Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 SAPTA 10

Macruht uh Sie Mwe Sang Sin God

Macruht uh Sie Mwe Sang Sin God

“Soko sucl ma pihplac ke koa tolkwe ac upac in wotlac.”​—ECCLESIASTES 4:12.

1, 2. (a) Nuh sin siacnyacn ma tuhfahna pahyuckyak uh, meac kuht ac kuh in nuhnkuh kac ke kais kuhtuh pacl ac efuh? (b) Kihsen siyuck fuhkah ac fah sramsramkihnyuck ke sapta se inge?

YAC kom luhngse in wi nuh ke macruht uh? Mwet pucspucs eltahl luhngse, mweyen arlacna pwacr kain in pacl inge. Kom ac liye ke siacnyacn sacn nahweyucklac uh. Tiac pa inge muhkwena, tuh kom ac kuh pac in liye ke muhtahltahl luhpan engan laltahl uh! Ke lwen se inge, eltahl arlacna engan ac luhman moul laltahl ke pacl fahsruh uh nwacnwaclah ke finsrak ac wuhlelah pucspucs.

2 Finne ohinge, arlacna kahlwem lah tiac wo moul in pahyuck luhn mwet pucspucs ke pacl inge uh. Finne kuht finsrak tuh in wo moul in pahyuck luhn siacnyacn ma tuhfahna pahyuckyak uh, sahp kuht ac kuh pacna in nuhnkuh: ‘Yac moul in pahyuck se inge ac fah insewowo? Yac eltahl ac kuh in sruokyacna macruht laltahl uh? Top nuh ke kihsen siyuck inge ac wi na luhlahlfongi luhn mukul ac muhtwacn sacn nuh ke kahs in kahsruh luhn God ke pahyuck se ac kwacfeacng laltahl in orekmakihn. (Riti Soakas 3:5, 6.) Eltahl enenuh in oruh ma inge eltahl fin luhngse in muhta na ke luhngse luhn God. Ingena, kuht kuh in lohacng nuh ke top luhn Bible nuh ke kihsen siyuck ahkosr inge: Meac srihpac luhn sie mwet in pahyuckyak? Kom ac sulaclah fuhkah lah suc wo kom in pahyuck nuh se uh? Kom ac ahkolah fuhkah in pahyuck? Ac meac ac kuh in  kahsruh sie siacnyacn in sruokyacna insewowo ke moul in pahyuck laltahl uh?

MEAC SRIHPAC LUHN SIE MWET IN PAYUCKYAK?

3. Efuh kuh tiac wo in pahyuck ke srihpac ma suhfal?

3 Kuhtuh mwet uh luhlahlfongi muh mwet lolacp uh tiac kuh in insewowo kuh engankihn moul laltahl uh eltahl fin tiac pahyuck. Ma inge arlacna suhtuh! Jesus, suc sie mukul lolacp el tuh sruhmuhn lah moul lolacp uh sie mwe sang ac el kwacfe mwet nuhkewa ma kuh in lolacp eltahl in sruokyacna. (Matthew 19:10-12) Mwet sap Paul el oacyacpac ahkuhtweyac ke ma wo pucspucs ma tuhkuh ke lolacp uh. (Sie Corinth 7:32-35) Wacngihn na masap ma Jesus ac Paul oraclah ke sulaclah luhn sie mwet in pahyuck kuh tiac pahyuck. Sie “mwe luti luhn demon uh” pa “tiac wo in pahyuck.” (Sie Timothy 4:1-3) Tuhsruhktuh, yohk orekma ma mwet lolacp suc luhngse in kuhlwacnsuhpuh Jeova kuh in oruh ke srihpen eltahl mwesahs ac wacngihn ma in ahkkulukyacltahl kuh tulohkohnuhltahl. Pwacnacng, ac tiac wo sie mwet elan pahyuck ke srihpac ma suhfal, sahp kena srihpen tuhlihk suc oasr ke matwacl an oruh.

