Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 SAPTA 2

Kom ac Sruokyac Fuhkah Sie Nuhnak ac Puhlakihn Wo?

Kom ac Sruokyac Fuhkah Sie Nuhnak ac Puhlakihn Wo?

“Karihngihn nuhnak luhn insiowos in nwacsnwacs na.”​—SIE PETER 3:16.

1, 2. (a) Efuh kuh yohk srihpac mwet se in utuck compass el fin oruh fuhfahsryucsr lal? (b) Ac ma inge oacpacna nuhnak ac puhlakihn lasr uh fuhkah?

SIE mwet el kahsruhsrkihn oak soko okoacl ac sahslah ke noa in meoa uh. Sie mwet el fuhfahsryucsr yen mwesis ac sie pilot ke soko oaksohk el sohkwack nuh yen engyeng uh. Yac kom etuh lah meac kais sie mwet inge oacna sie kac? Kais sie seltahl ac kuh in sun ma na upac eltahl fin tiac utuck compass, yohkna fin wacngihn kuhfwen mwe kahsruh sahyac.

2 Compass uh sie kuhfwen orekma ma oasr ninucl soko kac ac ma inge srihsrsrihsr nuh lacyen epang (north) pacl nuhkewa. (Nuhnak muhnahs liye petsac ke sra 16.) Fin wo ac tiac muhsahllah, ke orekmakihnyuck wi sie macp, ma inge kuh in sang kahsruh in molwelah moul luhn mwet. Ke inkacnek se pacna inge, mwe puhpuhlyuck se inge ac kuh in luhmweyuck nuh ke sie mwe sang na sacohk ma Jeova el use nuh sesr. Mwe sang se inge pa nuhnak ac puhlakihn (conscience) lasr uh. (James 1:17) Fin wacngihn nuhnak ac puhlakihn lasr, kuht ac kuh in tuhlac. Kuht fin orekmakihn ke inkacnek wo, ma inge ac kuh in kahsre kuht in konwacack ac in fahsr na ke inkacnek suwohs ke moul lasr uh. Pwacnacng, lwelah kuht in nuhnkuh lah meac se inge nuhnak ac puhlakihn ac lah ma inge orekma fuhkah. Na tohkoh, kuht ac fah sramsramkihn ma yohk  srihpac inge: (1) nuhnak ac puhlakihn lasr uh ac ahkpahyeyuck fuhkah, (2) efuh kuh kuht enenuh in nuhnkuh ke nuhnak ac puhlakihn luhn mwet sahyac uh, ac (3) ma wo fuhkah kuht kuh in engankihn kuht fin sruokyac na sie nuhnak ac puhlakihn wo.

MEAC SE INGE NUHNAK AC PUHLAKIHN AC MA INGE OREKMA FUHKAH

3. Meac kalmen kahs inge “nuhnak ac puhlakihn,” ac meac ma inge oruh nuh sin mwet uh?

3 Bible Kosrae uh orekmakihn kain in kahs pucspucs in sang ahkuhtweyac “nuhnak ac puhlakihn,” oacna “elah,” “nuhnak luhn insiac,” “inse” ac “nuhnak.” In Bible, kalmen kahs Greek se ma luhngasyucklac nuh ke “nuhnak ac puhlakihn” pa “etwacack luhn sie mwet kacl sifacna.” God el use ma inge nuh sesr mwet uh, tuh kuht in etuh ohiyacsr sifacna ac kuht tiac oacna ma oreklac nuhkewa sahyac fin facluh uh. Kalmen ma inge pa, kuht kuh in tuni kuht sifacna ac liye lah kuht nwacsnwacs ke ip pucspucs ke moul lasr uh. Nuhnak ac puhlakihn lasr uh ac kuh in oacna sie mwet nuhnuhnkuh suc tuni mukuikui, elah ac sulaclah lasr uh. Ma inge ac kuh in kol kuht in oruh sie sulaclah wo kuh sensenkihn kuht liki sie ma kuluk. Tohkoh,  ma inge ac kuh in oruh wo puhlakihn lasr ke sulaclah wo ma kuht oraclah kuh ahkkulukye kuht ke sulaclah kuluk lasr uh.

