Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwerikuminakughuma 2015

 OMWATSI W’OKWA KIDIPA | NYAMUHANGA AKALHANGIRA ATHI ESYONYUHI?

Ngoku Nyamuhanga Abya Akalhangira Esyonyuhi Omwa Kighonye ky’Erimbere

Ngoku Nyamuhanga Abya Akalhangira Esyonyuhi Omwa Kighonye ky’Erimbere

Abayuda b’omwa kighonye ky’erimbere nabu mubanubibwa. Ng’abathatha-kulhu babu abakera, nabu bangabya imubasaba Nyamuhanga bathi abalhusaye omwa bukobe obw’erinubibwa n’Obuthabali bwe Roma. Neryo mubowa oku Yesu, kandi abandi ibanasi ngoku ya Masiya. Sikiri swekaya abangyi eribya imubabya n’amaha bathi akendi thongolya Abaisraeli okwa munubo w’Abaroma. (Luka 24:21) Aliwe ekyo mukithabya. Omwakanya k’ekyo, Abasirikali be Roma mubasa n’eriherya e Yerusalemu n’Ehekalu omwa mwaka wa 70 E.K.

Mubyabya bithi? Ni kyahi Ekyaleka Nyamuhanga iniathalhwira Abayuda ngoku anabya akakolha kera? Kutse, ekyaleka iniathabalhaghira athi bayilhwireko niki? Mbwino abya iniabirihindulha amalengekania wiwe okwa by’esyonyuhi? Eyihi. Aliwe hane ekyo Abayuda byabya ibabirikolha. Mubaghana Yesu, bathi si Masiya. (Emibiri 2:36) Neryo mubabya isibakiri kihanda kya Nyamuhanga.Matayo 23:37, 38.

Abayuda n’Ekihugho kyabu babya isibakiri omwa butheya bwa Nyamuhanga, kandi isibakitholere bakalengekania bathi Nyamuhanga akendi balighira kutse eribawathikya erilhwa. Ngoku Yesu abya iniabiribugha, olhusunzo lhw’eribya bandu ba Nyamuhanga lhwabya ilhwabirilhua okwa Baisraeli b’onyine-nyine ng’ekihanda n’erisuba okwa kihanda kihya-kihya, e Israeli y’obunyakirimu, abo e Biblia yikahulha mwa “bandu ba Nyamuhanga” kutse e Israeli ya Nyamuhanga. (Abanya Galatia 6:16; Matayo 21:43) Abakristayo abahakabibawa bo babiribya Israeli ya Nyamuhanga ey’obunyakirimu. Omwa kighonye ky’erimbere mubabwirwa indi: ‘Lino muli bandu ba Nyamuhanga.’1 Petero 2:9, 10.

Kundi Abakristayo ab’omwa kighonye ky’erimbere mubabya ibo bamabya “bandu ba Nyamuhanga,” mwanabalhwira nuku angabalhamya okw’inubibwa n’Abanya Roma? Kutse mwanabugha athi balhwe n’abakabanubaya? Eyihi mwathakikolha. Busana naki? Esyonyuhi esyo Nyamuhanga akasighika, iyo yukanathwamu amalhwa ng’abye mughulhu wahi, ngoku thunalyalhangira omwa mwatsi owahwere. Okwa Bakristayo b’omwa kighonye ky’erimbere, Nyamuhanga mwathakwika nyuhi sy’eribalhwira kandi mwathabalhaghira erilhwa. Neryo kwesi, ekighonye ky’erimbere si bwabya buthuku bwa Nyamuhanga obw’erirwanisya obubi n’erinubibwa.

Neryo ngoku Abaisraeli banabya bakakolha, Abakristayo ab’omwa kighonye ky’erimbere babya batholere erilinda obuthuku bwa Nyamuhanga obw’erighunzaho obubi n’eriaghalhwa. Omw’irinda eryo, Nyamuhanga mwathabahamulha eriyithwiramu erilhwa n’esyonzighu syabu. Yesu mwakangania eki kya ndeke-ndeke akakangirirya. Ng’eky’erileberyako mwathalhaghira abigha biwe eriyingirya omwa nyuhi, aliwe mwababwira athi: “Mwanze esyonzighu syenyu, musabire abakabendereraya.” (Matayo 5:44) Abere akabugha ngoku e Yerusalemu ey’omwa kighonye ky’erimbere yikendisyabambirwa n’amahe w’Abaroma, Yesu mwabwira abigha biwe athi ibathibitha, isibasighalha omwa muyi—ekyo kyo banabya bakolire.Luka 21:20, 21.

Kandi n’omukwenda Paulo mwahandika athi: “Simukisaye, . . . kusangwa kisakire kithi, Omukama athi: ‘Erikisya ni ryaghe. Nasyaliha.’” (Abanya Roma 12:19) Paulo asuba omwa bya Nyamuhanga abya iniabiribugha ebiri omwa Abalawi 19:18 na Eryibuka Ebihano 32:35. Ngoku thunalyalhangira  omwa mwatsi owahwere, enzira nguma eya Nyamuhanga abya akakolesya erilhwira abandu biwe lyabya iry’eribawathikya bakalhwa n’esyonzighu syabu. Kwesi ebinywe bya Paulo bikakanganaya ngoku Nyamuhanga abya iniakinalhangira esyonyuhi nga kera. N’omwa kighonye ky’erimbere, Nyamuhanga abya iniakinathwalha esyonyuhi ng’enzira eyitholere ey’erilhwira abaghombe biwe n’erighunza h’obubi n’eriaghalhwa. Aliwe, Nyamuhanga iyukathwamu omughulhu w’erilhwa n’abatholere erilhwa.

Kilhangirikire ndeke ngoku Nyamuhanga mwathalhaghira Abakrisitayo ab’omwa kighonye ky’erimbere eriyingirya omwa malhwa wosi wosi. Ibbwa munabwire? Hane abo Nyamuhanga akalighira erilhwa esyonyuhi? Kutse mbwino, eno y’endambi ya Nyamuhanga ey’erilhwira abandu biwe? Aliwe, munabwire Nyamuhanga akalhangira athi esyonyuhi? Omwatsi w’erighunzerera akendi subirya ebibulyo ebyo.