4. Moul in pahyuck se ma wo uh ac oakiyac kain in pweluhng fuhkah nuh ke moul in sucu laltahl uh?

4 Yac oasr srihpac wo in pahyuck? Ahok. Macruht uh oacyacpac sie mwe sang sin God na luhngse se lasr inge. (Riti Genesis 2:18.) Pwacnacng, oasr ma wo ma tuhkuh kac ac ma inge ac kuh in oraclah insewowo yohk. Ke sie mwe puhpuhlyuck, moul in pahyuck wo uh pa pweluhng nuh ke moul in sucu ma insewowo uh. Tuhlihk uh enenuh in kapkapack ke sie moul wo ma oasr pahpah tuhmwacltahl ac ninac kiyacltahl in tuhfahltahllah, ahkkahlwemye luhngse nuh seltahl, kaeltahl, ac kahsreltahl. (Psalm 127:3; Ephesus 6:1-4) Tuhsruhktuh, tiac srihpac sefanna in pahyuckyak uh pa in orek tuhlihk.

5, 6. (a) In fal nuh ke Ecclesiastes 4:9-12, meac kuhtuh mwe insewowo ma tuhkuh ke kawuck fototo uh? (b) Ke inkacnek fuhkah moul in pahyuck se oacna soko sucl ma pihplac ke koa tolkwe?

 5 Nuhnkuh ke ma suhmuhslah ye sihfac se ke sapta se inge wi koano uh: “Mwet luo wo liki mwet se na, mweyen ke eltahl tuhkweni uh eltahl akacsruhi ke orekma laltahl. Sie seltahl fin ikori, mwet se ngiac ac kuh in kahsrel tulohkuhnuhlwack. Ac fin mwet se na ac el ikori, ac kuluk nuh sel mweyen wacngihn mwet in kahsrel. Ke pacl mihsrihsr, mwet luo fin tuhkweni oan eltahl ac fucsrfucsr na, a kom ac fucsrfucsr fuhkah kom fin muhkwena? Mwet se kuh in lain mwet se na ac kuhtanglah, tuh el tiac kuh in kuhtanglah kuhiyacn mwet luo. Soko sucl ma pihplac ke koa tolkwe ac upac in wotlac.”​—Ecclesiastes 4:9-12.

6 Ma yohk srihpac ke fuhs se inge uh pa in ahkkahlwemye ke sacohkiyen kawuck uh. Ke moul in pahyuck se, enenuh in fototo inmahsrloltahl. Oacna ke ma suhmuhslah uh ahkkahlwemye, fototo luhn siacnyacn sacn ac kuh in sang kahsruh, ahkkweye ac karihngihn sie sin sie. Yohk liki ma inge, moul in pahyuck se ac arlacna fokoko fin oasr ma na yohk srihpac se in ahkkweye fototo wo luhn mwet luo inge. In oacna ma fuhs se inge ahkkahlwemye, soko sucl ma pihplac ke koa lukwac ac kuh in wotlac. Tuhsruhktuh, fin koa tolkwe pihplac kuh pihraklah nuh ke sucl soko, ac upac liki na in wotlac. Fin ma yohk srihpac emeet nuh sin mukul ac muhtwacn se pa eltahl in ahkinsewowoye Jeova, moul in pahyuck laltahl uh ac fah fokoko oacna soko sucl ma pihplac ke koa tolkwe. Yohk srihpac Jeova elan oasr ke moul in pahyuck se, tuh inmahsrloltahl in arlacna kuh.

7, 8. (a) Kahs in kahsruh fuhkah Paul el suhmuhslah nuh sin mwet lili lolacp suc srackna oasr yohroh luhngse luhn ikoac? (b) Nuhnak wo ac fal fuhkah Bible uh kahsre kuht in liye ke moul in pahyuck uh?

7 Oacyacpac, macruht muhkwena pa ma sefanna ma luhngse luhn ikoac ac kuh in ahkfahsryeyuck ke inkacnek wo ac fal. Ke kain in pacl inge, tuhkweni luhn mwet  luo ke mahno el oacna sie mwe insewowo. (Soakas 5:18) Ke pacl se sie mwet lolacp el ahluhkwelah tari pacl in fuhsr lal ma luhngse luhn ikoacl uh arlacna fokoko, sahp kena se inge srackna oasr yohrohl. El fin tiac kuh in kutongyac, kain in kena inge ac kuh in kol nuh ke orekma fohkfohk ac suhfal. God el moklacl Paul elan suhmuhslah kahs in kahsruh inge nuh sin mwet lolacp: “Tuhsruhktuh kowos fin tiac kuh in kutong luhngse lowos an, tari pahyuckyak, wo in pahyuck liki tuh kena lowos in sokoelah insiowos.”​—Sie Corinth 7:9; James 1:15.

