Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwerikumi 2015

“Wukanyaye Erikirirya Lyethu”

“Wukanyaye Erikirirya Lyethu”

“Wuwathikaye erithend’ikirirya lyaghe!”MARIKO 9:24.

ESYONYIMBO: 81, 135

1. Erikirirya ni ry’omughaso lithi? (Lebaya ekisasani ekiri okw’itsuka.)

WUNE wathayibulya kino, ‘Mbwino ngane mundu oyo Yehova anganza erisyalhamya okwa bulighe bunene n’erinyingirya omwa kihugho kihya-kihya?’ Ni kwenene ni bingyi ebyanga leka ithwalhamibwa, aliriryo ibbwa ekikulhu, eky’omughaso ky’ekya Paulo akanayako kino: “Ahathe erikirirya omundu syangathoka eritsemesya Nyamuhanga.” (Ebr. 11:6) Eki kyanganabya nga kyolho aliwe ekwenene yiri yithi, “si bandu bosi abak’ikiriraya.” (2 Tes. 3:2) Ekyo kikaleka ithwaminya kwesi ku ni kikulhu erilhangira thuthi thukabya n’erikirirya erighumire.

2, 3. (a) Thuk’ighaki omwa bya Petero abugha okw’ikirirya? (b) Ni bibulyo byahi ebya thukendi kaniako?

2 Omukwenda Petero mwakangania omughaso w’eribya n’erikirirya akabugha athi erikirirya “litholere iryalengwako” nuku lyanga letha “eripipa n’olhukengerwa, erisikibwa oko kiro ekyo Yesu Kristo asyabisulhwa.” (Soma 1 Petero 1:7.) Kundi obulighe bunene bunemwasa buk’anguha, mbwino sikyangabya kibuya eribya omwa bawithe erikirirya eryo Omwami wethu ow’olhukengerwa akendi syatsemera akasa? Ahathe erithika-thika, thwanzire eribya n’erikirirya erikalhamaya esyongebe syethu. (Ebr. 10:39) Thwamabya n’ekilhubirirwa eki, ithukendi saba ng’omulhume oyuwabugha athi: “Wuwathikaye erithend’ikirirya lyaghe!” (Mk. 9:24) Kutse ithwangana bugha ng’abakwenda ba Yesu thuthi: “Wukanyaye erikirirya lyethu.”Lk. 17:5.

 3 Omwa mwatsi ono thukendikania okwa bibulyo bino. Thwanga himba thuthi erikirirya lyethu? Thwangakangania thuthi ngoku thunawithe erikirirya? Ni kyahi ekikathukakasaya ngoku thwamasaba thuthi erikirirya lyethu likanyirire, ithukendi subwamu?

ERIBYA N’ERIKIRIRYA ERIKATSEMESAYA NYAMUHANGA

4. Ni bahi abangana leka ithwanza erighumya erikirirya lyethu thwamab’ighako?

4 Kundi “ebyosi ebyasakawa erimbere omwa Masako byasakawa busana n’erithukangirirya,” ni bingyi ebya thwangan’ighira okwa babya n’erikirirya abali omwa Biblia. (Abar. 15:4) Thwamasoma okwa bandu nga Abrahamu, Sara, Isaka, Yakobo, Musa, Rahabu, Gideoni, Baraka, n’abandi bangyi, ikyangana leka ithwalebya ndeke erikirirya lyethu. (Ebr. 11:32-35) Eryongera okw’ekyo, thukabya thuk’igha okwa bihambire okwa balikyethu abamunabwire abawithe erikirirya erighumire, kikaleka ithwahira h’akaghalha erighumya erikirirya eryethu. *

5. Eliya mwakangania athi kw’ali n’erikirirya erighumire omu Yehova, kandi eky’erileberyako kiwe kikaleka ithwalengekania okuki?

