Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 SAPTA 7

Yac Kom Ahksacohkye Moul Oacna God

Yac Kom Ahksacohkye Moul Oacna God

“Kom pa muhtwacwacyen moul nuhkewa.”​—PSALM 36:9.

1, 2. Mwe sang sacohk fuhkah se sin God ma arlacna yohk srihpac ke pacl inge, ac efuh?

PAHPAH tuhmwacsr suc inkuhsrao el use nuh sesr sie ma na sacohk, pa mwe sang luhn moul oacna mwet suc kuh in etahi ohiyac pucspucs lal uh. (Genesis 1:27) Ke srihpen mwe sang na sacohk se inge, oruh kuht kuh in kahlwem ke kahs in kahsruh luhn Bible uh. Kuht fin orekmakihn ma inge, kuht kuh in kapkapwack ke luhngse lasr nuh sin Jeova ac ‘ke orekma ac pahlah lasr kuht kuh in akihlen inmahsrlon ma wo ac ma kuluk.’​—Hebrew 5:14.

2 Kuh lasr in nuhnkuh ac orekmakihn kahs in kahsruh luhn Bible uh arlacna yohk srihpac ke pacl inge, mweyen arlacna puhseni kain in oakwuck ac mwe elyah fin facluh. Ac ke srihpac se inge, masap pucspucs tiac kuh in sruok ohiyac nuhkewa ma ac kuh in sikyak ke moul lasr uh. Sie lah ke science ma lutlut ke ip luhn ono luhmahlah ma inge yohk na nuh ke kain in ono ac inkacnek in ono ma orekmakihn srah. Ma inge arlacna yohk srihpac nuh sin mwet nuhkewa suc luhngse in ahkos Jeova. Tuhsruhktuh, kuht fin kahlwem ke kahs in kahsruh ke Bible ma fal nuh kac uh, kuht enenuh in sulaclah in wo tuh kuht in kewana ahkfalye mwe enenuh luhn nuhnak ac puhlakihn lasr uh ac oacyacpac muhtana in luhngse luhn God. (Soakas 2:6-11) Nuhnkuh ke kuhtuh kahs in kahsruh inge.

 MOUL AC SRAH UH SACOHK

3, 4. Piyac pacl se emeet ma Bible uh ahkkahlwemye ke sacohkiyen ac muhtahliyen srah? Ac masap fuhkah luhn God ahkkahlwemye ma inge?

3 Pacl se emeet ma Jeova el ahkkahlwemye kuhpahsr luhn moul ac srah, wekuhnacng muhtahl ac sacohkiyen ma inge, pa tiac paht tukun Cain el unilyac Abel. God el fahk nuh sel Cain: “Srahn tamuhlel lom pa wowoyak nuh sihk infohk uh me, oacna sie puhsra ma sukok fohlohksahk.” (Genesis 4:10) Ye muhtuhn Jeova, srahl Abel luhmweyuck nuh ke moul lal, suc ahkfototoyeyucklac ke inkacnek in ahkmas.​—Hebrew 12:24.

4 Tukun sronot ke lwen lal Noah ah, God el lwelah mwet uh in mongo ikoac, tuhsruhktuh in tiac kang srah kac an. God el fahk: “A ikoac wi moul lal, suc srahl, kowos fah tiac mongo. Ac pwacye srahwos, suc srahn moul lowos Nga fah siyuck.” (Genesis 9:4, 5, BMK) Masap se inge ma nuh sin tuhlihk nuhkewa nahtuhl Noah ac fahfahsruh nwe mihsenge. Ma inge sifwilpac ahkkahlwemye yohk srihpaciyen kahs luhn God nuh sel Cain muh moul luhn ma orahkrahk nuhkewa uh luhmweyuck nuh ke srah. Masap se inge oacyacpac ahkpwacyeye lah mwet nuhkewa suc tiac suhnakihn moul ac srah ac fah nuhnuhnkweyuck sin Jeova, suc Sropon moul.​—Psalm 36:9.

5, 6. Masap ma ituckyang nuh sel Moses ac ahkkahlwemye fuhkah lah srah uh arlacna sacohk ac muhtahl? (Liye pac pohk se inge  “Suhnakihn Moul luhn Ma Orahkrahk uh.”)