4, 5. (a) Kuht etuh fuhkah lah oasr nuhnak ac puhlakihn lal Adam ac Eve ac meac sahflahiyen seahkos laltahl nuh ke masap luhn God? (b) Mwe srihkasrak fuhkah ahkkahlwemye lah oasr mukul oaru in pacl meet ah ma orekmakihn nuhnak ac puhlakihn laltahl uh?

4 Kuh se inge ma ituckyang nuh sin mukul ac muhtwacn uh ke muhtwacwacackiyac ah. Adam ac Eve ahkkahlwemye lah oasr nuhnak ac puhlakihn laltahl. Kuht kuh in liye mwe ahkpwacyeye nuh ke ma inge ke pacl se eltahl puhla mwekihn tukun ma kuluk se ma eltahl oraclah ah. (Genesis 3:7, 8) Mwe ahsor se lah ke ahkkulukyeyucklac tari nuhnak ac puhlakihn laltahl ah, wacngihn na ma wo ma inge kuh in kahsreltahl kac. Ke eltahl sulaclah in pihlesruh nuhnak ac puhlakihn laltahl oacyacpac masap luhn God uh, eltahl sulaclah in eklac mwet suc lain Jeova God. Eltahl mwet suwohswohs, pwacnacng eltahl etuh ma eltahl oruh inge ac eltahl ac tiac kuh in sifwil fototo nuh sin God eltahl fin forlah luhkel.

5 Puhs mwet suc tiac oacna Adam ac Eve, mweyen eltahl finne mwet sesuwohs eltahl lohng nuhnak ac puhlakihn laltahl uh. Ke sie mwe puhpuhlyuck, mukul oaru se inge pahngpahng Job el tuh fahk: “Nga fah tiacna muhnahslah in fahk lah moul luhk uh suwohs na; nuhnak luhn insiuck mwesahs na.” * (Job 27:6) Job el  kwacfeacng in lohacng nuh ke nuhnak ac puhlakihn lal uh in pa kol mukuikui ac sulaclah lal uh. Ke srihpac se inge, el kuh in fahk ke inse pwacye lah nuhnak ac puhlakihn lal uh tiac ahkkulukyacl in mwekihn kuh inse toasr. Srihke nuhnkuh ke ma tiac oacna sie inmahsrlol Job ac David. David el tiac ahkkahlwemye suhnak nuh sel Saul suc sie tohkohsrah akmuhsralah luhn Jeova, “tohkoh, David el muhtwacwacack in auli insiacl.” (Sie Samuel 24:5) Ke nuhnak ac puhlakihn lal David inge ahkkulukyacl, ma inge lotwel elan tiac sifwil oruh kain in ohiyac se inge.

6. Meac ahkkahlwemye lah nuhnak ac puhlakihn uh sie mwe sang nuh sin mwet nuhkewa?

6 Yac mwe sang se ke nuhnak ac puhlakihn inge oasr yurin mwet kuhlwacnsap luhn Jeova muhkwena? Nuhnkuh ke kahs lal mwet sap Paul inge: “Masap lal Moses tuh tiac ituckyang nuh sin mwet sahyacn mwet Jew. Tuhsruhktuh, kuhtwena pacl elos moul fal nuh ke masap mweyen na elos sifacna nuhnkeack muh fal, na elos ahkkahlwemye lah elos oakiyac masap nuh selos sifacna, finne wacngihn Masap lal Moses yohrohlos. Ohiyen moul lalos sifacna fahkwack lah ma sapkihnyuck in Masap uh sihmlac insiaclos. Oacyacpac elahlos wi pac ahkpwacyeye ma se inge, mweyen kuhtuh pacl uh nuhnak na lalos ahkkahlwemye nuh selos ma suc wo ac ma suc kuluk.” (Rome 2:14, 15) Nuhnak ac puhlakihn luhn mwet suc tiac etuh ke masap luhn Jeova uh kuh pac in mokleyuck in oruh sie ma ma fal nuh ke kahs in kahsruh luhn God.

