Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwomwenda 2015

Ni Byahi Ebikakanganaya Yehova kw’Athwanzire?

Ni Byahi Ebikakanganaya Yehova kw’Athwanzire?

“Mulhangire ngoku Thatha abirithwanza kutsibu!”1 YN. 3:1.

ESYONYIMBO: 91, 13

1. Omukwenda Yoane mwabwira Abakristayo athi bakoleki, kandi busana naki?

EBINYWE ebya mukwenda Yoane abugha omu 1 Yoane 3:1 ni by’erilengekania kwa kutsibu. Eribugha athi “mulebaye ngoku Thatha athwanzire kutsibu,” abya iniakahira omwa Bakristayo mw’omuhwa ow’erighanirya okwa bunene bw’olhwanzo lhwa Nyamuhanga kandi ng’akalhukanganaya athi. Eriyitheghererya olhwanzo lhwa Yehova lhwa thuthya irikendi leka ithwongera erimwanza n’erighumya obughuma bwethu nayu.

2. Busana naki kikanakalira abandi eriyitheghererya ngoku Nyamuhanga abanzire?

2 Eky’obulighe, abandi sibasi ngoku Nyamuhanga abanzire. Ibo basi bathi Nyamuhanga omubiiri wiwe n’ihiraho ebilhaghiro n’erisuyira abathe bighenderako. Kandi esyongangirirya sy’amabehi syabirileka ibalengekania bathi Nyamuhanga syathwanzire kutse nethu sithwanga mwanza. Aliriryo ibbwa hane abak’ikiriraya ngoku Nyamuhanga anzire obuli mundu. Wabere wuk’igha e Biblia muwaminya ngoku olhwanzo w’omubere mukulhu wa Yehova kandi ngoku lhw’olhwaleka iniathuma Mughalha wiwe erisyabya mbanulho busana nethu. (Yn 3:16; 1 Yn 4:8) Aliwe kyangana kukalira eriyitheghererya olhwanzo olhwa Yehova akuwithire busana n’ebyawukalhabamu omwa ngebe.

3. Ni kyahi ekyanga thuwathikya erilhangira ngoku Nyamuhanga athwanzire?

 3 Neryo ni byahi ebikakanganaya ngoku Yehova athwanzire? Eribana eky’erisubirya, thutholere ithwayitheghererya obughuma obuli ahakathi-kathi kethu na Yehova. Ahathe erithika-thika, Yehova, ya Muhangiki w’abandu bosi. (Soma Esyonyimbo 100:3-5.) Ky’ekikaleka e Biblia iy’ahulha Adamu mwa “mughalha wa Nyamuhanga,” na Yesu mwakangirirya abigha biwe eryahulha Nyamuhanga mwa “Thatha wethu oyuli elhubulha.” (Lk 3:38; Mt. 6:9) Yehova ni Thatha wethu kundi akathuha engebe. Obughuma obwa thuwithe nayu buli ng’obwa thatha n’abaana biwe. N’ibugha ambu Yehova athwanzire ngoku thatha akananza abaana biwe.

4. (a) Yehova ni wa mbaghane athi okwa bathatha wethu? (b) Thukendikania okuki omwa mwatsi ono n’owakakwamako?

4 Abathatha wethu sibahikene kundi ni bandu. Nomubanga lengaho bungahi, sibangahika oku Thatha wethu Yehova omw’ikangania olhwanzo. Abandi mubakulira omwa maka aw’abya mw’abathatha ababya bakabakolha nabi kutsibu, ekindu ekyabirisigha okwa mithima yabu kw’ebironda. Ekyo ni ky’akabi kandi kik’itha obulighe. Aliwe omwa kwenene Yehova iyo kwathe athya. (Esy. 27:10) Eriminya ngoku Yehova athwanzire kandi ngoku athutsomene kikendi leka ithwayithunda hakuhi nayu. (Yak. 4:8) Omwa mwatsi ono, thukendikania okwa bindu bbini ebikakanganaya ngoku Yehova athwanzire. Omwa w’akakwamako ithwalebya esyonzira ini esya thwanga kanganiryamu ngoku thwanzire Yehova.