5 Ma pwacye ac ma yohk srihpac luo inge oacyacpac ahkkahlwemyeyuck ke masap ma ituckyang nuh sel Moses ac. Leviticus 17:10, 11 fahk: “Kuhtwena mwet . . . fin kang ikoac ma srackna oasr srah kac, LEUM GOD El ac fah ngwetlah luhkel, ac mwet sac fah tiac sifwil pac oekyuck muh el sie sin mwet lal. Moul luhn ma oasr moul la nuhkewa oasr ke srah, ac pa ingacn srihpen LEUM GOD El sapkihn tuh srah nuhkewa fah okwoklac nuh fin loang uh in eislah ma kuluk luhn mwet uh. Srah, suc sang moul, el eislah ma  kuluk.”​—Liye pohk se inge “ Srah Uh Kuh In Afuhnlah Ma Kuluk.”

6 Fin srahn sie ma orahkrahk tiac okwoklac nuh ke mwe loang uh, na enenuh in okwoklac nuh infohk uh. Ke kahs in puhpuhlyuck, pa inge inkacnek ma sie moul ac kuh in fohlohk nuh yurin God, suc sang ma inge. (Deuteronomy 12:16; Ezekiel 18:4) Tuhsruhktuh, lohacng nuh kac lah mwet Israel in pacl meet ah tiac enenuh in eislah finne tul in srah nuhkewa ma luhlah ke ikwen kosro inge. Ma yohk srihpac ah pa in ahksohrohryeyucklac srahn ma orahkrahk inge ke pacl na sa tukun acnwucki. Eltahl fin oruh ma inge, na eltahl kuh in kang ma inge ac tiac ahkkulukyeyuck nuhnak ac puhlakihn laltahl uh mweyen eltahl ahkkahlwemye suhnak nuh sin God suc use moul.

7. David el ahkkahlwemye fuhkah suhnak nuh ke sacohkiyen srah?

7 David, ‘mwet se ma [God] el insewowo se’ el kahlwem ke kahs in kahsruh ke masap luhn God ke srah. (Orekma 13:22) Ke sie pacl ah, el maluhlac ac tolu sin mwet lal inge som utyak nuh ke nien ahktucktuck kuh acn luhn mwet lokoalok laltahl uh in ut kof ke luhf in kof laltahl, na eltahl us tuhkuh ac sang nuh sel David. Meac David el oruh? El fahk: “Nga koflahna nihm kof se inge, mweyen ac oacna ngan nihm srahn mwet suc pihlacsraclah moul lalos inge!” Nuh sel David, el fin nihm kof inge na ac oacpacna elan nihm srahn mwet lal suc pihlacsraclah moul laltahl in som eis. Pwacnacng, el finne maluhlac, el “okoaclah nuh infohk uh tuh in mwe kihsac nuh sin LEUM GOD.”​—Luo Samuel 23:15-17.

8, 9. Yac nuhnak luhn God ke moul ac srah uh eklac ke oakiyucki congregation luhn mwet Christian uh? Ahkuhtweyac.

8 Ahok, Jeova el fahk nuh sel Noah elan tiac mongo srah, ac ke yac 900 tohkoh sifwil pac sihmlac ma inge ke puk in masap ma ituckyang nuh sel Moses ac. Ke yac 1,500 tukun ma inge, nuhnak luhn Jeova ke srah uh tiac eklac. El mokle  un mwet lili akmuhsralah suc karihngihn congregation nuhkewa in pacl meet ah in suhmuhslah ma inge: “Kuht ac nguhn muhtahl, tuhkweni inseselac in tiac fihliyac kuhtwena ma toasr fowos sahyacn masap ma enenweyuck inge. Kowos in tiac kang kuhtwena mongo ma kisaclah nuh sin ma sruhloaclah, tiac mongo srah, tiac kang kuhtwena ma loksaklah, ac karihngihn kowosyang liki fohkfohk luhn orek kosro.”​—Orekma 15:28, 29.

