Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwerikuminibiri 2015

Yehova, Ni Nyamuhanga Oyukakaniranaya n’Abaghombe Biwe

Yehova, Ni Nyamuhanga Oyukakaniranaya n’Abaghombe Biwe

“Muwambwira wuthi, nyihulikirire omughulhu wukabugha.” —YOBU 42:4.

ESYONYIMBO: 113, 114

1-3. (a) Busana naki omubughe n’emibere y’erikanirania ya Nyamuhanga ni y’ekika ky’ahighulhu okwa y’abandu? (b) Thukendikania okuki omwa mwatsi ono?

NYAMUHANGA mwahangika ebihangikwa by’amenge eby’angakanirania nabyo. (Esy. 36:9) Omukwenda Yoane mwahulha oyo watsuka eribya na Nyamuhanga mwa “Kinywe” kandi mwa “nzuko y’erihangika lya Nyamuhanga.” (Yn. 1:1; Erib. 3:14) Yehova iniakabwira Mughalha wiwe oyu y’amalengekania n’eriyowa liwe. (Yn. 1:14, 17; Kol. 1:15) Omukwenda Paulo akakanganaya ku hane ‘omubughe w’abamalaika.’ Oyu ni mulingo w’erikanirania ow’ali elhubulha ow’athe ng’owethu.—1 Kor. 13:1.

2 Yehova anasi ndeke ebihangikwa by’amenge ebyosi, ebiri elhubulha n’ebiri okwa kihugho. Abandu bangyi kutsibu banganabya ibanemumusaba okwa buthuku bughumerere omwa mibughe muthina-muthina. Yehova akabahulikirira kandi okwa ndambi iyan’eyo inianemusondolha n’erikanirania n’ebihangwa biwe by’elhubulha. Iyo erithoka eki, amalengekania wiwe, emibughire yiwe bitholere ibyabya ini by’ekika ky’ahighulhu kutsibu okwa by’abandu. (Soma Isaya 55:8, 9.) Yehova akabya akakania n’abandu, akakanaya nabo omwa nzira eyolhobire nuku banga yitheghererya.

 3 Thukendi lebya ekya Nyamuhanga w’amenge oyu abirikolha nuku kyangathokekana erikania n’abandu biwe. Kandi thukendi lebya ngoku Nyamuhanga akabya iniane muhindulha emibere y’erikanirania n’abandu erikwamana n’obuyithawa n’emibere eyiriho.

NYAMUHANGA ERIKANIRANIA N’ABANDU

4. (a) Yehova mwakolesya mubugheki akakania na Musa, Samweli, na Dawudi? (b) Omwa Biblia muli myatsi yahi?

4 Omwirima ly’Edeni, Yehova iniakabya inianemukania na Adamu, omwa mubughe w’abandu. Nyamuhanga angabya iniabya akakolesya Ekihebrania ekya kera. Enyuma w’aho mwabwira amalengekania wiwe w’ababya bakabugha Ekihebrania abahandika e Biblia, nga Musa, Samweli na Dawudi, nabu bamahandikagho omwa binywe byabu. Mubahandika ebyo Nyamuhanga aby’akabugha iyuwene-wene, bamakania n’okwa mibere abya akolanganiramu n’abandu biwe, kandi bamahandika n’okwa bihambire okw’ikirirya lyabu n’olhwanzo lhwabu, kandi n’ebya kanganaya obulemwa n’erileghulha lyabu. Munabwire emyatsi yosi eyi yithuwithire mughaso munene.—Abar. 15:4.