YEHOVA YUKATHUHA EBYA THUKAYITHAGHA

5. Ni byahi ebihambire oku Nyamuhanga ebya Omukwenda Paulo abwira Abanya Atene?

5 Omughulhu omukwenda Paulo abya omwa muyi we Atene, e Greece, mwalhangira ngoku omuyi oyu oswire mw’esyosanamu n’esyonyamuhanga kandi ibakalengekanaya bathi syasikabaha engebe n’ebyosi ebya bakayithagha. Paulo mwathwamu eribugha athi: “Nyamuhanga oyo wahangika ekihugho n’ebindu ebyosi ebirimo. . .akaha engebe n’omuka n’ebindu byosi. . . . Eriwathana nayu thuliho, kandi thukalendera ithuneho.” (Emib. 17:24, 25, 28) Kwenene, olhwanzo lhwa lhukaleka Yehova iniathuha “ebindu ebyosi” ebya thukayithagha omwa ngebe. Thalengekania okwa by’abirithuha busana n’olhwanzo lhwiwe.

6. Ekihugho kikakanganaya kithi ngoku Nyamuhanga athwanzire? (Lebaya ekisasani ekiri okw’itsuka.)

6 Thalengekania okwa kihugho. Yehova yuwahangikakyo, kandi, abirikiha abandu. (Esy. 115:15, 16) Abanya seyansi babirikolesya esyosente nyingyi bakasondya omwa kyanya nga mune esindi planeti esisosire ekihugho. Kwenene babiribumbura esyoplaneti nyingyi, aliwe sibali bathabana eyangan’ikalhwa kw’abandu, kundi sikuli emibere eyiri ng’eyiri okwa kihugho. Okwa bindu byosi ebya Nyamuhanga abirihangika, ekihugho ni ky’embaghane. Thalengekania, omwa syoplaneti nyingyi esithasibwe na mughanzo esiriho, ekihugho mukyahangikwa ini ky’embaghane. Yehova mwakikolha ikyuwene erikalhwako, ikithekene, kandi isikyangahira engebe y’omwa kabi! (Isa. 45:18) Eki kikakanganaya ngoku Yehova athwanzire kutsibu.Soma Yobu 38:4, 7; Esyonyimbo 8:3-5.

7. Emibere Nyamuhanga athuhangikiramu yikakanganaya yithi ngoku athwanzire?

7 Nomwakine indi Yehova mwathukolera ekihugho ekyuwene, anasi ngoku ithwe eritsema thukayithagha ebilhabire okwa by’ekinyamubiri. Ng’eky’erileberyako, omwana akayowa ndeke amaminya ngoku ababuthi biwe bamwanzire n’erimutsomana. Yehova  mwahangika abandu omwa kisosekanio kiwe, n’eribahira mw’omubere w’eriminya ngoku abanzire n’eribatsomana. (Enz. 1:27) Okw’ekyo, Yesu mwabugha athi: “Obutseme buli oko basi ko bali n’obwagha bwa Nyamuhanga.” (Mt. 5:3) Yehova, nga Thatha w’olhwanzo “akathuha ndeke-ndeke ebindu byosi eritsemerabyo,” imwamuli eby’ekinyamubiri n’eby’obunyakirimu.1 Tim. 6:17; Esy. 145:16.

YEHOVA AKATHUKANGIRIRAYA EKWENENE

8. Busana naki thukanza Yehova iyuwathuha obusondoli?

8 Mughulhu mungyi, thatha akanza iniabya inianemutheya omwana wiwe y’okw’iheribwa kutse erithebwa. Aliwe ababuthi bangyi sibaliha abaana babu b’obusondoli obutholere kundi ibo nabu sibalighendera okwa busondoli obuli omwa Kinywe kya Nyamuhanga. Erighunzerera obutseme bukabulha n’abaana ibabulha eky’erighenderako. (Emi. 14:12) Aliwe Yehova iyo, ni “Nyamuhanga w’ekwenene.” (Esy. 31:5) Anzire abaana biwe kandi akatsema ekyakakalha ky’ekwenene yiwe kyamabasondolha omwa ngebe yabu yosi, kutsibu-tsibu omwa by’eriramya. (Soma Esyonyimbo 43:3.) Ni kwenene yahi eya Yehova abirithubisulira, kandi eki kikakanganaya kithi ngoku athwanzire?

Abathatha Abakristayo bakagherereraya Yehova omw’ikangirirya abaana babu ekwenene n’eribawathikya eribya bughuma na Thatha wabu w’elhubulha (Lebaya enungu 8-10)

9, 10. Yehova akakanganaya athi ngoku athwanzire omughulhu akabisulha ekwenene (a) eyimuhambireko? (b) eyihambire okwa lhukwamirwa lhwethu omwa mitheghekere yiwe?