9 Kahlwem lah un mwet lili inge akihlen lah srah uh ma sacohk se ac fin orekmakihnyuck ke inkacnek suhfal, ma inge kuluk oacna alu nuh ke ma sruhloaclah ac orekma in kosro. Pa inge pac luhlahlfongi luhn mwet Christian ke pacl inge uh. Oacyacpac, ke srihpen eltahl nuhnkuh ke kahs in kahsruh ke Bible uh ac orekmakihn pac ke moul laltahl uh, eltahl kuh in ahkinsewowoye Jeova ke pacl ma eltahl enenuh in oruh sulaclah laltahl nuh ke srah uh.

INKACNEK IN ONO KE SRAH

Nga ac ahkuhtweyac fuhkah nuh sin sie doctor ke sulaclah luhk nuh ke ip srihsrihk ke srah uh?

10, 11. (a) Meac nuhnak luhn mwet Loh luhn Jeova ke ituck srah kuh ip ahkosr ma yohk ke srah uh? (b) Ip fuhkah se ke srah ma kais sie mwet Christian ac enenuh in sifacna oruh sulaclah lal nuh kac uh?

10 Mwet Loh luhn Jeova uh akihlen lah kalmen “tiac mongo srah” pa eltahl in tiac eis nuh ke mahnoltahl kuh sang srah laltahl in orekmakihnyuck sin mwet sahyac. Ke srihpen suhnak laltahl nuh ke masap luhn God, eltahl tiac pac eis ip yohk ahkosr ke srah inge pahngpahng: red cells, white cells, platelets, ac plasma.

11 Ke pacl inge, tukun lihklihki ip ahkosr ma yohk ke srah inge, oasr ip srihsrihk pucspucs ma orekmakihnyuck pac ke inkacnek pucspucs. Yac sie mwet Christian el kuh in eis kuh orekmakihn ip srihsrihk inge? Yac el liye ma inge oacna “srah”? Kais sie mwet enenuh in sifacna oruh sulaclah lal ke ip se inge. Ma inge oacpacna nuh ke inkacnek in ono pac sahyac oacna hemodialysis, hemodilution, ac cell salvage ma orekmakihn srahn mwet sacn sifacna, ac ma inge enenuh  in tiac ma itucklac oan sahyac nwe sifwil orekmakihnyuck.​—Liye ke Kuhtuh Pac Mwe Ahkuhtweyac ke mwe lutlut se inge “Ip Srihsrihk ke Srah ac Inkacnek In Ono Pucspucs.”

12. Meac kuht enenuh in nuhnkuh ac oruh ke sulaclah ma tuhkuh ke nuhnak ac puhlakihn lasr uh?

12 Mwet se fin oruh sulaclah lal nuh ke sie ma, yac kalmac pa tiac arlac yohk srihpac nuh sin Jeova sulaclah  lal nuh ke ma inge? Moh, mweyen el luhngse na pwacye in etuh nuhnak ac srihpac nuhkewa lasr uh. (Riti Soakas 17:3; 24:12.) Pwacnacng, tukun kuht siyuck ke kahsruh luhn Jeova ac research ahkwoyac ke kain in ono kuh inkacnek in ono pucspucs, kuht enenuh in ahkos nuhnak ac puhlakihn inge ma ahkpahyeyuck ke Bible uh. (Rome 14:2, 22, 23) Pwacye, mwet sahyac uh tiac enenuh in kwacfe kuht in ukwe sulaclah laltahl uh ac kuht tiac pac enenuh in siyuck, “Meac kom ac oruh kom fin sun ohiyac se nga oasr kac inge?” Ke kain in ohiyac inge, kais sie mwet Christian enenuh in “sifacna fosrngahkihn ma kunacl.” *​—Galatia 6:5; Rome 14:12; liye pohk se inge “ Yac Nga Nuhnkuh Ke Srah Uh Oacna Sie Ma Muhtahl?