8 Arlacna yohk srihpac sie mwet elan nuhnkuh ke ma ac kuh in sikyak na pwacye ke moul in pahyuck uh, finne meac srihpac lal in pahyuckyak an. In oacna ke Paul el fahk ah, oasr “mwe ahkfohs luhn facluh ma kwacna sikyak inmahsrlon mwet pahyuck uh.” (Sie Corinth 7:28) Mwet pahyuck uh sun ma upac ma mwet lolacp uh tiac sun. Tuhsruhktuh, kom fin sulaclah in pahyuckyak meac ac kuh in kahsre kom in ahksrihkyelah ma upac an ac ahkyohkye mwe insewowo ma tuhkuh kac uh? Sie inkacnek an pa in sulaclah ahkwoyac mwet se ma kom luhngse in pahyuck nuh se an.

SUC WO KOM IN PAHYUCK NUH SE UH?

9. Paul el luhmahlah fuhkah mwe sensen kac in pahyuck nuh sin mwet suc tiac wi ke luhlahlfongi uh?

9 God el moklacl Paul elan suhmuhslah kahs in kahsruh na yohk srihpac inge ma enenuh in orekmakihnyuck in sulaclah mwet suc wo in pahyuck nuh se uh: “Kowos in tiac kuhpahsryang nuh sin mwet tiac luhlahlfongi.” (Luo Corinth 6:14) Fin kosro lukwac ma siena luhpah kuh pihsacltahl kapihri nuh sie, kewana ac kweok. In oacpacna, fin sie mwet ke luhlahlfongi uh pahyuck nuh sin sie mwet suc tiac wi ke luhlahlfongi uh, wacngihn ahlohloh kac lah eltahl ac fah sun ma upac. Sie seltahl fin luhngse in muhtana  in luhngse luhn Jeova ac mwet se sahyac an tiac nuhnkuh kuh elyah kac, ma yohk srihpac nuh seltahl uh tiac oacna sie pwacnacng, ma inge ac oraclah mwe toasr yohk. Ke srihpac se inge, Paul el kwacfe mwet Christian uh in pahyuck nuh sin “mwet Christian” muhkwena.​—Sie Corinth 7:39.

10. Inkaiyen pacl uh, meac ac kuh in sikyak ke srihpen pihlesreyuck kahs in kahsruh luhn God in tiac pahyuck nuh sin sie mwet suc tiac wi ke luhlahlfongi uh?

10 Ke kuhtuh pacl uh, oasr mwet Christian lolacp ma sulaclah muh wo eltahl in pahyuck nuh sin mwet suc tiac wi ke luhlahlfongi uh liki na eltahl in muhkwena. Kuhtuh seltahl tiac lohng kahs in kahsruh luhn Bible ac eltahl pahyuckyak sin sie mwet suc tiac kuhlwacnsuhpuh Jeova. Tuhsruhktuh, inkaiyen pacl uh tiac wo ma tuhkuh ke sulaclah ohinge uh. Mwet suc oruh ma inge eltahl konwacack lah eltahl pahyuckyak nuh sin sie mwet suc eltahl tiac kuh in sramsram nuh se ke ma yohk srihpac emeet ke moul uh. Ac puhlakihnyen ahsor ma tuhkuh kac uh yohk liki na puhlakihn laltahl ke eltahl muhkwena ac soenna pahyuckyak ah. Mwe engan se in etuh lah oasr tausin pucspucs sin mwet lili lolacp suc luhlahlfongi ac ahkos kahs in kahsruh luhn God ke ip se inge. (Riti Psalm 32:8.) Finne eltahl finsrak in pahyuckyak sie lwen, eltahl lolacp na ne ke pacl se ma eltahl konwacack sie mwet inmahsrlon mwet suc alu nuh sin Jeova God.

11. Meac ac kuh in kahsre kom in sulaclah ahkwoyac mwet se suc kom luhngse in pahyuck nuh se uh? (Liye pac pohk se inge “ Ohiyac Fuhkah Nga Luhngse in Oasr Yurin Mwet se Ma Nga ac Pahyuck Nuh Se uh?”)

