Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 KUHTUHPAC MWE AHKUHTWEYAC

Piyac Pacl Ma Muhtwacn se Enenuh in Sunyac Insifacl ac Efuh?

Piyac Pacl Ma Muhtwacn se Enenuh in Sunyac Insifacl ac Efuh?

Ke Bible uh, piyac pacl ma muhtwacn Christian uh enenuh in orekmakihn mwe afyucf in sunyac insifacltahl ac efuh? Lwelah kuht in nuhnkuh ke kahs ma mwet sap Paul el suhmuhslah ke sifac se inge. El use kahs in kahsruh ma kuht enenuh tuh in oruh sulaclah ma ac wo uh, sulaclah ma ac sang wolacna nuh sin God. Ke Sie Corinth 11:3-16, Paul el ahkkahlwemye ma luo ma kom enenuh in nuhnkuh kac: (1) pacl ma sie muhtwacn Christian el ac enenuh in sunyac insifacl, ac (2) srihpac ma oruh el ahkos oakwuck se inge.

Ke pacl ma sie muhtwacn Christian el orekmakihn mwe afyucf in sunyac insifacl. Paul el ahkkahlwemye pacl luo: pacl  in puhruhe ac pacl in palye kuh fahkwack. (Fuhs 4 ac 5) Ahok, puhruhe pa inkacnek in sramsram nuh sin Jeova uh. Ke pacl inge kalmen orekma in palye kuh in fahkwack pa kuhtwena orekma in luti ke Bible, ma oacna sie mwet luti el oruh. Tuhsruhktuh, yac kalmen ma Paul el fahk inge pa muhtwacn uh enenuh in sunyac insifacltahl ke pacl nuhkewa ma el puhruhe kuh fahkwack ma pwacye ke Bible uh? Moh. Ac oasr pacl ma el ac enenuh in sunyac insifacl.

Paul el ahkuhtweyac ke pacl ma sie muhtwacn lili el enenuh in oruh ma inge ke sucu lal ac ke congregation uh. El fahk: “Mukul tuhma el sifen muhtwacn kiyacl, . . . ac kuhtwena muhtwacn suc puhruhe kuh fahkwack kahs luhn God ye muhtuhn mwet uh a wacngihn ma sunyac sifacl el ahklusrohngtwenye mukul tuhmwacl, suc sifacl.” (Fuhs 3, ac 5) Ke sucu se, Jeova el pakiyac mukul tuhma in sifen muhtwacn kiyacl. Muhtwacn pahyuck se fin tiac akihlen kolyuck luhn mukul tuhmwacl uh ac el oruh kunohkohn ma Jeova el sang nuh sin mukul pahyuck uh, ac oacpacna elan ahkmwekihnye sifac lal uh. Ke sie mwe puhpuhlyuck, fin muhtwacn lili se kol sie lutlut ke Bible ke pacl ma mukul tuhmwacl uh oasr in lohm seltahl uh, el ac enenuh in ahkkahlwemye suhnak lal nuh ke kolyuck luhn mukul tuhmwacl uh ke el sunyac insifacl. * El fin puhruhe kuh luti ke pacl ma tuhlihk mukul se nahtuhl suc bacptais tari ac srackna muhta ye karihngihn lal uh oasr we, el ac enenuh in ahkkahlwemye suhnak lal ac sunyac pac insifacl. El ac enenuh in oruh ma inge tiac ke srihpen tuhlihk sacn pa sifac ke sucu uh, tuh ke srihpen kunohkohn ma ituckyang nuh sin mukul ke congregation suc bacptaislac tari uh.

Paul el ahkkahlwemye pacl ma sie muhtwacn el enenuh in oruh ma inge ke congregation uh, ke el fahk: “Kuhtwena mwet fin luhngse akuhkuhin kac, pwacyena ma nga ac fahk pa: yohrohsr, oacyacpac yurin church luhn God . . . pa inge ohiyac lasr ke pacl in alu uh.” (Fuhs 16) Ke congregation luhn mwet Christian uh, mukul suc bacptais tari pa sifac uh. (Sie Timothy 2:11-14; Hebrew 13:17) Mukul na ma srihsrngiyucki oacna mwet elder  ac mwet in kahsruh mwet elder uh pa oasr yohroh kunohkohn sacohk se inge in karihngihn un mwet luhn God uh. (Sie Peter 5:1, 2) Tuhsruhktuh, ke kais kuhtuh pacl, oasr ma ac kuh in sikyak ma sie muhtwacn lili el ac enenuh in oruh kunohkohn luhn mukul lili suc bacptais tari. Ke sie mwe puhpuhlyuck, el ac enenuh in kol toeni nuh ke forfor uh ke srihpen wacngihn mukul lili suc srihsrngiyucki sin mwet elder in oruh ma inge. Kuh, el ac kuh pac in kol ke sie lutlut ke Bible ma el ac sie mukul lili suc bacptais tari eltahl oakiyac in som nuh kac. * Ke srihpen kain in orekma inge ipin pacna inkacnek in luti ke congregation uh, el ac enenuh in sunyac insifacl in ahkkahlwemye lah el oruh sie kunohkohn ma kwacna orek sin mukul uh.