MASAP LUHN JEOVA UH AHKKAHLWEMYE LUHNGSE LAL OACNA SIE PAHPAH

13. Meac masap luhn Jeova ac meac kahs in kahsruh ke Bible uh ahkkahlwemye kacl? Sang sie mwe puhpuhlyuck an.

13 Masap ac kahs in kahsruh luhn Bible uh ahkkahlwemye lah Jeova el mwet lahlmwetmwet se suc oraclah masap ac oacyacpac Pahpah luhngse se suc nuhnkuh yohk ke ma ac wo nuh sin tuhlihk nahtuhl uh. (Psalm 19:7-11) Jeova el oraclah masap se inge in fahsr liki kuh ‘liyekuhtyang . . . liki srah’ mweyen ma inge muhtahl. Tuhsruhktuh, oasr pac ma wo sahyac ke kuht fahsr liki orekmakihnyen srah uh. Ke sie mwe puhpuhlyuck, ma inge karihngihn kuht liki kuhtwena mas ac ma upac ma kuh in sikyak ke ituck srah uh. (Orekma 15:20, BMK) Ma inge arlac pwacye ke srihpen doctor pucspucs eltahl ahkkahlwemye lah, inkacnek in ono se ma wo emeet uh pa inkacnek ma tiac orekmakihn srah. Nuh sin mwet Christian pwacye, kain in ma konweyuckyak inge ahkkahlwemye na pwacye lahlmwetmwet yohk luhn  Jeova ac luhngse yohk lal oacna sie pahpah.​—Riti Isaiah 55:9; John 14:21, 23.

14, 15. (a) Luhngse luhn God nuh sin mwet lal uh kahlwem ke masap fuhkah? (b) Kom ac orekmakihn fuhkah ke moul lom kahs in kahsruh ma oraclah masap inge?

14 Luhngse luhn God nuh ke moul luhn mwet Israel in pacl meet ah arlac kahlwem ke masap pucspucs ma el sang nuh seltahl ah. Ke sie mwe puhpuhlyuck, el sapkihn mwet Israel nuhkewa in kalkalweack fin lohm seltahl uh tuh in wacngihn kuhtwena mwe ongaiyac sikyak, ke srihpen eltahl kwacna orekmakihn fin lohm seltahl inge. (Deuteronomy 22:8; Sie Samuel 9:25, 26; Nehemiah 8:16; Orekma 10:9) God el oacyacpac sapkihn nuh sin mwet suc oasr cow mukul nahtuh in karuhnguhnwacng tuh in wacngihn  mwet sun ongaiyac kac. (Exodus 21:28, 29) Mwet se fin pihlesruh masap inge, el ahkkahlwemye lah wacngihn na pwacye suhnak lal nuh ke moul luhn mwet sahyac uh ac ma inge ac kuh in oruh elan eis mwacta ke misac luhn mwet sahyac uh.

15 Kom ac orekmakihn fuhkah ke moul lom an kahs in kahsruh ma oraclah masap inge? Kom kuh in nuhnkuh nuh ke mwe kahsruhsr kuh sitosah okom an, ohiyen kahsruhsr lom, kosro nuhtum, lohm sum, acn in orekma lom, ac sulaclah lom nuh ke mwe ahkengan. Ke kuhtuh acn uh, misac pa sie mwe ongaiyac yohk ma sikyak nuh sin tuhlihk fuhsr uh. Ke inkaiyen pacl uh, eltahl oruh ma na sensen nuh ke moul laltahl uh. Tuhsruhktuh, mwet fuhsr suc luhngse in muhtana in luhngse luhn God uh ahksacohkye moul ac tiac suk mwe ahkengan ma arlacna sensen. Eltahl ac tiac oacna mwet lahlfon suc nuhnkuh muh eltahl srackna fuhsr pwacnacng eltahl ac tiac kuh in sun ma upac. Eltahl engankihn moul in fuhsr laltahl uh ke eltahl karihngihn moul laltahl ac tiac oruh kuhtwena mwe sensen ma ac kuh in kol nuh ke ongaiyac.​—Ecclesiastes 11:9, 10.

16. Kahs in kahsruh fuhkah ke Bible ma kuh in orekmakihnyuck nuh ke sisi tuhlihk ma soenna isuslac? (Liye pac footnote.)

16 Moul luhn sie tuhlihk suc soenna isuslac sacohk pac ye muhtuhn God. Ke pacl luhn mwet Israel in pacl meet ah, mwet se fin ahkngalye sie muhtwacn pihtuctuc ac el kuh ahwowo nahtuhl an fin misac kac, God el liye muh mwet se ma oraclah ma inge el sie mwet ahkmas ac el enenuh in moli “moul molin moul.” * (Riti Exodus 21:22, 23.) Ke pacl  inge, tausin pucspucs sin muhtwacn uh uniyac ahwowo ke insiacltahl tuh eltahl in tiac elyah ke kunohkohn in tuhfahlah tuhlihk inge. Muhtwacn pucspucs inge oraclah sulaclah se inge tukun eltahl moulkihn moul fohkfohk kuh ke srihpen eltahl luhngse in tahfwelah na moulkihn kain in moul inge. Ke pacl se Jeova el liye ma inge uh, arlacna ahkngalye insiacl.

