Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 SAPTA 12

Kahskahskihn Ma Wo “Ma Ac Muhsaheack”

Kahskahskihn Ma Wo “Ma Ac Muhsaheack”

“Nikmet orekmakihn kahs in ahkkulukye mwet, a kahs in kahsruh muhkwena, kain in kahs ma ac muhsaheack.”​—EPHESUS 4:29.

1-3. (a) Meac sie mwe sang ma Jeova el acse nuh sesr uh, ac ma inge orekmakihnyuck fuhkah ke inkacnek tiac wo? (b) In muhtana ke luhngse luhn God, inkacnek fuhkah kuht enenuh in orekmakihn mwe sang se inge kac uh?

KOM fin sang sie mwe sang nuh sin sie mwet suc kom fototo nuh se, meac kom ac puhla el fin tiac orekmakihn in wo? Fin pa stosah soko pa mwe sang se ingacn, yac kom ac tiac ahsor kom fin konwacack lah el tiac kahsruhsrkihn wo ac el oruh mwet sahyac uh in sun ongaiyac?

2 Kuh luhn sie mwet in sramsram el sie mwe sang sin Jeova me, suc acse “mwe kihte wo ac fal nuhkewa.” (James 1:17) Wacngihn mwe sang se inge sin ma orahkrahk nuhkewa sahyac ac ma inge oruh kuht kuh in ahkkahlwemye nuhnak ac puhlakihn lasr uh nuh sin mwet sahyac. In oacna stosah soko ah, mwe sang se inge ac kuh in orekmakihnyuck ke inkacnek tiac wo. Kahlwem lah Jeova el arlacna ahsor ke pacl ma sramsram kuh kahs uh tiac orekmakihnyuck ke inkacnek wo ac ma inge ahkahsorye ac ahkngalye pac mwet sahyac!

3 In muhtana in luhngse luhn God, kuht enenuh in orekmakihn mwe sang se inge ke inkacnek ma God el insewowo kac. Jeova el ahkkahlwemye in arlac kahlwem ke kain in kahs ma ahkinsewowoyacl uh. Kahs lal uh fahk: “Nikmet orekmakihn kahs in ahkkulukye mwet, a kahs in  kahsruh muhkwena, kain in kahs ma ac muhsaheack ac suc fal nuh ke enenuh, tuh ma kowos fahk uh ac ahkwoyaclos suc lohng.” (Ephesus 4:29) Lwelah kuht in sramsramkihn lah efuh kuh kuht enenuh in arlacna taran ke pacl ma kuht kahskahs, ke kain in kahs ma kuht enenuh in tiac orekmakihn ac lah fuhkah kuht kuh in fahk kahs “ma ac muhsaheack.”

EFUH KUHT ENENUH IN TARAN SRAMSRAM LASR UH

4, 5. Fuhkah ahkuhtweyac luhn kuhtuh soakas in Bible uh ke kuhiyen kahs uh?

4 Sie srihpac na yohk ma oruh kuht enenuh in taran ohiyen sramsram lasr uh pa mweyen oasr kuh ke kahs uh. Soakas 15:4 fahk: “Kahs kuhlwacng mwe ahkkweye kom, a kahs toasr ac mwe ahkmuhnahsye kom.” * Pwacnacng, kahs kuhlwacng uh ac kuh in ahkkweye mwet suc lohng inge. Tuhsruhktuh, kahs upac uh ac kuh in ahktoasrye kuh ahkmwekihnye mwet sahyac uh. Pwacye lah kahs lasr uh oasr kuh kac in ahktoasrye kuh in ahkkweye sie mwet.​—Soakas 18:21.

