Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 SAPTA 5

Kom Kuh In Srikomlac Liki Facluh Fuhkah

Kom Kuh In Srikomlac Liki Facluh Fuhkah

“Kowos tiac ma luhn facluh.”​—JOHN 15:19.

1. Meac Jesus el lihksreni na ahkkahlwemye ke fong sahflah se lal fin facluh ah?

KE FONG sahflah se lal Jesus fin facluh ah, el ahkkahlwemye lah el arlacna nuhnkuh ke moul luhn mwet tuhma lutlut lal ke pacl fahsruh uh. El tuh puhruhe pac ke ma inge, ke el fahk nuh sin Pahpah tuhmwacl uh: “Nga tiac siyuck kom in eisacloslac liki facluh, tuhsruhktuh nga siyuck kom in liyaclosyang liki el suc Kuluklacna. In oacna ke nga tiac ma lun facluh, elos tiac pac ma luhn facluh.” (John 17:15, 16) Ke siyuck se lal Jesus inge, el ahkkahlwemye luhngse yohk lal nuh sin mwet tuhma lutlut lal uh ac yohk srihpaciyen kahs lal nuh sin kuhtuh seltahl: “Kowos tiac ma luhn facluh.” (John 15:19) Arlacna kahlwem lah nuh sel Jesus, yohk srihpac mwet lal uh in sreloslac liki facluh!

2. Meac kalmen “facluh” se ma Jesus el sramsramkihn inge?

2 “Facluh” se ma Jesus el sramsramkihn inge pa mwet nuhkewa suc srela ac tiac luhlahlfongi nuh sin God, suc oasr ye kolyuck lal Satan. Mwet inge eltahl ahkkahlwemye pac ohiyac kuluk nuhkewa lal Satan, oacna nuhnkuh kac sifacna ac inse fuhlwact. (John 14:30; Ephesus 2:2; Sie John 5:19) Ma na pwacye se lah ‘fin mwet uh kawuck luhn facluh, kalmac pa elos mwet lokoalok luhn God.’ (James 4:4) Tuhsruhktuh, fuhkah mwet nuhkewa suc luhngse in muhtana in luhngse luhn God ac oruh eltahl in muhta facluh, a tiac kuhpahsr nuh ke facluh? Kuht ac fah tuni inkacnek  lihmekohsr: (1) ke kuht sruokyacna oaru lasr nuh ke Tohkohsrahi luhn God ye kolyuck luhn Christ, ac ke kuht tiac wi ke kuhtwena u luhn politic, (2) ke kuht lain ohiyac kuluk luhn facluh, (3) ke kuht nukum nuknuk ma fal ac wo nahweyuck lasr uh, (4) ke kuht tiac nuhnkaclah ke ma pucspucs, ac (5) ke kuht nokomacng mwe loeyuck nuhkewa in karuhnganacng moul in Christian lasr uh.

SRUOKYACNA OHIYEN OARU AC TIAC WI KE KUHTWENA U

3. (a) Efuh kuh Jesus el tiac wi ke kuhtwena mukwikwi luhn politic ke lwen lal ah? (b) Efuh kuh mwet akmuhsralah lal Jesus uh oacna mwet in tuhtahfpo lal? (Liye footnote.)

3 Jesus el tiac wi ke mukwikwi luhn politic ke lwen lal ah, a el lohacng yohkna nuh ke orekma in fahkwack lal ke Tohkohsrahi luhn God, sie government inkuhsrao ma el ac fah Tohkohsrah kac ke pacl fahsruh uh. (Daniel 7:13, 14; Luke 4:43; 17:20, 21) Ke srihpac se inge, Jesus el kuh in fahk nuh sel Pontius Pilate suc Governor luhn acn Rome: “Tohkohsrahi luhk uh tiac ma luhn facl se inge.” (John 18:36) Mwet tuhma lutlut oaru luhn Christ eltahl etahi mwe srihkasrak lal uh ke eltahl sruokyacna oaru laltahl nuh sel ac nuh ke Tohkohsrahi lal uh. Eltahl oacyacpac fahkwack nuh sin mwet nuhkewa fin facluh ke Tohkohsrahi se inge. (Matthew 24:14) Mwet sap Paul el suhmuhslah: “Ke ma inge, kuht mwet in tahfwema kahs luhn Christ.” Ac el tahfwelah pac in fahk: “Kuht kwacfe kowos ke inen Christ: ‘Lwelah God elan ikihlkowoslac liki mwet lokoalok nuh ke mwet kawuck lal!’” *​—Luo Corinth 5:20.

