Ithwanaminya ekwenene eyihambire oku Nyamuhanga?

Busana naki nyamuhanga anzire ithwaminya ekwenene? Soma Yoane 17:3

Eritsuka kera, Nyamuhanga abiribya inianemukanirania n’abandu. Iniakakolesaya omulimu wiwe abuyirire, ni bugha ambu akaghalha kiwe akakakolha, erihira ebirengekanio biwe omwa malengekania w’abahandika e Biblia. (2 Petero 1:20, 21) Ithukendi minya ekwenene eyihambire oku Nyamuhanga thwamasoma e Biblia.—Soma Yoane 17:17; 2 Timoteo 3:16.

Omwa Biblia, Nyamuhanga akathubisulira emyatsi mingyi eyimuhambireko. Akathubwira ekyaleka iniahangika abandu, eky’akendi syabakolera, n’emibere ey’anzire ithwabyamu. (Emibiri 17:24-27) Yehova Nyamuhanga anzire ithwaminya ekwenene eyimuhambireko.—Soma 1 Timoteo 2:3, 4.

Busana naki Nyamuhanga akakokaya abanzire ekwenene?

Yehova ni Nyamuhanga oyuli mw’ekwenene, kandi mwathuma Yesu, erisyakangirirya ekwenene oko bandu. Busana n’ekyo, abanzire ekwenene, bakanza Yesu. (Yoane 18:37) Abandu ng’abo bo Nyamuhanga anzire ibabya baramya biwe.—Soma Yoane 4:23, 24.

Sitani abirilemesya abandu bangyi eriminya Nyamuhanga omw’ilhalhania esyongangirirya esikabugha ebithahikire oku Nyamuhanga. (2 Abanya Korinto 4:3, 4) Abandu abathyanza ebibuya, bakasima esyongangirirya ng’esyo. (Abanya Roma 1:25) Aliriryo abandu bangyi ab’emithima myolho banemuminya ekwenene eyihambire oku Nyamuhanga erilhabira omw’igha e Biblia.—Soma Emibiri 17:11.