 5 Sie pac soakas ma ahkuhtweyac pac ke kuhiyen kahs lasr uh fahk ohinge: “Kahs fakfuck uh kuh in kantweyac sie mwet oacna katlas.” (Soakas 12:18) Kahs upac ma fwacklac na ac kuh in ahkngalye puhlakihn luhn sie mwet ac ahkkulukyelah inmahsrlon mwet luo. Yac kom nuh puhla tari in ahkngalyeyuck kom ke kahs fakfuck? Tuhsruhktuh in orekmakihn kahs lasr ke inkacnek wo, soakas se pacna inge fahk ohinge: “Kahs lahlmwetmwet uh kuh in unwelah.” Kahs kuhlwacng luhn sie mwet suc ahkkahlwemye ohiyac lahlmwetmwet luhn God ac kuh in ahkkweye sie mwet inse toasr ac ahkwoyelah inmahsrlon mwet luo. Yac kom kuh in esam sie pacl ma kom puhla mwe ahkkweye ke srihpen kahs kuhlwacng? (Riti Soakas 16:24.) Ke kuht akihlen lah oasr kuh ke kahs ma kuht orekmakihn uh, kuht luhngse in orekmakihn kahs lasr uh in mwe ahkkweye mwet sahyac ac tiac in ahkngalyacltahl.

Sramsram wo ac fihsracsr uh mwe ahkkweye

6. Efuh kuh sie ma upac pa in karihngihn lohohsr kuh ma kuht fahk uh?

6 Kuht finne kwacfeacng na pwacye in taran ke ma kuht fahk uh, oasr pacl ma kuht ac tahfonglac. Ke ma inge, srihpac se ahkluo ma pwacnacng kuht enenuh in sensenkihn ma kuht fahk uh pa: Ma kuluk ac sesuwohs uh mokle kuht in orekmakihn lohohsr kuh kahs lasr uh ke inkacnek ma tiac wo. Kahs uh ma tuhkuh ke insiacsr ac ‘nuhnak luhn insiacn mwet uh kuluk.’ (Genesis 8:21, BMK; Luke 6:45) Ke srihpac se inge, ma na upac se pa in karihngihn lohohsr kuh ma kuht fahk uh. (Riti James 3:2-4.) Finne kuht tiac kuh in leumi ma nuhkewa kuht fahk uh, kuht srackna kuh in kwacfeacng in kapkapack ke orekmakihnyen lohohsr. In oacna ke sie mwet el kwacfeacng in kofkof lain sie acsr, kuht enenuh pac in kwacfeacng ac lain ohiyac kuluk ma ac oruh kuht in pahlah in orekmakihn lohohsr ke inkacnek tiac wo.

7, 8. Ke inkacnek fuhkah kahs lasr uh ac kuh in ahkkulukye alu ac kuhlwacnsap lasr nuh sin Jeova uh?

 7 Srihpac se ahktolu ma pwacnacng kuht enenuh in taran kahs lasr uh pa Jeova el ac fah nuhnuhnke kuht kac uh. Inkacnek ma kuht orekmakihn lohohsr kac ac kuh in ahkkulukye fototo lasr nuh sin mwet sahyac ac oacyacpac nuh sin Jeova. James 1:26 el fahk: “Yac oasr mwet nuhnkuh muh el ahkfalye oakwuck luhn alu uh? El fin tiac karihngihn lohohl, ac wacngihn srihpen alu lal ac el sifacna kiacpwellah.” In oacna ma kuht liye ke sapta se meet ah, kahs lasr uh kuhpahsr nuh ke alu lasr uh. Kuht fin tiac kuh in leumi lohohsr, a kuht kwacna fahk kahs in ahkngal ac kahs kuluk, na orekma nuhkewa ma kuht oruh in kuhlwacnsuhpuh God kac ac wacngihn srihpac ye muhtahl. Yac kom tiac insese kac lah sie mwe ahsor pa inge?​—James 3:8-10.

8 Arlacna kahlwem lah oasr srihpac wo ma oruh kuht in taran kahs lasr uh in tiac orekmakihnyuck ke inkacnek kuluk. Meet liki kuht sramsramkihn inkacnek wo ma kahs lasr uh ac kuh in muhsaheack mwet sahyac, lwelah kuht in sramsramkihn kahs ma tiac enenuh in orekmakihnyuck sin mwet Christian pwacye uh.

