Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Na. 1 2017

Bana Etseme Eyikalhua omw’Ihithya

Bana Etseme Eyikalhua omw’Ihithya

“EBBASI iyo yighende, aliwe omulhume Omuchaina iyo asighale!” Ekyo kya Alexandra owa inianikere omwa bbasi eyikakyuruka omuthanu w’ekihugho kye South Amerika eriya omwa kindi kihugho. Alexandra mwalhua omwa bbasi eriyalebya ekyamabya nga niki neryo mweya omulhume Omuchaina inianemusoborera omupolisi w’okwa muthanu y’ekitsibu ekyo amabana. Kundi mwali wethu Alexandra abya omwa kithunga ekikakolesaya Olhuchaina eky’Abema ba Yehova, mwathwamu eribawathikya eribahindulira omubughe.

Omulhume mwabugha athi ni ndulhani y’ekihugho ekyo aliwe athi babirimwiba kw’ebipapura biwe n’esyosente siwe. Erimbere omupolisi mwathaligha kandi amalengekania athi Alexandra anganabya iniakalhabaya abandu b’omwa magendo. Erighunzerera, omupolisi mwaligha eby’omulhume asoborera, aliwe omulhume oyu abya atholere erithuha efaini busana n’eribya isy’awithe ebipapura ebihikire. Kundi omulhume syabya awithe esyosente, Alexandra mwamuha esyodola 20. Omulhume mwasima kandi amabugha athi akendi syasighobesya. Alexandra mwabugha athi syali sondaya ndundi; aliwe athi atsemire kundi eky’amakolha ky’ekihikire erikolhwa. Alexandra mwaha omulhume y’ebitabu ebiseghemere okwa Biblia kandi mwamubwira athi ambi ighe e Biblia n’Abema ba Yehova.

Kikatsemesaya eriowa okwa mubere w’erihithya okwa ba mundu athasi, kandi nibya eki kikakolhawa n’abandu ab’omwa madini wosi nibya n’abathawithe dini. Nawu wangana yihereyo eriwathikya omwa mibere eyi? Ekibulyo ekyo kitholere kundi na Yesu mwanabugha athi: “Erihithya likaletha obutseme kwilhaba erihabwa.” (Emibiri 20:35) Kandi n’abanyasayansi nabu bakabugha bathi erihithya lyangana kughasira. Thuthalebya nga lyanga kughasira lithi.

OYUKAHITHAYA INIANATSEMIRE

Ebyalholirweko bikakanganaya ngoku etseme n’erihithya bihambangene. Omukwenda Paulo mwahandika athi “Nyamuhanga akasima oyukaha n’eriyisyandira.” Paulo abya akakania okwa Bakristayo ababya bakahayo busana n’eriwathikya balikyabo abali omwa bitsibu. (2 Abanya Korinto 8:4; 9:7) Paulo mwathabugha athi etseme y’eyaleka ibahithya kutse erihithya nuku batseme—batsema kundi mubathoka erihithya.

Kandi kwenene erisekulya lirebe likabugha lithi erihithya “likaleka ehitsweka hirebe omwa bwongo ihyakolha ndeke, ng’ehitsweka ehihambire okw’itsema, eritsangira abandi, n’eribayikethera, ikyalethera omundu ‘eriyowa ndeke’ omwa muthima.” Erindi isekulya likakanganaya ngoku “eriha owundi y’esyosente likalethera etseme kwilhaba eriyikoleseryasyo.”

Mbwino wune wathayowa nga sihali ekya wangahayo eriwathikya habw’emibere eya wulimu? Okwenene kuli kuthi, obuli mundu anganabana obutseme amabya akahithya inianatsemire.  Ekighendererwa kyawu ky’erihithya okwa bya wuwithe kyamabya kwenene ikin’uwene, n’akandu kake buyira iwangana kahithya. Omwema wa Yehova mwathumira abakahulhukaya egazeti eno b’omwatsi imune n’esyosente, athi: “Emyaka yosi eyi isindithoka erihayo ndeke aliwe iningahayo busente buke buyira okwa Kingdom Hall.” Aliwe kandi athi: “Yehova Nyamuhanga abirinyiha bingyi kwilhaba ebyo ngaha. . . . Mwasingya erinyithokesya erithuma ekyanamahayo kino erisighika omubiiri wa Yehova—kikanyihumulikanaya.”