11 Tuhsruhktuh, tiac kalmac pa mwet kuhlwacnsap nuhkewa luhn Jeova uh wo ac fal kom in pahyuck nuh se uh. Kom fin nuhnkuh in pahyuck, suk sie mwet suc ohiyacl, finsrak lal ke orekma in kuhlwacnsap lal, ac luhngse lal nuh sin God uh oacna kom. Mwet kuhlwacnsap oaru eltahl oraclah mwe kahsruh na yohk ke inkacnek luhn mwe rit  pucspucs ke sifac se inge. Ac wo kom in puhruhe ac nuhnkuh ke kahs in kahsruh luhn Bible uh in muh kol kom ke sulaclah na yohk srihpac se inge. *—Riti Psalm 119:105.

12. Facsin fuhkah se ke macruht ma orekmakihnyuck ke acn pucspucs, ac mwe srihkasrak fuhkah ke Bible ma use kahsruh kac?

12 Ke acn pucspucs, facsin laltahl uh pa pahpah ac ninac in sulaclah mwet suc eltahl ac pahyuck nuh se uh. Yohk insese luhn mwet pucspucs lah ke facsin inge, pahpah ac ninac uh pa yohk emeet etwacack la in oruh sulaclah na yohk srihpac se ma enenuh in oreklac inge. Macruht ma orekeni sin pahpah ac ninac uh kwacna fahlac wo, oacna ke ma orek ke pacl luhn mwet in Bible uh. Mwe srihkasrak lal Abraham in suhpwaclah mwet kuhlwacnsap se lal in konwacack sie muhtwacn ah kiyacl Isaac mwe kahsruh se nuh sin pahpah ac ninac pucspucs ke pacl inge suc sun kain in ohiyac se inge. Tiac mani kuh wal pa yohk srihpac nuh sel Abraham ah. Tuhsruhktuh, el kwacfeacng na pwacye in konwacack sie muhtwacn ah kiyacl Isaac inmahsrlon mwet suc alu nuh sin Jeova inge. *​—Genesis 24:3, 67.

KOM AC AHKOLAH FUHKAH NUH KE SIE MOUL IN PAHYUCK INSEWOWO?

13-15. (a) Kahs in kahsruh in Soakas 24:27 inge ac kahsruh fuhkah sie mukul suc luhngse in pahyuck? (b) Meac sie muhtwacn el kuh in oruh el fin ahkolah in pahyuck?

13 Kom fin luhngse na pwacye in pahyuck, wo kom in siyuck sum sifacna, ‘Yac nga ahkolah na pwacye in pahyuck?’  Ahkolah luhn sie mwet in pahyuck tiac ma na ke srihpen puhlakihnyen luhngse lal nuh sin sie mwet, in oasr kawuck lal, in wi sie mwet oan, kuh in orek tuhlihk. Tuhsruhktuh, kais sie mukul ac muhtwacn ma ahkolah in pahyuck el enenuh in nuhnkuh ke kunohkohn pucspucs ma enenweyuck ke moul in pahyuck lal an.

14 Sie mukul suc suk in oasr muhtwacn kiyacl el enenuh in nuhnkuh ahkwoyac ke kahs in kahsruh luhn Bible inge: “Ahkolah imac lom ac yukwiyac ma kom ac moul kac, na kom fah muhsahi lohm sum ac sucu lom.” (Soakas 24:27) Meac kalmen ma inge? In pacl sac, mukul se fin luhngse in ‘muhsahi lohm sel ac sucu lal,’ kuh pahyuckyak el enenuh in siyuck sel sifacna, ‘Yac nga ahkolah in karihngihn ac kahsruh muhtwacn kiyuck ac tuhlihk nahtuhsr uh, fin oasr?’ El enenuh in orekma meet ac karihngihn imac kuh ma suhnwacl. Kahs in kahsruh se inge orekmakihnyuck pac ke pacl inge. Sie mukul suc luhngse in pahyuck el enenuh in ahkolah nuh ke kunohkohn se inge. Fin oasr kuh lal, el ac enenuh in orekma. Kahs luhn God uh ahkkahlwemye lah sie mukul suc tiac karihngihn mwe enenuh luhn sucu lal ke mahno, puhlakihn ac ke fototo luhn sucu lal nuh sin God, el kuluk liki na sie mukul suc wacngihn luhlahlfongi la!​—Riti Sie Timothy 5:8.