9 Eky’erimbere, Yehova akathubisulira ekwenene eyimuhambireko. Akabisulha erina liwe, erikabanika omwa Biblia mwa ngendu nyingyi okwa wandi mena wosi. Omw’eki, Yehova akayithunda hakuhi nethu, akanza thumuminye ndeke. (Yak. 4:8) Kandi akathasyathubisulira n’emibere yiwe, iyo nga ni Nyamuhanga oyuli athi. Obuthoki bwiwe n’amenge wiwe manene thukabilhangira omwa by’abirihangika, n’omwa Masako akathukanganaya ku ni Nyamuhanga w’obulingirirania n’ow’olhwanzo lhunene kutsibu. (Abar. 1:20) Ali nga thatha oyuwithe akaghalha n’amenge aliwe kandi ini w’obulingirirania n’olhwanzo, neryo abaana biwe ibabya banywani biwe busana n’emibere eyo.

10 Yehova abirithubwira n’olhukwamirwa olhwa thuwithe omwa mitheghekere yiwe. Eki kikaleka ihabya obuholho n’obuyithondeke omw’ihika lya Yehova eryosi. E Biblia yikakanganaya ngoku abandu bahangikawa isi b’eriyithabalhako, eribya butsira busondoli bwa Nyamuhanga, kandi ngoku eki kyamabya ini bitsibu bisa-bisa. (Yer. 10:23) Eriminya eki ni kikulhu kutsibu omwa ngebe yethu. Thwamaminya ngoku Nyamuhanga yuli n’obuthoki bw’erithabalha, ithukendibana obuholho n’obughuma. Yehova ka ni Nyamuhanga w’olhwanzo eribya inianganathwamu erithubwira omwatsi oyu!

11. Ni mulhaghe wahi owakakanganaya ngoku Yehova athwanzire n’erithutsomana?

11 Thatha oyuwanzire abaana biwe, akatsomana nga bakendisyabya bathi omwa buthuku bw’embere, erianza babye omwa ngebe eyuwene. Eky’obulighe abandu banene sibasi ebikendibya omwa buthuku obukasa, ikyaleka ibakwamirira ebithendi syabalethera emighia ya kera na kera. (Esy. 90:10) Ithwe ng’abaana ba Nyamuhanga thukayowa iniathwanzire kundi abirithulhagha erisyabya omwa tseme obuthuku obukasa. Ekyo kikaleka ithwabya n’ebilhubirirwa ebyuwene omwa ngebe yethu.

YEHOVA AKAHABULHA N’ERIKUNGA ABAANA BIWE

12. Erihabulha erya Yehova aha Kaina na Baruku mulyakangania lithi ngoku abanzire?

12 “Busana naki wukahithana n’obusu bwawu bwamahina? Wamakolha ndeke  siwendi syaliwa kwehi? . . . ebibi binasunamire okwa lhukyo.” (Enz. 4:6, 7) Eryo ni habulha erya Yehova aha Kaina erimukangya ekitholere. Yehova mwa muhabulha lhuba ihakine obuthuku. Eky’obulighe Kaina mwathowa, mwamamulhwira ekitsibu. (Enz. 4:11-13) Omughulhu Baruku, omuhandiki wa Yeremia, alhuhirira n’eryanza erileghulha, Yehova mwamuhabulha. Erithendibya nga Kaina, Baruku iyo mw’owa neryo eki kyamalhamya engebe yiwe.

13. Ni kyahi ekyaleka Yehova inialighira abaghombe biwe erihika kw’ebitsibu?

13 Paulo mwahandika athi “Omwami mukulhu akakunga oyo anzire, kandi akaswiraya obuli mughalha oyukamukokaya.” (Ebr. 12:6) Aliwe erikungwa kutse eryeghesibwa erisoma siriryasira omw’isuyirwa lisa. Likanabya omwa nzira muthina-muthina. Ng’eky’erileberyako hane abaghombe ba Nyamuhanga abathaleghulha abalhaba omwa bitsibu ebikalire ebya b’eghesaya erisomo. Thalengekania oku Yozefu, Musa, na Dawudi. Ni baghuma b’okwa bandu abasibwe kutsibu omwa Biblia. Kundi Yehova mwabya nabo n’eribawathikya omwa bitsibu byosi kandi ngoku mwabakolesya omwa mibiiri y’omughaso munene kutsibu, thukaminya ngoku Yehova anzire n’eritsomana abaghombe biwe.Soma Emisyo 3:11, 12.

