Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Na. 1 2017

 OMWATSI W’OKWA KIDIPA | WUNEMWENDYANGIRIRA EKIHEMBO KYA NYAMUHANGA EKILENGIRE KUTSIBU?

Ekihembo Ekithe ng’Ebindi

Ekihembo Ekithe ng’Ebindi

AKUMA akakasonga esyokalamu sy’ekikala akali ng’obwathu aka Jordan awithe omwa byalha biwe kakalhangirika ini kandu kake buyira. Aliriryo ibbwa okw’iyo ni kighuma ky’okwa bindu eby’akatsemera eribya iniawithe. Jordan akabugha athi, “Omusyakulhu mukulhu, ya Russell, omunywani ow’omw’eka yethu yuwambako ingakine mulere.” Russell abere abiriholha, Jordan mwabwirwa ngoku Russell abya akawathikya kutsibu ababuthi biwe na sukulhu wiwe, kandi iniakabahumulikanaya omwa buthuku bawithe ebitsibu. Neryo Jordan akabugha athi, “Busana n’eribya inamabiriminya bingyi oku Russell, kyabirileka akahembo kanyoho ak’amba aka ikabya k’omughaso munene omwa ngebe yaghe kwilhaba kera.”

Ngoku thwamalhangira omwa mwatsi wa Jordan, ekihembo ikyangana lhangirika okwa bandi isikya mughaso munene. Aliwe okwa yulyahebawakyo, oyukasima, okw’iyo ikyanganabya ky’obughuli bunene, kutse inialhangira isihali sente esyanga thoka erikighulha. Aliwe ibbwa, e Biblia yikabugha okwa kihembo ky’obughuli obuthe bwanga ghanzwa yithi: “Nyamuhanga mwanza ekihugho ky’athya, kyaleka iniaha mughalha wiwe, Ekyusa kiwe, neryo oyukamwikiriraya syahere nikwa abye n’engebe y’erikotha.”Yoane 3:16.

Nawu thalengekania, ekihembo ekyanga lethera oyukahebawakyo y’engebe y’erikotha! Mbwino ihanganabya ekirengire ekihembo ng’ekyo? Nomwakine indi hane abatsomene ekihembo ekyo, Abakristayo ab’okwenene ibo bakalhangira ekihembo ekyo ini “ndihi nene kutsibu.” (Esyonyimbo 49:8; 1 Petero 1:18, 19) Aliwe busana naki Nyamuhanga mwathwamu erihayo engebe ya Mughalha wiwe ng’ekihembo busana n’ekihugho?

Omukwenda Paulo akabugha ekyaleka, omw’ibugha athi: “Neryo ebibi mubyahika munakihugho busana n’omundu mughuma, n’olhuholho mulhwingira busana n’ekibi kiwe, neryo lithya olhuholho mulhwahika oko bandu abosi.” (Abanya Roma 5:12) Omundu w’erimbere, Adamu, mwakolha ekibi omw’ikighenderera erithendiowa Nyamuhanga, neryo amabya ini w’eriholha. Erilhabira omu Adamu, olhuholho mulhwahika okwa bosi b’omo lhubutho lhwiwe lhwosi, n’ibugha ambu, abandu abosi.

 “Obuhingyi bw’erikolha ebibi ni lhuholho nikwa olhusunzo olhukalhua oku Nyamuhanga ni ngebe y’erikotha busana n’erimathikana na Kristo Yesu, Omukama wethu.” (Abanya Roma 6:23) Erithoka erilhusya omundu y’omwa muliki w’olhuholho, Nyamuhanga mwathuma mughalha wiwe, Yesu Kristo okwa kihugho, nuku aheyo engebe yiwe eyihikene busana n’ekihugo. Busana n’ekihongwa ekyo, ekyasibwe “ng’embanulho,” abosi abak’ikiriraya omu Yesu bakendisyathunga engebe y’erikotha.Abanya Roma 3:24.

Omukwenda Paulo abere akakania okwa mighisa eya Nyamuhanga akaha abaramya biwe erilhabira omu Yesu Kristo, mwabugha athi: “Thuhe Nyamuhanga y’ewasingya busana n’olhusunzo lhwiwe olhuthe lhwanga kanibwa.” (2 Abanya Korinto 9:15) Ni kwenene, embanulho ni y’omughaso munene kutsibu, indi sithwanga thoka erisoborerayo ndeke. Aliwe busana naki okwa bihembo byosi by’olhukogho lhwa Nyamuhanga, eky’embanulho kya kikulhu kutsibu? Ikyo ni kya mbaghane kithi okwa bindi? * Nethu thwanga kolhaki erikangania erisima lyethu? Thukakukokaya erisoma ebya Biblia yikasubiraya okwa bibulyo ebyo omw’isoma emyatsi ibiri eyikakwamako.

^ enu. 8 Ahathe erikakwa, Yesu “mwaha engebe yiwe busana nethu.” (1 Yoane 3:16) Aliriryo, kundi ekihongwa ekyo ni kitsweka ky’okwa kighendererwa kya Nyamuhanga, emyatsi eyikwamangene eyi yikahira omuwathu okwa lhukwamirwa olhwa Nyamuhanga awithe iyo ng’Oyuwaha embanulho.