5. Yehova mwanahathikana athi abandu biwe babye bakakolesya Ekihebrania kisa? Soborera.

5 Emibere yabere yinemuhinduka, Nyamuhanga mwathahathikana erikolesya Ekihebrania akakania n’abandu. Abandi bandu ba Nyamuhanga mubakolesya Ekiaramaiki kya kutsibu bakalhua omwa bunyewa mw’Ebabeli. Obundi busana n’eryanza erikangania ebikendi syabya omwa buthuku bw’embere, Yehova mwasondolha Danieli, Yeremia n’omuhereri Ezera erihandika eyindi myatsi eyiri omwa bitabu byabu omwa Kiaramaiki. *

6. Ekinywe kya Nyamuhanga mukyabanika kithi omwa yindi mibughe erilhua omwa Kihebrania?

6 Alexander the Great abere abirithabalha okwa bihugho bingyi kera, Ekigiriki mwabya mubughe ow’akakolesibawa omwa bihugho bingyi. Abayuda bangyi mubatsuka eribya bakakaniagho, kyamaleka Amasako w’Ekihebrania iniahindulhwa n’omwa Kigiriki. Amasako w’Ekigiriki aya, aw’asibwe ng’aw’ahindulhawa n’abandu 72, mwahulhwa mwa Septuagint. E Septuagint ye Biblia y’erimbere eribanika omwa ghundi mubughe kandi enguma y’okwa sy’omughaso munene kutsibu. * Embindulha eyi eribya imuyakolhwako n’abandu bangyi, emihindulire siyabya yisosene. Nomubyanabya bithya, Abayuda ababya bakabugha Ekigiriki mubalhangira e Septuagint ini Kinywe kya Nyamuhanga. Abakrisitayo nabu kubanabya balhangireyo bathya.

7. Yesu angabya iniabya akakolesya mubughe wahi akakangirirya abigha biwe?

7 Yesu abere asa okwa kihugho, angabya imwakania n’erikangirirya omwa Kihebrania. (Yn. 19:20; 20:16; Emib. 26:14) Ekihebrania ky’omwa kighonye ky’erimbere kyangabya ikyabya kitswangenemu Ekiaramaiki. Neryo kwesi, Yesu angabya imwanakolesya n’ebinywe by’Ekiaramaiki. Aliwe abya inianasi n’Ekihebrania ekya kera ekyo Musa n’abandi baminyereri babya bakakolesya, ekyabya kikakolesibwa omw’isoma Amasako obuli yenga omwa manyumba w’erihindanamo. (Lk. 4:17-19; 24:44, 45; Emib. 15:21) Eryongera okw’ekyo, Ekigiriki n’Olhulatini byanabya bikabuwa omwa Israeli. Amasako syalibugha Yesu nga mwanakolesya n’emibughe eyo.

8, 9. Ni kyahi ekyaleka ebindi bitabu bye Biblia ibyahandikwa omwa Kigiriki, kandi eki kikathw’eghesayaki oku Yehova?

8 Abigha ba Yesu ab’erimbere babya ibanasi Ekihebrania, aliwe abere abiriholha,  mubakolesya eyindi mibughe. (Soma Emibiri 6:1.) Ekikristayo kyabere kinemukanyirira, Abakristayo mubakolesya Ekigiriki kya kutsibu. Nibya Enjiri ya Matayo, Luka, Mariko, n’eya Yoane, omuli ebya Yesu akangiriraya n’erikolha yabya omwa Kigiriki. Kyabya kithya kundi abigha bangyi ibakabugha Ekigiriki butsira Ekihebrania. * N’esyobaruha sy’omukwenda Paulo n’ebindi bitabu byabya omwa Kigiriki.

9 Kikalhangirika ngoku abahandika Amasako w’Ekigiriki ibakabya bamayithagha erihandika ebiri omwa Masako w’Ekihebrania, ibakakolesaya e Septuagint. Ebinywe ebyo nomubikanabya nga byahukene hake okwa byonyine-nyine eby’Ekihebrania, nabyo byabiribya by’okwa Masako awasondolibawa n’omulimu abuyirire. Neryo ebyo abahinduli abathahikene bakolha nabyo mubyabya by’okwa Kinywe kya Nyamuhanga ekyasondolibawa n’omulimu wiwe, kundi iyo si Nyamuhanga oyukasolholha ekihanda kirebe kutse mubughe mulebe.—Soma Emibiri 10:34.