4. Mwet Christian pwacye nuhkewa ahkkahlwemye fuhkah oaru laltahl nuh ke Tohkohsrahi luhn God? (Liye pohk se inge “ Mwet Christian In Pacl Meet ah Tiac Wi nuh ke Mukwikwi luhn Politic.”)

 4 Ke srihpen mwet tuhtahfpo inge ahol muhkwena sie acn kuh muhtuhnfacl sahyac, eltahl ac tiac eisacltahlwacng nuh ke ma upac luhn muhtuhnfacl se ma eltahl orekma we inge, ac tiac pac wi ke kuhtwena u. Tuhsruhktuh, mwet tuhtahfpo inge ahkkweye government luhn muhtuhnfacl se ma eltahl ahol inge. Ma inge oacpacna nuh ke mwet akmuhsralah luhn Christ, suc ‘acn na pwacye seltahl pa inkuhsrao.’ (Philippi 3:20) Ke srihpen moniyuck laltahl in fahkwack ke Tohkohsrahi uh, eltahl sang kahsruh nuh sin million sin “kuhtuh pac sheep” in eklac ‘mwet kawuck luhn God.’ (John 10:16; Matthew 25:31-40) “Kuhtuh pac sheep” inge kuhlwacnsap oacna mwet suc sang kahsruh nuh sin mwet akmuhsralah wiyen Christ. Oacna sie u suc tuhkweni orekma ac inse sefanna in fahkwack ke Tohkohsrahi se ma Jesus el ac fah kol kac inge, u luo inge tu na kuh ac tiac wi ke kuhtwena mukwikwi luhn politic.​—Riti Isaiah 2:2-4.

5. Ke inkacnek fuhkah congregation luhn mwet Christian ke pacl inge uh siena liki mwet Israel in pacl meet ah? Ac mwet Christian uh ahkkahlwemye ma inge fuhkah?

5 Tiac ohiyen oaru luhn mwet Christian pwacye nuh sin Christ muhkwena pa srihpac se pwacnacng eltahl tiac wi ke kuhtwena u. Mwet Israel in pacl meet ah muhta ke muhtuhnfacl sefanna, tuhsruhktuh ke pacl inge, mwet lili wiyacsr uh oasr fin facluh nohfohn. (Matthew 28:19; Sie Peter 2:9) Pwacnacng, kuht fin ahkkweye sie u luhn politic, kuht ac tiac kuh in fahkwack ke puhlaik lah Tohkohsrahi luhn God uh pa finsrak sefanna luhn mwet uh. Ma inge kuh pac in ahkkulukyelah inse sefanna lasr uh. (Sie Corinth 1:10) Ac ke pacl in mweun uh, kuht ac tuh lain mwet lili wiyacsr suc sapkihnyuck nuh sesr in luhngse. (John 13:34, 35; Sie John 3:10-12) Ke srihpac se inge, Jesus el fahk nuh sin mwet tuhma lutlut lal ah in tiac wi  mweun. Ac el fahk pac nuh seltahl in luhngse mwet lokoalok laltahl uh.​—Matthew 5:44; 26:52; liye pohk se inge “ Yac Nga Kwacfeacng In Tiac Wi ke Kuhtwena U?

6. Ke srihpen kuht wuhlelah moul lasr nuh sin God, ohiyac fuhkah kuht ac ahkkahlwemye nuh sin Caesar?

 6 In oacna mwet Christian pwacye, kuht wuhlelah moul lasr nuh sin God ac tiac nuh sin kuhtwena mwet, un mwet kuh muhtuhnfacl. Sie Corinth 6:19, 20 ahkkahlwemye: “Kowos tiac ma lowos sifacna, a ma luhn God.” Pwacnacng, mwet lal Jesus uh sang nuh sel “Caesar” ma luhn Caesar, oacna suhnak, tax ac ahkostwen nuh ke ma  God el lwelah ac eltahl “sang nuh sin God ma luhn God.” (Mark 12:17; Rome 13:1-7) Ma inge wekuhnacng pac alu laltahl, luhngse laltahl kewa ac oaru laltahl in ahkos. Fin enenweyuck, eltahl ahkolah in fuhleack moul laltahl ke srihpen God.​—Luke 4:8; 10:27; riti Orekma 5:29; Rome 14:8.

