Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 KUHTUHPAC MWE AHKUHTWEYAC

Ma Bible uh Ahkkahlwemye ke Divorce ac Fahsrelihk

Ma Bible uh Ahkkahlwemye ke Divorce ac Fahsrelihk

Jeova el luhngse mwet pahyuck uh in sruokyacna wuhlelah laltahl nuh sin mukul tuhmwacltahl kuh muhtwacn kiyacltahl uh. Ke Jeova el oracni mukul ac muhtwacn se emeet in pahyuck, El fahk: “Sie mukul el . . . ac fulyang nuh sin muhtwacn kiyacl, ac eltahl ma sefannalac.” Tok, Jesus el sifwil pacna kalweni kahs inge ac fahk: “Ke ma inge, ma God el falseni, lwelah mwet uh in tiac esaclihk.” (Genesis 2:24; Matthew 19:3-6) Pwacnacng, Jeova ac Jesus eltahl liye oakwuck ke macruht uh oacna sie wuhlelah fokoko inmahsrlon sie mukul ac muhtwacn ma oan ne ke sie seltahl misac. (Sie Corinth 7:39) Ke srihpen macruht uh ma na sacohk se, tiac mwe sritacl se pa in divorce. Sahyen ma inge, Jeova el sruhnga ke mwet luo divorce ac wacngihn srihpac wo kac ma fal nuh ke Bible.​—Malachi 2:15, 16.

Meac srihpac sefanna ma oruh divorce in fal nuh ke Bible? Jeova el sruhnga orekma in kosro uh. (Genesis 39:9; Luo Samuel 11:26, 27; Psalm 51:4) Ke srihpen el arlacna kwase orekma in kosro uh, pwacnacng el lwelah tuh in pa inge srihpac sefanna ma fal nuh sin sie mwet elan divorce. (Ke kuhtuh mwe ahkuhtweyac lah meac kalmen orekma in kosro, som nuh ke Sapta 9, paragraph 7, ma ahkuhtweyac lah meac orekma in kosro uh.) Fin sie mwet ke moul in pahyuck se oruh orekma in kosro, Jeova el lwelah mwet se ma oaru an in sulaclah el fin ac wi na mwet se ma oruh orekma in kosro ingacn kuh el fin ac divorce. (Matthew 19:9) Mwet oaru sacn fin suk in divorce, sulaclah lal uh tiac sruhngacyuck ye muhtuhn Jeova. Oacyacpac, mwet lili uh tiac pahtok kuhtwena mwet in divorce. Mweyen, kuhtuh pacl uh mwet oaru sacn ac kuh in sulaclah in wi na mukul tuhmwacl kuh muhtwacn kiyacl uh, yohkna el fin auliyak na pwacye. Mwet suc oasr srihpac ma fal nuh ke Bible in divorce uh enenuh in sifacna oruh sulaclah se inge ac sifacna ahkolah nuh ke kuhtwena ma ma ac kuh in sikyak kuh tuhkuh ke sulaclah lal uh.​—Galatia 6:5.

 Ke kuhtuh ohiyac ma arlacna upac inmahsrlon siacnyacn uh, oasr mwet lili ma sulaclah in fahsrelihk * kuh divorce, finne mwet se sahyac an tiac oruh orekma in kosro. Ke kain in ohiyac inge, Bible uh fahk lah mwet se ma som liki mukul tuhmwacl kuh muhtwacn kiyacl uh, “el enenuh in muhtana ac tiac sifwil pahyuck, kuh elan suk in ahkwoye inmahsrloltahl ac sifwil fohlohklac.” (Sie Corinth 7:11) Mwet lili se inge tiac sukohsohk in suk sie pac mwet ah elan sifwil pahyuck nuh se. (Matthew 5:32) Nuhnkuh ke kuhtuh ohiyac ma oruh kuhtuh mwet uh in nuhnkuh muh fal in fahsrelihk.