Erihithya, si hithya esyosente lisa. Hane esindi nzira nyingyi esy’erihithiryamu.

ERIHITHYA LIKALEKA IWABYA N’AMAGHALHA AWUWENE

Erihithya likakughasira iwe n’abandi

Ekinywe kya Nyamuhanga, e Biblia, kikabugha kithi: “Omundu w’erighanyira [w’olhukeri] akakolera ekirimu kiwe ky’ebibuya, nikwa omusindwa akayaghalhaya.” (Emisyo 11:17) Abandu b’olhukeri bakahithaya, ibananzire eriyihayo busana n’abandi omw’ikolesya obuthuku bwabu, akaghalha kabu, n’eribatsomana, n’ebindi-n’ebindi. Ekyo kikaghasira abandu ng’abo omwa nzira nene, imwamune n’eribya n’amaghalha awuwene.

Erisekulya likakanganaya ngoku abakayihayo eriwathikya abandi bakabya n’amalhumi make n’amaghaniryo make. Erithwalira haghuma, bakabya n’amaghalha awuwene ndeke. Omubere w’erihithya akanaleka n’abawithe amalhwere awakalire kutsibu ng’aw’omwa bwongo kutse Esilimu nabu ibathunga obuholho omwa maghalha. Kandi kyabirilhangirika ngoku n’abakanza eritsira obwabu, omubere w’erihithya akaleka ibathabya omwa maghaniryo w’eribuleka kutse eryanza eribusubira.

Kikasoborerawa indi ekikaleka eki ikyathokekana ly’eribya “omuthima w’erikwira abandi b’obulighe, eribakolera ebyuwene akaleka omundu iniathunga amalengekania awathekene.” Kandi erihithya lyangana kehya ekitsibu ky’amaghaniryo n’epresya. Kandi abakaholerawa abanze babu bakalhua lhuba omwa bulighe bamasangira omw’iwathikya abandi.

Ekyo, sihali erithika-thika. Erihithya likakughasira.

OMUBERE W’ERIHITHYA AKASIGHALIRA

Yesu mwabugha athi: “Muhithaye, na Nyamuhanga asyabaha. Mwasyabaghalira olhulengo lhuwene, olhusokire, olhutsingire, olhuli kw’omutsogho. Kusangwa olhulengo olho mukalengamo, mwasyalengerwalho.” (Luka 6:38) Wamabya wukahithya, abawukaha ibakendi sima, nabu ibabya bakahithya. Kwesi erihithya likakulha-kulhanaya obughuma n’obunywani.

Erihithya likakulha-kulhanaya obughuma n’obunywani

Abasomire eby’erikolangana ly’abandu bakabugha bathi “abandu abakahithaya bakaleka n’abandi ibasa mw’omuthima w’erihithya.” Nibya, “n’erithasoma buyira okwa bibuya ebikakolerawa abandi kikaleka omundu iniongera eryanza erihithya.” Neryo, erikwamana n’erisekulya lighuma, “omundu mughuma angana leka abandu banene kutsibu ibasa mw’omuthima w’erihithya, nibya n’abandi isyabasi.” Ni bugha ambu, ekikorwa kighuma ky’erihithya ikyangana hamba okwa bandu, ikyalhandaghana n’eribughana obulhambu obwosi. Mbwino isiwanganza er’ikalha omwa bulhambu ng’obo? Ni kwenene,  ni bibuya bingyi ebyangabya, abandu bamayongera eribya n’omubere w’erihithya.