LAIN “OHIYAC KULUK LUHN FACLUH”

7, 8. Meac se inge “ohiyac kuluk luhn facluh,” ac meac ohiyac se inge ac kuh in oruh nuh sin sie mwet?

7 Sie pac inkacnek ma mwet Christian uh sreloslac liki facluh pa ke eltahl fahsr liki ohiyac kuluk luhn facluh. Mwet sap Paul el suhmuhslah, “Kuht tiac eis nguhn luhn facluh, a kuht eis nguhn se suc suhpweyuckme sin God.” (Sie Corinth 2:12) El tuh fahk pac nuh sin mwet Ephesus: “Kowos tuh fahsr tukun ohiyac kuluk luhn facluh, kowos tuh ahkos leum kuluk suc kol nguhn kuluk yen engyeng uh, nguhn suc leumi mwet suc seahkos God in pacl inge.”​—Ephesus 2:2, 3.

8 “Ohiyac kuluk” se luhn facluh inge pa sie kuh ma tiac kuh in liyeyuck ac ma inge pahtok ohiyen seahkos nuh sin God ac ahkkweye “luhng luhn ikwac wi ma mwet uh liye ac mwel.” (Sie John 2:16; Sie Timothy 6:9, 10) Oasr kuh luhn ohiyac kuluk se inge in pihrihk insiacn mwet uh. Ohiyac kuluk se inge arlacna kuhtasrihk, upac in akihlenyuck ac oacna eng uh ma kuh in ahkkulukyelah sie mwet ke ip nuhkewa ke moul lal ac wacngihn sahflahiyac. Sahyen ma inge, ohiyac kuluk se inge kais kuhtuh na kap ke insiacn sie mwet, oacna nuhnkuh kac sifacna, inse fuhlwact, rahpkuh, ac kena in oruh sulaclah lal sifacna ac orekma in lain mwet kol. * Ke kahs fototo, ohiyac kuluk  luhn facluh ac kuh in kais kuhtuh na oruh ohiyac kuluk luhn Devil in yohkwelihk ke insiacn sie mwet.​—John 8:44; Orekma 13:10; Sie John 3:8, 10.

9. Ke inkacnek fuhkah ohiyen facluh ac kuh in sun nuhnak lasr ac insiacsr?

9 Yac ohiyac kuluk luhn facluh ac kuh in ilyak nuh ke nuhnak lom ac insiom? Ahok, tuhsruhktuh ma inge ac kuh in sikyak kom fin lwelah ac tiac kwacfeacng in lain. (Riti Soakas 4:23.) Ohiyac kuluk se inge kwacna tiac kahlwem, sahp ke inkacnek luhn mwet kom asruoki nuh se an suc oraclah muh eltahl wo tuhsruhktuh wacngihn luhngse laltahl nuh sin Jeova. (Soakas 13:20; Sie Corinth 15:33) Kom kuh pac in eis ohiyac kuluk se inge ke inkacnek luhn mwe rit ma tiac fal, ma oacna petsac fohkfohk kuh ke Internet site ke mwet suc lain ma pwacye uh, mwe ahkengan kuluk, ac kain in sritacl ma upac kuh yohk amaci inmahsrlon mwet. Pwacye, kuht kuh in eis ohiyac kuluk se inge ke kuhtwena ma kuh sin kuhtwena mwet suc nuhnak lal Satan ac luhn facl se inge oasr yohroh.

10. Kuht ac lain fuhkah ohiyac kuluk luhn facluh?

10 Kuht ac lain fuhkah ohiyac kuluk luhn facluh ac muhtana in luhngse luhn God? Kuht kuh in oruh ma inge ke kuht orekmakihn mwe kahsruh nuhkewa luhn Jeova  nuh sesr ke inkacnek luhn kahs lal, toeni lasr uh ac ke kuht puhruhe pacl nuhkewa in siyuck ke nguhn muhtahl. Jeova el arlacna kuh liki Devil ac liki facl kuluk se ma Satan el kol inge. (James 4:7) Pwacnacng, arlacna yohk srihpac nuh sesr in fototo nuh sin Jeova ke inkacnek luhn puhruhe!

