Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 SAPTA 4

Efuh Kuht Enenuh in Suhnakihn Mwet Kol uh?

Efuh Kuht Enenuh in Suhnakihn Mwet Kol uh?

“Kowos in suhnakihn mwet nuhkewa.”​—SIE PETER 2:17.

1, 2. (a) Efuh kuh upac nuh sesr in suhnakihn kolyuck luhn mwet uh? (b) Kihsen siyuck fuhkah kuht ac fah sramsramkihn uh?

YAC kom nuh liye tari ma tuhlihk mukul srihsrihk se ac oruh fin siyuckyuck sel elan oruh sie ma el sruhnga na pwacye in oruh? Sahp, kom liye arlac kahlwem ke muhtuhn tuhlihk mukul srihsrihk sacn puhlakihn lal uh. Ke el lohng puhsren pahpah tuhmwacl ac ninac kiyacl uh, el etuh lah el enenuh in ahkos kolyuck laltahl uh. Tuhsruhktuh, el sruhnga na pwacye in oruh ma sapkihnyuck nuh sel uh. Ma el puhlakihn ingacn, luhmweyuck nuh ke sie ma kuht nuhkewa sun ke kais kuhtuh pacl.

2 Tiac fihsracsr in suhnakihn mwet suc kol kuht uh pacl nuhkewa. Yac nuh oasr pacl kom puhla ohinge? Fin ahok, tiac kom muhkwena. Kuht muhta ke sie pacl ma mwet pucspucs tiac suhnakihn mwet kol laltahl uh. Tuhsruhktuh, Bible uh fahk lah kuht enenuh in suhnakihn mwet suc ituckyang kuh nuh se in kol kuht uh. (Soakas 24:21) Kuht fin ke muhtana in luhngse luhn God, arlacna yohk srihpac kuht in oruh ma inge. Pwacnacng, oasr kihsen siyuck ma mwet uh nuhnkuh kac. Meac se oruh in arlacna upac nuh sesr in suhnakihn mwet kol uh? Efuh kuh Jeova el siyuck sesr in oruh ma inge? Meac ac kuh in kahsre kuht in ahkos? Ke inkacnek fuhkah kuht kuh in ahkkahlwemye suhnak lasr nuh ke kolyuck luhn mwet uh?

 EFUH MA INGE UPAC

3, 4. Fuhkah muhtwacwaciyen orekma kuluk ac ohiyac sesuwohs lasr uh? Efuh kuh ohiyac sesuwohs lasr uh oruh upac nuh sesr in suhnakihn kolyuck luhn mwet uh?

3 Kuht kuh in nuhnkuh ke srihpac luo ma pwacnacng upac nuh sesr in suhnakihn mwet suc kol kuht uh. Ma se meet, kuht sesuwohs. Ahkluo, mwet suc oasr kuh la inge oacyacpac sesuwohs. Ma kuluk ac sesuwohs luhn mwet uh ma na muhtwacwacack emeet, ke imac Eden ke pacl se Adam ac Eve lain kolyuck luhn God ah. Pwacnacng, ma kuluk uh muhtwacwacack ke orekma in lain. Ke pacl se mwet se isuslac, oasr tari kena in lain se inge in el.​—Genesis 2:15-17; 3:1-7; Psalm 51:5; Rome 5:12.