7. Efuh kuh kuhtuh pacl uh nuhnak ac puhlakihn lasr uh tahfonglac?

7 Tuhsruhktuh, oasr pacl ma nuhnak ac puhlakihn lasr uh tahfonglac. Fuhkah? Koacl, srihke nuhnkuh ke  mwe puhpuhlyuck ke compass sac. Ke pacl se ma compass uh oan sisken sie magnet, ma inge ac kuh in tahfonglac ac srihsrsrihsr nuh ke acn sahyac. Ma inge ac kuh pac in sikyak nuh ke nuhnak ac puhlakihn lasr uh, kuht fin tiac lutlutkihn Kahs luhn God. Kuht ac tilac kuh in akihlen inmahsrlon ma wo ac ma kuluk. In oacpacna, kena kuluk luhn insiacsr fin kihfucs nuhnak ac puhlakihn lasr uh, ma inge ac kuh in oruh kuht in oraclah sie ma na kuluk ac. Pwacye lah, kuht fin luhngse nuhnak ac puhlakihn lasr uh in orekma wo, kuht enenuh in eis kahsruh ke nguhn muhtahl luhn Jeova. Paul el suhmuhslah: “Nuhnak luhn insiuck, suc kolyuck ke nguhn muhtahl ahkpwacyeyuck nuh sihk.” (Rome 9:1) Tuhsruhktuh, kuht ac oruh fuhkah nuhnak ac puhlakihn lasr uh in kolyuck ke nguhn muhtahl luhn Jeova? Enenuh in ahkpahyeyuck.

AHKPAHYEYUCK FUHKAH NUHNAK AC PUHLAKIHN LASR UH

8. (a) Insiacn mwet se ac kuh in ahkkulukyelah fuhkah nuhnak ac puhlakihn lal uh ac meac kuht enenuh in nuhnkuh yohk meet ke pacl kuht oruh sie sulaclah? (b) Meac pac ma enenweyuck nuh sin sie mwet Christian sahyacn sie nuhnak ac puhlakihn wo? (Liye footnote.)

8 Kom ac oraclah fuhkah sie sulaclah ma fal nuh ke nuhnak ac puhlakihn lom? Nuh sin kuhtuh mwet uh, eltahl oruh na ma eltahl liye, nuhnkuh ac puhla muh wo uh. Tukun ma inge eltahl ac kuh in fahk, “Wona, mweyen tiac ahkkulukye nuhnak ac puhlakihn luhk uh.” Kena luhn insiacsr arlac fokoko ac kuh pac in kihfucs nuhnak ac puhlakihn lasr uh. Bible uh fahk: “Suc kuh in etuh ma oan insiacn mwet? Wacngihn ma kuhtasrihk oacna nuhnak [insiacn] luhn mwet.” (Jeremiah 17:9) Pwacnacng, kuht enenuh in tiac ukwe kena luhn  insiacsr. Tuhsruhktuh, kuht enenuh in nuhnkuh meet ke ma ac ahkenganye Jeova God. *

9. Meac kalmac in sahngweng sin God, ac kuht fin sahngweng sin God ma inge ac kihfucs fuhkah nuhnak ac puhlakihn lasr uh?