NUKUM NUKNUK MA FAL AC IN WO NAHWEYUCK LASR UH

11. Ke inkacnek fuhkah ohiyen facluh kihfaslah nuhnak luhn mwet uh ke nuknuk?

11 Sie mwe akucl na kahlwem ke ohiyac ma kihfaslah sie mwet pa ke nuknuk, nahweyuck ac ohiyen nwacsnwacs lal uh. Ke acn pucspucs, oakwuck nuh ke nukumyen nuknuk uh arlacna kuluklac liki na meet ah. Pwacnacng, sie  mwet suc oruh sramsram lal ke TV el fahk lah ke pacl na sa ac wacngihnlac ma ac siena ke nuknuk luhn sie muhtwacn kosro ac nuknuk luhn mwet sahyac uh. Finne ke tuhlihk muhtwacn ma soenna sun matwacn muhtwacn fuhsr uh eltahl wi pac orekmakihn kain in style ma sie newspaper pahngon: “nuknuk ma fototo ac kuh in liyeyuck monum.” Sie pac kain in style pa in nukum nuknuk ma okahrkahr ac ahkkahlwemye luhman suhnuhnkuh ac ohiyac ma wacngihn suhnak kuh nuhnak wo kacl sifacna.

12, 13. Kahs in kahsruh fuhkah ac kol sulaclah lasr ke nuknuk ac nahweyuck lasr uh?

12 In oacna mwet kuhlwacnsap luhn Jeova, kuht luhngse in wo ac kahto luhmahsr, kalmac pa nuknuk lasr uh in los, nwacsnwacs, tiac ahktihkuclkuclye mwet ac fal nuh ke pacl kuh ma kuht oruh uh. Ke pacl nuhkewa, atacsr ahkkahlwemye lah kuht luhngse in “efahl ac in etuh ma wo nuh ke nahweyuck” wi “orekma wo” ma fal nuh sin mukul kuh muhtwacn suc “fahkwack lah elos mwet alu nuh sin God.” Pwacye lah, ma yohk srihpac nuh sesr uh pa in tiac pwen muhtuhn mwet nuh yohrohsr a kuht in “muhtana in luhngse luhn God.” (Sie Timothy 2:9, 10; Jude 21) Ahok, kuht luhngse in ohiyac se ma kahto emeet sesr uh pa ‘nuhnak pwacye luhn insiacsr . . . , ac pa sacohk na pwacye ye muhtuhn God uh.’​—Sie Peter 3:3, 4.

13 Esam pac lah nahweyuck lasr ac style ke nuknuk ma kuht nukum uh ac kuh in kihfaslah nuhnak luhn mwet sahyac ke alu pwacye uh. Kahs Greek ke “efahl” pa in ahkkahlwemye suhnak ac nuhnkuh ke mwet sahyac. Pwacnacng, ke pacl se kuht sule nuknuk lasr uh, kuht enenuh in tiac nuhnkuh muh kuht sukohsohk in nukum kuhtwena ma kuht luhngse. Tuhsruhktuh, kuht enenuh in nuhnkuh ke mwet sahyac uh meet. Yohk liki nuhkewa, kuht  luhngse in sang kaksak nuh sin Jeova ac mwet lal uh. Kuht luhngse pac in ahkkahlwemye lah kuht mwet kuhlwacnsap luhn God suc “oruh ma nuhkewa nuh ke wolacna luhn God.”​—Sie Corinth 4:9; 10:31; Luo Corinth 6:3, 4; 7:1.

Yac nahweyuck luhk uh sang wolacna nuh sin Jeova?

14. Meac kuhtuh kihsen siyuck ma kuht enenuh in siyuck sesr sifacna ke nahweyuck ac ohiyen nwacsnwacs lasr uh?

14 Nuknuk, nahweyuck ac ohiyen nwacsnwacs lasr uh arlacna yohk srihpac ke pacl kuht wi ke orekma in luti kuh ke kuht wi ke toeni uh. Siyuck sum sifacna: ‘Yac atuck ac ohiyen nwacsnwacs luhk uh oruh mwet sahyac uh in liyeyuc ke sie inkacnek ma tiac wo? Yac ma inge ahkmwekihnye mwet sahyac? Yac nga nuhnkuh yohk ke suwohs luhk ke ip inge liki na yohk srihpaciyac in fal nuh ke kunohkohn pucspucs ke congregation uh?’​—Psalm 68:6; Philippi 4:5; Sie Peter 5:6.

