Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwerikuminakughuma 2015

Eghesaya Omwana Wawu Erikolera Yehova

Eghesaya Omwana Wawu Erikolera Yehova

“Wuleke omundu wa Nyamuhanga . . . athukangiriraye ebyo thwasyakolera omwana oyo wasyabuthwa.”ABAT. 13:8.

ESYONYIMBO: 88, 120

1. Manoa mwayowa athi akaminya ku bakendi thunga omwana?

MANOA na mukali wiwe babya ibanasi ndeke ku sibanga butha omwana kundi omukali abya ngumba. Lero lino omukali amaletha omwatsi owakaswekaya kutsibu, athi bakendi thunga omwana! Omulaika wa Yehova abya iniabiri muhikako erimubwira ekyo. Ahathe erithika-thika, Manoa mwatsema, aliwe kandi abya inianasi ngoku erithunga omwana ni lhukwamirwa olhulithohire. Omwa kihugho ekyabya kyoswire mw’obubi, iyo na mukali wiwe bangathokire bathi erikulya ndeke omwana wabu erikolera Yehova? Manoa “mwasaba” Yehova athi: “Ngakusaba wuleke omundu wa Nyamuhanga [omulaika] oyo wathuma ase kandi okw’ithwe athukangiriraye ebyo thwasyakolera omwana oyowasyabuthwa.”Abat. 13:1-8.

2. Erikangirirya omwana wawu likayithaghaki? (Kanaya n’okwa biri omwa kasanduku “ Abigha Bawu ab’Omughaso Munene Kutsibu.”)

2 Wamabya iwuli mubuthi, nawu wanganabya iwukanayowa ngoku Manoa asaba. Nawu wuwithe omubiiri munene ow’eriwathikya omwana eriminya n’eryanza Yehova. (Emi. 1:8) Ekyo kyabirileka ababuthi bangyi ibahiraho endegheka eyuwene ey’Eriramya ly’Eka. Ni kwenene Eriramya ly’Eka lisa siryo lyangaleka  omwana wawu inianza ekwenene ye Biblia. (Soma Eryibuka Ebihano 6:6-9.) Wanga berererya wuthi olhukwamirwa olhw’er’ingirya ekwenene omwa mwana wawu? Omwatsi ono n’owakakwamako yikendi kangania ababuthi nga banga gherererya bathi Yesu. Nomwakine indi sy’aby’awithe mwana, ababuthi bangana mw’ighirako, kundi abya akakangirirya abigha biwe omwa lhwanzo, omw’iyikehya, n’omwa menge. Thuthakania okwa mibere eyi, mughuma okwa mughuma.

ANZA OMWANA WAWU

3. Yesu mwakangania athi abigha biwe b’olhwanzo?

3 Yesu iniakabya inianemubwira abigha biwe athi abanzire. (Soma Yoane 15:9.) Kandi mwakangania kw’abanzire omw’ibya akabya haghuma nabu n’erisatha nabu. (Mk. 6:31, 32; Yn. 2:2; 21:12, 13) Isibugha ambu obuli ibya nabu ibakabya ibali omwa mibiiri. Neryo mukithabakalira eriminya kw’abanzire. Wanga gherererya wuthi emibere y’erikangirirya lya Yesu?

4. Abaana bangaminya bathi ku wubanzire? (Lebaya ekisasani ekiri okw’itsuka.)

4 Bwira abaana bawu wuthi wubanzire, kandi mughulhu wosi bakanganaye ku ni b’omughaso okw’iwe. (Emi. 4:3; Tito 2:4) Samuel, owe Australia, akabugha athi: “Omughulhu nabya ingakine mulere, Thatha iniakabera erinyisomera ebiri omwa Ekitabu Kyaghe eky’Esyangano Sye Biblia obuli igholho-gholho. Iningamubulhaya inianemusubamo, inianyihira okwa kikuba n’erisigha anyilhalirirya. Mukyanyiswekya ingaminya ngoku iyo akakulha mubatha mukolera ebi! Aliwe iyo mwalengaho erinyikangania olhwanzo omwa nzira eyi. Ekyo mukyaleka iniabya munywani waghe kutsibu, kandi iningayowa buholho n’eribya omwa butheya ithune haghuma.” Leka n’abaana bawu bayowa bathya omw’ikolesya ebinywe nga, “Ngakwanzire.” Kanganaya omwana y’olhwanzo. Kanaya nabu, wulye nabu, satha nabu.