5 Omwa Biblia mune eky’erileberyako ky’omuminyereri Eliya ng’oyuwakanganaya erikirirya. Thalengekania okwa byabya ebya kanganaya ngoku ayikethere Yehova. Omughulhu Eliya abwira Omwami Ahabu ngoku Yehova akendi letha ekyanda, omwa buthubaha Eliya mwa bugha athi: “Ngoku Mwami Mukulhu . . . aneho, . . . sihendi syabya ekime kutse embulha!” (1 Bam. 17:1) Eliya mwayikethera Yehova ngoku akendi muha n’eriha abandi b’ebyo bakayithagha omwa buthuku bw’ekyanda. (1 Bam. 17:4, 5, 13, 14) Mwayikethera ngoku Yehova akendi subya omwana oyuwabya iniabiriholha. (1 Bam. 17:21) Ahathe erithika-thika, mwayikethera ngoku Yehova akendi thuma omuliro erihisya obuhere obwabya okwa Kithwe Karmeli. (1 Bam. 18:24, 37) Omughulhu obuthuku bwa Yehova bwahika obw’erighunza h’ekyanda, nibya isihali habya n’ekikakanganaya ngoku embulha yikayawa, Eliya mwabwira Ahabu athi: “Wuhethuke, wulye, wupulhaye; kusangwa hali mulenge w’embulha nyingyi.” (1 Bam. 18:41) Mbwino eby’erileberyako ebi sibiri leka thukanza eriyirebya nga thunawithe erikirirya erighumire lithya?

THWANGA KOLHAKI ERIHIMBA ERIKIRIRYA?

6. Erithoka erihimba erikirirya lyethu ni kyahi ekya thutholere ithwasaba Yehova?

6 Sithwangathoka erihimba erikirirya lyethu omwa kaghalha kethu. Erikirirya ni kighuma ky’okwa mikolere eyikalhwa okwa mulimu wa Nyamuhanga. Neryo kwesi ni ky’amenge erighendera okw’ihano lya Yesu ery’erisaba omulimu, kundi Yesu akathukakasaya athi Thatha wiwe analighire eriha omulimu abuyirire okwa bakamusabagho.Lk. 11:13.

7. Iha eky’erileberyako ngoku thwanga ghumya erikirirya lyethu.

7 Erikirirya lyethu lyamabirighuma, thutholere ithwalholya embere eririghumya. Erikirirya lyethu lyangana sosekanibwa n’omuliro w’esyongwe. Omuliro oyu akabya akathatsuka, akaka ndeke. Aliriryo wamalekeraniagho, iniakendighenda akalima, imwasighalha amakalha n’erighunzerera iryabya ibwe lisa. Aliwe wamabera ery’ongera mw’esyongwe n’erithundagho, iniakendibya inianemwaka buthalima. Kuthya, n’erikirirya lyethu irikendi lholha embere thwama yeghesya Ekinywe kya Nyamuhanga mughulhu wosi. Thwamabya ithunemuyeghesya e Biblia, ithukendyanzayo ithwanza na Mwinyeyo,  neryo erighunzerera ikyaleka ithw’ongera erighumya erikirirya lyethu.

8. Ni kyahi ekyanga thuwathikya erihimba erikirirya lyethu?

8 Ni bindi byahi ebya wangakolha erihimba erikirirya lyawu? Isiwayowa wuthi ebyawamath’igha erihika okw’ibatizibwa bikaghunza. (Ebr. 6:1, 2) Iwangana lholha embere erigha okwa maminyereri we Biblia aw’anemubererera kundi ekyo ikyanganaghumya erikirirya lyawu. Kandi iwangana kolesya ekinywe kya Nyamuhanga ng’ekipimo erilebya erikirirya lyawu nga line ng’ery’abawithe erikirirya erighumire.Soma Yakobo 1:25; 2:24, 26.

9, 10. Bino byanga himba bithi erikirirya: (a) abanywani babuya? (b) emihindano? (c) erithulira?

9 Omukwenda Paulo mwabwira Balikyabu athi batholere “erisikania emithima omw’ikirirya.” (Abar. 1:12) Omughulhu thukasangira haghuma na balikyethu, thukahimbangana, kutsibu-tsibu omughulhu thuli n’abawithe erikirirya eryabirilengwako. (Yak. 1:3) Amanywani mabi akatsandaya erikirirya, aliriryo awuwene akalihimba. (1 Kor. 15:33) Eki ky’ekikaleka ithwahanwa okw’ithendi lekerania “erihindana lyethu haghuma,” aliwe ngoku thutholere ithwalholha embere erihimbangana. (Soma Abaebrania 10:24, 25.) Eyindi nzumwa yiri yithi, thukabana ebikahimba erikirirya lyethu omwa byathuk’igha okwa mihindano. Eki kikaghenda-ghendanaya n’ebya Paulo abugha bino: “Erikirirya likasa busana n’eryowa.” (Abar. 10:17) Mbwino erihindana okwa mihindano y’Ekikristayo nina mubere wawu?