9 Sulaclah lasr uh fin fal nuh ke nuhnak ac puhlakihn wo lasr ma ahkpahyeyuck, ma inge ac ahkkahlwemye sahngweng lasr sin God ac tiac kena lasr sifacna. Nuhnkuh ke mwe puhpuhlyuck na wo se inge. Governor oaru se inge pahngpahng Nehemiah tuh oasr suwohs lal in sapkihn mwet Jerusalem inge in moli ac ahkfalye tax laltahl. Tuhsruhktuh, el tiac oruh ma inge. Efuh? Mweyen el sruhnga na pwacye in ahktoasrye insiacn Jeova ke el oruh mwet lal inge in kweok. El fahk: “Nga oruh siena, mweyen nga ahkfuhlwactye God.” (Nehemiah 5:15) Arlacna yohk srihpac kuht in sahngweng sin Jeova, kalmac pa kuht sahngweng in oruh kuhtwena ma ma ac ahksuhpwacrye Pahpah tuhmwacsr inkuhsrao uh. Kain in sahngweng se inge ac kuh in mokle kuht in suk kahsruh ke Kahs luhn God ke pacl se kuht enenuh in oruh sie sulaclah.

10, 11. Meac kahs in kahsruh ke Bible uh fahk ke mwe nihmnihm uh, ac kuht ac eis fuhkah kahsruh luhn God tuh kuht in orekmakihn ma inge ke moul lasr uh?

10 Ke sie mwe puhpuhlyuck, nuhnkuh ke mwe nihmnihm uh. Pa inge sie ma suc kais sie sesr enenuh in oruh sulaclah lasr nuh kac uh, yac nga ac nihm kuh tiac? Ma  se meet, kuht enenuh in luti kuht sifacna. Meac kahs in kahsruh ke Bible uh fahk kac? Bible uh tiac tulokihn orekmakihnyen mwe nihmnihm ke inkacnek fal. Pwacyeiyac uh pa, Bible uh sang pac kaksak nuh sin Jeova ke mwe sang lal ke wain. (Psalm 104:14, 15) Tuhsruhktuh, Bible uh lain sruhi ac toeni ma orek ke inkacnek okahrkahr ke srihpen sruhi. (Luke 21:34; Rome 13:13) Tuh yohk liki na, Bible uh ahkkahlwemye lah sruhi el sie sin ma kuluk upac, oacna orekma luhn kosro. *​—Sie Corinth 6:9, 10.

11 Kahs in kahsruh ke Bible uh ahkpahye nuhnak ac puhlakihn luhn sie mwet Christian. Pwacnacng, ke pacl se kuht oasr ke sie tuhkweni ac kuht enenuh in oruh sulaclah lasr kac, kuht ac kuh in siyuck sesr sifacna kihsen siyuck inge: ‘Tuhkweni fuhkah se inge? Yac tuhkweni se inge ac kuh in okahrkahrack ke mwet sruhi? Fuhkah ohiyuck sifacna? Yac nga arlacna luhngse yohk mwe nihmnihm ac nuhnkuh muh pa inge ma ac ahkwacngihnyelah ma upac luhk uh? Yac nga kuh in kutong kena luhk nuh ke luhpan mwe nihmnihm ma nga eis nuh in ikok uh?’ Ke kuht nuhnkuh ke kahs in kahsruh luhn Bible ac top lasr nuh ke kihsen siyuck inge, kuht enenuh in puhruhe siyuck ke kahsruh luhn Jeova. (Riti Psalm 139:23, 24.) Ke kuht oruh ma inge, kuht siyuck Jeova elan kol kuht ke nguhn muhtahl lal. Kuht oacyacpac ahkpahye nuhnak ac puhlakihn lasr uh tuh in fal nuh ke kahs in kahsruh luhn God. Tuhsruhktuh, srackna oasr pac ma se sahyac ma kuht ac enenuh in nuhnkuh kac ke pacl ma kuht oruh sulaclah lasr uh.

 EFUH KUHT ENENUH IN NUHNKUH KE NUHNAK AC PUHLAKIHN LUHN MWET SAHYAC UH?

Sie nuhnak ac puhlakihn ma ahkpahyeyuck ke Bible ac kuh in kahsre kom in sulaclah lah kom ac nihm kuh tiac nihm mwe nihmnihm

12, 13. (a) Meac kuhtuh srihpac ma oruh nuhnak ac puhlakihn luhn mwet Christian uh tiac oacna sie? (b) Ac meac kuht kuh in oruh ke kain in mwet inge?

