Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 KUHTUHPAC MWE AHKUHTWEYAC

Ahkfuhlwact nuh ke Flag, Vote ac Orekma In Kuhlwacnsuhpuh Acn Sum

Ahkfuhlwact nuh ke Flag, Vote ac Orekma In Kuhlwacnsuhpuh Acn Sum

Ahkfuhlwact nuh ke flag. Mwet Loh luhn Jeova uh luhlahlfongi muh sie inkacnek in alu pa in epahsrlah kuh ahkfuhlwactye flag wi on in akihlen mwet kol kuh muhtuhnfacl seltahl uh oacna mwe molwelah laltahl ac tiac ma nuh sin God. (Isaiah 43:11; Sie Corinth 10:14; Sie John 5:21) Tohkohsrah Nebuchadnezzar pa mwet kol luhn acn Babylon in pacl meet ah. El luhngse in fihlacngkihn wolacna lal ac moniyuck lal nuh ke alu, pwacnacng el tulohkuhnwack ma sruhloaclah na luhlahp se ac kwacfe mwet  nuhkewa ye kolyuck lal uh in epahsrlah ac alu nuh kac. Ke pacl sac pacna, oasr anthem kuh on luhn muhtuhnfacl seltahl uh ma sritaclkihnyuck. Tuhsruhktuh, tuhlihk mukul Hebrew tolu inge Shadrach, Meshach ac Abednego eltahl sruhnga in epahsrlah nuh ke ma sruhloaclah se inge, finne kalmac pa molin sulaclah laltahl uh pa misac.​—Daniel, sapta 3.

Carlton Hayes, sie mukul suc sruhmuhn ke moul luhn mwet, el fahk lah “ahkfuhlwact nuh ke flag uh pa sie inkacnek in alu ke pacl inge. Mukul uh eslah susu laltahl ke pacl ma flag uh utuck ahluhkeltahllah. Ac in ahkfuhlwactye flag uh, oasr on ma tuhlihk uh yuck ac poem ma oreklac sin mwet sihm.” El fahk pac lah oasr mwe ahkfuhlwact nuh ke muhtuhnfacl pucspucs ac nuh ke “lwen muhtahl” kuh holiday, oacna July 4 luhn mwet America. Oasr pac mwe ahkfuhlwact kuh mwe acsmakihn ma orek nuh sin “mwet suc kuhtanglah ke pacl in ongaiyac ac mwet suc molweltahllah” inge. Eltahl oacyacpac oruh mwe ahkfuhlwact ke “tempuhl” ac acn ma sie mwet el misac we. Ke sie toeni nuh sin mwet nuhkewa fin acn Brazil, president luhn mwet kol fuhlwact ke acn in nuhnuhnkuh luhn military el ahkkahlwemye: “Flag uh suhnakihnyuck ac ahkfuhlwactyeyuck . . . oacna ke kuht ahkfuhlwactye acn kuh muhtuhnfacl sesr uh.” Puk se inge The Encyclopedia Americana el tuh fahk lah, pwacye “flag uh muhtahl oacna sahkseng.”

Puk se pacna ma kuht sramsramkihn inge ahkkahlwemye lah on ma oreklac nuh ke sie muhtuhnfacl “ahkkahlwemye ohiyen luhngse yohk ac oaru luhn mwet nuh kac ac inkaiyen pacl uh oasr nguhsr ma oreklac nuh sin sie god tuh in kolyuck ac karihngihnyuck eltahl kuh mwet kol laltahl uh.” Pwacnacng, arlacna fal mwet kuhlwacnsap luhn Jeova uh in nuhnkuh ke mwe ahkfuhlwact nuh ke flag ac on ma orek nuh ke sie muhtuhnfacl oacna sie inkacnek in alu. Puk se inge The American Character, ahkkahlwemye lah tuhlihk nuhtin Mwet Loh luhn Jeova ke lohm lutlut fin acn America uh sruhnga in wi ahkfuhlwactye flag kuh in fuhlahk lah eltahl ac fah oaru ac ahkkweye acn seltahl uh. Pa inge ma sihmlac kac: “Pacl puhs ma nuhnuhnkuh fuhlwact uh wi insese kac lah facsin se ma orek ke lwen nuhkewa inge oacna sie inkacnek in alu.”

 Finne Mwet Loh luhn Jeova uh tiac wi ke kuhtwena mwe ahkfuhlwact ma tiac ahkkahlwemyeyuck in Bible uh, eltahl suhnakihn suwohs luhn mwet sahyac in oruh ma inge. Eltahl oacyacpac suhnakihn flag uh oacna mwe akucl nuh ke acn seltahl uh ac eltahl akihlen government laltahl uh oacna “mwet kol fin acn uh” suc orekma oacna “mwet kuhlwacnsap luhn God.” (Rome 13:1-4) Ke ma inge, Mwet Loh luhn Jeova uh ahkos kahs in ahkkweye inge, in puhruhe “yohkna ke tohkohsrah ac mwet leum nuhkewa.” Srihpac lasr in oruh ma inge uh pa kuht in “kuh in moul mislac . . . ac ahkfuhlwactye God ac oruh ma wo.”​—Sie Timothy 2:2.