15 Sie muhtwacn suc sulaclah in pahyuck el oacyacpac inseselac muh el ac ahkfalye kuhtuh sin kunohkohn inge. Bible uh ahkkahlwemye kuhtuh sin orekma ac ohiyac pucspucs ma sie muhtwacn el ac enenuh in oruh ke el kahsruh mukul tuhmwacl in karihngihn sucu laltahl uh. (Soakas 31:10-31) Mukul ac muhtwacn suc suhlahklahklac in tari pahyuckyak uh ac tiac nuhnkuh ke kunohkohn ma eltahl ac enenuh in ahkfalye uh nuhnkuh kacltahl sifacna ac eltahl tiac pac nuhnkuh lah meac eltahl ac kuh in sang nuh sin mwet se ma eltahl luhngse in pahyuck nuh se an. Yohk liki na inge, mwet suc nuhnkuh in pahyuck uh enenuh  elan orekmakihn kahs in kahsruh luhn God in Bible ke moul in pahyuck laltahl uh.

16, 17. Mwet suc ahkolah in pahyuck uh enenuh in nuhnkuh yohk ke kahs in kahsruh fuhkah luhn Bible?

16 In ahkolah nuh ke pahyuck, kais sie mwet ac enenuh in nuhnkuh yohk ke kunohkohn ma God el sang nuh sin mukul tuhma ac muhtwacn kiyac. Mukul se enenuh in etuh lah meac kalmac in sifac ke sucu lal an. Kunohkohn se inge tiac sang muhkwena kuh lal in oacna sie mwet kol suc sapsap pacl nuhkewa. Tuhsruhktuh, el enenuh in nuhnkuh yohk ke inkacnek ma Jesus el orekmakihn kuh lal nuh kac oacna sie sifac. (Ephesus 5:23) In oacna, sie muhtwacn Christian el enenuh in kahlwem ke kunohkohn wo lal oacna sie muhtwacn pahyuck. Yac el ac kuh in ahkpuhsisaclyacl nuh ye kolyuck luhn mukul tuhmwacl uh? (Sie Corinth 11:3) El muhta tari ye kolyuck luhn Jeova ac Jesus Christ. (Galatia 6:2) Kuh luhn mukul tuhmwacl an el oacpacna nuh ke sie pac masap sahyac. Yac el kuh in ahkkweye ac ahkpuhsisaclyacl ye kuh luhn mukul sesuwohs se tuhmwacl ingacn? El fin puhla muh el soenna ahkolah in oruh ma inge, tiac fal elan pahyuck.

17 In wekuhnacng, kais sie mukul kuh muhtwacn eltahl enenuh in ahkolah pac in karihngihn kuh ahkfalye enenuh luhn mwet se sahyac an. (Riti Philippi 2:4.) Paul el suhmuhslah: “Kais sie mukul tuhma elan luhngse muhtwacn kiacl oacna el sifacna, ac kais sie muhtwacn kiac elan ahkfuhlwactye mukul tuhmwacl.” Ke kahsruh luhn God, Paul el liye lah oasr enenuh luhn mukul se in puhla suhnak yohk luhn muhtwacn kiyacl. Ac muhtwacn se enenuh pac in puhla luhngse luhn mukul tuhmwacl uh.​—Ephesus 5:21-33.

Ke pacl se sie mukul ac muhtwacn eltahl kwacfeacng in etuh sie sin sie, wo eltahl in oraclah oakwuck in oasr mwet se ma weluhltahl

18. Efuh kuh mukul ac muhtwacn uh enenuh in leumi puhlakihn laltahl ke eltahl tuhkweni ac aetuhilac inmahsrloltahl?

18 Mwet luo suc luhngse in pahyuck eltahl kuh in oraclah  pacl eltahl in tuhkweni ac aetuhilac in liye fin eltahl fal nuh sin sie sin sie. Tiac pacl in pwacr muhkwena pa inge. Pa inge pac sie pacl in ahkpahye kuh lom in leumi puhlakihn lom an! Ke pacl se mwet luo eltahl fototoeni nuh sie, arlacna yohk kena laltahl in ahkkahlwemye luhngse nuh sin sie sin sie kuh in apuhsrali. Ac mwet nuhkewa ac puhla ma inge. Tuhsruhktuh, mwet luo suc luhngse na pwacye sie sin sie eltahl ac fahsr liki kuhtwena orekma ma ac kuh in kuhnahoslah fototo luhn mwet se sahyac an nuh sin  Jeova. (Sie Corinth 13:5) Pwacnacng, kom fin ahko, kwacfeacng in leumi puhlakihn lom an. Lah kom pahyuck kuh tiac, puhs ma wo ma tuhkuh ke kom orekmakihn ohiyac se inge ke ip pucspucs ke moul lom.

