Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 SAPTA 13

Mwe Ahkfuhlwact Ma Tiac Ahkinsewowoye God

Mwe Ahkfuhlwact Ma Tiac Ahkinsewowoye God

“Kowos in suk in etuh ma ac ahkinsewowoye Leum.”​—EPHESUS 5:10.

1. Kain in mwet fuhkah Jeova el kohlma nuh yohrohl, ac efuh kuh eltahl enenuh in kwacfeacng in ahkinsewowoye God?

JESUS el tuh fahk, “Mwet alu pwacye elos fah alu nuh sin Pahpah in nguhn ac pwacye, tuh Pahpah el sokolos suc ohinge tuh elos in mwet alu nuh sel.” (John 4:23, BMK) Ke pacl ma Jeova el konwacack kain in mwet inge, in oacna ke el konwekomyak uh, el kohluhltahl ma nuh yohrohl ac nuh yurin wen nahtuhl. (John 6:44) Sie ma yohk ac sacohk pa inge! Tuhsruhktuh, mwet suc luhngse ma pwacye in Bible uh, eltahl enenuh in “suk in etuh ma ac ahkinsewowoye Leum,” mweyen Satan el sang kuhiyacl in kiacpwelah mwet uh.​—Ephesus 5:10; Fwackyuk 12:9.

2. Ahkuhtweyac lah meac nuhnak luhn Jeova nuh sin mwet suc srihke in oracni alu pwacye ac alu kikiacp.

2 Nuhnkuh ke ma sikyak apkuhran nuh ke finohl Sinai ke pacl se mwet Israel ah tuh siyuck Aaron elan oraclah sie god ah laltahl. Aaron el oruh na ma eltahl fahk ah ac el oraclah cow mukul soko ke gold, tuhsruhktuh el fahk muh ma inge mwe luhmah se na nuh kacl Jeova. El fahk muh “Lutu ac fah orek sie kuhfa in ahkfuhlwactye LEUM GOD.” Yac Jeova el engan lah eltahl oracni alu pwacye ac alu kikiacp uh nuh sie? Moh. Ke srihpen ma sikyak inge, el sapkihn in acnwucki apkuhran nuh ke tausin tolu ke mwet suc alu nuh ke ma sruhloaclah sac. (Exodus 32:1-6, 10, 28) Meac kuht lotwelah kac? Kuht fin luhngse  in muhtana in luhngse luhn God uh, kuht enenuh in tiac “kahlyac kuhtwena ma suc tiac fal in puhsralyuck” ac sruokyacna oaru lasr in karihngihn alu pwacye liki kuhtwena mwe luti kikiacp.

3, 4. Efuh kuht enenuh in lohacng ahkwoyac nuh ke kahs in kahsruh luhn Bible ke pacl ma kuht tuni kain in facsin ac mwe ahkfuhlwact pucspucs?

3 Mwe ahsor se lah, mwet suc tiac luhngse ma pwacye uh eltahl muhtwacwacack in oruh kain in facsin kuh mwe ahkfuhlwact ma God el tiac insewowo kac. (Luo Thessalonica 2:7, 10) Ke kom nuhnkuh ke kuhtuh sin mwe ahkfuhlwact ma ac fah sramsramkihnyuck inge ac kuhtuh pac sahyac, lohacng nuh ke inkacnek ma mwe ahkfuhlwact inge tiac ahkkahlwemye ohiyac luhn God, a ohiyac luhn facluh. Oasr ip se ma mwe ahkfuhlwact nuhkewa ma orek fin facluh nohfohn uh oacna sie kac: Ma inge nuhkewa mwe luhng luhn ikoac ma oacyacpac ahkkweye luhlahlfongi luhn alu kikiacp ac orekma in inutnut, suc pa inge mwe akucl yohk luhn “Babylon Luhlahp.” * (Fwackyuk 18:2-4, 23) Esam pac lah, Jeova el liye orekma luhn mwet pagan (mwet suc tiac alu nuh sin Jeova) in pacl meet ah ma facsin ac mwe ahkfuhlwact pucspucs ke pacl inge uh tuhkuh kac ac el arlacna sruhnga. Wacngihn ahlohloh kac lah finne ke pacl inge, tiac eklac puhlakihn lal nuh ke mwe ahkfuhlwact inge. Yac kom tiac insese tuh wo kuht in nuhnkuh ke nuhnak luhn Jeova ke ma inge?​—Luo John 6, 7.