4 Ke srihpen ohiyac sesuwohs lasr uh, inkaiyacsr ac sa in ahkkahlwemye inse fuhlwact ac kuht nuhnkuh muh kuht wo liki mwet sahyac uh. Inse puhsisacl uh sie ohiyac ma suhkwac ahkkahlwemyeyuck ke pacl inge, pwacnacng kuht enenuh in kwacfeacng in oruh ac sruokyacna. Kuht finne kuhlwacnsuhpuh God ke lusen yac pucspucs, kuht srackna kuh in ahkkahlwemye inse fuhlwact ac lihkkeke. Ke sie mwe puhpuhlyuck, nuhnkuh kacl Korah suc moul ke pacl lal Moses ac. El oaru ac wi na mwet luhn Jeova finne ke pacl upac. Tuhsruhktuh, el suk in ahkyohkye kuh lal ac el kol un mwet se in lainuhl Moses, suc pa inse puhsisacl emeet ke pacl sac. (Oekyuk 12:3; 16:1-3) Nuhnkuh pac kacl Uzziah, suc inse fuhlwact lal oruh el utyak nuh in tempuhl luhn Jeova ac oruh kunohkohn na sacohk se ma mwet tol muhkwena pa fal in oruh. (Luo Chronicle 26:16-21) Mukul inge kewa eis mwe kai upac ke srihpen orekma in lain laltahl uh. Tuhsruhktuh, mwe srihkasrak kuluk laltahl inge mwe acsmakihn se nuh sesr nuhkewa. Kuht enenuh in lain ohiyen inse fuhlwact ma oruh upac nuh sesr in suhnakihn kolyuck luhn mwet uh.

5. Mwet sesuwohs uh orekmakihn fuhkah kuh laltahl uh ke inkacnek kuluk?

 5 Tuhsruhktuh, arlacna yohk ma mwet sesuwohs suc kol inge oruh in ahkmuhnahsye suhnak luhn mwet eltahl kol uh. Puhs sin mwet kol inge suhlallacl kuh kuluk nuh sin mwet eltahl kol uh. In pacl meet ah nuh ke pacl inge, oasr mwet suc orekmakihn kuh laltahl uh in ahkkulukye mwet ma oan ye kuh laltahl uh. (Riti Ecclesiastes 4:1.) Ke sie mwe puhpuhlyuck, Saul el mukul wo ac inse puhsisacl se ke pacl se Jeova el sulacllah in tohkohsrah. Tuhsruhktuh, el eklac sie mwet na sok ac inse fuhlwact. Tok, el kalyei mukul na oaru se inge pahngpahng David. (Sie Samuel 9:20, 21; 10:20-22; 18:7-11) Tok, David el eklac sie sin tohkohsrah suc wo emeet luhn mwet Israel, tuhsruhktuh el orekmakihn kuh lal uh ke inkacnek sesuwohs ke pacl se el pihsraclah muhtwacn kiyacl Uriah, sie mwet Hit. Ac tok el sap in fihliyucki mukul wo se inge elan tu ke tahk soko emeet ke sie mweun tuh in acnwucki el. (Luo Samuel 11:1-17) Ma na pwacye se lah, ohiyac sesuwohs uh oruh tiac wo inkacnek in kol luhn mwet uh. Ac ke pacl ma mwet kol inge tiac suhnakihn Jeova, eltahl oruh ma kuluk na upac. Sie mukul fin acn Britain suc tuh kuhpahsr nuh ke mukwikwi luhn government uh el fahk lah emeet me na, kuhtuh sin mwet kol fuhlwact ke alu luhn Catholic inge orekmakihn kuh laltahl uh ke inkacnek kuluk in ahkkulukye ac kalyei mwet pucspucs. Ke kuht etuh ke orekma kuluk luhn mwet suc oasr kuh la inge, kuht kuh in nuhnkuh ke kihsen siyuck se inge: Efuh kuh kuht enenuh in suhnakihn mwet kol uh?

EFUH KUHT IN SUHNAKIHN MWET KOL UH?

6, 7. (a) Meac luhngse lasr nuh sin Jeova uh mokle kuht in oruh ac efuh? (b) Meac kalmac in ahkos ac fuhlweack luhngse lasr uh? (c) Kuht ac ahkkahlwemye fuhkah?