12 Sahp, oasr pacl kom lut ke srihpen oasr kain in nuhnak ac puhlakihn ma tiac oacna sie inmahsrlon mwet Christian uh. Sahp, sie mwet el puhla muh mukuikui se kuh facsin se ahktihkuclkuclyacl, a sie pac mwet el tiac puhla muh oasr ma kuluk kac. Ke sie mwe puhpuhlyuck, ke kuht sramsramkihn mwe nihmnihm ac, mwet se ac kuh in engan in wi kawuck ekahsr lal muhta, monglac ac nuhmlah kuhtuh srihsrihk mwe nihm ke ekuh se. A sie pac mwet el ac kuh in tihkuclkucl kac. Efuh kuh oasr kain in nuhnak luo ac ma inge ac mokle fuhkah sulaclah lasr uh?

13 Oasr srihpac pucspucs ma oruh mwet nuhkewa in tiac oacna sie. Ohiyac ma kais sie mwet mahtuhlah kac uh tiac oacna sie. Ke sie mwe puhpuhlyuck, kuhtuh mwet uh arlacna etuh ke mwe muhnahs laltahl sifacna ma upac nuh seltahl in kuhtanglah in pacl meet ah. (Sie Tokosra 8:38, 39) Oasr mwet suc nuhnak ac puhlakihn laltahl uh oruh eltahl in nuhnkaclah ahkwoyac orekmakihnyen mwe nihmnihm uh. Kain in mwet se inge fin fahsrot nuh lohm sum an in muhtwacta, nuhnak ac puhlakihn lal uh ac kuh in moklacl in tiac eis mwe nihm ma kom sang nuh sel an. Yac ma inge ac ahktihkuclkuclye kom? Yac kom ac kwacfel? Moh. Kom finne etuh kuh nihkihn srihpac ma pwacnacng el tiac eis an, luhngse lom nuh sin mwet lili se wiyom ingacn ac mokle kom in nuhnkuh ke puhlakihn lal an ac tiac kwacfel.

14, 15. (a) Ma upac fuhkah nuhnak ac puhlakihn luhn mwet Christian in pacl meet ah tiac oacna sie kac? (b) Ac meac kahs in kahsruh lal Paul nuh kac?

 14 Mwet sap Paul el liye lah nuhnak ac puhlakihn luhn mwet Christian ke pacl lal ah tiac oacna sie. In pacl sacn, upac nuh sin mwet Christian inge in kang kain in mongo ma kihsackihnyuck nuh ke ma sruhloaclah. (Sie Corinth 10:25) Nuhnak ac puhlakihn lal Paul ah tiac sruohkuhl liki kain in mongo inge ma kuhka ke market. Wacngihn srihpen ma sruhloaclah inge nuh sel. Pwacye, Jeova pa oraclah kain in mongo nuhkewa inge ac ma inge ma tuhkuh sel me, ac tiac ma luhn ma sruhloaclah. Finne ohinge, mwet sap Paul el kahlwem kac lah nuhnak ac puhlakihn luhn mwet sahyac inge tiac oacna  nuhnak ac puhlakihn lal uh. Sahp, kuhtuh sin mwet inge wi alu nuh ke ma sruhloaclah meet liki eltahl eklac mwet Christian. Kuhtwena ma ma kuhpahsr nuh ke mwe sruhloaclah uh mwe tikuclkucl se nuh seltahl. Meac Paul el oruh?