4 In oacna mwet Christian pwacye, kuht etuh lah oasr mwe ahkfuhlwact ma tiac ahkinsewowoye Jeova. Pwacnacng,  kuht enenuh in tu na kuh ke insiacsr kewa in tiacna kuhpahsr nuh kac. Kuht fin kalweni srihpac pucspucs ma pwacnacng Jeova el tiac insewowo ke mwe ahkfuhlwact inge kewa, ma inge ac fah ahkkweye sulaclah lasr in fahsr liki kuhtwena ma ma ac kuh in ahkkulukye kuht in tilac muhtana in luhngse luhn God.

CHRISTMAS UH MA TUHKUH KE MWE AHKFUHLWACT NUH KE FAHT

5. Efuh kuht kuh in luhlahlfongi lah Jesus el tiac isuslac ke December 25?

5 Bible uh tiacna sramsramkihn kuhtwena pacl ma ahkfuhlwactyeyuck isuslac lal Jesus uh. Lwen in isuslac lal uh tiac pac etweyuck. Tuhsruhktuh, kuht kuh in luhlahlfongi lah el tiac isuslac ke December 25 ke puhlan pacl na ohu. * Sie srihpac ma oruh kuht etuh ma inge uh pa ke srihpen Luke el fahk lah ke pacl se Jesus el isuslac ah, “oasr kuhtuh mwet shepherd in acn sac, suc muhta inimac uh ke fong sac in karihngihn un sheep nahtuhlos.” (Luke 2:8-11) Fin pa mwet shepherd inge pahlah tari ke “muhta inimac uh” pacl nuhkewa, sahp ac wacngihn srihpac kuht in lohacng nuh ke ma inge. Tuhsruhktuh, ke srihpen ohu, af, ac snow fin acn Bethlehem ke puhlan pacl sac, un sheep uh enenuh in utuckyak nuh ke acn fucsrfucsr ma wihklac ac mwet shepherd inge ac tiac pac muhta “inimac uh.” In wekuhnacng ma inge, Joseph ac Mary eltahl som nuh Bethlehem ke srihpen Caesar Augustus el sapkihn in oreklac sie oacwac ah. (Luke 2:1-7) Ac arlacna  usrnguck Caesar elan sapkihn mwet suc sruhnga kolyuck luhn mwet Rome inge eltahl in fuhfahsryucsr som nuh ke acn na pwacye seltahl uh ke puhlan pacl ohu inge.

6, 7. (a) Facsin pucspucs ke Christmas uh muhtwacwacack oyac? (b) Meac ma tiac oacna sie inmahsrlon mwe sang ke pacl in Christmas ac mwe sang luhn mwet Christian?

6 Muhtwacwacyen Christmas uh wacngihn ke Bible, tuhsruhktuh ma inge orek ke kuhfa in ahkfuhlwact luhn mwet pegan in pacl meet ah. Mwe ahkfuhlwact se inge pa Roman Saturnalia, sie mwe ahkfuhlwact ma oreklac nuh sin god luhn imac se inge pahngpahng Saturn. In fal nuh ke lwemlwem luhn mwet suc alu nuh sin god luhn faht se inge pahngpahng Mithra, eltahl ahkfuhlwactye lwen in isuslac lal uh ke December 25. Puk se inge pahngpahng New Catholic Encyclopedia el fahk, “Mwe ahkfuhlwact ke Christmas uh muhtwacwacack ke puhlan pacl se ma arlacna fokoko ahkfuhlwact luhn mwet Rome nuh ke god luhn faht se inge,” apkuhran nuh ke yac tolfoko tukun misac luhn Christ.