6 Srihpac se ma wo emeet kuht in suhnakihn mwet kol  uh pa luhngse lasr nuh sin Jeova, nuh sin mwet sahyac ac nuh sesr sifacna. Ke srihpen kuht luhngse Jeova yohk liki ma nuhkewa, kuht ke ahkenganye insiacl. (Riti Soakas 27:11; Mark 12:29, 30.) Kuht etuh lah suwohs lal in kol fin ma nuhkewa fin facluh pa lainyuck emeet, muhtwacwacack ke orekma in lain se ke imac Eden. Oacyacpac, inkaiyen mwet uh weluhlack Satan ac sruhnga kolyuck luhn Jeova. Kuht arlacna engan in ahkkweye kolyuck luhn Jeova uh. Ke pacl se kuht riti Fwackyuk 4:11 uh, kahs inge sun na pwacye insiacsr. Arlacna kahlwem nuh sesr lah Jeova pa fal emeet in kol inkuhsrao ac facluh! Kuht ahkkweye suwohs luhn Jeova in kol ac ahkos kolyuck lal ke kais sie lwen in moul lasr.

7 Suhnak inge kalmackihnyuck nuh ke ahkostwen ac kuhtuh pac ma sahyac. Ke srihpen kuht luhngse Jeova, kuht inse muhlahlah in ahksol. Tuhsruhktuh, oasr pacl ma upac nuh sesr in ahkos. Ke kain in pacl inge, kuht ac enenuh in etwaclah in fuhleack luhngse lasr uh ac ahkos oacna tuhlihk mukul se ma sramsramkihnyuck ke muhtwacwaciyen mwe lutlut se inge. Kuht esam lah Jesus el engan in ahkos ma luhngse luhn Pahpah tuhmwacl el finne puhla muh arlacna upac. El fahk nuh sin Pahpah tuhmwacl ah, “in tiac ou luhngse luhk, a lwelah ma luhngse lom in orek.”​—Luke 22:42.

8. (a) Ke pacl inge, meac ahkkahlwemye lah kuht luhngse in ahkos kolyuck luhn Jeova uh? (b) Meac puhlakihn luhn Jeova ke ma inge? (c) Meac ac kuh in kahsre kuht in lohng kahs in kahsruh ac eis mwe ahksuwohs ma utuckuh nuh sesr uh? (Liye pohk se inge “ Porongo Kahs In Kahsruh Ac Eis Mwe Kai.”)

8 Jeova el tiac sramsram nuh sin kais sie sesr ke pacl inge, tuhsruhktuh el orekmakihn Kahs lal ac mwet tuhtahfpo lal fin facluh. Ke srihpac se inge, inkaiyen pacl uh kuht ahkkahlwemye lah kuht luhngse in ahkos kolyuck luhn Jeova ke pacl kuht suhnakihn mwet suc el srihsrngiyac in kol kuht uh. Kuht fin lain mwet inge, kuht ahktoasrye  insiacl. Kalmac pa, kuht fin sruhnga eis kahs in kahsruh kuh ahksuwohs ke Bible ma mwet suc kol kuht inge use nuh sesr. Ke pacl ma mwet Israel ah tohrkahskahs lainuhl Moses, Jeova el liye orekma in lain laltahl inge oacna in ma orek nuh sel sifacna.​—Oekyuk 14:26, 27.