MEAC AC KUH IN KAHSRUH SIACNYACN SE IN SRUOKYACNA INSEWOWO LALTAHL KE MOUL IN PAHYUCK UH?

19, 20. Ke inkacnek fuhkah nuhnak luhn sie mwet Christian ke macruht uh siena liki nuhnak luhn mwet pucspucs ke facl lal Satan uh? Sang sie mwe puhpuhlyuck an.

19 Siacnyacn se fin luhngse moul in pahyuck laltahl uh in oan ne tok, eltahl enenuh in kahlwem kac lah meac kalmac in oraclah sie wuhlelah. Mwet pucspucs engan ke kain in puk ac movie ke mwet luo kac an pahyuckyak ac insewowo ke sahflahiyac. Tuhsruhktuh, ke ma na pwacye uh, mwet luo fin pahyuckyak tiac kalmac pa sahflahiyac uh pa inge. Pahyuck uh muhtwacwacyen sie ma suc Jeova el oraclah in oan ma pahtpaht. (Genesis 2:24) Tuhsruhktuh, mwe ahsor se lah tiac pa inge nuhnak luhn mwet pucspucs fin facluh ke pacl inge. Ke kuhtuh acn uh, mwet we ingacn nuhnkuh ke pahyuckyak luhn mwet luo oacna koa in sucl lukwac ma kapihri. Sahp, eltahl tiac lohacng nuh kac, tuh kahs in puhpuhlyuck se inge ahkuhtweyac na pwacye nuhnak luhn mwet pucspucs ke pahyuck uh. Fuhkah? Sie kapihr wo ac kuh in sruokyac ma enenuh in sruhoh an, tuhsruhktuh in oacna ke ma inge fihsracsr in kapihri ac oacyacpac fihsracsr in taltallah.

20 Mwet pucspucs ke pacl inge eltahl nuhnkuh muh macruht uh ma na nuh ke kihtin pacl. Eltahl nuhnkuh muh fal eltahl in sroacng nuh kac mweyen ma inge ac ahkfalyelah enenuh laltahl uh, tuh fin oasr ma upac sikyak eltahl tuhfah srolah liki. Tuhsruhktuh, esam ke Bible uh orekmakihn sucl soko oacna kahs in puhpuhlyuck se nuh ke moul in pahyuck uh. Sucl ma orekmakihnyuck ke oak  luhlahp uh oreklac in oan paht ac in tiac wotlac, finne ke puhlan pacl ma oasr pahkah upac. In oacpacna, macruht uh oreklac in oan paht. Esam ke Jesus el tuh fahk: “Ma God el falseni, lwelah mwet uh in tiac esaclihk.” (Matthew 19:6) Kom fin pahyuck, nuhnak lom ke macruht uh enenuh in oacpacna. Yac kahs inge oraclah macruht uh in sie ma upac kuh toasr? Moh.

21. Ohiyac fuhkah mukul tuhma ac muhtwacn kiyac uh enenuh in ahkkahlwemye nuh sin sie sin sie, ac meac ac kuh in kahsreltahl in oruh ma inge?

21 Siacnyacn se enenuh in sruokyacna nuhnak wo ke sie sin sie. Kais sie seltahl fin kwacfeacng in lohacng ahkwoyac nuh ke ohiyac ac orekma wo luhn mwet se sahyac an, na moul in pahyuck laltahl uh fah arlacna insewowo. Yac sie mwet el kuh in liye mukul kuh muhtwacn sesuwohs se kiyacl uh ac nuhnkuh na ke ma wo pacl nuhkewa? Jeova el etuh ohiyac sesuwohs nuhkewa lasr uh, tuhsruhktuh el liye na ma wo sesr uh. Mwet sihm luhn psalm el tuh siyuck: ‘Kom fin oacklah ma kuluk lasr in ma suhmuhslah lom, suc ac kuh in kahingkuhnlah nuhnuhnkuh lom?’ (Psalm 130:3) Mukul tuhma ac muhtwacn kiyac uh enenuh in oacpacna inge ke nuhnak wo laltahl ke sie sin sie ac in nuhnak muhnahs nuh sin sie sin sie.​—Riti Ephesus 4:32.