10. Yehova erihikya Ekinywe kiwe okwa bandu kikathweghesayaki?

10 Ebike ebya thwamabirilhangira oku Nyamuhanga erikanirania n’abandu bikakanganaya ngoku akakanaya nabu erikwamana n’obuyithawa n’emibere eya balimu. Syalithuhathika erigha omubughe mulebe nuku thwangathoka erimuminya n’eriminya ebighendererwa biwe. (Soma Zekaria 8:23; Eribisulirwa 7:9, 10.) Yehova yuwasondolha abahandika e Biblia omwa mulimu wiwe, aliwe kandi amaligha yihandikawe omwa mihandikire muthina-muthina.

ERITHEYA EKINYWE KYA NYAMUHANGA

11. Busana naki emibughe muthina-muthina siyathakakirya Nyamuhanga erikania nabu?

11 Mbwino abandu eribya ibakakolesaya emibughe mingyi n’esyombaghane nyike-nyike omwa syombindulha sye Biblia, byabirileka ikyakalira Nyamuhanga erikania n’abandu? Eyihi. Ng’eky’erileberyako, thwanganabya ithwasi ebinywe bike buyira eby’Ekihebrania ebya Yesu akolesaya. (Mt. 27:46; Mk. 5:41; 7:34) Aliwe Yehova mwalhangira athi ebya Yesu abugha bikabanika omwa Kigiriki, n’erihindulhwa omwa yindi mibughe. Enyuma w’aho, Abayuda n’Abakristayo ibakabya ibanemulhusya omwa Masako we Biblia mw’esindi kopi, neryo Amasako abuyirire mwathabulirana. Mwathasyahindulhwa n’omwa yindi mibughe mingyi. John Chrysostom oyuwabyaho omwa kighonye ekya 4 kutse ekya 5 E.K. mwabugha athi erihika omwa buthuku bwiwe, ebya Yesu akangiriraya byabya ibyabirihindulhwa omwa mibughe ey’Abasuria, Abanya Misiri, Abanya India, Abanya Etiopia, Abaperesi n’omwa yindi mibughe mingyi.

12. E Biblia muyahakanisibwa yithi?

12 E Biblia eribya omwa mibughe mingyi mukyalemesya abanza erighunza yoho. Ng’Omuthabali we Roma ya Diocletian, omwa  mwaka wa 303 E.K., mwalhaghira athi esyokopi syosi sy’Amasako siheribawe. Ekinywe kya Nyamuhanga mukyahakanisibwa kutsibu n’eryendererya ababya bakakihindulha n’erikighaba. Omwa myaka eya 1500, William Tyndale mwatsuka erihindulha e Biblia omwa Lhusungu erilhua omwa Kihebrania n’Ekigiriki. Mwabugha athi Nyamuhanga amabya iniakinamulekireho, akendi lhangira athi n’omulimi akaminya Amasako kwilhaba n’omukangirirya w’edini. Tyndale mwalhua omwa England amathibitha omwa bindi bihugho bye Yuropu nuku angahindulha n’erihulhukya eby’abya akahindulha. Nomwakine indi abakulhu b’amadini mubahiraho akaghalha kanene eryanza erihisya esyo Biblia esyosi, aliwe ibbwa kandi musyongera erikanyirira omwa bandu. Endambi muyahika, Tyndale amahambwa, amahanikwa okwa muthi n’erihisibwa. Aliwe e Biblia eyo ahindulha muyabalha. Muyakolesibwa kutsibu bakahindulha e Biblia eyasibwe kutsibu eye King James.—Soma 2 Timoteo 2:9.