5, 6. (a) Abo Yesu anzire akabakolha athi? (b) Soborera erikunga eryuwene nga lyanga leka lithi omwana iniayowa buholho.

5 Yesu mwabugha athi: “Ngakunga n’erisuyira abosi abo nyanzire.” * (Erib. 3:19) Nomwakine indi abigha ba Yesu ibakanabera erisubirira omwa kya Yesu akabathanga, eribera erikuba obuhaka omukulhu omw’ibo nga nindi, mwathalhuhirira eribahana. Kandi isyali balekeranaya bamalemwa erighendera okwa by’akabahana. Omwa lhwanzo n’omwa bwolho-bwolho Yesu iniakabakunga okwa ndambi eyitholere kandi omwa mwanya owatholere.Mk. 9:33-37.

6 Kanganaya ngoku wanzire abaana bawu omw’ibakunga. Obundi ihanganayira ikyayithaghisya erisoborera buyira ekikaleka ikyabya ini kibi kutse ikihikire erikolha kindu kirebe. Okwa bundi buthuku, omwana angana ghana erikolha ngoku wulya muhabulha. (Emi. 22:15) Ekyo kyamabya, gherereraya Yesu. Omwa lhwanzo n’omwa bwolho-bwolho, omwana wawu oyo musuyire okwa ndambi n’omwanya owatholere, erighumisirizya omw’imusondolha, erimukangirirya n’erimukunga. Mwali wethu omwa South Africa ya Elaine akabugha athi: “Ababuthi baghe ibakabya ibanemunyikunga. Bamanyikunga okwa kindu kirebe ibakabya ibane mulebya nga mungan’owa. Aliwe isibali nyikunga omwa kinigha kutse erinyikunga isibathanyibwira enzumwa. Ekyo ikikaleka inayowa  buholho. Munaminya ndeke ebyanga tholere erikolha n’ebya ngatha tholere erikolha.”

KANGANAYA ERIYIKEHYA

7, 8. (a) Yesu mwakangania athi eriyikehya omwa misabe yiwe? (b) Emisabe yawu yanga wathikya yithi abaana bawu eriyikethera Nyamuhanga?

7 Thalengekania abigha ba Yesu nga mubayowa bathi okwa bya Yesu abugha omwa musabe wiwe athi: “Thatha, Thatha! emyatsi yosi yikathokekana okw’iwe. Wunyilhusaye kw’olhuthehi olhu. Nikwa butsira ekyo nyanzire, nikwa ekyo wanzire.” (Mk. 14:36) Ahathe erithika-thika, abigha ba Yesu babere balhangira ngoku iyo ng’omundu oyuhikene amalemba-lemba Thatha wiwe, mubaminya ngoku nabu ekyo kya batholere ibakolha.

8 Ni kyahi ekya abaana bawu bak’igha wamasaba haghuma nabu? Ni kwenene enzumwa yawu y’erisaba siry’erikangirirya abaana. Nomwabine bithya, wamasaba n’abaana bawu, nabo bak’igha eriyikethera Yehova. Ana, owe Brazil, akabugha athi: “Ihakabya hamabya ebitsibu, ng’omughulhu ababuthi ba mama waghe balhwalha, mama na thatha ibakasaba Yehova abahe akaghalha k’erighuma n’amenge w’erithwamu ndeke. Nomubangabya ibahathathene kutsibu, ebitsibu byabo ibakabireka Yehova. Ekyo mukyaleka naghe nam’igha eriyikethera ndeke Yehova.” Wukasaba n’abaana bawu, isiwasabira ibo basa. Saba wuthi Yehova nawu akuwathikaye—obundi erikuwathikya erikania n’oyukakukolesaya wukamusaba obuthuku bw’erighenda okwa lhuhindano olhunene, erikuha amani w’erithulira omutaka wawu kutse erikuwathikya omwa yindi mibere. Wamayikethere Yehova, n’abaana bawu ibakendi kw’ighirako.