15. Efuh kuh Kahs luhn God uh tiac ahkkahlwemye masap nuhkewa nuh ke nuknuk, nahweyuck ac ke ohiyen nwacsnwacs?

15 Bible uh tiac ip srihsrihkiyac nuh sin mwet Christian uh masap nuhkewa nuh ke nuknuk, nahweyuck ac ohiyen nwacsnwacs. Jeova el luhngse kuht in orekmakihn nuhnak kuh sukohsohk lasr in oruh sulaclah lasr sifacna. Mweyen, el luhngse kuht in eklac nuh ke mwet mahtuh in nuhnak suc fahsr fal nuh ke kahs in kahsruh luhn Bible uh ac “suc ke orekma ac pahlah lal el kuh in akihlen inmahsrlon ma wo ac ma kuluk.” (Hebrew 5:14) Tuh yohk liki nuhkewa, el luhngse kuht in ahkkahlwemye luhngse, nuh sin God ac nuh sin mwet tuhlan lasr uh. (Riti Mark 12:30, 31.) Arlacna puhs kain in nuknuk ac mwe nahweyuck ma kuht kuh in orekmakihn kuh sulaclah ma ac tiac kuhnahoslah oakwuck luhn Bible. Mwe ahkpwacyeye nuh ke ma inge uh pa ke atacn nuknuk ac nahweyuck ma un mwet engan luhn Jeova eltahl orekmakihn ke pacl eltahl tuhkweni uh finne eltahl muhta oyac fin facluh.

 TIAC NUHNKWACLAH KE MA PUCSPUCS

16. Ohiyac kuluk luhn facluh siena liki mwe luti lal Jesus uh ke inkacnek fuhkah? Ac kihsen siyuck fuhkah kuht enenuh in siyuck sesr sifacna?

16 Ohiyac kuluk luhn facluh kiacpwelah ac kihfaslah million sin mwet in luhlahlfongi lah mani ac mwe kahsruhp uh pa use insewowo uh. Tuhsruhktuh, Jesus el fahk: “Moul na pwacye luhn sie mwet, tiac ma ke ma suc oasr lal, el finne arulacna kahsruhp.” (Luke 12:15) Jesus el tiac ahkkweye mwet uh in nuhnkuh muh kuht tiac enenuh mani kuh kuhtwena ma. Tuhsruhktuh, el luti lah mwet suc ‘wo ahtronmuhtaltahl,’ kalmac pa eltahl fihliyac kahs luhn God in pa ma se emeet ke moul laltahl uh, pa inge mwet suc ac fah konwacack moul insewowo mweyen eltahl nuhnkuh yohk ke mwe enenuh laltahl in fototo nuh sin God. (Matthew 5:3; 6:22, 23) Siyuck sum sifacna: “Yac nga luhlahlfongi na pwacye ma Jesus el luti uh kuh nuhnak luhk uh kihfucsyucklac sin “pahpah tuhmuhn kikiacp nuhkewa”? (John 8:44) Meac kahs luhk, finsrak luhk, ma yohk srihpac nuh sihk ac inkacnek in moul luhk uh ahkkahlwemye keik?’​—Luke 6:45; 21:34-36; Luo John 6.

17. Meac kuhtuh mwe insewowo ma engankihnyuck sin mwet suc tiac nuhnkuh ke ma pucspucs luhn facluh?

17 Jesus el fahk, “Lahlmwetmwet . . . ahkpwacyeyuck ke fahko la.” (Matthew 11:19) Nuhnkuh ke kuhtuh mwe insewowo ma engankihnyuck sin mwet suc tiac nuhnkuh ke ma pucspucs luhn facluh. Eltahl konwacack engan pwacye ke orekma in kuhlwacnsap laltahl ke Tohkohsrahi uh. (Matthew 11:29, 30) Eltahl fahsr liki kuhtwena mwe fosrngah ac ke srihpac se inge eltahl tiac puhla elyah ac ahsor yohk. (Riti Sie Timothy 6:9, 10.) Mwet suc falkihn ma oasr tari yohrohltahl uh, engankihn pacl yohk laltahl yurin sucu ac mwet lili wiyacltahl uh. Ke srihpac se inge, eltahl kuh pac in mutul wo. (Ecclesiastes 5:12) Eltahl puhla  insewowo se ma yohk emeet ma tuhkuh ke inkacnek nuhkewa ma eltahl kuh in sang. (Orekma 20:35) Na ‘finsrak laltahl uh fah yohkwelihk’ ac eltahl puhla mislac ke nuhnak ac inse, wekuhnacng insewowo yohk ke moul laltahl uh. (Rome 15:13; Matthew 6:31, 32) Mwe insewowo inge sacohk na pwacye!