13. Erisoma okwa biri omwa mikunzo eya kera eye Biblia lyabiribisulhaki?

13 Ni kwenene omwa sindi kopi esya kera esye Biblia esikiriho munabwire, mune ehisobyo n’esyombaghane nyike-nyike. Aliwe abasomire kutsibu ebye Biblia, babirisoma okwa mikunzo mingyi y’Amasako n’ebihandi-bihandi byagho ebya kera n’esindi mbindulha esya kera, n’erilebya ebyosi ebyo nga byanamahambangana. Mubalhangira ngoku ni milhondo mike eyikabya nga yam’ahukana kandi ngoku n’ehisobyo ehirimo ni hike buyira. Emilhondo mike eyi siyirihindulha omwatsi mukulhu ow’ali omwa Biblia. Erigha emikunzo ye Biblia eya kera likaleka abigha be Biblia ibaligha ngoku ebiri omwa Biblia munabwire byan’ebya Yehova abya akabwira abahandikayo.—Isa. 40:8. *

14. Munabwire e Biblia yikabanika bungahi?

14 E Biblia nomuyanabiri hakanisibwa kutsibu, Yehova abirilhangira athi Ekinywe kiwe ky’ekikabya kitabu ekikahindulhawa kutsibu ah’abandu bakathabera okwa kihugho. Nibya n’omwa buthuku buno, omughulhu abandu bangyi sib’ikirirye Yehova kutse erimw’ikirirya kuke, e Biblia ky’ekitabu ekikaghulha kutsibu kandi eyosi kutse ebitsweka byayu yiri omwa mibughe eyilhabire omu 2,800. Sihali ekindi kitabu ekikaghabawa kutse eribanika omwa bungyi nge Biblia. Ni kwenene hane esindi mbindulha esikalire erisoma n’eriyitheghererya. Aliwe hakuhi omwa buli mbindulha mune omwatsi w’omulhamu n’amaha busana n’abandu.

EMBINDULHA NYIHYAKA MUYAYITHAYISIBWA

15. (a) Ekitsibu ky’omubughe munabwire kyabirirwanisibwa kithi? (b) Ni kyahi ekikaleka ebitabu byethu ibyatsuka erihandikwa omwa Lhusungu?

15 Omwa 1919, abigha bake be Biblia mubasombolhwa eribya “mughombe oyutheleghulha n’ow’amenge.” Iniakakolesaya Olhusungu  erihikya emyatsi okwa bandu ba Nyamuhanga. (Mt. 24:45) “Omughombe” oyu abirihiraho akaghalha erilhangira athi akalyo k’obunyakirimu kakabanika omwa mibughe minene kutsibu. Hathya ni mibughe eyilhabire oku 700. Ngoku Ekigiriki kyanakolesibawa omwa kighonye ky’erimbere, Olhusungu w’omubughe ow’akakolesibawa kutsibu omwa suburu n’omwa masukuru, kandi asibwe kutsibu. Neryo ebitabu byethu bikatsuka erihandikwa omwa Lhusungu neryo ibyahindulhwa omwa sindi ndimi.

16, 17. (a) Abandu ba Nyamuhanga mubayithaghaki? (b) Ekiyithawa eki mukyakolhwako kithi? (c) Omu 1950, Mughalha wethu Knorr mwabugha athi awithe mahaki okwa New World Translation?

16 Ebyobunyakirimu ebyosi ebyathukathunga biseghemere okwa Biblia. Omwa kathi-kathi k’ekighonye kya 20, e Biblia y’Olhusungu eya King James eyahindulhawa omwa 1611 iyayikakolesibawa kutsibu. Aliwe imuli ebinywe ebya kera. Kandi erina lya Nyamuhanga iriri mwa mirundi mike buyira, nomwakine indi omwa mikunzo eya kera ye Biblia likabanikamu mirundi eyilhabire omu 7,000. Kandi omwa Biblia eyo mwabya ebisobyo ebikabanika busana n’erihindulha. Mwabya n’emilhondo eyithe omwa mikunzo eya kera eye Biblia. N’esindi mbindulha sye Biblia esy’Olhusungu syabya isinawithe ebitsibu ng’ebyo.