17. Kom ac ahkkweye fuhkah sie muhtwacn suc sislah tuhlihk liki insiacl meet liki el etwaclah ke oakwuck luhn God?

17 Tuhsruhktuh, fuhkah nuh sin sie muhtwacn suc sislah tuhlihk liki insiacl meet liki el etwaclah ma pwacye luhn Bible? Yac el tiac kuh in eis nuhnak muhnahs luhn God? Moh, tiac pa inge kalmeyac! Mweyen, sie mwet suc auliyak na pwacye el kuh in luhlahlfongi lah Jeova el nuhnak muhnahs nuh sel ke srihpen mwe kihsac lal Jesus ke srahl. (Psalm 103:8-14; Ephesus 1:7) Ahok, Christ sifacna el fahk: “Nga tiac tuhkuh in suk mwet suwohswohs, a mwet kuluk.”​—Luke 5:32.

FAHSR LIKI NUHNAK IN SRUHNGA!

18. Bible uh ahkkahlwemye fuhkah srihpac yohk se ma oraclah ahkmas uh?

18 Jeova el sruhnga kuht in ahkngalye mwet sahyac uh. Sahyen ma inge, el luhngse kuht in eislah liki insiacsr kuhtwena nuhnak in sruhnga, ac ma inge pa sropon ahkmas. Mwet sap John el suhmuhslah: “Kuhtwena mwet suc sruhnga mwet wiyacl, el sie mwet ahkmas.” (Sie John 3:15) Sie mwet suc nuhnak ohinge el tiac sruhnga muhkwena mwet lili wiyacl a el oacyacpac finsrakkihn elan misac. Kasrkuhsrak lal uh ac kuh in kahlwem ke kahs kuluk kuh sramsram kikiacp ke sie ma sikyak ma ac kuh in sang nuhnuhnkuh luhn Jeova nuh sel. (Leviticus 19:16; Deuteronomy 19:18-21; Matthew 5:22) Pwacnacng, fuhkah luhpan yohk srihpaciyac nuh sesr in eslah kuhtwena sruhnga liki insiacsr in tiac oan na!​—James 1:14, 15; 4:1-3.

19. Meac sie mwet suc karihngihn moul lal ke kahs in kahsruh luhn Bible uh nuhnkuh ke kahs ma sihmlac in Psalm 11:5 ac Philippi 4:8, 9?

 19 Mwet suc ahksacohkye moul oacna Jeova ac luhngse  in muhtana ke luhngse lal uh ac oacyacpac fahsr liki kain in ma suhlallacl nuhkewa. Psalm 11:5 fahk lah Jeova “El arulacna kwase mwet suc luhngse oruh ma suhlallacl.” Fuhs se inge tiac ahkkahlwemye muhkwena ke ohiyen God, a ma inge kahs in kahsruh pac nuh ke moul. Ma inge mokle mwet suc luhngse God eltahl in fahsr liki kuhtwena mwe ahkengan ma ahkkweye orekma suhlallacl. In oacpacna, kahs inge Jeova el “God suc acse mislac,” kwacfe mwet kuhlwacnsap lal uh in nwacklah nuhnak laltahl ac insiacltahl ke luhngse, ma suwohs, ac ma kaksakihnyuck ma oraclah mislac.​—Riti Philippi 4:8, 9.

TIAC KUHPAHSR NUH KE U MA OASR MWACTA KE SRAHN MWET

20-22. Oakwuck fuhkah luhn facluh ma mwet Christian uh tiac wi kac? Efuh?