9. Efuh kuh luhngse lasr nuh sin mwet sahyac uh mokle kuht in suhnakihn mwet kol lasr uh? Sang sie mwe puhpuhlyuck an.

9 Kuht oacyacpac ahkkahlwemye luhngse lasr nuh sin mwet sahyac uh ke kuht suhnakihn ac ahkos mwet kol lasr uh. Efuh kuh in ohinge? Koacl, srihke luhmahlah ke nuhnak lom an muh kom sie mwet mweun. Kuhtanglah ac molwelah luhn kais sie un mwet mweun ac fal nuh ke akacsruhi, ahkostwen ac suhnak luhn kais sie mwet mweun nuh sin kais sie mwet kol laltahl. Kom fin tiac ahkos ac kom lain oakwuck ke u lom an, kom fihliyac moul luhn mwet mweun nuhkewa sahyac ke mwe sensen yohk. Pwacye lah, ma upac pucspucs sikyak fin facluh ke pacl inge ke srihpen orekma luhn un mwet mweun. Tuhsruhktuh, oasr mwet mweun luhn Jeova suc oruh ma wo muhkwena. Pacl puhs Bible uh pahngon God oacna “Jeova luhn un mwet mweun.” (Sie Samuel 1:3, BMK) El pa mwet kol luhn u luhlahp ma oreklac ke lipufacn na kuh. Oasr pacl Jeova el pahngon mwet kuhlwacnsap lal fin facluh oacna mwet mweun. (Ezekiel 37:1-10) Pwacnacng, kuht fin lain kolyuck luhn mwet suc Jeova el srihsrngiyac in kol kuht uh, yac kuht tiac fihliyac moul luhn mwet lili wiyacsr uh ke mwe sensen? Ke pacl se mwet Christian se lain mwet elder ke congregation uh, mwet sahyac ke congregation uh oacyacpac puhla kweok. (Sie Corinth 12:14, 25, 26) Ke pacl se tuhlihk se lain pahpah ac ninac kiyacl uh, sucu na fohn se oacyacpac puhla ahsor yohk. Pwacnacng, kuht fin luhngse mwet sahyac uh, kuht ac ahkkahlwemye suhnak ac akacsruhi nuh seltahl.

10, 11. Meac pac mokle kuht in ahkos mwet kol uh?

 10 Kuht oacyacpac suhnakihn mwet suc kol kuht uh ke srihpen ma inge ac wo nuh sesr sifacna. Ke pacl ma Jeova el siyuck sesr in ahkos kolyuck luhn mwet uh, el kwacna ahkkahlwemye ma wo ma ac tuhkuh kac uh. Ke sie mwe puhpuhlyuck, el sapkihn tuhlihk uh in ahkos pahpah ac ninac kiyacltahl tuh in loes ac wo moul laltahl. (Deuteronomy 5:16; Ephesus 6:2, 3) El sapkihn kuht in ahkos mwet elder ke congregation uh, mweyen kuht fin tiac ac kuh in oraclah mwe sensen yohk nuh ke fototo lasr nuh sin Jeova God. (Hebrew 13:7, 17) Ac el oacyacpac fahk nuh sesr in ahkos mwet kol fin acn uh tuh in karihngihnkuhtyang sifacna.​—Rome 13:4.

11 Yac kom tiac insese nuh kac lah ke kuht etuh srihpac luhn Jeova in ahkos mwet kol uh, ma inge ac kahsre kuht in suhnakuhnuhltahl? Pwacnacng, lwelah kuht in nuhnkuh  lah kuht ac ahkkahlwemye fuhkah suhnak nuh sin mwet kol ke inkacnek tolu ke moul ma arlacna yohk srihpac.

AHKKAHLWEMYE SUHNAK KE SUCU

12. (a) Kunohkohn fuhkah se Jeova el sang nuh sin mukul tuhma ke sucu se? (b) Mukul se ac ahkpwacyeye fuhkah kunohkohn se inge?

12 Jeova pa oraclah oakwuck nuh ke sucu uh. Ke srihpen el pa God luhn ma tahklac wo nuhkewa, el oakiyac sucu uh ke inkacnek wo. (Sie Corinth 14:40) El sang kuh nuh sin mukul pahyuck tuh eltahl in oacna sifac ke sucu se. Mukul pahyuck uh ahkkahlwemye suhnak nuh sin sifac laltahl uh, suc Jesus Christ ke eltahl etahi inkacnek in kol lal nuh sin congregation uh. (Ephesus 5:23) Ke srihpac se inge, sifen sucu se enenuh in kwacfeacng in ahkfalye ma kunacl. El tiac enenuh in sapsap upac kuh kohu, tuhsruhktuh elan ahkkahlwemye ohiyen luhngse, nuhnak suwohs ac kuhlwacng nuh sin muhtwacn kiyacl ac tuhlihk nahtuhltahl uh. El enenuh in esam lah kuh se lal inge tiac ma lal sifacna ac tiac pac fuhlwact liki kuh luhn Jeova.

