Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

Top nuhke Kihsen siyuck 10 Ma Mwet Fuhsr uh Siyuck

 KIHSEN SIYUCK 9

Yac Nga ac Luhlahlfongi lah Mwet uh Tuhkuh ke Ma Orahkrahk uh?

Yac Nga ac Luhlahlfongi lah Mwet uh Tuhkuh ke Ma Orahkrahk uh?

EFUH KUH MA INGE YOHK SRIHPAC

Fin pwacye lah mwet uh tuhkuh ke ma orahkrahk (evolution), na wacngihn srihpen moul uh. Fin pwacye lah ma nuhkewa oreklac, kuht kuh in konwacack top na wowo nuhke kihsen siyuck ke moul ac ke pacl fahsruh uh.

MEAC KOM KUH IN ORUH?

Nuhnkuh ke mwe luhmahlah se inge: Alex el fohsack. El luhlahlfongi pacl nuhkewa ke God ac ke ma oreklac uh. Tuhsruhktuh mihsenge, mwet luti se lal ke biology el fahk muh pwacye mwe luti se ma fahk muh, mwet uh tuhkuh ke ma orahkrahk. Ac ma inge fal nuhke ma konweyuckyak ke lutlut ma orek sin scientist. Alex el sruhnga in liyeyuck muh el lahlfon. El fahk nuh sel sifacna, ‘fin scientist uh ahkpwacyeye lah mwet uh tuhkuh ke ma orahkrahk uh, na suc nga uh ngan kihsen siyuckkihn ma eltahl fahk inge?’

Fin kom pa Alex, yac kom ac insese nuh kac lah mwet uh tuhkuh ke ma orahkrahk uh mweyen puk pucspucs fahk muh ma inge pwacye?

TUI AC NUHNKUH MEET!

Kewana mwet ke lwacyen luo ke debate se ingacn eltahl sa na in fahk ma eltahl luhlahlfongi kac an liki na in etuh na pwacye lah efuh kuh eltahl luhlahlfongi kac.

  • Kuhtuh mwet uh luhlahlfongi ke ma oreklac uh ke na srihpen pa ingacn ma lutiyuck nuh seltahl ke alu laltahl uh.

  • Kuhtuh mwet uh luhlahlfongi kac lah mwet uh tuhkuh ke ma orahkrahk ke srihpen pa ingacn ma lutiyuck eltahl kac ke lutlut ac.

 KIHSEN SIYUCK ONKOHSR MA ENENUH IN NUHNKUH YOHK KAC

Bible uh fahk: “Lohm nuhkewa muhsahiyuck sin mwet, ac God pa muhsahelah ma nuhkewa.” (Hebrew 3:4) Yac fal ac suwohs in luhlahlfongi ma inge?

Kuht fin fahk muh wacngihn God suc oraclah ma nuhkewa, ac oacpacna ke kuht fahk muh wacngihn mwet muhsahi lohm se inge

MA MWET UH FAHK: Ma nuhkewa inkuhsrao ac facluh tuhkuh ke srihpen fokwelihk luhn ma uh inkuhsrao.

1. Suc kuh meac se oraclah fokwelihk luhn ma inkuhsrao uh?

2. Piyac kac ma pwacye uh, ma nuhkewa oreklac ke wacngihn kuh ma nuhkewa oreklac sin mwet se?

MA MWET UH FAHK: Mwet uh tuhkuh ke ma orahkrahk.

3. Fin pa mwet uh oreklac ke ma orahkrahk ke sie mwe puhpuhlyuck, sacko uh efuh kuh arlac yohk ma tiac oacna sie ke lahlmwetmwet luhn mwet uh ac sacko uh?

4. Efuh kuh upac in kahlwem finne ke ma srihsrihk ma oasr moul la?

MA MWET UH FAHK: Ma na pwacye se lah mwet uh tuhkuh ke ma orahkrahk.