Sruhnga in sang mwe enenuh luhn sucu lal. Sucu se ac kuh in suhkahsruhp ac wacngihn mwe enenuh laltahl nuh ke moul ke srihpen mukul tuhma el sulaclah in tiac sang mwe enenuh laltahl uh, el finne kuh. Bible uh fahk: “Sie mwet fin tiac karuhnguhnwacng sucu lal . . . suc muhta in lohm sel, el lahfwekihn luhlahlfongi lal, ac ke el oruh ohinge el kuluk liki na mwet se ma tiac luhlahlfongi.” (Sie Timothy 5:8) Fin sie mukul pahyuck el sruhnga ekuhllah ohiyacl, muhtwacn kiyacl uh ac kuh in sulaclah lah el ac enenuh in som liki mukul tuhmwacl uh tuh elan kuh in karihngihn mwe enenuh lal sifacna ac luhn tuhlihk nahtuhl uh. Mwet elder ke congregation uh enenuh in konwacack meet fin pwacye lah mukul lili sacn tiac ahkpwacyeye kunohkohn lal in karihngihn mwe enenuh luhn sucu lal uh. Mweyen, sie mwet suc sruhnga karihngihn mwe enenuh luhn sucu lal uh ac kuh in sisilac liki congregation uh.

Acnwuck upac. Fin mukul kuh muhtwacn pahyuck se luhngse in acnwuck, ma inge ac kuh in oruh moul luhn mwet se sahyac an in oasr ke mwe sensen. Fin mwet se ma luhngse in acnwuck ingacn el sie mwet lili, mwet elder uh enenuh in konwacack fin ma inge pwacye kuh suhtuhuh. Kasrkuhsrak ac orekma suhlallacl uh ac kuh in oruh sie mwet in sisilac liki congregation uh.​—Galatia 5:19-21.

Tulokihn mwet se sahyac an ke alu lal. Sie mukul kuh muhtwacn pahyuck el ac kuh in oruh upac nuh sin mwet se sahyac  an in oruh alu lal uh. El ac kuh pac in oruh mukul tuhmwacl kuh muhtwacn kiyacl uh in kuhnahoslah masap luhn God uh. Ke kain in ohiyac inge, mukul kuh muhtwacn se ma upac nuh se in oruh alu lal uh el ac enenuh in sulaclah el fin luhngse eltahl in fahsrelihk. Sahp, ke srihpen pa inge inkacnek sefanna ma el kuh in “ahkos God, ac tiac mwet uh.”​—Orekma 5:29.

Ke ohiyac upac nuhkewa, in oacna ke ma kuht sramsramkihn tari inge, wacngihn kuhtwena mwet ma enenuh in pahtok mukul kuh muhtwacn se ma oaru ke pahyuck lal an elan som liki kuh muhtana yurin mukul tuhmwacl kuh muhtwacn kiyacl uh. Finne mwet lili ac mwet elder uh sang mwe ahkkweye kuh kahsruh ma tuhkuh ke Bible, eltahl tiac kuh in etuh ma nuhkewa ma sikyak inmahsrlon siacnyacn se. Jeova muhkwena pa kuh in liye uh. Oacyacpac, sie muhtwacn kuh mukul pahyuck el tiac ahkfuhlwactye God kuh oakwuck in macruht uh el fin laheslah upaciyen ohiyac ma el oasr kac uh tuh elan tilac muhta yurin mukul tuhmwacl kuh muhtwacn kiyacl uh. Jeova el etuh pwacpa suhlallacl luhn kuhtwena mwet in fahsrelihk, finne sie mwet el srihke in okanlah. Pwacye, “ma oreklac nuhkewa fin facluh oan lwemtuhlwacack ye muhtahl. Ac kuht nuhkewa fah enenuh in fahkkuhtyak nuh sel.” (Hebrew 4:13) Tuhsruhktuh, fin ohiyac upac luhn sie mwet tiac eklac ke lusen pacl na loeloes, wacngihn kuhtwena mwet suc enenuh in ahkkulukyacl fin sulaclah lal uh pa in fahsrelihk. Ke sahflahiyac uh, “kuht nuhkewa fah tu ye muhtuhn God in nuhnuhnkweyuck sel.”​—Rome 14:10-12.

^ par. 2 Kalmen fahsrelihk pa siacnyacn se tiac tuhkweni muhta, tuhsruhktuh eltahl srackna pahyuck.