Sie pahpah Christian el etahi inkacnek in kol luhn Christ oacna sie sifac

13. Muhtwacn pahyuck se ac ahkpwacyeye fuhkah ma kunacl ke sucu lal ke sie inkacnek ma ahkinsewowoye Jeova?

13 Kunohkohn luhn muhtwacn pahyuck se  pa in kahsruh mukul tuhmwacl uh. Oasr pac kuh ma ituckyang nuh sel ke sucu lal uh ke srihpen Bible uh luti nuh sin tuhlihk uh eltahl in tiac pihlesruh ‘kahs in luti . . . luhn ninac kiyacltahl.’ (Soakas 1:8) Kuh luhn muhtwacn pahyuck se oan ye kolyuck luhn mukul tuhmwacl uh. Sie muhtwacn Christian el ahkkahlwemye suhnak nuh ke kolyuck luhn mukul tuhmwacl uh ke el kahsrel in ahkpwacyeye ma kunacl ke sucu oacna sie sifac. El ac tiac srihkkihn, ahkkulukye kuh srihke in eslah ma kunen mukul tuhmwacl uh. Tuhsruhktuh, el ac kahsrel ac weluhl orekma. Ke pacl se el tiac insese nuh ke sulaclah ma mukul tuhmwacl uh oraclah, el kuh in ahkkahlwemye nuhnak lal ke inkacnek kuhlwacng ac srackna ahkkahlwemye inse puhsisacl ke el ahkos. Mukul tuhmwacl uh fin tiac wi ke luhlahlfongi uh, sahp ac kuh in upac nuh sel, tuhsruhktuh ohiyen inse puhsisacl ac orekma wo lal uh  ac kuh in mokle mukul tuhmwacl an in etwacllah Jeova.​—Riti Sie Peter 3:1.

14. Tuhlihk uh ac ahkenganye pahpah, ninac ac Jeova fuhkah?

14 Tuhlihk uh ahkinsewowoye insiacn Jeova ke pacl ma eltahl ahkos pahpah ac ninac kiyacltahl uh. Ma inge oacyacpac sang kaksak ac ahkenganye pahpah ac ninac kiyacltahl uh. (Soakas 10:1) Ke sucu ma pahpah se kuh ninac se muhkwena, tuhlihk uh orekmakihn pac kahs in kahsruh ke ohiyen ahkostwen mweyen eltahl etuh lah pahpah kuh ninac kiyacltahl uh enenuh na pwacye kahsruh ac akacsruhi laltahl uh. Arlac yohk mislac ac engan ke pacl se ma mwet nuhkewa ke sucu uh ahkpwacyeye kunohkohn ma God el pakiyac nuh seltahl uh. Ma inge sang kaksak nuh sin Jeova God, suc oraclah oakwuck wo ke sucu nuhkewa.​—Ephesus 3:14, 15, NW.

SUHNAKIHN MWET KOL KE CONGREGATION

15. (a) Ke congregation uh, kuht ac ahkkahlwemye fuhkah lah kuht suhnakihn kolyuck luhn Jeova uh? (b) Kahs in kahsruh fuhkah ac kuh in kahsre kuht in ahkos mwet suc kol kuht uh? (Liye pohk se inge “ Kowos In Ahkos Mwet Kol Lowos.”)

15 Jeova el srihsrngiyac wen nahtuhl in kol mwet Christian ke congregation uh. (Colossae 1:13) Ac Jesus el srihsrngiyac “mwet kuhlwacnsap oaru ac lahlmwetmwet” uh in kahsruh mwet luhn God fin facluh ke mwe enenuh laltahl in fototo nuh sin Jeova. (Matthew 24:45-47) Ke pacl inge, “mwet kuhlwacnsap oaru ac lahlmwetmwet” uh pa Un Mwet Suc Liyacacng Orekma Nuhkewa luhn Mwet Loh luhn Jeova Fin Facluh Nohfohn. In oacna mwet Christian ke pacl luhn mwet sap ah, mwet elder ke pacl inge eis kahs in luti ac kahs in kahsruh sin un mwet se inge, ke inkacnek luhn lwacta kuh sin mwet tuhtahfpo oacna mwet liyacacng suc fuhfahsryacsr nuh ke congregation pucspucs. Kuht ahkos Jeova ke pacl se kais sie sesr  suhnakihn kolyuck luhn mwet Christian elder uh.​—Riti Sie Thessalonica 5:12; Hebrew 13:17.