Obubuya bw’eki, ky’eky’erileberyako omwa Florida, e Amerika. Abema ba Yehova mubayihayo eriwathikya omughulhu hawa ekitsinduli ky’ekiyagha kinene. Babere banalindirire eby’erikolesya ahali enyumba eyo bayasubaya, mubalhangira olhughuthu lhw’omutaka ilhwabirithera, neryo bamayihayo erilhukokothya. Enyuma w’aho, omutaka oyo mwahandikira ekyaghanda kikulhu ky’Abema ba Yehova athi, “Ngasima isingwithe busubuliro. Munalhangira abandu aba ini bandu babuya kutsibu.” Omuthima w’erisima mwaleka iniahayo ekihembo ekyuwene eky’abugha athi kiwathikaye omwa mubiiri munene w’Abema ba Yehova.

GHERERERAYA OYULI KY’ERILEBERYAKO KIKULHU OMW’IHITHYA

Abanya seyansi bakabugha bathi “hakabya nga hane amaaka aw’akaleka abandu ibanza eriwathikya abandi.” Erisekulya lyabu lithi abaana “bakanakanganaya omubere w’erihithya nibya isibali batsuka n’eribugha.” Busana naki? E Biblia yikathuha eky’erisubirya omughulhu yikathubwira yithi abandu bahangikire omwa kisosekanio kya Nyamuhanga, ni bugha ambu, eribya n’emibere mirebe ng’eya Nyamuhanga.Enzuko 1:27.

Okwa mibere eya Muhangiki wethu awithe, mwamuli erihithya. Abirithuha engebe n’ebyosi ebya thukayithagha erithoka eritsema. (Emibiri 14:17; 17:26-28) Ithwangana minya ndeke Thatha wethu w’elhubulha n’ekighendererwa kiwe eky’olhwanzo omw’isoma Ekinywe kiwe, e Biblia. Ekitabu ekyo kikathubisulira kithi Nyamuhanga abirithutheghekera ebikendi syathulethera etseme omwa buthuku bw’embere. * (1 Yoane 4:9, 10) Neryo kundi Yehova ya nzuko y’omuthima w’erihithya, kandi iwuhangikire omwa kisosekanio kiwe, sikiriswekaya indi wamamugherererya omw’ihithya, wukaghasirawa n’erimutsemesya.Abaebrania 13:16.

Mbwino wukin’ibukire Alexandra, omukali oyulyakanibawako okw’itsuka ly’omwatsi ono? Omwatsi wiwe mwaghunzerera athi? Nomwakine indi owundi mundu oyo babya nayu omwa bbasi mwabugha athi esyosente siwe ali ng’oyuwamasighusa, aliwe babere bahika aho bakimira omwa tawuni, omulhume oyo mwasaba banywani biwe b’esyosente amathuha eribanza ery’esyodola 20. N’ekindi omulhume oyu mwakolha ngoku Alexandra anamubwira, mwayatsuka erigha e Biblia. Enyuma w’emyezi isathu, Alexandra mwatsema ak’eya omulhume oyo okwa lhuhindano lhw’Abema ba Yehova omwa mubughe w’Olhuchaina e Peru. Erikangania erisima liwe okwa bya Alexandra amukolera, omulhume oyo mwamukokya okwa huteri yiwe, iyo n’abandi abo asa nabu.

Erihithya n’eriwathikya abandi likaletha etseme. Kandi ibbwa, etseme yikabya nene na kwilhaba omw’ihithya, wamawathikya omundu eriminya ndeke oyukalhua kw’ebibuya byosi—Yehova Nyamuhanga! (Yakobo 1:17) Wunemughasirwa omwa bubuya bw’erihithya ng’eryo?

^ enu. 21 Erithasyaminya bingyi, lebaya omwa kitabu E Biblia Yanga Thukangiriryaki? ekyahulhukibawa n’Abema ba Yehova kandi kine n’okwa www.jw.org/koo. Lebaya omwa EBITABU > EBITABU N’ESYOBROKYUWA.