Mwet Christian pwacye uh sang ke srihpen luhngse

7 Ke mwe ahkfuhlwact luhn mwet pegan in pacl meet ah, eltahl kihtakat mwe sang ac orek kuhfa ac pa pacna inge facsin ma orek ke mwe ahkfuhlwact nuh ke Christmas ke pacl inge. Ac in oacpacna ke pacl inge, ke puhlan pacl in Christmas uh arlacna ahluhkwelah kuh puhslaclac mwe sang luhn mwet nuh sin sie sin sie. Ac ma inge tiac fal nuh ke ohiyac ma ahkkahlwemyeyuck ke Luo Corinth 9:7, ma fahk: “Kais sie mwet in sang fal nuh ke ma el sifacna sulaclah, tiac ke inse toasr kuh ke srihpen sapkihnyuck; tuh God El luhngse el suc insewowo in sang.” Mwet Christian pwacye uh oruh mwe sang laltahl ke inkacnek suc ahkkahlwemye lah eltahl luhngse in oruh. Ac ma inge ac tiac pahtkoltahl in orek mwe sang ke na srihpen eltahl enenuh in ahksacohkye sie lwen. Eltahl tiac pac sano in  oasr mwe sang ma ituckyang nuh seltahl. (Luke 14:12-14; riti Orekma 20:35.) Tuh yohk liki na inge, eltahl arlacna ahksacohkye sukohsohk laltahl liki mwe fosrngah, elyah ac ma nuhkewa ma orek ke pacl in Christmas uh. Eltahl tiac pac enenuh in puhla elyah ke mani ma mwet pucspucs ke puhlan pacl se inge sun uh.​—Matthew 11:28-30; John 8:32.

8. Yac mwet lahlmwetmwet suc ukwe itu sac ac sang mwe sang nuh sel Jesus ke lwen in isuslac lal ah? Ahkuhtweyac.

8 Tuhsruhktuh, kuhtuh mwet uh sahp tiac insese ac kuh in siyuck, yac mwet lahlmwetmwet ma ukwe itu ac tiac som in sang mwe sang nuh ke lwen in isuslac lal Jesus ah? Moh, mweyen mwe sang laltahl inge sie inkacnek ma eltahl kuh in ahkkahlwemye suhnak laltahl nuh sin sie mwet suc fal in akihlenyuck, pa inge facsin ke pacl  luhn mwet in Bible inge. (Sie Tokosra 10:1, 2, 10, 13; Matthew 2:2, 11) Eltahl tiac pac yorack ke fong se na ma Jesus el isuslac ah. Jesus el mahlwem ekahsrlac tari ac el muhta luun lohm seltahl ah ke mwet inge sun acn we.

MA BIBLE UH FAHK KE BIRTHDAY

9. Meac sikyak ke mwe ahkfuhlwact nuh ke lwen in isuslac luhn mwet luo ma sramsramkihnyuck in Bible muh ahkfuhlwactye inge?

9 Finne lwen in isuslac luhn sie ahwowo el mwe engan na yohk se, Bible uh tiac ahkkahlwemye lah mwet kuhlwacnsap luhn God in pacl meet ah ahkfuhlwactye lwen in isuslac uh. (Psalm 127:3) Yac mwet sihm in Bible inge pa muhlkuhnlah in ahkkahlwemye lah oasr mwe ahkfuhlwact  ma orek nuh ke isuslac luhn wen nuhtin God? Moh, mweyen oasr sramsramkihnyen mwe ahkfuhlwact ma orek nuh ke lwen in isuslac luhn mwet luo sahyac, Pharaoh luhn acn Egypt ac Herod Antipas. (Riti Genesis 40:20-22; Mark 6:21-29.) Tuhsruhktuh kewana, ke pacl luo inge tiac wo ma ahkkahlwemyeyuck kac uh, yohk na ke ahkfuhlwactyeyuck lwen in isuslac lal Herod ke el sapkihn in tahtlah inkwacwacl John Bacptais.

10, 11. Efuh kuh mwet Christian in pacl meet ah tiac ahkfuhlwactye lwen in isuslac uh?

