Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwerikuminakughuma 2015

 OMWATSI W’OKWA KIDIPA

Nyamuhanga Akalhangira Athi Esyonyuhi?

Nyamuhanga Akalhangira Athi Esyonyuhi?

Iwe iwukendi subirya wuthiki? Abangyi bakalengekanaya bathi Nyamuhanga akanasighika esyonyuhi. Bathi kundi kera iniakana lhaghira abaramya biwe eriyalhwa n’abandi bandu; kandi kwenene ebyo bine omwa Biblia. Aliwe abandi bathi Yesu Mughalha wa Nyamuhanga mwakangirirya abigha biwe athi banze esyonzighu syabu. (Matayo 5:43, 44) Neryo bathi busana n’ekyo, Nyamuhanga syakisighika esyonyuhi.

Iwe wukakibughako wuthiki? Mbwino Nyamuhanga akanasighika amalhwa? Amabya iniakanasighikagho, neryo obo, omwa malhwa wa munabwire iniali okwa lhuhandi lhwa bahi? Eby’erisubirya ibyangana kuwathikya nawu erithasyalengekania ndeke okwa nzumwa eyo. Thuthabugha thuthi wasi wuthi Nyamuhanga akasighika esyonyuhi, kandi iwaminya ngoku ali okwa lhuhandi lhwawu, iwukendi yisima kundi wukaminya ngoku abawu bakendi singa. Aliwe ibbwa iwukendi yowa wuthi Nyamuhanga amabya iniakasighika olhuhandi olhwa wuthanzire? Aho kandi iwangananza erimutsweba.

Obo kwesi hane ekya thutholere ithwayitheghererya ndeke. Eriminya Nyamuhanga ng’akalhangira athi esyonyuhi, ikyangana leka iwamwanza kutse iwamupona. Wamabya iwuli omwa bangyi ababirikolhwa nabi n’eriaghalhwa busana n’esyonyuhi, wangabya iwunanzire kutsibu eriminya eky’erisubirya okwa kibulyo kino: Ngoku abandu bakabugha, mbwino Nyamuhanga ni mundu oyuwanzire esyonyuhi, oyukaletha amalhwa wosi n’eriaghalhwa erikalhua mugho, kutse aly’aho sy’atsomene abakaghalhawa?

Wangana sweka wukaminya ngoku ebya Biblia yikabugha biri mbaghane okwa biri ahighulhu. Omwa kwenene, amalengekania wa Nyamuhanga awahambire okwa syonyuhi syali atha hinduka. Thulebaye ekya Biblia yikabugha ngoku Nyamuhanga abya akalhangira esyonyuhi omwa buthuku bw’Abaisraeli n’omwa kighonye ky’erimbere omughulhu Yesu abya okwa kihugho. Ekyo ikikendi thuwathikya erilhangira Nyamuhanga ng’awithe malengekaniaki okwa syonyuhi munabwire, kandi abandu nga bakendisyabya musyo kera na kera.