20 Ye muhtuhn God, facluh se lal Satan inge nwacnwaclah ke mwacta ke srahn mwet sahyac. Oakwuck luhn politic in oacna ma Bible uh luhmahlah oacna kosro suhlallacl soko, el onelah million sin mwet ac kuhtuh seltahl mwet kuhlwacnsap luhn Jeova. (Daniel 8:3, 4, 20-22; Fwackyuk 13:1, 2, 7, 8) Business ac science, sang kahsruh ac ahkkweye orekma luhn kosro suhlallacl soko inge in oraclah kuhfwen mwe mweun na luhlahp, ac ma inge oraclah mani yohk. Ma na pwacye se lah “facluh nohfohn . . . oan ye kuh luhn el suc kuluklacna”!​—Sie John 5:19.

21 Ke srihpen mwet tuhma lutlut lal Jesus uh “tiac ma luhn facluh” pwacnacng eltahl tiac wi ke kuhtwena u ke politic kuh ke mweun. Pa inge sie pac srihpac ma pwacnacng eltahl tiac eis mwacta ke moul luhn mwet sahyac. * (John 15:19; 17:16) Ac in etahi Christ, eltahl tiac fohlohkihn kasrkuhsrak laltahl ke pacl mwet sahyac uh oruh mwe kalyei nuh seltahl. Tuhsruhktuh, eltahl ahkkahlwemye  luhngse nuh sin mwet lokoalok laltahl uh ac oacyacpac puhruhe kacltahl.​—Matthew 5:44; Rome 12:17-21.

22 Yohk liki ma inge nuhkewa, mwet Christian pwacye uh tiac kuhpahsr nuh ke mukwikwi luhn Babylon luhlahp, suc pa alu kikiacp nuhkewa fin facluh nohfohn ma eis mwacta yohk ke srahn mwet pucspucs. Bible uh fahk lah “srahn mwet pahluh ac mwet luhn God uh konweyuckyak in el ahok, srah kaclos nuhkewa suc acnwucki fin facluh.” Pwacnacng, Bible uh sensenkackihn kuht: “Mwet luhk, kowos in kahinglac liki Babylon Luhlahp.”​—Fwackyuk 17:6; 18:2, 4, 24.

23. Meac kalmac in som liki Babylon Luhlahp?

23 In som liki Babylon Luhlahp, oasr ma sie mwet el enenuh in oruh sahyacn el som eislah inel liki alu ingacn. Kuhtuh sin ma el enenuh in oruh inge pa in sruhnga orekma kuluk ma alu kikiacp uh lwelah kuh ahkkweye, oacna orekma in kosro, kuhpahsr nuh ke politic ac in suk mwe  kahsruhp ke inkacnek rahpkuh. (Riti Psalm 97:10; Fwackyuk 18:7, 9, 11-17) Kuht sruhnga kuhpahsr nuh ke ma inge.

24, 25. (a) Meac oruh God el kuh in ahkkahlwemye pahkotwen nuh sin mwet se suc auli ke mwactan ma kuluk lal uh? (b) Ma inge luhmweyucklac fuhkah ke pacl luhn mwet in Bible uh?

24 Meet liki kais sie sesr wuhlelah moul la ac bacptaislac, kuht tuh wi kahsruh kuh ahkkweye oakwuck lal Satan uh ac in eis mwacta ke moul luhn mwet sahyac. Tuhsruhktuh, ke srihpen kuht ekuhllah ohiyacsr, kuht ahkkahlwemye luhlahlfongi lasr nuh ke mwe kihsac ke misac luhn Christ ac wuhlelah moul lasr nuh sin God. Ke srihpac se ingacn, kuht eis pahkotwen ac nuhnak muhnahs luhn God ac mwe karihngihnyuck luhn Jeova liki kuhtwena ma ma ac ahkkulukye fototo lasr nuh sel uh. (Orekma 3:19) Mwe karihngihnyuck se inge luhmweyuck nuh ke siti in molwelah ke pacl luhn mwet in Bible ah.​—Oekyuk 35:11-15; Deuteronomy 21:1-9.