10 Puk se inge pahngpahng The World Book Encyclopedia, fahk lah “Mwet Christian in pacl meet ah liye muh kuhtwena mwe ahkfuhlwact nuh ke lwen luhn sie mwet ma tuhkuh ke facsin luhn mwet pegan.” Ke sie mwe puhpuhlyuck, mwet Greek in pacl meet ah luhlahlfongi muh oasr nguhn se ma karihngihn sie mwet, muhtwacwacack na e ke pacl se ma el isuslac ah me. Puk se inge, The Lore of Birthdays el fahk lah “Oasr kuhpahsr luhn nguhn se inge nuh sin god luhn mwet se ma lwen la ingacn.” Oasr pac kuhpahsr ke mwe ahkfuhlwact ke lwen in isuslac uh nuh ke inutnut ac orekma in palye ma ac sikyak ke pacl fahsruh uh ke inkacnek luhn itu ac oan la inkuhsrao ke pacl se sie mwet el isuslac.

11 Sahyen orekma luhn inutnut ac facsin luhn mwet pegan ma kuhpahsr nuh ke mwe ahkfuhlwact ke lwen in isuslac luhn sie mwet, mwet kuhlwacnsap luhn God in pacl meet ah tiac wi ahkfuhlwactye ke srihpen luhlahlfongi laltahl kac uh. Efuh? Eltahl mwet inse puhsisacl suc puhla muh lwen in isuslac laltahl sifacna uh tiac ma yohk srihpac se in akihlenyuck kuh ahkfuhlwactyeyuck. * (Micah 6:8; Luke 9:48) Pwacnacng, eltahl sang wolacna ac  kuloh nuh sin Jeova ke mwe sang se inge ke moul. *​—Psalm 8:3, 4; 36:9; Fwackyuk 4:11.

12. Fuhkah tuh lwen in misac uh in wo liki lwen in isuslac uh?

12 Bible uh fahk: “Sie e wo, wo liki oil sacohk; a lwen in misac, wo liki lwen in isuslac.” (Ecclesiastes 7:1, BMK) Efuh kuh fuhs se inge fahk ma inge? Kuht fin kwacfeacng ke orekma in kuhlwacnsap lasr nuh sin God, ac fah wo inesr ye muhtuhn God. God el ac fah esam mwet nuhkewa suc insiacltahl kewa som nuh sel. El finne misac, God el ac fah sifwil ahkmoulyelack ke pacl fahsruh uh. (Job 14:14, 15) Pa inge srihpac se pwacnacng Bible uh fahk lah lwen in misac uh wo liki lwen in isuslac. In wekuhnacng ma inge, oasr lwen sefanna ma Bible uh sapkihn kuht in ahkfuhlwactye ac lwen se inge pa lwen in misac lal Jesus. Ke srihpen “ine” wo luhn Jesus ye muhtuhn God, kuht nuhkewa ac kuh in eis molwelah.​—Hebrew 1:3, 4; Luke 22:17-20.

MWE AHKFUHLWACT KE EASTER UH MA TUHKUH KE ALU KIKIACP

13, 14. Fuhkah muhtwacwacyen facsin pucspucs ke Easter uh?

13 Mwe ahkfuhlwact ke Easter uh orek oacna in mwe ahkfuhlwactye sifwil moulyak luhn Christ, tuhsruhktuh ma inge muhtwacwacack yurin alu kikiacp. Ine se inge Easter ma tuhkuh ke Eostre kuh Ostara, god muhtwacn luhn lwenelihk ac pacl in orek imac. Fuhkah tuh ahtro ac rabbit uh kuhpahsr nuh ke ahkfuhlwactyeyacn Easter? Puk se inge Encyclopædia Britannica el fahk lah ahtro uh  “mwe akucl se nuh ke moul sasuc ac sifwil moulyak,” ac rabbit uh mwe akucl se nuh ke orek fahko. Pwacnacng, ke ma na pwacye uh Easter el mwe ahkfuhlwact nuh ke orekma in isus fahko ma oreklac in muh mwe ahkfuhlwact nuh ke sifwil moulyak luhn Christ. *

14 Yac Jeova el kuh in insewowo ke inkacnek fohkfohk in orek fahko tuh in ahkacsmakihnye sifwil moulyak luhn wen nahtuhl? El tiacna! (Luo Corinth 6:17, 18) Ma suhmuhslah uh tiac sapkihn ac tiac pac lwelah in oasr mwe acsmakihn ke sifwil moulyak lal Jesus uh. Pwacnacng, fin orek ma inge ac pahngpahng Easter, arlacna kahlwem lah ma inge ahluhkwelah mwe sruhngacyuck na yohk nuh sel.