9. (a) Yesu mw’eghesya athi abigha biwe erikolera abandi ibanayikehirye? (b) Abaana bawu bakend’ighaki wamabya iwanzire eriwathikya abandi?

 9 Omwa by’abya akabugha n’omwa by’abya akakolha, Yesu mw’eghesya abigha biwe erikolera abandi omw’iyikehya. (Soma Luka 22:27.) Mwakangirirya abigha biwe omubere w’eriyihayo omwa mubiiri wa Yehova n’erikolangana n’abalikyabo. Nawu wamakangania eriyikehya omw’iyihayo, abaana bawu ibakendi kw’ighirako. Debbie mama w’abaana babiri akabugha athi: “Isindi yowa nabi busana n’obuthuku obwa mwira waghe abya akaghunza n’abandi iyo ng’omusyakulhu. Nabya inganasi ngoku thwamamuyithagha, iniakendi thuhulikirira.” (1 Tim. 3:4, 5) Na mwira wiwe Pranas, akabugha athi: “Enyuma w’aho abaana bethu mubatsuka eritsemera n’erikolha okwa mibiiri y’okwa mihindano minene n’eyindi mibiiri y’ekithunga. Mubakulha-kulhana, bamabana abanywani, kandi bamayowa ini b’okw’ibo!” Hathya eka eyosi yinemukolera Yehova omwa mubiiri w’omughulhu wosi. Emibere eya wukakanganirayamu eriyikehya n’eriyihayo, yikendi leka n’abaana bawu nabu ibigha eriwathikya abandi.

KANGANAYA AMENGE

10. Omughulhu abandu basa oku Yesu, mwakangania athi ngoku ni w’amenge?

10 Yesu mwakangania ku ni w’amenge omw’ithendi tsomana ekya mundu alya kolha aliwe iniakatsomana ekiryaleka iniakikolha. Kiro kighuma abandi abamuhulikirira mubabya ng’aban’anzire erimukwama. (Yn. 6:22-24) Aliwe Yesu kundi iniakaminya ebiri omwa muthima, mwalhangira ngoku abandu abo batsomene ebyalya omwakanya k’ebyabya akakangirirya. (Yn. 2:25) Mwalhangira ekitsibu, neryo amabahabulha omwa bwolho-bwolho n’eribabwira ah’eryuwania.Soma Yoane 6:25-27.

Mbwino omwana wawu akanatsemera n’erianza erithulira? (Lebaya enungu 11)

11. (a) Iha eky’erileberyako ekikakanganaya ngoku amenge angawathikya eriminya omwana wawu ng’akana tsemera erithulira. (b) Wanga kolhaki nuku omwana wawu anze n’eritsemera erithulira?

11 Nomwakine indi siwangathoka eriminya ebiri omwa muthima, wangana kolesya amenge eriminya omwana wawu ng’akalhangira athi omubiiri w’erithulira. Abandi babuthi omw’ithulira, bakana lhuhuka hake nuku abaana babu balhuhuke kutse ng’eribaha eky’erirya. Aliwe ibbwa iwangana yibulya kino, ‘Mbwino omwana waghe akanatsemera omubiiri  w’erithulira kutse akatsemera erilhuhuka lisa?’ Wamalhangira abaana bawu ibanzire erithulira, iwe nabu muhireho ebilhubirirwa. Nabu bawathikaye basangire omw’ithulira bakaghenda nawu.

12. (a) Yesu mwakolesya athi amenge erihabulha abigha biwe okwa by’obutswatswa? (b) Erihabulha lya Yesu mulyabya lithi iritholere?