15 Paul el fahk: “Luhlahlfongi lasr fin kuh, na kuht in kahsrelos suc muhnahs ke ma toasr lalos. Kuht in tiac srihke in ahkinsewowoye kuht sifacna. Finne Christ, el tuh tiac moul in ahkinsewowoyacl sifacna.” (Rome 15:1, 3) Paul el fahk lah in oacna Christ, kuht enenuh in fihliyac mwe enenuh luhn mwet lili wiyacsr uh meet liki enenuh lasr uh. Ke sie pac sramsram lal Paul, el tuh fahk lah el ac sulaclah in tiac sifwil mongo ikoac liki na elan ahktihkuclkuclye sie sheep sacohk ma Christ el sang moul lal kac.​—Riti Sie Corinth 8:13; 10:23, 24, 31-33.

16. Efuh kuh mwet suc fihsracsr in ahktihkuclkuclyeyuck nuhnak ac puhlakihn la uh tiac enenuh in nuhnuhnkuh mwet suc siena nuhnak ac puhlakihn la uh?

 16 Tuhsruhktuh, mwet ma nuhnak ac puhlakihn la uh fihsracsr in ahktihkuclkuclyeyuck eltahl tiac enenuh in nuhnak kuluk nuh sin mwet sahyac uh. Eltahl ac tiac pac kwacfe muh nuhnak ac puhlakihn luhn mwet sahyac uh enenuh in oacna eltahl. (Riti Rome 14:10.) Pwacyeiyac uh pa, kuht enenuh in orekmakihn nuhnak ac puhlakihn lasr uh in nuhnuhnke kuht sifacna ac tiac mwet sahyac. Esam kahs lal Jesus inge: “Nik kowos nuhnuhnkuh mwet, tuh God Elan tiac pac nuhnuhnke kowos.” (Matthew 7:1) Mwet nuhkewa ke congregation enenuh in fahsr liki kuhtwena mwe puhrakack ma sikyak ke srihpen tiac insese ke nuhnak ac puhlakihn luhn kais sie mwet. Tuhsruhktuh, kuht enenuh in suk inkacnek in ahkkweye luhngse ac inse sefanna, muhsaheack inmahsrlosr nuh sin sie sin sie ac tiac ahkmuhnahsye sie sin sie.​—Rome 14:19.

MA WO FUHKAH TUHKUH KE KUHT SRUOKYAC SIE NUHNAK AC PUHLAKIHN WO?

Sie nuhnak ac puhlakihn wo ac kuh in kol kuht ke fuhfahsryucsr lasr ke moul, ahkinsewowoye kuht ac acse inse mislac

17. Meac sikyak nuh ke nuhnak ac puhlakihn luhn mwet pucspucs ke pacl inge?

17 Mwet sap Peter el suhmuhslah: “Karihngihn nuhnak luhn insiowos in nwacsnwacs na.” (Sie Peter 3:16) Sie nuhnak ac puhlakihn ma nwacsnwacs ye muhtuhn Jeova God el sie mwe insewowo na yohk. Ma inge tiac oacna nuhnak ac puhlakihn luhn mwet pucspucs ke pacl inge. Paul el ahkuhtweyac lah mwet suc “akihlenyuck elos oacna ke soko osra fol sang akihlenuhlosi, pwacnacng wacngihnlac nuhnkaclos in etuh inmahsrlon ma wo ac ma kuluk.” (Sie Timothy 4:2) Soko osra fol ma puhsrallah mahno se ac akihlenyac  ac ahkmahtoltolyelah. Nuhnak ac puhlakihn luhn mwet pucspucs ke pacl inge tilac orekma, mahtoltollac ne oruh ma inge tilac pac sensenkuhnuhltahl, tulokuhnuhltahl kuh ahkkulukye puhlakihn laltahl uh in mwekihn ke ma kuluk ma eltahl oraclah uh. Mwet pucspucs ke pacl inge pihlesruh nuhnak ac puhlakihn laltahl uh.

18, 19. (a) Ma wo fuhkah ac kuh in tuhkuh ke puhlakihnyen mwekihn kuh inse toasr? (b) Meac kuht ac kuh in oruh fin nuhnak ac puhlakihn lasr uh ahkkulukye kuht ke ma kuluk lasr in pacl meet ah ma kuht auliyak tari kac?