MUHTWACWACYEN HALLOWEEN

15. Fuhkah muhtwacwacyen Halloween, ac ma fuhkah arlacna kahlwem ke lwen se ma suleyucklac in orek mwe ahkfuhlwact se inge?

15 Halloween el etweyuck muh kuhpahsr nuh ke inutnut, nguhn fohkfohk ma som liki mwet misac uh, ac kuhtuh pac mwe nahweyuck ac mwe yucn na ahksahngweng ma kuhpahsr nuh kac. Mwe ahkfuhlwact se inge muhtwacwacack ke pacl luhn mwet Celt fin acn Britain ac Ireland. Ke pacl se ma fohnlah mahlwem ah, apkuhran nuh ke November 1, eltahl ahkfuhlwactye kuhfa luhn Samhain, kalmac pa “sahflahiyen summer.” Eltahl luhlahlfongi muh ke puhlan pacl in Samhain, facl luhn mwet uh ac facl luhn nguhn pucspucs ac fah maelihk, ac nguhn nuhkewa ma wo ac kuluk uh sukohsohk in forfor rauni facluh. Motkoeyuck muh nguhn ke mwet misac inge  fohlohk nuh ke acn seltahl uh ac sucu pucspucs luhn mwet inge ac fihliyac mongo ac mwe nihm nihmacn inut ma tuhkuh in muhtwacta yohrohltahl inge tuh in ahkmihsye nguhn inge. Ke ma inge, ke tuhlihk ke pacl inge uh nahweyucklac oacna inut ac eltahl som nuh ke kais sie lohm ac siyuck mwet in lohm inge in sang sie ma wo ah (treat) kuh ac oasr ma ac sikyak (trick) nuh seltahl, ac ma inge oacpacna eltahl in tahfwema facsin ma orek ke puhlan pacl in Samhain.

ORUH IN WO LWEN IN MACRUHT LOM AN

16, 17. (a) Efuh kuh siacnyacn ma ahkolah in macruht uh enenuh in tuni ahkwoyac facsin pucspucs ke acn seltahl uh nuh ke macruht ma fal nuh ke Bible uh? (b) Kuht fin nuhnkuh ke mwe puhpuhlyuck se ke sie facsin ma muhtwacn pahyuck se ac sislah ros uh ac muhtwacn se ma saoklah an pa ac pahyuck tok uh, meac mwet Christian uh enenuh in nuhnkaclah ahkwoyac uh?

16 Ke pacl na sa, “wacngihn mwet ac sifwil . . . lohng kusen wuhleacng luhn mwet macruht in kom [Babylon Luhlahp].” (Fwackyuk 18:23) Efuh? Mweyen Babylon sifacna ac wacngihnlac ke srihpen orekma luhn inutnut lal uh. Ma inge ac kuh in ahkkulukyelah moul in pahyuck se muhtwacwacack na e ke lwen in macruht sacn.​—Mark 10:6-9.

17 Facsin ke kais sie muhtuhnfacl uh tiac oacna sie. Kuhtuh facsin inge luhman tiac kuluk tuhsruhktuh sahp, muhtwacwacyen ma inge tuhkuh ke alu luhn mwet Babylon in pacl meet ah ma motkoeyuck muh ma inge ac sang “wo ohiyac, [‘good luck,’ NW]” nuh sin siacnyacn sacn kuh mwet suc eltahl suli nuh kac an. (Isaiah 65:11) Sie facsin pwengpweng ke pacl inge uh pa ke muhtwacn se ma pahyuck an el sislah rose ma oan in pahol ingacn. Motkoeyuck muh mwet se ma saoklah an pa ac pahyuckyak tohkoh an. Facsin se inge ma muhtwacwacack ke luhlahlfongi kikiacp luhn mwet pegan. Arlacna kahlwem lah  mwet nuhkewa suc luhngse in muhtana in luhngse luhn God uh enenuh in fahsr liki facsin kuluk inge.​—Riti Luo Corinth 6:14-18.