10 Omughulhu thukasangira omw’ithulira, sithulihimba erikirirya ly’abandi lisa aliriryo thukahimba n’ery’ethu. Ng’Abakristayo abakera, nethu thukanza ithwabya n’erikirirya erighumire omu Yehova n’eriminya ngoku thwanga bugha okwa kyosi-kyosi omwa buthubaha.Emib. 4:17-20; 13:46.

11. Ni kyahi ekyaleka Kalebu na Yosua ibabya n’erikirirya erighumire, nethu thwangabya thuthi ng’ibo?

11 Thukabya thukalhangira ngoku Yehova anemuthuwathikya kandi ngoku anemusubirya emisabe yethu, erikirirya lyethu likaghuma. Ekiri ng’eki mukyabya oku Kalebu na Yosua. Mubakangania ku bawithe erikirirya omughulhu bayalinga Ekihugho ekya Lhaghanisibawa. Aliwe kandi, babere bakalhangira ebya Yehova akakolha omwa ngebe syabu, erikirirya lyabu mulyayongera. Ky’ekyanaleka Yosua iniabugha n’Abaisraeli athi: Sihali “kinywe na kighuma ekikehire okwa binywe byosi ebyuwene ebyo Mwami Mukulhu Nyamuhanga wenyu abugha busana n’enyu.” Kandi enyuma w’aho mwabugha athi: “Na lino mubahe Omwami Mukulhu mumukolere omwa kwenene n’ekundu . . . Nikwa ingye n’ekithunga kyaghe thwasyakolera Omwami Mukulhu.” (Yos. 23:14; 24:14, 15) Nethu thukabya thunemuyibanira obubuya bwa Yehova, nethu ithwanganabya n’eriyikethera ng’eryo.Esy. 34:8.

ERIKANGANIA ERIKIRIRYA

12. Yakobo athi ekikulhu ni kyahi omw’ikangania erikirirya?

12 Thukakanganaya thuthi ngoku thuwithe erikirirya erighumire? Omukwenda Yakobo mwasubirya okwa kibulyo ekyo athi: “Ngendikukangya erikirirya lyaghe omwa mibiiri yaghe.” (Yak. 2:18) Ebya thukakolha byo bikakanganaya ngoku thunawithe erikirirya. Thulebaye eby’erileberyako.

Abakayihweraya omwa mubiiri w’erithulira bakakanganaya ngoku bawithe erikirirya erighumire (Lebaya enungu 13)

13. Omubiiri wethu w’erithulira anga thuwathikya athi erikangania erikirirya lyethu?

13 Erisangira omwa mubiiri w’erithulira ni nzira ngulhu ey’erikanganirya mw’erikirirya lyethu. Busana naki? Kundi omughulhu thukathulira thukakanganaya ku thun’ikirirye ngoku enduli yiri hakuhi kandi ngoku ‘siyendi syamalha.’ (Hab. 2:3)  Wamanza erilebya nga wunawithe erikirirya, iwayilebya nga wanzire bungahi omubiiri w’erithulira. Mbwino wunemulengaho ngoku wanga thoka omw’eki, obundi n’eryanza erithasyakolha bingyi? (2 Kor. 13:5) Omwa kwenene, “erithulhagho omwa bunu” bwethu omwatsi w’erilhamibwa kikakanganaya ngoku thuwithe erikirirya.Soma Abanya Roma 10:10.  

14, 15. (a) Thwangakangania thuthi erikirirya omwa ngebe yethu eya buli kiro? (b) Iha ekyalholirweko ekikakanganaya erikirirya erighumire.

14 Kandi thukakanganaya erikirirya omughulhu thukalhaba omwa bitsibu. Mbulha thuwithe ebitsibu ng’amalhwere, erihwa amani, ebitunturo, obunakwa, kutse ebindi bitsibu, thuyikethere ngoku Yehova na Mughalha wiwe bakendi thuwathikya okwa buthuku obutholere omwa mughulhu w’obwagha. (Ebr. 4:16) Eriyikethera ng’eryo thukalikanganaya omughulhu thukasaba n’ebindi, butsira eby’obunyakirimu bisa. Yesu mwabugha athi ithwangana saba n’ebindu by’ekinyamubiri, ng’erisaba “akalyo kethu akathutholere.” (Lk. 11:3) Eby’erileberyako ebiri omwa Biblia bikaleka ithwayikethera ngoku Yehova iniakendi thuha ebya thukayithagha. Omwa kyanda ekyabya e Israeli, Yehova iniakaha Eliya y’ebyalya n’amaghetse. “Ebikororo ibikamulethera obundu n’eyiswe omwangyakya-ngyakya n’obundu n’eyiswe omw’igholho-gholho neryo mwabya akapulya okwa kusi,” ngoku Yehova analhaghira. (1 Bam. 17:3-6) Thuyikethere ngoku Yehova iniakendiyira eky’akakolha nuku thubane ebyathukayithagha.