18 Puhlakihnyen mwekihn kuh inse toasr uh pa sie inkacnek ma nuhnak ac puhlakihn lasr uh ac kuh in fahk lah kuht oraclah ma kuluk se. Puhlakihn inge ac fin mokle sie mwet elan auliyak, el kuh in eis nuhnak muhnahs kac finne ma kuluk na upac se pa el oraclah uh. Ke sie mwe puhpuhlyuck, Tohkohsrah David el toasrlah ke ma na kuluk se ma el tuh oraclah ah, tuhsruhktuh el eis nuhnak muhnahs ke srihpen el auliyak na pwacye. Sruhnga yohk lal nuh ke orekma kuluk lal wi kwacfeacng lal in ahkos ma sap luhn Jeova ke pacl sac oruh elan liye lah Jeova el ‘arlacna wo ac . . . el nuhnak muhnahs nuh sesr.’ (Psalm 51:1-19; 86:5) Tuhsruhktuh, ac fuhkah fin puhlakihnyen mwekihn ac inse toasr lasr uh srackna oasr yohrohsr tukun kuht eis tari nuhnak muhnahs?

19 Kuhtuh pacl uh, nuhnak ac puhlakihn luhn mwet se ac kuh in arlacna upac ac ahkkulukyacl, el finne auliyak tari tukun yac pucspucs ke ma kuluk lal uh. Ke kain in pacl se inge, sahp kuht ac enenuh in ahkkweye kuht sifacna in luhlahlfongi na pwacye lah Jeova el etuh puhlakihn luhn mwet uh. Kuht ac enenuh in luhlahlfongi ac eis luhngse lal ac nuhnak muhnahs lal, in oacna ke kuht ahkkweye mwet sahyac uh in oruh. (Riti Sie John 3:19, 20.) Tuhsruhktuh, nuh ke sie nuhnak ac puhlakihn  nwacsnwacs, ma inge acse nuhnak mislac ac engan na pwacye ma suhkwac konweyuckyak fin facluh. Mwet pucspucs suc oraclah ma na kuluk ke pacl meet ah, wi puhla mongi yohk ac ke pacl inge eltahl kuh in sruokyacna nuhnak ac puhlakihn wo laltahl ke eltahl kuhlwacnsuhpuh Jeova God.​—Sie Corinth 6:11.

20, 21. (a) Puk se inge oreklac in kahsre kom fuhkah? (b) In oacna mwet Christian, sukohsohk fuhkah kuht nuhkewa engankihn? (c) Tuhsruhktuh, kuht ac orekmakihn fuhkah sukohsohk se inge?

20 Puk se inge oreklac in kahsre kom in konwacack sie moul engan ac in sruokyac sie nuhnak ac puhlakihn wo ke lusen lwen sahflah ke oakwuck kuluk se lal Satan inge. Tuhsruhktuh, puk se inge ac tiac kuh in sramsramkihn masap ac kahs in kahsruh nuhkewa luhn Bible ma kom ac enenuh in nuhnkuh kac ac orekmakihn nuh ke kais sie ip srihsrihk ke moul lom an. In wekuhnacng, nikmet nuhnkuh muh oasr ke puk se inge masap kuh oakwuck nuh ke kain in sulaclah ma mwet uh ac oruh fin nuhnak ac puhlakihn pa enenweyuck in orekmakihn nuh kac. Srihpen puk se inge pa in kahsre kom, luti kom ac ahkpahye nuhnak ac puhlakihn lom ke orekmakihnyen Kahs luhn God ke kais sie lwen ke moul lom. Masap ma ituckyang nuh sel Moses uh siena liki “masap luhn Christ.” Masap ma ituckyang nuh sel Moses uh kwacfe kuht in ahkos masap nuhkewa luhn God. Tuhsruhktuh, “masap luhn Christ” uh kwacfe kuht in orekmakihn yohk nuhnak ac puhlakihn wo lasr ac ukwe kahs in kahsruh ke Bible nuh ke moul lasr uh liki na masap ma sihmihsyucklac uh. (Galatia 6:2) Pwacnacng, Jeova el sang sukohsohk yohk nuh sin mwet Christian. Tuhsruhktuh, Kahs lal uh ahkacsmakihnye kuht in tiac orekmakihn sukohsohk se inge “in afihnyac kuhtwena ma kuluk.” (Sie Peter 2:16) Mweyen, sukohsohk se ma  utuckuh nuh sesr inge oruh kuht kuh in ahkkahlwemye luhngse lasr nuh sin Jeova.