16. Ke inkacnek fuhkah mwet elder uh srihsrngiyucki ke nguhn muhtahl?

16 Mwet elder ac mukul lili suc kahsruh mwet elder inge tiac suwohswohs. Oasr pac pacl eltahl tahfonglac, oacna kuht. Tuhsruhktuh, mwet elder uh oacna “mwe sang nuh sin mwet uh,” in kahsruh congregation tuh fototo laltahl nuh sin Jeova uh in arlacna kuh. (Ephesus 4:8) Mwet elder uh srihsrngiyucki ke inkacnek luhn nguhn muhtahl. (Orekma 20:28) Fuhkah tuh in ohinge? Mweyen, mukul inge enenuh in sun ma enenweyuck nuh seltahl uh meet, oacna ke Kahs luhn God uh ahkkahlwemye. (Sie Timothy 3:1-7, 12; Titus 1:5-9) Oacyacpac, ke mwet elder uh liye ac tuni fin fal mukul lili se in eis kunohkohn lal, eltahl ac puhruhe siyuck kahsruh sin Jeova ke nguhn muhtahl lal.

17. Efuh kuh muhtwacn Christian uh sunyac insifacltahl ke kuhtuh orekma ke congregation laltahl uh?

17 Ke congregation uh, sahp oasr pacl ma wacngihn mwet elder ac mukul lili suc kahsruh mwet elder in oruh kunohkohn laltahl uh, oacna in kol miting ke orekma in luti uh. Ke kain in pacl inge, mukul lili sahyac suc bacptais tari ac fah kuh in aholuhltahl. Fin wacngihn mukul lili sahyac, na muhtwacn lili uh kuh in oruh ma inge. Tuhsruhktuh, ke pacl nuhkewa ma muhtwacn lili se oruh kunohkohn luhn mukul lili uh, el enenuh in sunyac insifacl. * (Sie Corinth 11:3-10) Oakwuck se inge tiac srihkkihn muhtwacn uh. Tuhsruhktuh, ma inge oraclah pacl wo se nuh seltahl in ahkkahlwemye suhnak laltahl nuh ke oakwuck luhn Jeova ke kolyuck luhn sucu ac luhn congregation uh.

 SUHNAKIHN MWET KOL LUHN ACN UH

18, 19. (a) Kom ac ahkuhtweyac fuhkah kahs in kahsruh ma sihmlac ke Rome 13:1-7? (b) Kuht ac suhnakihn fuhkah mwet kol luhn acn uh?

18 Mwet Christian pwacye uh oaru in ahkos kahs in kahsruh ma sihmlac in Rome 13:1-7. (Riti.) Ke kom riti ma suhmuhslah inge, kom kuh in akihlen lah “mwet kol fin acn uh” ma sramsramkihnyuck inge pa mwet kol luhn government. Ke Jeova el lwelah government luhn acn uh in srackna oan, ma inge sang kahsruh in karihngihn mislac luhn acn uh ac in sang kahsruh ke orekma ma enenweyuck uh. Kuht ahkkahlwemye suhnak nuh sin mwet kol inge ke kuht ahkos masap luhn acn uh. Kuht oaru in moli kuhtwena tax ma kuht enenuh in moli, kuht nwacklah kuhtwena kain in pwepuh ma government uh enenuh sesr ac fahsr fal nuh ke masap nuhkewa ma karihngihn kuht, sucu, orekma ac ma lasr. Tuhsruhktuh, kuht ac tiac ahkos mwet kol luhn acn uh eltahl fin siyuck sesr in seahkos masap luhn God, a kuht ac topuk ac fahk oacna ma mwet sap in pacl meet ah fahk: ‘Wo tuh kuht in ahkos God yohk liki mwet uh.’​—Orekma 5:28, 29, BMK; liye pohk se inge “ Kolyuck Luhn Suc Nga Enenuh In Ahkos?