18. Kahs in kahsruh fuhkah ke Bible enenuh in kol siacnyacn se suc ahkoo macruht laltahl ac mwet suc suliyuck nuh kac an?

18 In oacpacna, mwet kuhlwacnsap luhn Jeova uh tiac oruh kuhtwena orekma kuh facsin luhn kuhtwena acn fin facluh ma ac kuh in oraclah mwe ahsor ke macruht ac program ma orek ke macruht luhn mwet Christian uh. Ac ma inge in tiac pac ahkkulukye nuhnak ac puhlakihn luhn mwet sahyac ma wi nuh kac uh. Ke sie mwe puhpuhlyuck, eltahl tiac oruh kain in mwe sramsram ma ac kuh in ahkmwekihnye mwet luo ma ac pahyuck ingacn. Eltahl tiac pac fahk kain in kahs ma ahkkahlwemye lah eltahl nuhnkuh na ke mwe enenuh luhn siacnyacn sacn ke mwe kahsruhp ac ke ma luhn facluh. (Soakas 26:18, 19; Luke 6:31; 10:27) Eltahl tiac pac oruh kain in toeni kuh program ma arlacna yohk molo ac tiac ahkkahlwemye ohiyen moul fal, a “ma lusrohngtwen nuhkewa ma mwet uh kohnkihn.” (Sie John 2:16) Kom fin ahkoo macruht lom an, nikmet muhlkuhnlah lah Jeova el luhngse kom in ngwetlah esam pacl nuhkewa ke lwen sacohk se lom inge oacna sie lwen in engan, ac tiac ma kom auli kac. *

YAC KULUK IN TOAST?

19, 20. Meac sie puk el fahk ke muhtwacwacyen toast, ac efuh kuh facsin se inge tiac orek sin mwet Christian?

19 Sie ma kwacna orek ke macruht ac toeni pucspucs uh pa toast. Ke puk se inge International Handbook on Alcohol and Culture ma sihmlac ke yac 1995, el fahk: “Toast uh sie facsin ma orek ke pacl inge ac ma tuhkuh ke orekma in kihsackihn mwe nihmnihm nuh sin god in pacl  meet ah. Ke mwe kihsac se inge, eltahl ac okoaclah mwe nihm nihmacltahl uh nuh sin god pucspucs tuh eltahl in siyuck sie ma eltahl luhngse seltahl uh. Oasr puhruhe ma eltahl oraclah in siyuck nguhsr laltahl uh wi kahs inge ‘in loes moul lom’ kuh ‘in wo moul lom!’”

20 Pwacye, puhs mwet suc tiac nuhnkuh muh toast uh kuhpahsr nuh ke alu kuh nuh ke alyalu. Tuhsruhktuh, facsin se inge ma mwet uh sruhkwack cup in wain nihmacltahl uh nuh lucng, oraclah atacn nguhsr luhn sie mwet nuh inkuhsrao nuh sin god tuh in ahkinsewowoyeyuck eltahl ac ma inge tiac fal nuh ke mwe luti luhn Bible.​—John 14:6; 16:23. *

‘KOWOS SUC LUHNGSE JEOVA, KOWOS IN SRUHNGA MA KULUK’

21. Kain in mwe ahkfuhlwact fuhkah mwet Christian uh fahsr liki, finne ma inge tiac kuhpahsr nuh ke alu kikiacp kuh nuh ke luhlahlfongi luhn alu sahyac? Ac efuh?