21 Kwacfeacng in puhruhe ac nuhnkuh yohk ke inkacnek se ma ac wo emeet kom in moulkihn in fal nuh ke kahs in kahsruh ke Bible. Ac tohkoh kom orekmakihn ma inge ke sulaclah pucspucs lom uh ac tahfwelah na in kapkapack oacna ke pacl se kom tuhfahna etwacllah Jeova. Kuh lom in “akihlen inmahsrlon ma wo ac ma kuluk” ac fah ahkpahyeyuck ke kom orekmakihn kahs in kahsruh ke Bible uh pacl nuhkewa. (Hebrew 5:14) Nuhnak ac puhlakihn lom ma ahkpahyeyuck ke Bible uh ac mwe kahsruh na yohk se nuh sum ke kais sie lwen in moul lom. In oacna compass se ma kuh in kol inkacnek luhn sie mwet fuhfahsryucsr, nuhnak ac puhlakihn lom uh ac kuh in kahsre kom in oruh sulaclah ma ac ahkenganye Pahpah tuhmom inkuhsrao. Pa inge sie inkacnek na wo in muhtana in luhngse luhn God.

^ par. 5 Wacngihn kahs na pwacye se ma ahkuhtweyac ke “nuhnak ac puhlakihn” ma sihmihsyucklac ke puk luhn Genesis nuh ke Malachi. Tuhsruhktuh, arlac kahlwem lah nuhnak ac puhlakihn pa sramsramkihnyuck ke fuhs se inge. Kahs se inge “insiac” el kwacna luhmweyuck nuh ke ohiyen mwet se. Ke mwe puhpuhlyuck inge kewa, arlacna kahlwem lah ohiyen mwet se pa ma inge sramsramkihn uh kuh nuhnak ac puhlakihn lal uh. Ke ma suhmuhslah ke kahs Greek, Matthew nuh ke Fwackyuk, kahs Greek nuh ke “nuhnak ac puhlakihn” el sikyak pacl 30 kuhtuh.

^ par. 8 Bible uh ahkkahlwemye lah oasr pac ma enenweyuck sahyacn nuhnak ac puhlakihn wo. Ke sie mwe puhpuhlyuck, Paul el fahk: “Nga puhlakihn sihk sifacna muh wacngihn ma suhfal luhk, tuhsruhktuh nga tiac kuh in sifacna ahkpwacyei lah wacngihn mwetihk. Leum pa ac nuhnuhnkweyuc.” (Sie Corinth 4:4) Finne nuh sin mwet suc kalyei mwet Christian, oacna ke Paul el tuh oruh meet ah, ma inge tiac ahkkulukye nuhnak ac puhlakihn laltahl uh mweyen eltahl nuhnkuh muh God el engan ke orekma laltahl uh. Pwacnacng, yohk srihpac nuhnak ac puhlakihn lasr uh in wo ye muhtahsr ac ye muhtuhn God.​—Orekma 23:1; Luo Timothy 1:3.

^ par. 10 Enenuh in kahlwem lah doctor pucspucs eltahl ahkkahlwemye lah mwet suc luhngse mwe nihmnihm uh tiac kuh in kutong nihmnihm laltahl uh. Nuh sin kain in mwet inge, enenuh eltahl in tiacna nihmnihm kuh eis mwe nihmnihm nuh ke mahnoltahl.