17 Muhayithaghisya e Biblia eyolhobire eriyitheghererya kandi eyiri omwa mubughe owa munabwire. Neryo muhahirwa akathunga ake New World Bible Translation, kandi omwa myaka ng’ikumi eritsuka 1950 erihika 1960, baghalha bethu mubahulhukyayo mwa bitsweka-bitsweka mukagha. Biro 2 Okwomunani, 1950, ekitsweka ky’okubanza mukyahulhukibwa okwa lhuhindano. Mughalha wethu N. H. Knorr mwabugha athi abandu ba Nyamuhanga babya bakayithagha embindulha ye Biblia eyiri omwa mubughe owa munabwire eya bangana yitheghererya ndeke kandi eyangana bawathikya erigha ekwenene ya ndeke. Kandi athi babya bakayithagha embindulha eyolhobire erisoma n’eriyitheghererya ngoku amasako agho abigha ba Yesu bahandika anabya. Mwakangania ngoku awithe amaha indi embindulha eyi yikendi wathikya abandu banene eriminya Yehova ya ndeke.

18. N’ithwamu lyahi eryabiry’anguhya erihindulha e Biblia?

18 Amaha ayo mwabererera omwa 1963, omughulhu e New World Translation of the Christian Greek Scriptures yahulhukibawa omwa yindi mibughe mukagha—Dutch, French, German, Italian, Portuguese, ne Spanish. Omwa 1989 Akathunga Akakasondolha ak’Abema ba Yehova mukahiraho akandi kathunga eriwathikya abahinduli be Biblia eyi. Neryo omwa 2005, erihindulha e Biblia omwa mibughe eya egazeti eno yikahulhukamo mulyahamibwako. Hathya e New World Translation eyosi kutse omwa bitsweka yiri omwa mibughe eyilhabire omu 130.

19. Ekindu kikulhu ekyabya omwa 2013 ni kyahi, kandi omo mwatsi owakakwamako thukendi syakania okuki?

19 Omubughe w’Olhusungu abirighenda akahinduka ah’embindulha eye New World Translation y’Olhusungu yikathahulhukira. Neryo mukyayithagha erithasyasuba muyo nuku mubye Olhusungu olhwa munabwire. Biro 5 n’ebiro 6 Okwerikumi, 2013, abandu 1,413,676 omwa bihugho 31 mubahindana okwa lhuhindano lhw’omwaka olhw’engendo eya 129 olhwe Watch Tower Bible and Tract Society of Pennsylvania imwamuli n’abandi abalhuhulikirira eya bali. Abosi mubatsema bak’owa omughuma w’okwa Kathunga Akakasondolha akaranga erihulhukibwa lye New World Translation ey’Olhusungu eya 2013. Abangyi mubathoghongya emisoni bakahebwa e Biblia eyi. Emilhondo yabere yikasomwa omwa mbindulha eyi, abahulikiriri mubalhangira iyolhobire erisoma n’eriyitheghererya. Omo mwatsi owakakwamako thukendi syakania kutsibu okwa mbindulha eyi kandi nga yinemuhindulhwa yithi omwa yindi mibughe.

^ enu. 5 Ezera 4:8–6:18, 7:12-26; Yeremia 10:11; na Danieli 2:4b–7:28 byahandikawa omwa Kiaramaiki.

^ enu. 6 Ekinywe Septuagint kikamanyisaya “Sanju.” Erihindulha likabya nga lya tsuka omwa Misiri ng’omwa 300 E.K.K. kandi yangabya imuyahwa ng’omwa 150 E.K.K. Embindulha eyi yikine y’omughaso munene, kundi yikawathikaya abakasoma eby’Amasako eriyitheghererya ebindi binywe by’Ekihebrania ebikabya nga bikalire.

^ enu. 8 Kikana lengekanibawa indi Matayo angabya imwahandika ekitabu kiwe omwa Kihebrania, aliwe enyuma w’aho kyamahindulhwa omwa Kigiriki obundi na Matayo iyuwene-wene.

^ enu. 13 Lebaya Appendix A3 omwa New World Translation; eya 2013 kandi n’omwa brokyuwa eya A Book for All People, olhup. 7-9, ahali omuthwe, “Ekitabu Mukyasabuka Kithi?”