KAHS IN AHKKULUKYE MWET

9, 10. (a) Kain in kahs fuhkah ma mwet ke facl se inge orekmakihn ke lwen nuhkewa? (b) Efuh kuh enenuh se kuht in tiac orekmakihn kahs fohkfohk uh? (Liye pac footnote.)

9 Kahs fohkfohk. Ke facl se inge, kahskahs kuluk ac kahs kuhpahtol uh kwacna orekmakihnyuck lwen nuhkewa sin mwet pucspucs ke sramsram laltahl uh. Mwet pucspucs eltahl fahk kahs kuluk ke pacl ma eltahl kasrkuhsrak ac eltahl orekmakihn pac kahs fohkfohk ac kahs in ahksruhksruhk kuluk in orek tahfuhnkahs. Tuhsruhktuh, tiac mwe ahksruhksruhkkihnyuck pa kahs kuluk uh. Ke yac 2,000 kuhtuh somlah, mwet sap Paul el sang kahs in kahsruh nuh sin mwet Christian fin acn Colossae eltahl in tiac fahk  “kahs fohkfohk.” (Colossae 3:8, BMK) Nuh sin mwet Christian fin acn Ephesus, Paul el fahk lah “ahksruhksruhk kuluk” uh pa sie kain in kahs ma “tiac wo in fwack” inmahsrlon mwet Christian pwacye.​—Ephesus 5:3, 4.

10 Kahs fohkfohk uh arlacna sruhngwacyuck sin Jeova. Ma inge oacyacpac sruhngwacyuck sin mwet suc luhngse el. Pwacye, luhngse lasr nuh sin Jeova uh mokle kuht in tiac orekmakihn kuhtwena kahs fohkfohk. Ke Paul el ahkkahlwemye ke “orekma luhn ikoac,” “luhmah fohkfohk” uh oacyacpac oacwaclah kac wi kahs fohkfohk. (Galatia 5:19-21) Ma na yohk srihpac se pa inge. Sie mwet el kuh in sisilac liki congregation uh el fin eis tari kahs in kahsruh a el sikaleni na in orekmakihn kahs ma ahkkahlwemye ohiyac fohkfohk ac kahs kuluk. *

11, 12. (a) Meac kalmen lwesrihk, ac piyac pacl ma tiac wo in sramsram ke mwet sahyac uh? (b) Efuh kuh mwet suc alu nuh sin Jeova uh enenuh in tiac orekmakihn kahs in ahkkuluk?

11 Lwesrihk, ac kahs in ahkkuluk. Lwesrihk pa sramsram wacngihn srihpac ma fwack ke mwet sahyac ac ke moul laltahl uh. Yac sramsram nuhkewa ke mwet sahyac uh kuluk? Moh. Tiac kuluk fin ma kom sruhmuhn ingacn ac tiac ahkngalye kuhtwena mwet ac ma inge ahkkahlwemye sie ma wo kuh oasr kahs in kahsruh kac. Ke sie mwe puhpuhlyuck, fin kahs ma sramsramkihnyuck inge ahkkahlwemye ke sie mwet suc tuhfahna bacptaislac kuh sie mwet suc enenuh kuhtuh kahs in kahsruh. Mwet Christian ke pacl luhn mwet sap ah luhngse in etuh ma sikyak inmahsrloltahl ac eltahl kwacna sramsramkihn ma fal in sruhmuhnyuck ke  mwet lili wiyacltahl uh. (Ephesus 6:21, 22; Colossae 4:8, 9) Tuhsruhktuh, lwesrihk uh ac kuh in ahkngalye sie mwet fin ma sruhmuhnyuck ingacn tiac suwohs kuh fahkwack ke ma lukmac ma mwet ingacn ac tiac luhngse in etweyuck. Yohk liki na, ma inge ac kuh in ahkkulukyelah moul luhn sie mwet. Kahs in ahkkuluk uh pa “sramsram kikiacp ma kwacna ahkkulukye ohiyen mwet se.” Ke sie mwe puhpuhlyuck, mwet Pharisee eltahl fahk kahs in ahkkuluk kacl Jesus tuh in ahkpwacyeye lah el kikiacp. (Matthew 9:32-34; 12:22-24) Kahs in ahkkuluk uh kwacna oraclah fohs ac akuhkuhin.​—Soakas 26:20.

