Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Na. 1 2017

Yesu mwabungira mabyalha wa Petero amamulhamya.—Matayo 8:14, 15; Mariko 1:29-31

Mbwino Ni Kilhaghiro Indi Abakangirirya b’Edini y’Ekikrisitayo Isibingira Omwa Butheke?

Mbwino Ni Kilhaghiro Indi Abakangirirya b’Edini y’Ekikrisitayo Isibingira Omwa Butheke?

AMADINI mangyi erithimba omwa kihugho—ng’omwa Kikatuliki, Ekiothodokisi, Edini y’Ekibbuda, n’esindi—ibo ni kilhaghiro indi abasondoli babu isibathahaya kutse erithahibwa. Aliwe, abandu bangyi babirilhangira ekyo iky’ekyalekire eby’obutswatswa ibyakanyirira omwa bakulhu b’amadini mangyi.

Neryo kwesi kine mw’amenge eribulya kino: Kwenene Amasako akanasighika Abakangirirya b’edini y’Ekikristayo erithend’ingira omwa butheke? Erithoka erisubirya ekibulyo ekyo, thuthatsuka erilebya nga kyatsuka kithi kandi na Nyamuhanga ng’akakibughako athiki.

NGOKU KYINGIRA OMWA DINI

Ekitabu Encyclopædia Britannica kikasoborera omubere oyu kithi “ly’erithend’ingira omwa butheke, neryo iwayikakirya okwa myatsi y’engyingo, kandi kutsibu-tsibu wamabya iwuli mukulhu w’edini kutse oyuyihereyo kutsibu okwa dini.” Omo mwaka owa 2006 Papa  Benedict XVI, omwa mwatsi ow’akaniraya abakulhu-bakulhu omwa Kikatuliki, mwabugha athi ekilhaghiro ky’erithend’ingira omwa butheke omwa basondoli b’edini “ni kindu ekyatsuka kera, obuthuku buke abakwenda ibamabirihwaho.”

Aliwe ekilhaghiro ekyo sikyabya omwa Bakristayo ab’omwa kighonye ky’erimbere. Nibya n’omukwenda Paulo, oyuwabyaho omwa kighonye ky’erimbere, mwakunga abikirirya okwa bandu ‘abakathebaya’ kandi “abakaghanaya erihikania.”1 Timoteo 4:1-3.

Omwa kighonye kyakabiri, omutse oyo mwatsuka eribanika omwa syokanisa “sy’Ekikristayo” esy’omwa Yuropu. Ekitabu Celibacy and Religious Traditions, kikabugha kithi ekindu ekyo “kyasa busana n’omubere w’eriyikakirya okwa myatsi y’engyingo ow’abuthuka omwa Buthabali bwe Roma.”

Neryo omwa myaka mingyi eyakwamako, esyondeko sy’abakulhu b’edini n’abakayahulha mwa Church Fathers mubakulha-kulhania ekilhaghiro indi abakulhu  balebe isibingira omwa butheke. Ibakayowa bathi erikolha emyatsi y’engyingo ni kindu ekikakinaya kandi sikiriha kitsumbi okwa musondoli w’ekanisa. Aliwe nomubyanabya bithya, kandi ekitabu Encyclopædia Britannica kikabugha kithi “erihikira ighuma n’omwa kighonye ky’erikumi, abafaza bangyi nibya n’abandi babisyopu babya ibanawithe abakali.”

Ekilhaghiro eky’abakulhu b’edini erithend’ingira omwa butheke kyalhabibawa omwa syondeko sy’abakulhu b’Ekikatuliki (Lateran Councils) esyabya omo mwaka wa 1123 n’owa 1139, esyabya sikabya e Roma, neryo kyabiribya kilhaghiro omwa dini y’Ekikatuliki erihika na munabwire. Ekilhaghiro ekyo mukyawathikya ekanisa erithendi herya obuthoki bwayu n’esyosente kundi abafaza abathahirye ibakanasighira abaana babu b’ebindu by’ekanisa ng’omwandu.