Tuhsruhktuh, oasr ip pucspucs ke alu lasr uh ma tiac enenweyuck sie muhtwacn lili elan sunyac insifacl. Ke sie mwe puhpuhlyuck, el tiac enenuh in sunyac insifacl ke pacl ma el top ke miting uh, ke el wi mukul tuhmwacl kuh sie pac mukul lili ke orekma in luti sie lohm nuh ke sie lohm, ke el lutlut kuh puhruhe yurin tuhlihk nahtuhl uh ac mukul tuhmwacl uh wacngihn we. Pwacye lah, oasr pac ip sahyac ma kuht kuh in nuhnkeack, tuhsruhktuh fin sie muhtwacn lili el tiac arlac etuh ma el enenuh in oruh el kuh in orek research kac. * El fin srackna tiac etuh ac nuhnak ac puhlakihn lal uh moklacl in sunyac insifacl, ac tiac kuluk el fin oruh, oacna ma kuht liye ke petsac se inge.

Srihpac uh. Ke fuhs 10, kuht kuh in konwacack srihpac luo ma pwacnacng muhtwacn lili uh luhngse in ahkfalye oakwuck se inge: “Pa inge srihpac pwacnacng enenuh in oasr mwe akucl ke kuh fin sifen muhtwacn, ma ke srihpen lipufacn uh.” ( 1 Corint 11:10NW) Ma se meet, lohacng nuh ke kahs inge, “mwe akucl ke kuh.” Sie muhtwacn fin sunyac insifacl, ma inge fahkwack lah el akihlen kuh ma Jeova el sang nuh sin sifac ke congregation uh. Ke ma inge, el ahkkahlwemye luhngse ac oaru lal nuh sin Jeova God. Srihpac se ahkluo an oasr ke kahs inge, “ke srihpen lipufacn uh.” Meac sie muhtwacn el ahkkahlwemye nuh sin lipufacn uh ke el sunyac sifacl?

Lipufacn uh luhngse liye ke kolyuck luhn God uh akihlenyuck ke u luhn Jeova in kuhsrao ac fin facluh. Eltahl oacyacpac eis mwe ahkkweye ke mwe srihkasrak wo luhn mwet sesuwohs ke ohiyac inge. Sahyen ma inge, eltahl enenuh pac in ahkkahlwemye ohiyen inse puhsisacl nuh ke kolyuck luhn Jeova, suc pa inge ma lipufacn pucspucs in pacl meet ah puhtatlac kac. (Jude 6) Ke pacl inge, lipufacn uh kuh in liye lah finne sie muhtwacn lili el pah na pwacye, yohk etwacack lal ac el lahlmwetmwet liki sie mukul lili ke congregation ma bacptais tari, tuhsruhktuh el ahkkahlwemye ohiyen inse puhsisacl nuh ke kolyuck lal uh. Ke kuhtuh pacl uh, muhtwacn inge wi ke mwet akmuhsralah suc ac fah weluhl Christ ke pacl fahsruh uh. Muhtwacn inge ac fah fuhlwact liki lipufacn pucspucs ac weluhl Christ inkuhsrao in kol. Ma inge mwe srihkasrak na wo nuh sin lipufacn uh in liye ke pacl inge! Kunohkohn na sacohk se pa inge nuh sin muhtwacn lili nuhkewa in ahkkahlwemye ohiyen inse puhsisacl in ahkos ke eltahl oaru in oruh ma siyuckyuck seltahl uh ac million sin lipufacn uh liye ma inge!

^ par. 3 Sie muhtwacn lili el tiac kuh in kol ke sie puhruhe fin mukul tuhmwacl suc oasr ke luhlahlfongi uh el oasr we. Pacl na ma kwacohlah na pwacye uh fah kuh. Ke sie mwe puhpuhlyuck, fin pa mukul tuhmwacl uh wi ke sie mas ma oruh elan tiac kuh in sramsram.

^ par. 1 Sie muhtwacn lili el ac tiac enenuh in sunyac insifacl ke pacl ma el kol ke sie lutlut ke Bible ma el ac sie pac mukul lili suc el tiac pahyuck nuh se ac soenna bacptais, eltahl som nuh kac.

^ par. 2 Ke kuhtuh pac mwe ahkuhtweyac, nuhnak muhnahs liye The Watchtower ke November 15, 2009, sra 12-13, ac Tower in San ke February 1, 2015, sra 31.