21 Kuht fin nuhnkuh ke ohiyac kuluk pucspucs luhn facluh ma ahkkweyeyuck sin Babylon Luhlahp ke inkacnek nuhkewa, lah kahlwem kuh tiac, ke muhtuhnfacl pucspucs oasr mwe ahkfuhlwact ke kais sie yac ke kuhfa ma oasr tacn sakihrihk orek kac. Ke kuhtuh mwe ahkfuhlwact inge ahkfuhlwactyeyuck moul fohkfohk inmahsrlon mukul nuh sin mukul ac muhtwacn nuh sin muhtwacn. Yac fal nuh sin mwet suc luhngse Jeova uh in wi kuh liye kain in mwe ahkfuhlwact inge? Yac wi laltahl nuh kac uh ac ahkkahlwemye na pwacye lah eltahl sruhnga ma kuluk? (Psalm 1:1, 2; 97:10, BMK) Fuhkah wohiyac in etahi ohiyac wo luhn mwet sihm luhn psalm suc puhruhe ohinge: “Furohklah muhtuhk liki ma lusrohngtwen!”​—Psalm 119:37.

22. Piyac pacl ma mwet Christian se ac enenuh in oruh sulaclah lal sifacna ma fal nuh ke nuhnak ac puhlakihn lal in wi ke sie mwe ahkfuhlwact kuh tiac?

 22 Mwet Christian uh enenuh in taran ke lwen ma oasr mwe ahkfuhlwact orek kac tuh ohiyacltahl in tiacna oraclah nuh sin mwet sahyac uh muh eltahl wi ke mwe ahkfuhlwact ingacn. “Kowos fin mongo kuh nihm, kuh kuhtwena ma kowos oruh, oruh ma nuhkewa nuh ke wolacna luhn God.” (Sie Corinth 10:31; liye pohk se inge “ Oruh Sulaclah Ma Wo Emeet Uh.”) Tuhsruhktuh, kais sie mwet Christian ac kuh in oruh sulaclah la sifacna lah facsin kuh mwe ahkfuhlwact se arlacna kahlwem lah tiac kuhpahsr nuh ke alu kikiacp, politic, kuh kuhtwena mwe ahkfuhlwact luhn acn uh, ac tiac pac lain kahs in kahsruh ke Bible uh. Ke pacl sacn pacna, el ac enenuh in nuhnkuh ke puhlakihn luhn mwet sahyac uh tuh elan tiac ahktihkuclkuclye kuhtwena mwet.

SANG WOLACNA NUH SIN JEOVA KE KAHS AC OREKMA

23, 24. Kuht ac sang fuhkah ma loh ke oakwuck suwohs luhn Jeova ke inkacnek wo?

23 Mwet pucspucs eltahl nuhnkuh muh inkaiyen mwe ahkfuhlwact ma etweyuck inge sang pacl wo nuh sin sucu ac kawuck pucspucs in tuhkweni nuh sie. Pwacnacng, fin oasr mwet suc nuhnkuh muh sulaclah lasr ma fal nuh ke Bible inge tiac ahkkahlwemye luhngse kuh sahp upaclac, kuht kuh in ahkuhtweyac ke inkacnek kuhlwacng lah Mwet Loh luhn Jeova uh arlac ahksacohkye pacl in tuhkweni luhn sucu ac kawuck laltahl uh. (Soakas 11:25; Ecclesiastes 3:12, 13; Luo Corinth 9:7) Kuht engankihn asruoki lasr yurin mwet lasr uh ke pacl nuhkewa, tuhsruhktuh ke srihpen luhngse lasr nuh sin God ac oakwuck suwohs lal uh, kuht tiac luhngse in ahkkulukye pacl in engan inge ke kain in orekma kuh facsin ma ac kuh in  ahktoasrye insiacl.​—Liye pohk se inge “ Alu Pwacye uh Use Engan Yohk.”

24 Oasr mwet lili suc ahkkahlwemye kuhtuh ma wo ma sikyak ke eltahl orekmakihn mwe lutlut ke sapta 16 ke puk se inge Mea Baibel el Luti Na Paye? in topuk kihsen siyuck luhn mwet ke mwe ahkfuhlwact pucspucs. * Tuhsruhktuh, esam lah finsrak lasr uh pa in kahsruh mwet nuhkewa in luhngse ma pwacye, tiac in ahkpwacyeye lah eltahl suhtuh. Ke ma inge, ahkkahlwemye suhnak, mongfihsracsr ac “ahkolah in topuk kuhtwena mwe siyuck lalos ke top fal ac suwohs.”​—Colossae 4:6.