5. Yac oasr mwe ahkpwacyeye luhn mwet se inge nuhke fahk se lal inge?

6. Mwet ekahsr luhlahlfongi muh mwet uh tuhkuh ke ma orahkrahk ke srihpen oasr mwet fahk nuh seltahl muh mwet lahlmwetmwet nuhkewa eltahl luhlahlfongi ke ma inge?

“Kom fin fahsr sahslah ke insack se ac konwacack lohm na kahto se, yac kom ac nuhnkuh: ‘Arlac usrnguck! Sahk inge sahp sifacna puhtatlac ac oraclah lohm se inge.’ Tiac kuh in ohingacn! Wacngihn na pwacye kalmac. Na, efuh kuh kuht in luhlahlfongi muh ma nuhkewa inkuhsrao uh sifacna sikyak?”—Julia.

“Srihke petsacelah muh oasr mwet se fahk nuh sum lah oasr ma se fokwelihk ke lohm in print pwepuh se, ac ink kac ingacn osraclihk pe sinkac ah ac acn lucng ke lohm sacn, ac oraclah dictionary se. Yac kom ac luhlahlfongi?”—Gwen.

 EFUH IN LUHLAHLFONGI KE GOD?

Bible uh ahkkweye kuht in “arlacna tuni ac srihke ma nuhkewa.” (Sie Thessalonica 5:21) Kalmac pa luhlahlfongi lom nuh sin God uh tiac tuhkuh ke

  • PUHLAKIHN (Nga puhla muh oasr kuh se ma fuhlwact liki nuhkewa)

  • FACSIN (Nga muhta ke sie acn ma mwet we ingacn luhlahlfongi ke God)

  • KWACFE IN ORUH (Pahpah ac ninac kiyuck uh tuhfweyuclac in luhlahlfongi ke God—wacngihn sulaclah sahyac luhk)

A, luhlahlfongi lom nuh sin God enenuh in oasr srihpac wo lom nuh kac.

“Ke nga lohng ke mwe ahkuhtweyac luhn mwet luti se lasr ke lohm lutlut ac lah mahnosr orekma fuhkah, wacngihn ahlohloh kac lah oasr na pwacye God se. Ip nuhkewa ke mahno oasr orekma la, finne ke ip na srihsrihk, ac kuht tiac etuh lah ma inge oruh fuhkah orekma la. Pwacye lah arlacna usrnguck monin mwet uh!” —Teresa.

“Ke pacl se nga liye sie lohm na luhlahp ma arlacna fuhlwact, soko oak ma arlacna kahto, kuh sitosah soko, nga siyuck sihk sifacna, ‘Suc oraclah ma inge uh?’ Enenuh in oasr sie mwet lahlmwetmwet in oraclah sitosah soko mweyen arlac puhs ip kac ma ac enenweyuck nuh kac tuh in orekma. Ke ma inge, fin pa sitosah soko mwet se pa enenuh in oraclah, ac oacpacna nuhke mwet uh.”—Richard.

“Ke nga lutlut ke ma pucspucs ke science, ma inge oruh in srihksrihkeni luhlahlfongi luhk lah mwet uh tuhkuh ke ma orahkrahk. . . . Nuh sihk, fihsracsr in luhlahlfongi ke sie God suc oraclah ma nuhkewa liki na in ‘luhlahlfongi’ muh mwet uh tuhkuh ke ma orahkrahk.”—Anthony.

NUHNKUH KAC

Soenna oasr mwe ahkuhtweyac ma scientist nuhkewa insese kac lah mwet uh tuhkuh ke ma orahkrahk eltahl finne oruh lutlut yohk kac ke lusen yac pucspucs. Fin scientist suc arlacna suhmaht ac lahlmwetmwet inge tiac insese ke mwe luti lah mwet uh tuhkuh ke ma orahkrahk uh, yac kuluk kom in kihsen siyuck ke mwe luti se inge?