12 Jeova el tiac insewowo ke mwet suc orekmakihn kahs kuh sramsram laltahl uh ke inkacnek ma ahkkulukye kuh sraclihk inmahsrlon mwet. El arlacna sruhnga mwet suc “sraclihk inmahsrlon sucu [mwet lili].” (Soakas 6:16-19) Kahs Greek ke “mwet suc fahk kahs in ahkkuluk” pa di·aʹbo·los, ac pa pac inge sie ine ma pahngohnyuck Satan kac. El pa “Devil,” suc kahskahs kuluk ke God. (Fwackyuk 12:9, 10) Ma na pwacye se lah kuht sruhnga in orekmakihn kahs ma ac oruh kuht in oacna devil. Mwet suc fahk kahs in ahkkuluk ac puhrakack kain in orekma luhn ikoac inge oacna “sraclihk ac srihkasrak kahs” eltahl tiac kuh in wi ke congregation uh. (Galatia 5:19-21) Ke srihpac se inge, meet liki kom tahfwelah in fahk sie ma ke kuhtwena mwet, siyuck sum sifacna: ‘Yac pwacye ma inge? Yac wo nga in fahk kuh tahfwelah ma inge nuh sin mwet sahyac? Yac enenuh na pwacye nga in sruhmuhn ma nga etuh inge?’​—Riti Sie Peter 4:15.

13, 14. (a) Ma upac fuhkah kahs upac uh kuh in oruh nuh sin mwet suc fwack nuh se inge? (b) Ke inkacnek fuhkah sie mwet suc ahkkulukye mwet sahyac el sifacna fihliyac moul lal ke mwe sensen?

13 Kahs upac. In oacna ma ahkkahlwemyeyuck tari, oasr kuh ke kahs uh in ahkngalye mwet. Pwacye lah ke srihpen kuht mwet sesuwohs, oasr pacl ma kuht nuhkewa fahk  ma kuht auli kac tok. Tuhsruhktuh, Bible uh sensenkihn kain in kahs ma tiac enenuh in fwack sin mwet Christian se ke lohm sel kuh ke congregation uh. Paul el kwacfe mwet Christian: “Sislah liki kowos luhmah inge nuhkewa: suhlohng, mongsa, kasrkuhsrak, wohwohn, wenteisr, ac kuhtwena nuhnak kuluk lain mwet.” (Ephesus 4:31) Kahs upac inge wekuhnacng ahruhkyen ine uh ac kahs in ahkkulukye mwet uh. Kain in kahs inge kewa ac kuh in oruh sie mwet in sifacna puhla muh wacngihn srihpacl. Kain in mwe ahkkuluk ma tuhkuh ke kahs upac uh ac kuh in ahkmuhnahsye puhlakihn ac luhlahlfongi luhn tuhlihk uh.​—Colossae 3:21.

14 Bible uh lihksreni na ahkkahlwemye lah kuluk na pwacye in orekmakihnyuck kahs lasr uh in ahkmwekihnye, ahkngalye kuh ahkkulukye mwet sahyac. Sie mwet suc oruh kain in sramsram inge el sifacna fihliyac moul lal ke mwe sensen, pwacnacng mwet suc orekmakihn kahs kuluk uh ac kuh in sisilac liki congregation uh el fin sikaleni in pihlesruh kahsruh nuhkewa ma ituckyang nuh sel in ekuhllah inge. El fin tiac ekuhllah ohiyacl, el ac kuh pac in tiac wi eis mwe insewowo in moul ma pahtpaht ke facl sasuc uh. (Sie Corinth 5:11-13; 6:9, 10) Pwacnacng, arlac kahlwem lah mwet suc tahfwelah na in orekmakihn kahs ma tiac wo, kikiacp, kuh tiac ahkkahlwemye suhnak eltahl tiac kuh in muhtana in luhngse luhn God uh. Kain in kahs inge nuhkewa ahkkulukye mwet.