“NOKOMACNG MWE LOEYUCK NUHKEWA”

18. Bible uh ahkuhtweyac fuhkah mwet lokoalok se lasr inge, orekma kuluk lal, ac ma upac ma kuht lain uh?

18 Mwet suc muhtana in luhngse luhn God uh karihngihnyuck pac liki mwe ahkkuluk lal Satan in tulokihnuhltahluh liki kuhlwacnsap laltahl nuh sin God. Satan el luhngse in ahkkulukye insewowo luhn mwet Christian uh ac eslah pac finsrak laltahl nuh ke moul ma pahtpaht. (Sie Peter 5:8) Mwet sap Paul el fahk, “Kuht mweuni . . . nguhn fohkfohk yen engyeng uh ac mwet leum ac wal ac nguhn kuluk ma leumi mwet uh, kuh luhn we lohsr se inge.” (Ephesus 6:12) Kahs se inge “mweuni” kuh apihrack ahkkahlwemye lah amaci se lasr inge tiac loes liki kuht ma kuht enenuh in wihklac liki, tuhsruhktuh arlacna fototo nuh yohrohsr. In wekuhnacng, kahs inge “mwet leum ac wal ac nguhn kuluk ma leumi mwet uh” ahkkahlwemye lah mwe lain ma tuhkuh sin nguhn kuluk inge ma oakiyucki ac pwacpalah.

19. Ahkuhtweyac mwe loeyuck in mweun luhn mwet Christian se.

19 Tuhsruhktuh, kuht finne muhnahs ac sesuwohs, kuht kuh in kuhtanglah. Fuhkah? Ke kuht ‘nokomacng mwe loeyuck nuhkewa ma God el acse.’ (Ephesus 6:13) Ephesus 6:14-18 ahkuhtweyac ke mwe loeyuck se inge: “Ke ma inge, kowos in tuyak ac ahkolah. Losacni infulwowos in kuh ke pwacye, ac nokomacng suwohswohs tuh in mwe loeyuck nuh ke iniwowos, ac kena lowos in fahkwelihk Pweng wo ke mislac, in pa fahluhk lowos. Pacl nuhkewa kowos in us luhlahlfongi oacna mwe loang lowos; kowos  in kuh in sang konelah pihsr fihrihr nuhkewa sin el suc kuluklacna. Ac kowos in eis lahngo sin God tuh in oacna sie helmet, ac kahs luhn God in oacna cutlass suc nguhn muhtahl sot nuh suwos. Oruh ma inge nuhkewa ke puhruhe, ac siyuck kahsruh sin God. In kuhtwena ma kowos oruh kowos in puhruhe fal nuh ke kolyuck luhn nguhn.”

20. Ohiyac ma kuht oasr kac uh siena liki solse na pwacye uh fuhkah?

20 Ke srihpen ma inge sie mwe sang luhn God, pwacnacng mwe loeyuck nuh ke moul in Christian lasr uh ac fah karihngihn kuht, kuht fin orekmakihn ke pacl nuhkewa. Mwet Christian uh siena liki mwet mweun na pwacye uh. Oasr pacl in monglac luhn mwet mweun uh ke pacl ma oasr mislac, tuhsruhktuh mwet Christian uh tiac tui ke kwacfeacng lalos in lain nguhn kuluk uh nwe ke pacl se God el kuhnahoslah facl kuluk se lal Satan inge ac ahkwacngihnyelah nguhn kuluk nuhkewa lal uh. (Fwackyuk 12:17; 20:1-3) Sahp, oasr mwe muhnahs lasr kuh ma kuluk ma insiacsr kena oruh. Tuhsruhktuh, in oacna ke kahs in puhpuhlyuck inge, kuht enenuh in kwacfeacng in “puok” mahnosr sifacna tuh kuht in sruokyacna oaru lasr nuh sin Jeova uh. (Sie Corinth 9:27) Ma na pwacye se lah pacl ma kuht tiac amaci uh pa pacl kuht enenuh in taran emeet uh!