19 Kuht oacyacpac suhnakihn mwet kol luhn acn uh ke ohiyacsr ac orekma lasr nuh sin mwet sahyac uh. Ke kais kuhtuh pacl, kuht ohsun kuh sramsram nuh sin mwet kol fuhlwact ke government. Mwet sap Paul el ahkkahlwemye ohiyac wo nuh sin mwet kol pucspucs, oacna Tohkohsrah Herod Agrippa ac Governor Festus. Mukul luo inge oraclah ma na kuluk, tuhsruhktuh Paul el sramsram nuh seltahl ke inkacnek ma ahkkahlwemye suhnak. (Orekma 26:2, 25) Kuht kuh in etahi mwe srihkasrak lal Paul inge,  finne mwet kol ma kuht sramsram nuh se uh el president kuh policeman se. Ke acn in lutlut uh, mwet Christian fuhsr uh kwacfeacng in ahkkahlwemye pac suhnak nuh sin mwet luti, mwet orekma ac mwet kol nuhkewa ke acn in lutlut ac. Pwacye, kuht tiac suhnakihn muhkwena mwet suc insese ke luhlahlfongi lasr uh, tuhsruhktuh kuht oacyacpac kuhlwacng nuh sin mwet suc sruhnga Mwet Loh luhn Jeova uh. Ahok, mwet nuhkewa sahyac suc tiac wi ke luhlahlfongi uh enenuh in akihlen suhnak lasr uh.​—Riti Rome 12:17, 18; Sie Peter 3:15.

20, 21. Meac kuhtuh mwe insewowo kuht kuh in eis ke kuht ahkkahlwemye suhnak pwacye nuh sin mwet kol pucspucs?

20 Mwet sap Paul el suhmuhslah: “Kowos in suhnakihn mwet nuhkewa.” (Sie Peter 2:17) Lwelah kuht in ahkkahlwemye suhnak lasr pacl nuhkewa nuh sin mwet sahyac uh. Ke mwet uh akihlen lah kuht suhnakuhnuhltahl, eltahl ac arlacna fwefwelac. Esam, ohiyac se inge suhkwac liyeyuck sin mwet uh ke pacl inge. Pwacnacng, kuht fin ahkkahlwemye ohiyac se inge, pa inge sie inkacnek ma kuht ahkos masap lal Jesus inge: “Kowos sang kahlwem lowos in tohlack ye muhtuhn mwet uh, tuh elos in kuh in liye orekma wo lowos, ac kaksakihn Pahpah tomowos suc inkuhsrao.”​—Matthew 5:16.

21 Ke facl se kuht muhta kac mihsenge inge, mwet inse puhsisacl pa suk ma pwacye kacl God uh. Ke pacl se kuht suhnakihn mwet in sucu, ke congregation ac ke acn uh, ma inge ac kuh in pwacnma mwet sahyac ac mokleltahl in wi kuht alu nuh sin God. Sie ma wolacna pa inge! Tuhsruhktuh, finne ma inge tiac sikyak, srackna oasr ma se kuht kuh in luhlahlfongi na pwacye. Suhnak lasr nuh sin mwet uh ahkinsewowoye Jeova God ac kahsre kuht in muhtana in luhngse lal uh. Wacngihn kuhtwena mwe sang ma wo ac yohk liki ma inge.

^ par. 17 Ke Kuhtuh Pac Mwe Ahkuhtweyac ke mwe lutlut se inge “Piyac Pacl Ma Muhtwacn se Enenuh in Sunyac Insifacl ac Efuh?” ahkkahlwemye ke kuhtuh pac inkacnek ma kahs in kahsruh inge kuh in orekmakinyuck nuh kac.