KAHS MA AC “MUHSAHEACK” MWET

15. Kain in kahs fuhkah mwe “muhsaheack” uh?

15 Kuht ac orekmakihn fuhkah mwe sang se inge ke inkacnek ma el suc use nuh sesr el luhngse kuht in orekmakihn nuh kac? Esam lah kahs luhn God uh kwacfe kuht in sramsramkihn, “ma ac muhsaheack” muhkwena. (Ephesus 4:29) Jeova el engan ke pacl ma kuht orekmakihn kahs lasr uh in mwe muhsaheack ac ahkkweye mwet  sahyac. Pwacnacng, kuht enenuh in nuhnkuh yohk ke ma kuht fahk uh. Bible uh tiac oakiyac masap pucspucs ma kuht enenuh in ukwe ahkwoyac, ac wacngihn pac un kahs kuh kain in “kahs suwohs” ma oakiyucki. (Titus 2:8) In fahk “kahs ma ac muhsaheack,” wo kuht in esam ip tolu ma fihsracsr ac arlacna yohk srihpac inge ma ahkkahlwemye ke kahs ma muhsaheack mwet uh: Ma inge wo, pwacye, ac ahkkahlwemye suhnak. Ke kuht esam ma yohk srihpac inge, lwelah kuht in nuhnkuh ke kihtin pacl kuhtuh mwe puhpuhlyuck ke kahs ma muhsaheack uh.​—Liye pohk se inge “ Yac Sramsram Luhk uh Mwe Ahkkweye?

16, 17. (a) Efuh kuh kuht enenuh in kaksakihn mwet sahyac? (b) Piyac kuhtuh pacl ma kuht kuh in kaksakihn mwet sahyac ke congregation uh, ac ke sucu se?

16 Kahs in kaksak ma tuhkuh ke insiacsr. Kewana Jeova ac Jesus eltahl akihlen lah enenuh in orekmakihnyuck kahs in kaksak. (Matthew 3:17; 25:19-23; John 1:47) In oacna mwet Christian, ac wo pac kuht in sang kahs in kaksak ma tuhkuh ke insiacsr nuh sin mwet sahyac. Efuh? Soakas 15:23 el fahk, “Mwe engan na yohk in konwacack kahs fal nuh ke srihpac se luhn pacl sac!” Siyuck sum sifacna: ‘Meac puhlakihn luhk ke pacl ma nga eis kahs in kaksak ma tuhkuh ke insiacn mwet? Yac ma inge tiac ahkinsewowoyeyuc ac ahkkweyeyuc?’ Kahlwem lah kahs in kaksak uh ahkkahlwemye nuh sum lohacng luhn mwet sahyac, nuhnak laltahl keim, ac yohk srihpaciyen ma kom oruh ingacn. Kain in kahs in kaksak inge ahkyohkye luhlahlfongi lom keim sifacna ac ahkkweye kom in kwacfeacng liki na inge ke pacl fahsruh uh. Ke srihpen kom arlacna ahksacohkye kahs in kaksak ma kom eis uh, yac tiac fal kom in oacyacpac kwacfeacng in sang kahs in kaksak nuh sin mwet sahyac?​—Riti Matthew 7:12.

