Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 KUHTUHPAC MWE AHKUHTWEYAC

Ahksuwohsye Ma Upac ke Business

Ahksuwohsye Ma Upac ke Business

In oacna ma sihmlac ke Sie Corinth 6:1-8, mwet sap Paul el sramsramkihn alein inmahsrlon mwet lili ke congregation uh. El toasrlah ke kuhtuh sin mwet lili fin acn Corinth inge “usack nuh ye muhtuhn mwet nuhnuhnkuh luhn mwet sesuwohs” ma upac laltahl uh. (Fuhs 1NW) Paul el ahkkahlwemye kuhtuh srihpac yohk ma pwacnacng mwet Christian  uh tiac enenuh in usack sie sin sie nuh ke court kuh in nuhnuhnkuh, a eltahl in sifacna ahkwoyelah inmahsrloltahl ke inkacnek ma oakiyucki ke congregation uh. Kuht srihke nuhnkuh ke kuhtuh srihpac ma oruh kahs in kahsruh inge sihmlac. Na kuht ac tuni kuhtuh pac inkacnek sahyac ma kahs in kahsruh inge tiac arlac orekmakihnyuck nuh kac.

Fin oasr ma upac inmahsrlosr ac mwet lili wiyacsr uh, ke ip luhn business kuh acn, kuht ac enenuh in suk in ahkwoyelah ma upac inge ke inkacnek luhn Jeova, tiac ke inkacnek lasr sifacna. (Soakas 14:12) Oacna ke Jesus el ahkkahlwemye, ma wo emeet uh pa in ahkwoyelah kuhtwena ma upac ke pacl na sa meet liki ma inge yohkwelihk. (Matthew 5:23-26) Mwe ahsor se lah, kuhtuh sin mwet lili uh luhngse in akuhkuhin ac usack ma upac laltahl uh nuh ke acn in nuhnuhnkuh. Paul el fahk: “Ke kowos usack alein lowos nuh ke nien nuhnuhnkuh,” kom kuhtangyucklac tari. Ke inkacnek fuhkah? Sie srihpac yohk uh pa, mweyen kain in orekma inge ac kuh in ahkkulukyelah inen congregation lasr ac God suc kuht alu nuh se uh. Ke ma inge, kuht arlacna insese ke kahs lal Paul inge: “Mwet uh finne pihsre ma lowos kuh kuhtasrihk nuh suwos ac wo liki ke kowos usack nuh in nuhnuhnkuh.”​—Fuhs 7.

Paul el oacyacpac ahkuhtweyac lah God el oraclah oakwuck wo in ahkmihsye ma upac ke congregation uh. Mwet elder uh oacna mukul lili suc lahlmwetmwet ke srihpen etwacack laltahl ke ma pwacye in Bible uh. Paul el fahk lah eltahl “kuh in ahkmihsyelah alein inmahsrlon mwet Christian” ke ma upac “luhn moul.” (Fuhs 3-5) Jesus el ahkkahlwemye lah ke kuhtwena ma upac ma sikyak ke srihpen kahs in ahkkuluk ac kikiacp, ma inge enenuh in ahkwoyeyuck fal nuh ke step tolu inge: ma se meet kwacfeacng in ahkwoyelah ma ingacn inmahsrlomtacl muhkwena. Fin tiac orekma step se meet an, step ahkluo pa in us sie kuh luo mwet loh an. Fin tiac orekma step se ahkluo an, step ahktolu pa in usack ma upac inge nuh yurin mwet elder ke congregation uh.​—Matthew 18:15-17.

Tuhsruhktuh, mwet elder uh tiac lawyer kuh mwet nuh ke business pwacnacng tiac ma kunacltahl in sang kahs in kahsruh  nuh ke masap kuh ke business laltahl an. Eltahl ac tiac fahk nuh sin mwet suc sun ma upac inge lah meac eltahl ac oruh in ahkwoyelah ma upac ke business kuh acn laltahl uh. A, eltahl ac sang kahsruh ma fal nuh ke Bible nuh sin mwet nuhkewa suc sun ma upac ingacn ac inseselac ke sie inkacnek mislac. Fin oasr kuhtwena ma upac, sahp eltahl ac luhngse pac in eis kahsruh luhn mwet liyacacng suc fuhfahsryucsr nuh ke congregation pucspucs (circuit overseer) kuh mukul lili suc karihngihn ohfuhs luhn Mwet Loh luhn Jeova uh. Finne ohinge, ac oasr pacl kuh ohiyac ma ac tiac puhtatyang nuh ke kahs in kahsruh lal Paul inge ac enenuh in utuckyak nuh ke court. Piyac kuhtuh sin ohiyac inge?

Ke kuhtuh ma upac ma sikyak uh, sahp ac enenuh in utuckyak nuh in court ke srihpen pa inge inkacnek sefanna in ahkfalye masap luhn acn uh ac in oruh ke inkacnek mislac. Ke kuhtuh mwe puhpuhlyuck, oakwuck in eis divorce, insurance, mwe usru, konwacack karihngihnyuck ma wo nuh sin sie tuhlihk, in sang luhpan mani ma enenweyuck in karihngihn sie tuhlihk, ac wi ke mwet suc enenuh in ahkfalye misac la ke business ma bankrupt. Oasr pac pacl ma sie mwet lili el ac puhla muh el enenuh in usack sie mwet ma usaclwack nuh in court tuh in karuhnguhnuhl sifacna. *

Ma upac ingacn fin utuckyak nuh ke court ac orek ke inkacnek mislac, ma inge ac tiac kuhnahoslah kahs in kahsruh lal Paul ke Bible inge.  * Finne ohinge, ma yohk srihpac emeet nuh sin sie mwet Christian uh pa in ahkmuhtahlye inen Jeova ac suk mislac ac inse sefanna luhn congregation uh. Ma se meet ma mwet tuhma lutlut luhn Christ uh etweyuck kac uh pa luhngse laltahl uh ac “luhngse . . . el tiac nuhnkuh kacl sifacna.”​—Sie Corinth 13:4, 5; John 13:34, 35.

^ par. 2 Sesahlah in sikyak, tuh oasr pacl ma mwet lili se oraclah ma na kuluk nuh sin sie pac, sahp rape, acnwuck, uniyac mwet kuh pihsrapasr. Ke kain in pacl inge, ac tiac kuluk in fahkwack nuh sin police kuh mwet nuhnuhnkuh luhn acn uh, finne ma inge ac kuh in lohngyuck in court.

^ par. 3 Ke kuhtuh pac mwe ahkuhtweyac, nuhnak muhnahs liye The Watchtower, March 15, 1997, sra 17-22, ac October 15, 1991, sra 25-28.