AMALENGEKANIA WA NYAMUHANGA OKW’EKI

Amalengekania wa Nyamuhanga oko mwatsi oyu analhangirikire ndeke-ndeke omwa Kinywe kiwe, e Biblia. Omwa Biblia, mune ebya Yesu abugha okwa babya isibath’ingira omwa butheke ng’iyo, mwabugha athi, “n’abandi sibehikaya busana n’Obwami bw’elhubulha.” (Matayo 19:12) Okwa mwatsi iwan’oyo, n’omukwenda Paulo mwanakania okwa banganza erikwama eky’erileberyako kiwe eribya ibane ibobene “busana n’Engulhu Yuwene.”1 Abanya Korinto 7:37, 38; 9:23.

Aliwe okw’ekyo, Yesu na Paulo mubathabugha bathi ni kilhaghiro omukangirirya erithendi thahya. Nibya Yesu mwanabugha athi ‘abosi sibethoka eriligha’ erisighalha inina bahuru. Paulo abere ahandika okwa “bathahikenie,” mwabugha okwenene athi: “Singwithe kihano ky’Omukama, nikwa ngabugha ekyaghe.”Matayo 19:11; 1 Abanya Korinto 7:25.

N’ekindi, e Biblia yikakanganaya ngoku nibya n’okwa bakwenda kwanabya ababya bathahirye, imwamuli n’omukwenda Petero. (Matayo 8:14; Mariko 1:29-31; 1 Abanya Korinto 9:5) Kandi busana n’eby’obusingiri ebyabya bikanyirire e Roma okwa buthuku obo, Paulo mwahandika athi Omukrisitayo oyuwithe olhukwamirwa lhw’erisondolha amathahya, atholere iniabya “n’omukali mughuma” kandi “n’abaana biwe ibakayolhobeka n’erimukenga.”1 Timoteo 3:2, 4.

Isithwanga bugha thuthi aba babya bakali b’erikalha nabu buyira, kundi e Biblia yikaghumaya kutsibu “omulhume ahe mukali wiwe ebimutholere” kandi yithi abathahenie ‘sibimangane’ emyatsi y’engyingo. (1 Abanya Korinto 7:3-5) Ekyo kikakanganaya ndeke-ndeke ngoku ekilhaghiro ky’abasondoli b’ekanisa erithendi thahya, si Nyamuhanga oyukihirireho. Neryo si kilhaghiro okwa Bakristayo.

ERIKOLHAKYO BUSANA N’ENGULHU YUWENE

Kyamabya isi kyabya kilhaghiro, kandi ekyaleka Yesu n’omukwenda Paulo ibakania ndeke okwa buhuru niki? Ekyo ni kusangwa obuhuru bwangana leka omundu iniakolha kutsibu omwa mubiiri w’erihikya okwa bandi kw’engulhu yuwene. Abahuru ibangana kolha bingyi kundi bakabya isibawithe maghaniryo ng’aw’abali omwa butheke.1 Abanya Korinto 7:32-35.

Thalengekania oku mulikyethu David, oyuwathwamu erileka omubiiri wiwe w’esyosente nene omwa Meksiko nuku angaghenda omwa kyalu kye Costa Rica eriyakangirirya abandi e Biblia. Mbwino David mwanayowa obuhuru ibwamamuwathikya? Akabugha athi, “Ndeke-ndeke kabbisa.” Kandi athi, “Sikyabya kyolho eribeghera emibere mihya-mihya eyonahikamu eyo, aliwe kundi nabya ingane ingyuwene munathoka erighenda ingabeghera.”

Claudia, Omukristayo omuhuru oyuwabiriyawathikya eyiri obuyithawa bw’abathuliri, akabugha athi: “Ngatsemera ebya ngakolera Nyamuhanga. Erikirirya lyaghe n’obughuma bwaghe na Nyamuhanga bukaghuma ingalhangira emibere akanyitsomaniramu.”

“Siki mbulha wuli omwa butheke kutse wuli muhuru, ekikulhu wamaha Yehova Nyamuhanga y’ebimutholere, iwukendibya iwunatsemire.”—Claudia

Obuhuru sibutholere bukakubyako muheke. Claudia ak’ongerako athi: “Siki mbulha wuli omwa butheke kutse wuli muhuru, ekikulhu wamaha Yehova Nyamuhanga y’ebimutholere, iwukendibya iwunatsemire.”Esyonyimbo 119:1, 2.