25 Oakwuck se inge orek fuhkah? Mwet Israel se fin tahfonglac ac oraclah mwet se misac, el enenuh in kahinglac nuh ke sie siti in molwelah. Tukun mwet nuhnuhnkuh uh oraclah sulaclah laltahl uh, mwet se ma tahfonglac eislah moul luhn mwet sac, el enenuh in muhta ke siti in molwelah ne ke na mwet tol fuhlwact sacn misac. Na, el ac fah sukohsohk in som muhta ke kuhtwena acn sahyac. Mwe srihkasrak na wo se pa inge ke pahkotwen luhn God ac sacohkiyen moul luhn mwet uh nuh sel! In oacna siti in molwelah se inge, ke pacl inge mwe sang luhn God uh pa mwe kihsac ke misac luhn Christ. Ma inge karihngihn kuht liki misac ke srihpen kuht tahfonglac ac kuhnahoslah masap luhn God ke sacohkiyen moul ac srah. Yac kom ahksacohkye mwe sang se inge? Kom ac ahkkahlwemye fuhkah lah kom ahksacohkye? Sie inkacnek an pa ke kom suli mwet sahyac uh in wi kom in eis mwe molwelah ke siti se inge,  yohk na ke “mwe ongaiyac luhlahp uh apkuhran me inge.”​—Matthew 24:21; Luo Corinth 6:1, 2.

AHKSACOHKYE MOUL KE OREKMA IN FAHKWACK KE TOHKOHSRAHI UH

26-28. Ke inkacnek fuhkah ohiyac ma kuht oasr kac ke pacl inge uh oacna ma mwet pahluh Ezekiel el puhla? Kuht ac oruh fuhkah kuht in muhtana ke luhngse luhn God?

26 Ohiyac ma mwet luhn God ke pacl inge oasr kac uh ahkacsmakihnye kuht kacl mwet pahluh Ezekiel. Jeova el sapkihn elan kuhlwacnsuhpwacl oacna sie mwet san suc fahkwack kahs in sensen luhn God ke lohm sin mwet Israel. God el fahk, “Kom enenuh in tahfwelah nuh selos kahs in sensenkackihn ma nga ac usot nuh sum.” Ezekiel el fuhnuh pihlesruh ma sapkihnyuck nuh sel inge, el luhkuhn eis mwacta ke moul luhn mwet nuhkewa suc acnwucki fin acn Jerusalem. (Ezekiel 33:7-9) Tuhsruhktuh, Ezekiel el ahkos ac tiac eis mwacta ke moul luhn mwet sahyac uh.

27 Ke pacl inge, kuht apkuhran nuh ke sahflahiyen oakwuck se lal Satan inge. Pwacnacng, Mwet Loh luhn Jeova uh nuhnkuh ke orekma in fahkwack laltahl ke “lwen in fohlohksahk” luhn God uh wi pweng ke Tohkohsrahi uh oacna sie ma yohk srihpac ac sie kunohkohn sacohk. (Isaiah 61:2, BMK; Matthew 24:14) Yac kom sang kuhiyom kewa in wi ke orekma na yohk srihpac se inge? Mwet sap Paul el nuhnkuh yohk ke orekma in luti lal uh. Ke srihpac se inge, el kuh in fahk: “Nga nwacsnwacs liki srahn mwet e nuhkewa.” (Orekma 20:26, 27, BMK) Mwe srihkasrak na wo se pa inge nuh sesr in etahi!

28 Ke ma inge, in muhtana in luhngse luhn Jeova suc pahpah tuhmwacsr inkuhsrao, kuht enenuh in oruh nuhnak lasr ke moul ac srah in oacna nuhnak lal uh. Sahyen ma inge, kuht enenuh pac in nwacsnwacs kuh muhtahl ye muhtuhn Jeova oacna ke ma kuht ac fah sramsramkihn ke sapta se tok uh.

^ par. 12 Liye Awake! ke August 2006, sra 3-12, oreklac sin Mwet Loh luhn Jeova.

^ par. 16 Mwet suc suhmuhslah dictionary ke Bible uh fahk lah kahs Hebrew ke pohloh kahs inge “tiac ahkkahlwemye ke ma upac ma sikyak nuh sin muhtwacn pituctuc sacn muhkwena.” Lohacng pac nuh kac lah Bible uh tiac fahk kuhtwena ma ke matwacn sie tuhlihk ke insiacn muhtwacn se nuh ke nuhnuhnkuh ma mwet sacn ac fah eis sin Jeova uh.

^ par. 69 Liye ke Kuhtuh Pac Mwe Ahkuhtweyac ke mwe lutlut se inge “Ip Srihsrihk ke Srah ac Inkacnek In Ono Pucspucs” in eis etwacack yohk kac.