17 Ahkpahye kom in liye ma wo ke mwet sahyac uh, na kom fahk nuh seltahl ma wo ingacn. Ke congregation uh,  sahp oasr mwe sramsram se ma kom lohng muh arlacna wo. Lohacng nuh sin sie tuhlihk fuhsr suc suk in kapkapwack ke congregation uh, kuh lohacng nuh sin sie mwet mahtuh suc arlacna oaru in wi ke toeni uh finne el arlacna mahtuhoh. Sie kahs in kaksak ac kuh in ahkkweye insiacn mwet inge ac ahkkweyacltahl in tahfwelah na kuhlwacnsuhpuh Jeova. Ke sucu se, mukul tuhma ac muhtwacn kiyac uh enenuh in lohng kahs in kaksak ac srui luhn mwet se sahyac an. (Soakas 31:10, 28) Yohkna tuhlihk uh, eltahl enenuh in puhla lah oasr mwet lohacng nuh seltahl ac ahksacohkyacltahl. Kahs in kaksak ac insewowo luhn mwet sahyac uh nuh seltahl oacpacna faht ac kof nuh ke sahk soko. Pahpah ac ninac, suk inkacnek pucspucs ma kom ac kuh in kaksakihn tuhlihk nuhtum an ke ohiyac wo ac kwacfeacng laltahl an. Kahs in kaksak inge ac kuh in ahkkweye puhlaik ac luhlahlfongi luhn tuhlihk nuhtum an ac mokleltahl in kwacfeacng liki na inge ac oruh ma wo.

18, 19. Efuh kuh kuht enenuh in kwacfeacng in ahkkweye mwet lili wiyacsr, ac kuht ac oruh fuhkah ma inge?

18 Kahs in ahkkweye. Jeova el arlacna nuhnkuh ke mwet suc ‘inse muhsahllah.’ (Psalm 147:3) Kahs lal uh kwacfe kuht in “ahkkweye sie sin sie” ac in sramsram ke inkacnek ma “ahkkweyelos suc ahsor yohk, ac muhnahs.” (Sie Thessalonica 5:11, 14NW) Kuht kuh in luhlahlfongi lah God el  akihlen ac el ahksacohkye kwacfeacng lasr in ahkkweye ac kahsruh mwet lili wiyacsr suc inse toasr ke ahsor yohk.

Jeova el insewowo ke pacl ma kuht orekmakihn kahs lasr in ahkkweye kuh muhsaheack mwet sahyac uh

19 Tuhsruhktuh, meac kom ac kuh in fahk in muhsaheack sie mwet lili suc inse toasr kuh ahsor? Nik kom nuhnkuh muh kom enenuh in ahkwoyelah ma upac lal an. Inkaiyen pacl uh, kahs fihsracsr uh arlacna kahsruh. Ahkkweye mwet suc ahsor yohk ingacn elan etuh lah kom nuhnkuh kacl. Siyuck kom in wi mwet inse toasr sacn puhruhelac; kom kuh in siyuck sin Jeova elan kahsruh mwet sacn in etuh luhpan luhngse luhn mwet pucspucs wiyacl ac luhn God nuh sel. (James 5:14, 15) Ahkkweyacl elan etuh lah enenweyuck el ac ahksacohkyeyuck oasr lal ke congregation uh. (Sie Corinth 12:12-26) Riti sie fuhs in Bible ma ac kuh in ahkkweyacl in esam lah Jeova el nuhnkuh kacl. (Psalm 34:18; Matthew 10:29-31) Ke kom oraclah pacl in fahk kahs na wo ac kuhlwacng nuh sin mwet ahsor inge ac sramsram nuh sel ke insiom kewa, wacngihn ahlohloh kac lah ma inge ac kahsrel in puhla lah oasr mwet luhngse el ac ahksacohkyacl.​—Riti Soakas 12:25.

20, 21. Meac kuhtuh ip ma ac kuh in oruh wo kahs in kahsruh uh?

20 Kahs in kahsruh wo. Ke srihpen kuht nuhkewa sesuwohs, kuht enenuh in eis kahs in kahsruh ke kais kuhtuh pacl. Bible uh ahkkweye kuht: “Porongo kahs in kahsruh nuh sum ac engan in eis kahs in luti, na sie lwen kom ac fah lahlmwetmwet.” (Soakas 19:20) Tiac mwet elder uh muhkwena kuh in sang kahs in kahsruh. Pahpah ac ninac uh sang kahs in kahsruh in kai tuhlihk nahtuhltahl. (Ephesus 6:4) Muhtwacn lili mahtuh uh ac sahp enenuh in sang kahs in kahsruh nuh sin muhtwacn fuhsr uh. (Titus 2:3-5) Luhngse nuh sin mwet sahyac pa ac mokle kuht in sang kahs in kahsruh nuh sin mwet se ma ac eis ingacn ke inkacnek ma ac tiac ahktoasryacl. Meac ac kuh in kahsre kuht in sang kahs in kahsruh? Nuhnkuh ke ip tolu ma oruh wo kahs in kahsruh uh: ohiyac ac srihpac luhn mwet se suc  sang an, kahs in kahsruh fin fal nuh ke Bible, ac inkacnek ma kahs in kahsruh ingacn utuckot kac.