21. Ke inkacnek fuhkah kuht kuh in kuhtanglah ke moul in Christian lasr uh?

21 Yohk srihpac kuht in esam pac lah kuht tiac kuh in kuhtanglah ke amaci se inge ke kuh lasr sifacna. Pa inge srihpac se pwacnacng mwet sap Paul el ahkacsmakihnye kuht ke yohk srihpaciyac in puhruhe nuh sin Jeova “pacl nuhkewa.” Ke pacl sacn pacna, kuht enenuh in ahkos Jeova ke kuht lutlut ke Kahs lal ac asruoki nuh sin “mwet wiyacsr” ke pacl nuhkewa ma kuht kuh, mweyen kuht tiac muhkwena ke amaci se inge! (Philemon 2; Hebrew 10:24, 25)  Mwet suc oaru ke ip nuhkewa inge ac fah kuhtanglah ac oacyacpac kuh in tu na kuh ac fahkwack ke luhlahlfongi laltahl uh ke pacl in srihkeyuck.

AHKOLAH IN TU NA KUH AC FAHKWACK LUHLAHLFONGI LOM UH

22, 23. (a) Efuh kuh kuht enenuh in ahkolah pacl nuhkewa in tu na kuh ke luhlahlfongi lasr uh? Ac kihsen siyuck fuhkah kuht enenuh in siyuck sesr sifacna? (b) Sifac fuhkah se kuht ac fah tuni ke sapta se tok uh?

22 Jesus el fahk “kowos tiac ma luhn facluh . . . pwacnacng mwet facluh sruhngac kowos.” (John 15:19) Ke srihpac se inge, mwet Christian uh enenuh in ahkolah in tu na kuh ac fahkwack ke luhlahlfongi laltahl uh ac in oruh ma inge ke inkacnek ma ahkkahlwemye kuhlwacng ac suhnak. (Riti Sie Peter 3:15.) Siyuck sum sifacna: ‘Yac nga kahlwem kac lah efuh Mwet Loh luhn Jeova uh kuhtuh pacl uh tu na kuh ke ma se ma siena liki nuhnak luhn inkaiyen mwet uh? Ke pacl nga sun ma upac ke srihpen nga tu na kuh, yac nga luhlahlfongi na pwacye ke ma Bible uh luti ac pwacye ma mwet kuhlwacnsap oaru ac lahlmwetmwet inge fahk uh? (Matthew 24:45; John 17:17) Ac ke pacl ma nga enenuh in oruh ma suwohs ye muhtuhn Jeova uh, yac nga ahkolah ac engan in siena liki mwet sahyac uh?’​—Psalm 34:2; Matthew 10:32, 33.

23 Tuhsruhktuh, inkaiyen pacl uh kena yohk lasr in tiac kuhpahsr nuh ke facluh srihfeyuck ke inkacnek ma kuht tiac motko. Ke sie mwe puhpuhlyuck, in oacna ke fwack tari ac, Devil el srihke in kihfaslah mwet kuhlwacnsap luhn Jeova uh ke inkacnek luhn mwe ahkengan pucspucs luhn facluh. Kuht ac sulaclah fuhkah kain in mwe ahkengan wo ma ac ahkkweye kuht ac use nuhnak ac puhlakihn wo? Sifac se inge ac fah topukyucklac ke sapta se tohkoh uh.

^ par. 3 Muhtwacwacack ke Pentecost 33, Christ el kuhlwacnsap oacna sie Tohkohsrah suc kol congregation ke mwet akmuhsralah lal fin facluh. (Colossae 1:13) Ke yac 1914, Christ el eis kuh in “leumi facluh nohfohn.” Ke ma inge, mwet Christian akmuhsralah uh oacyacpac kuhlwacnsap oacna mwet tuhtahfpo ke Tohkohsrahi se ma Jesus el kol kac uh.​—Fwackyuk 11:15.

^ par. 8 Liye puk se inge Reasoning From the Scriptures, sra 389-393, oreklac sin Mwet Loh luhn Jeova.

^ par. 65 Liye ke Kuhtuh Pac Mwe Ahkuhtweyac ke mwe lutlut se inge “Ahkfuhlwact nuh ke Flag, Vote ac Orekma In Kuhlwacnsuhpuh Acn Sum.”