12 Yesu kandi mwakangania amenge akasoborera ebindu ebikakolhaya okwa kibi. Ng’eky’erileberyako, abigha biwe babya ibanasi ngoku erisingira ni kibi. Aliwe mwabakunga okwa byangaleka omundu iniasingira, athi: ‘Obuli mundu oyukasamalira omukali omwa ngumbu nyibi iniamabirisingira nayu omwa muthima. N’eriso lyawu ly’amali lyamaleka wukakolha ekibi, wukuleryo, wughuseryo!’ (Mt. 5:27-29) Okwa Bakristayo ababya bikere omwa buthabali bwe Roma, ebinywe ebyo byabya bitholere. Oyusomire ebya kera mwahandika athi omwa misathu ye Roma, “ameso iniakalhangira n’amathwe iniahulikirira eby’obutswatswa kandi eby’obusingiri ibya bandu bakasima kutsibu erilebya.” Yesu erikangania abigha biwe b’ebyangalekire ikyabakalira eribya iban’erire mukyakangania amenge n’olhwanzo lhwiwe.

13, 14. Abaana bawu wangabatheya wuthi okwa by’eriyitsemesya ebithuwene?

13 Amenge angana leka iwathoka eritheya abaana bawu okw’itsanda bunyakirimu. Munabwire, ni kyolho abaana erilhangira eby’obutswatswa n’ebindi ebithuwene ibakine balere kwilhaba kera. Kwenene, ababuthi Abakristayo bakabwira abaana babu ngoku eby’eriyitsemesya ebithuwene ni kibi. Aliriryo, amenge angana kuwathikya eriminya ngoku omwana wawu nayu angananza erilebya eby’obutswatswa. Yibulhaye: ‘Ni kyahi ekyangaleka omwana waghe inianza erilebya eby’obutswatswa? Mbwino anasi ekikaleka ikyabya ini ky’akabi? Mbwino emibere yaghe yangana leka iniambikako amabya iniabiri lebya eby’obutswatswa?’ Abaana bawu n’omubangabya ibakine balere, wangana kania nabu wuthi: “Wamayisanga iwabirilebya eby’obutswatswa ambi isiwasagha erinyibwira. Nganza ingakuwathikya.”

14 Nawu amenge iniakendi kuwathikya erisombolha ndeke eby’eriyitsemesya. Pranas akabugha athi: “Abaana omw’eka ibakendianza esyonyimbo, esyofilimu, kutse ebitabu ebyothwanzire. Wangana bugha bingyi, aliriryo abaana bawu ibakendi kugherererya n’erilebya ebya wukakolha.” Abaana bawu bamalhangira wukasombolha eby’eriyitsemesya ebyuwene nabu ikubanemwendi kolha bathya.Abar. 2:21-24.

NYAMUHANGA W’OKWENENE AKENDI KUHULIKIRIRA

15, 16. (a) Busana naki wutholere iwayikethera ngoku Nyamuhanga akendi kuwathikya erikangirirya abaana bawu? (b) Omwa mwatsi owakakwamako thukendi syakania okuki?

15 Mubyabya bithi Manoa akasaba obuwathikya obw’erikulya mughalha wiwe? “Nyamuhanga mwahulikirira omulenge wa Manoa.” (Abat. 13:9) Ababuthi, nenyu Yehova akendi bahulikirira. Akendi suba omw’isaba lyenyu n’eribawathikya erikangirirya abaana benyu. Olhwanzo, eriyikehya, n’amenge bikendi kuthokesya.

16 Ngoku Yehova akanawathikaya ababuthi erithoka erikangirirya abaana balere, kw’anemwendi bawathikya athya erikangirirya eminyethu. Omwa mwatsi owakakwamako thukendi syalebya ngoku ababuthi banga gherererya olhwanzo, eriyikehya, n’amenge wa Yesu erithoka erikangirirya emyusuko erikolera Yehova.

^ enu. 5 Omwa Biblia, erikunga liri mw’erisondolha omwa lhwanzo, erikangirirya, erihabulha, kutse n’okwa bundi buthuku eriha ekifubiro—ebyosi ebyo sibiri kolhawa omwa kinigha.