25, 26. Pahpah ac ninac uh ac kahsruh fuhkah tuhlihk nahtuhltahl uh in kapkapwack ke luhlahlfongi ac luhngse laltahl nuh sin Jeova uh?

25 Ke srihpen kuht mwet kuhlwacnsap luhn Jeova, oasr etwacack lasr. Kuht etuh lah efuh kuht luhlahlfongi ac oruh kais kuhtuh ma. (Hebrew 5:14) Pwacnacng, pahpah ac ninac, luti tuhlihk nuhtumtacl an in nuhnkuh yohk ke kahs in kahsruh luhn Bible. Kom fin oruh ma inge, kom ac kuh in ahkyohkye luhlahlfongi laltahl uh, kom in kahsreltahl in sang top ma fal nuh ke Bible nuh sin mwet suc kihsen siyuckkihn luhlahlfongi laltahl uh ac kom ahkkweyacltahl ke luhngse luhn Jeova nuh seltahl.​—Isaiah 48:17, 18; Sie Peter 3:15.

26 Mwet nuhkewa suc alu nuh sin God in “nguhn ac pwacye” ac tiac ahkfuhlwactye kuhtwena mwe ahkfuhlwact ma tiac fal nuh ke Bible ac eltahl ac kwacfeacng in pwacye ke inkacnek nuhkewa ke moul laltahl uh. (John 4:23, BMK) Ke pacl inge, puhs mwet suc tiac luhlahlfongi muh ohiyen pwacye uh kuh in orekmakihnyuck ke pacl inge. Tuhsruhktuh, in oacna ke ma kuht ac fah liye ke sapta se tok uh, inkacnek luhn God uh pa wo emeet uh.

^ par. 3 Liye pohk se inge “ Yac Fal Nga In Wi nuh ke Mwe Ahkfuhlwact Inge?” Kuhtuh pac holiday kuh mwe ahkfuhlwact sahyac ituckyang nuh ke Watch Tower Publications Index, ma oreklac sin Mwet Loh luhn Jeova.

^ par. 5 In fal nuh ke tahklac luhn Bible uh ac mwe sramsram ke ma sikyak fin facluh, Jesus el kuh na in isuslac ke yac 2 B.C.E ke mahlwem Ethanim ke calendar luhn mwet Jew, ac ma inge tuhngalyac mahlwem luhn September/October ke calendar lasr mihsenge uh.​—Liye Insight on the Scriptures, Volume 2, sra 56-57, ma oreklac sin Mwet Loh luhn Jeova.

^ par. 11 Ye masap luhn God nuh sin mwet Israel, tukun muhtwacn se isuslac, el enenuh in oraclah sie mwe kihsac ke ma kuluk nuh sin God. (Leviticus 12:1-8) Masap se inge ma in ahkacsmakihnyacltahl lah ma kuluk luhn mwet uh sun pac tuhlihk nahtuhltahl uh. Ma inge kahsruh mwet Israel in oasr nuhnak suwohs laltahl ke isuslac luhn tuhlihk uh ac sahp, pa inge ma mokleltahl in tiac ahkfuhlwactye lwen in isuslac luhn kuhtwena mwet.​—Psalm 51:5.

^ par. 13 Eostre (kuh Eastre) el god muhtwacn se luhn orek fahko. In fal nuh ke The Dictionary of Mythology, “oasr rabbit soko nahtuhl ma muhta ke mahlwem ah ma luhngse ahtro. Kuhtuh pacl uh ahkkahlwemyeyuck muh sifen rabbit soko inge pa luhn god muhtwacn se inge.”

^ par. 18 Liye mwe lutlut luo ke macruht ac toeni pucspucs ke Tauer in San ke January 1, 2007, sra 23-32.

^ par. 20 Liye The Watchtower ke February 15, 2007, sra 30-31.

^ par. 24 Oreklac sin Mwet Loh luhn Jeova.