21 Inkacnek ac ohiyac ma sie mwet el sang kahs in kahsruh pa ac kuh in oruh wo uh. Siyuck sum sifacna, ‘Ke pacl fuhkah ac tiac upac nuh sihk in eis kahs in kahsruh uh?” Ke pacl ma kom etuh lah mwet se suc usot kahs in kahsruh se ingacn el nuhnkuh keim, el tiac usot ke srihpen kasrkuhsrak lal sum, ac wacngihn srihpac suhfal kac, kahs in kai ingacn ac tiac upac kom in eis. Pwacnacng, ke pacl ma kom sang kahs in kahsruh nuh sin mwet sahyac, kom tiac nuhnkuh muh fal kom in oacpacna? Kahs in kahsruh ma wo uh oacyacpac oreklac fal nuh ke Bible. (Luo Timothy 3:16) Ke kahs in kahsruh nuhkewa ma kuht sang nuh sin mwet sahyac uh, lah kuht riti suwohs ke Bible kuh tiac, enenuh in fal nuh ke Bible. Ke srihpac se inge, mwet elder uh arlacna kwacfeacng eltahl in tiac sifacna pahtok ma eltahl nuhnkuh uh ac eltahl tiac pac ekuhllah ma suhmuhslah uh in oraclah muh Bible uh ahkkweye nuhnak se laltahl. Kahs in kahsruh uh oacyacpac wo fin ma inge ahkkahlwemyeyuck ke inkacnek wo. Kahs in kahsruh ma ahkkahlwemyeyuck ke inkacnek kuhlwacng uh kwacna fihsracsr in lohngyuck ac ma inge oruh mwet se ma eis ingacn in tiac tuhpwek.​—Colossae 4:6.

22. Meac kom luhngse na pwacye in oruh ke kuh lom in sramsram?

22 Pwacye, sramsram uh ma na sacohk se sin God me. Luhngse lasr nuh sin Jeova uh enenuh in mokle kuht in orekmakihn wo mwe sang se inge. Lwelah kuht in esam lah kahs lasr nuh sin mwet sahyac uh oasr kuh kac, ac kuh in ahkkweye kuh ahkkulukye. Pwacnacng, kuht kwacfeacng in orekmakihn mwe sang se inge ke inkacnek wo ma God el acse nuh sesr, in ahkkweye kuh muhsaheack mwet sahyac. Kuht fin oruh ohinge, sramsram lasr uh ac fah mwe insewowo se nuh sin mwet sahyac ac ma inge ac fah kahsre kuht in muhtana ke luhngse luhn God uh.

^ par. 4 Kahs Hebrew se ma luhngasyucklac oacna “toasr” ke Soakas 15:4 inge ac kuh pac in kalmackihnyuck nuh ke “kuhruh” ac “tiac suwohs.”

^ par. 10 In oacna ke orekmakihnyuck ke ma suhmuhslah uh, orekma kuluk pucspucs kuh in oacwaclah muh “luhmah fohkfohk.” Finne tiac luhmah fohkfohk nuhkewa oasr mwe kai ma ituckyang nuh kac, sie mwet el kuh in sisilac liki congregation uh el fin sikaleni na in oruh sie orekma fohkfohk ac el tiac auliyak.​—Luo Corinth 12:21; Ephesus 4:19; liye “Questions From Readers” ke July 15, 2006, The Watchtower.