Vote. Mwet Christian pwacye uh suhnakihn suwohs luhn mwet sahyac in vote. Eltahl tiac lain orekma in vote luhn mwet uh ac eltahl ahkos mwet kol ma srihsrngiyucki inge. Tuhsruhktuh, eltahl tiac weack kuhtwena mwet kuh u ke kuhtwena orekma kuh mukuikui luhn politic ke acn seltahl uh. (Matthew 22:21; Sie Peter 3:16) Meac sie mwet Christian el enenuh in oruh el fin muhta ke sie acn ma vote uh enenuh na in orek kuh ke sie acn ma mwet we uh kasrkuhsrak sin mwet suc tiac som wi vote? Sie mwet Christian el ac kuh in nuhnkuh kacl Shadrach, Meshach ac Abednego ke eltahl som nuh Dura. Ma inge ac kuh in oruh elan sulaclah in som nuh ke acn in vote inge ke srihpen ma inge tiac ahkkulukye nuhnak ac puhlakihn lal uh. Tuhsruhktuh, el enenuh in taran elan tiac muhnahslah ac weack kuhtwena mwet kuh u. El enenuh in nuhnkuh ke kahs in kahsruh ohnkohsr luhn Bible inge:

  1. Mwet tuhma lutlut lal Jesus uh “tiac ma luhn facluh.”​—John 15:19.

  2. Mwet Christian uh us inen Christ ac Tohkohsrahi lal uh.​—John 18:36; Luo Corinth 5:20.

  3. Mwet Christian uh inse sefanna ke luhlahlfongi ac mwet nuhkewa kac inge tuhkweni nuh sie ke srihpen luhngse laltahl oacna Christ.​—Sie Corinth 1:10; Colossae 3:14.

  4. Mwet nuhkewa suc sulaclah mwet in kohluhltahl, eltahl wi ipeis ke ma nuhkewa ma el oruh uh.​—Lohacng nuh ke kahs in kahsruh ke Bible ma sihmlac ke Sie Samuel 8:5, 10-18 ac Sie Timothy 5:22.

  5.   Luhngse yohk luhn mwet Israel in sruhkwack sie mwet kol ma eltahl kuh in liye ah, oacna sie mwe akucl nuh sin Jeova muh eltahl pihlacsracl.​—Sie Samuel 8:7.

  6. Mwet uh enenuh in liye lah kuht wi lacyen luhn Jeova uh muhkwena, pwacnacng mwet Christian uh enenuh in puhlaik in fahkwack ke Tohkohsrahi luhn God nuh sin mwet ac un mwet suc wi ke kain in government nuhkewa.​—Matthew 24:14; 28:19, 20; Hebrew 10:35.

Orekma in kuhlwacnsuhpuh acn sum. Ke kuhtuh acn uh, oasr masap se ma oreklac nuh sin mwet suc tiac wi ke military. Eltahl enenuh in oruh sie kain in orekma in kuhlwacnsuhpuh acn seltahl uh ke lusen pacl se. Kuhtuh sin orekma inge pa in puhkanack luhf, orek inkacnek ac muhsah lohm in lutlut kuh lohm in ono. Ke kuht oruh sulaclah lasr nuh ke ip se inge, kuht enenuh in puhruhe kac ac sahp sramsramkihn nuh sin sie mwet lili suc pah in nuhnak. Tukun ma inge, kuht ac fah kuh in orekmakihn nuhnak ac puhlakihn lasr uh in oruh sulaclah ma ac fal nuh ke ma kuht lotwelah kac uh.​—Soakas 2:1-5.

Kahs luhn God uh fahk nuh sesr kuht in “puhsisacl nuh sin mwet kol . . . ahkolah in oruh ma wo in ohiyac nuhkewa.” (Titus 3:1, 2) Ke kuht nuhnkuh ke ma inge, kuht kuh in siyuck sesr sifacna kihsen siyuck inge: ‘Nga fin oruh kuhtwena orekma in kuhlwacnsuhpuh acn sihk, yac ma inge ac oacpacna nga in fuhleack ke sulaclah luhk in tiac weack kuhtwena mwet kuh u? Yac ma inge ac kuh in oruh nga in kuhpahsr nuh ke alu kikiacp?’ (Micah 4:3, 5; Luo Corinth 6:16, 17) ‘Yac orekma se inge ac oruh upac nuh sihk in ahkpwacyeye kunohkohn luhk oacna sie mwet Christian?’ (Matthew 28:19, 20; Ephesus 6:4; Hebrew 10:24, 25) ‘Kuh, nga fin wi ke orekma inge, yac ac kuh in oruh nga in ahkyohkye pacl luhk nuh ke orekma in kuhlwacnsap luhk nuh sin Jeova oacna sie pioneer kuh kuhtuh pac ma sahyac?’​—Hebrew 6:11, 12.

Sie mwet Christian el fin otwelah sel sifacna muh el ac oruh orekma in kuhlwacnsuhpuh acn sel liki na in som nuh in presin, mwet lili uh enenuh in suhnakihn sulaclah lal inge. (Rome 14:10) Tuhsruhktuh, el fin puhla muh el tiac kuh in oruh orekma inge, mwet lili sahyac uh enenuh in suhnakihn pac sulaclah se lal inge.​—Sie Corinth 10:29; Luo Corinth 1:24.