Omughulhu thukaghumira ebitsibu, thukakanganaya erikirirya (Lebaya enungu 14)

15 Thuyikethere ngoku erighendera okwa misingyi ye Biblia irikendireka ithwabana eky’erirya. Rebecca, mwali wethu omuthahibwa owe Asia, mwayilhangirira eki. Babirikolesya erisako erya Matayo 6:33 ne Emisyo 10:4 omwa ngebe yabu, omw’ihira Obwami bw’embere n’erikolha emibiiri yabu n’omuhwa. Akabugha athi mwira wiwe mwayowa omubiiri ow’akakolha ng’akahira obunyakirimu bwiwe bw’omwa kabi, neryo mwalekagho. Aliriryo babya ibanawithe abaana bani. Rebecca akabugha athi: “Muthwatsuka eribya thukakolha ehiggati ehikasihirira ehy’erighulya. Emyaka eyosi eya thwaghunza ithunemubana eky’erirya omwa nzira  eyi, muthwayowa Yehova isyathathulekerenia. Sihali kiro thwasiba nzalha.” Mbwino nawu wunayikethere ngoku e Biblia yinemuha abandu b’obusondoli obuwene munabwire?

16. Thwamayikethera Nyamuhanga imukendi lhwiririraki?

16 Ahathe erithika-thika, erighendera okwa busondoli bwa Nyamuhanga likathughasira kutsibu. Akasuba omwa binywe bya Habakuki, Paulo mwahandika athi: “Omuthunganene asyabyaho busana n’erikirirya.” (Gal. 3:11; Ebr. 2:4) Neryo kwesi, thutholere ithwayikethera Oyuwanga thuwathikya omwa kwenene. Paulo akathw’ibukaya ngoku Nyamuhanga iyo “yuwithe obuthoki bw’erikolha ebyosi ebyo thukabulhaya kutse ebyathukalengekanaya ng’obuthoki obukakolha omwisi wethu.” (Efe. 3:20) Abaghombe ba Yehova bakakolha ngoku banga thoka erikolha erisonda liwe, aliwe kundi banasi ngoku sibanga thoka ahabwabu, bakayikethera Yehova. Mbwino sikirithutsemesaya eriminya ngoku Nyamuhanga wethu akathusighika?

ERISABA ERIKIRIRYA LIKASUBAWAMU

17. (a) Erisaba ly’abakwenda ery’erihebwa erikirirya mulyasubwamu lithi? (b) Busana naki thutholere ithwayikethera ngoku ithukendisubwamu thwamasaba ery’ongera erikirirya lyethu?

17 Busana n’ebya thwamabir’igha, thwangana yowa ng’abakwenda omughulhu babwira Yesu bathi: “Wukanyaye erikirirya lyethu.” (Lk. 17:5) Erisaba lyabu mulyasubwamu okwa Pentekote 33 E.K. omughulhu buthulirawako omulimu abuyirire neryo bamathoka eriyitheghererya ebighendererwa bya Nyamuhanga. Eki mukyaghumya erikirirya lyabu. Ekyalhwiririramu, mubatsuka omubiiri munene ow’erithulira n’omuhwa. (Kol. 1:23) Mbwino nethu thwamasaba erikirirya ithwanganasubwamu? E Biblia yithi “thwamabulya ekindu omw’isonda liwe akathw’owa.” ithukendisubwamu.1 Yn. 5:14.

18. Yehova akatsumulha athi abawithe erikirirya?

18 Ahathe erithika-thika, Yehova akatsemera abakamuyikethera kutsibu. Iniakendi thusubirya thwamamusaba erikirirya, kandi erikirirya lyethu irikendyongera, ikyaleka ithwathoka “erighanzwa nga batholere Obwami bwa Nyamuhanga.”2 Tes. 1:3, 5.

^ enu. 4 Erithasyasoma n’okwa bandi, lebaya ebihambire oku Lillian Gobitas Klose omwa Awake! eya Okwomusanju 22, 1993, Feliks Borys omwa Awake! eya Okwakabiri 22, 1994, na Josephine Elias omwa Awake! eya Okwomwenda 2009.