Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwerikumi 2015

 AMENGE AWAHEBAWA KERA AKINAKOLHA

Ghanyira

Ghanyira

EKYA BIBLIA YIKABUGHA: “Neryo mughanyirane.  . . omughulhu oghundi awithe omwatsi okwa ghundi. Ngoku Mukama ababuyira nenyu ku mwangabuyira abandi bo muthya.”Abanya Kolosai 3:13.

Eki kikamanyisayaki? Omwa Biblia, ekibi kikanathwalhawa ng’eribanza n’erighanyira iryathwalhwa ng’erithendithasyathuhya eribanza. (Matayo 18:21-35) Omwatsi mughuma akakanganaya athi omwa Masako, ekinywe ky’Ekigiriki ekikahindulhawa mwa “ghanyira” kikanamanyisaya “erilekera omundu y’eribanza, isiwanga thasyamuthuhya.” Neryo kwesi, thwamathwamu erighanyira omundu oyuwabirithusoberya, thukabya isithukimuyithagha kw’erikolha ekyosi-kyosi nuku thwanga mughanyira. Aliwe erighanyira omundu sikirimanyisaya indi eky’alyathukolhako thwakithwere nga kibuya. Aliwe thukabya ithwamathwamu erithend’ihithana, nomwakine indi thunasingene omwa mwatsi owa thumuwitheko.

Mbwino kikinatholere na munabwire? Kundi ithwe bosi sithuhikene, thukasobaya. (Abanya Roma 3:23) Neryo kwesi ni kya menge eribya n’omuthima w’erighanyira, kundi endambi ni ndambi nawu wukendi yithagha erighanyirwa. Nibya, thukabya thwamaghanyira, nethu thukaghasirawa. Thuthi?

Thwamabika ekinigha—thukathendi ghanyira—n’ithwe thuk’aghalhawa. Eki kikathughunza kw’etseme, ikyathuhira omwa buli nga bukobe, ithwabya omw’ilirikana. Kandi kyangana lhwiririra mw’obulhwere obukalire. Dokita Yoichi Chida na Profesa omwa by’Emibere y’Abandu iya Andrew Steptoe mubahandika omwatsi omwa gazeti eya Journal of the American College of Cardiology, bathi: “Erisekulya erya lino-lino likakanganaya ngoku ekinigha n’obutsurumi bikaletha obulhwere bw’omuthima [CHD].”

Aliwe thuthalebya emighaso eyiri omw’ighanyira. Thukabya thwamaghanyira abandi, thukaleka ihabya obuholho n’obughuma, ikyaleka ithwabya n’engolangana eyuwene n’abandi. Ekikulhu kutsibu, thukabya ithwamakangania ngoku thukagherereraya Nyamuhanga, oyukaghanyira abakayisubamu kandi oyukanza nethu ekyo ikyathwanakolha.Mariko 11:25; Abanya Efeso 4:32; 5:1