22, 23. Abraham ac Sarah eltahl oakiyac fuhkah mwe srihkasrak wo nuh sin siacnyacn pucspucs ke pacl inge?

22 Moul in pahyuck se ac kuh in eklac sie mwe insewowo na yohk ke mwet luo inge muhtwacnglah ke lusen yac pucspucs. Bible uh ahkkahlwemye nuh sesr ke moul in pahyuck lal Abraham ac Sarah ke pacl se ma eltahl mahtuhoh. Oasr ma upac ma eltahl sun kuh puhla ke moul in pahyuck laltahl uh. Srihke nuhnkuh ke puhlakihn lal Sarah ke el yac 60 kuhtuh. El enenuh in som liki lohm na wo se seltahl ke sie siti na kahsruhp pahngpahng Ur ac el enenuh in muhta ke lohm nuknuk ne ke el misac. Finne ohinge, el ahkpuhsisaclyacl nuh ke kolyuck luhn mukul  tuhmwacl uh. El mwe kahsruh na wo se nuh sel Abraham ke el kahsrel in ahkfahsrye sulaclah nuhkewa luhn mukul tuhmwacl uh. Ahkostwen lal uh tiac mwe luhmah se na, mweyen ke insiacl, el pahngon mukul tuhmwacl uh leum lal. (Genesis 18:12; * Sie Peter 3:6) Suhnak lal nuh sel Abraham uh ma tuhkuh ke insiacl.

23 Tiac kalmac pa Abraham ac Sarah insese ke ma nuhkewa. Sarah el tuh fahk nuhnak se lal ma arlacna “ahkfohsyaclack” Abraham. Tuhsruhktuh, ke kahsruh luhn Jeova, Abraham el ahkpuhsisaclyacl ac lohng ma muhtwacn kiyacl uh fahk inge ac ke sahflahiyen ma inge oraclah mwe insewowo yohk nuh sin sucu laltahl uh. (Genesis 21:9-13) Mukul tuhma ac muhtwacn kiyac ke pacl inge uh finne pahyuck ke lusen yac pucspucs, eltahl kuh in lotwelah ma pucspucs sin siacnyacn se ma ahkos God inge.

24. Moul in pahyuck fuhkah se sang wolacna nuh sin Jeova God uh, ac efuh?

24 Ke congregation luhn mwet Christian uh, tausin pucspucs ke siacnyacn inge eltahl insewowokihn moul in pahyuck laltahl uh. Kalmac pa muhtwacn inge ahkkahlwemye suhnak yohk nuh sin mukul tuhmwacltahl uh, mukul inge luhngse ac ahkfuhlwactye muhtwacn kiyacltahl uh ac eltahl tuhkweni orekma in fihliyac ma luhngse luhn Jeova meet liki ma nuhkewa ke moul laltahl uh. Kom fin sulaclah in pahyuck, kwacfeacng in sulaclah ahkwoyac mukul tuhmom kuh muhtwacn kiyom an, ahkolah in wo meet liki kom pahyuckyak, ac kwacfeacng in ahkmihsye ac ahkkweye ohiyen luhngse ke moul in pahyuck lom an ma ac kuh in sang wolacna nuh sin Jeova God. Ke inkacnek se inge, moul in pahyuck lom an ac fah arlacna kahsre kom in muhtana in luhngse luhn God.

^ par. 11 Liye sapta 2 ke puk se inge The Secret of Family Happiness, ma oreklac sin Mwet Loh luhn Jeova.

^ par. 12 Kuhtuh sin mwet kuhlwacnsap luhn Jeova in pacl meet ah puhs muhtwacn kiyac, oacna Abraham ac Jacob. Jeova el lwelah eltahl in pahyuck nuh sin muhtwacn pucspucs. Tuhsruhktuh, tiac el pa oakiyac oakwuck se inge uh, pwacnacng el oraclah masap nuh kac ma eltahl enenuh in ukwe. Mwet Christian uh enenuh in esam lah Jeova el tiac sifwil lwelah mwet kuhlwacnsap lal uh in pahyuck nuh sin mwet pucspucs.​—Matthew 19:9; Sie Timothy 3:2.

^ par. 22 Finne Genesis 18:12 ke Bible Kosrae uh fahk lah Sarah el pahnglol Abraham “mukul tuhmuhk,” Sie Peter 3:6 el ahkkahlwemye lah Sarah el pahnglol Abraham ‘leum luhk.’