14. Thukalhangira thuthi olhwanzo lhwa Yehova akathukunga?

14 Erithukunga ni yindi nzira eyo Yehova akathukanganiraya mw’olhwanzo. Abo Yehova akakunga bam’olhoba neryo bakayisubamu, Yehova akababuyira ndeke. (Isa. 55:7) Ekyo kikamanyisayaki? Dawudi mwasoborera erighanyira lya Yehova omwa binywe bino: “Akabuyira ebibi byaghe byosi, Akalhamaya amakoni waghe wosi; Akanyilhamaya  okw’isinda. Akanyitsumulha omwa lhwanzo n’erighanyira. Ngoku endatha yiri hali kw’eyikwa abirilhusya ebibi byethu bya hali kw’ithwe athya.” (Esy. 103:3, 4, 12) Kwesi ambi ithwabya ithunayitheghekire erihabulhwa na Yehova, n’erithukunga, kandi ithwanguhirwa erimwowa, kundi eki kikakanganaya ngoku athwanzire kutsibu.Esy 30:5.

YEHOVA AKATHUTHEGHAYA

15. Ni kyahi ekikakanganaya ngoku Yehova akalhangira abandu biwe mwa b’omughaso munene?

15 Ekighuma ky’okwa bindu ebya thatha oyuwithe olhwanzo akahira embere ly’eritheya eka yiwe okwa kabi kosi-kosi. Ekyo kya Yehova, Thatha wethu w’elhubulha, akakolha. Omuhandiki w’esyonyimbo mwakania oku Yehova athi: “Akahanganira engebe y’abandu biwe, akalhamayabo okwa maaka w’ababi.” (Esy. 97:10) Ng’eky’erileberyako, ngoku wukanalhangira ameso wawu mwa w’omughaso munene kutsibu, na Yehova kw’akalhangira athya abandu biwe. (Soma Zekaria 2:8.) Kwesi abandu ba Nyamuhanga ka ni b’omughaso munene embere siwe! 

16, 17. Soborera emibere Yehova abirithegherya mw’abandu biwe, nibya na munabwire.

16 Yehova akanakolesaya abamalaika biwe eritheya abandu biwe. (Esy. 91:11) Omumalaika mwan’itha abasirikali 185,000 be Asuria abasonda erithoghothya omuyi we Yerusalemu. (2 Bam. 19:35) Abamalaika mubanalhusya Petero, Paulo n’abandi omwa syongomo. (Emib. 5:18-20; 12:6-11) Na munabwire, Yehova syaghotsere. Omuthumwa erilhua okwa kyaghanda kikulhu mwabungira ekyaghanda ky’omuthahulha omwa Afrika. Mwathulhagho athi omwa kihugho ekyo mwabya imwabiribya akatabanguko busana n’amalhwa w’ekipolitiki n’aw’amadini. Yabya amalhwa masa-masa, obwibi, erihamba abakali kinyamakara, obwithi n’eriyisamambulha. Nomwakine indi balikyethu bangyi mubaherya ebindu byabu byosi, sihali n’omughuma oyuwaholha. Babere babulibwa nga bakayowa bathi, obuli mughuma iniakasubiraya inianatsemire athi: “Thune ndeke, ngasima Yehova!” Mubayilhangirira olhwanzo lhwa Nyamuhanga.

17 Okwa bundi buthuku, Yehova akanalekerera esyonzighu er’itha omughombe wiwe, ng’omughulhu Setefano ithawa. Aliwe Nyamuhanga akabya inianemutheya abaghombe biwe abosi omw’ibya inianemubabwira okwa bithegho by’amenge wa Sitani. (Efe. 6:10-12) Erilhabira omwa Kinywe kiwe, e Biblia n’omwa bitabu ebiseghemere okwa Biblia ebikabanika omwa kithunga kiwe, thukawathikibawa eriminya akabi akali omw’anza kutsibu ebindu, eby’eriyitsemesya ebiri mw’obwithi n’eby’obutswatswa, n’erikolesya e Intaneti ya nabi, n’ebindi ng’ebyo. Kwenene, nga Thatha oyuwanzire abaana biwe, Yehova atsomene kutsibu abandu biwe.

THUWITHE OLHUSUNZO LHUNENE

18. Wukayowa wuthi okwa lhwanzo olhwa Yehova akuwithire?

18 Emibere eya Yehova akathukanganiraya mw’olhwanzo eya thwamabiri lhangira, yikaleka ithwayowa ngoku Musa ayowa. Abere aghanirya okwa mughulhu ow’amabirighunza omw’ikolera Yehova, Musa mwabugha athi: “Wuthughuthaye obuli ngyakya-ngyakya omwa lhwanzo lhwawu olhuthyusa, ithwathoka eriimba n’eriyisyandira ebiro byethu byosi.” (Esy. 90:14) Ni lhusunzo lhunene munabwire eriyitheghererya olhwanzo lhunene olhwa Yehova athuwithire n’eriyilhangiriralho. Ng’omukwenda Yoane, nethu ithukendi bugha thuthi: “Mulhangire ngoku Thatha abirithwanza kutsibu!”—1 Yn 3:1.