Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwomusanju 2015

Hano Hathukaramiraya

Hano Hathukaramiraya

‘Obuha bw’enyumba yawu bukanyitha.’YN. 2:17.

ESYONYIMBO: 127, 118

1, 2. (a) Kera, abaghombe ba Yehova babya bakakolesya myanya yahi omw’imuramya? (b) Yesu abya akayowa athi busana n’ehekalu eyabya e Yerusalemu? (c) Omwa mwatsi ono thukendi kania okuki?

ERITSUKA kera, abaghombe ba Nyamuhanga ibakabya ibanawithe ah’eriramirya. Abeli abere akahongera Nyamuhanga, angabya imwakolesya ekiherero. (Enz. 4:3, 4) Noa, Abrahamu, Isaka, Yakobo, na Musa, nabu mubahimba ebiherero. (Enz. 8:20; 12:7; 26:25; 35:1; Eri. 17:15) Yehova mwanalhaghira Abaisraeli athi bahimbe ahabuyirire—ehema ey’erihindamu. (Eri. 25:8) Kandi endambi muyanahika, bamahimba ehekalu ey’eriramiryamu Yehova. (1 Bam. 8:27, 29) Abayuda babere babirilhua omwa bunyewa mwe Babeli, ibakayaramiraya omwa manyumba w’erihindanamu—esyosinagogi. (Mk. 6:2; Yn. 18:20; Emib. 15:21) Abakrisitayo ab’erimbere ibakanahindanira omwa manyumba w’abalikyabo. (Emib. 12:12; 1 Kor. 16:19) Munabwire, hali Ebisenge by’Obwami bingyi omo Abema ba Yehova bakahindanira bakaramya n’erikangiriribwa.

2 Olhwanzo lhunene olhwa Yesu abya awithire ehekalu ya Yehova eyabya e Yerusalemu, mulhwaleka omukwenda Yoane iniahandika athi obuminyereri obukabugha buthi ‘omuhwa w’enyumba yawu akaghulhumira omw’isi waghe ng’omuliro,’ buhambire oku Yesu. (Esy. 69:9; Yn. 2:17) Munabwire,  Ebisenge by’Obwami sibiri ng’ehekalu eyabya e Yerusalemu eyabya yikahulhwa mwa ‘nyumba ya Yehova.’ (2 Emy. 5:13; 33:4) Nomwakine, thutholere ithwasikya emyanya eya thukahindaniramu munabwire. Omo mwatsi ono thukendi kania okwa misingyi ye Biblia eyanga thuwathikya ngoku thwanga lhangira Ebisenge byethu by’Obwami, erihayo esyosente, n’eribisugha. *

SIKAYA ERIRAMYA LY’EKWENENE

3-5. Omubiiri w’Ekisenge ky’Obwami niki, kandi eki kitholere ikyaleka ithwalhangira emihindano ya thuthi?

3 Ekisenge ky’Obwami, ha thukayasangira haghuma omw’iramya ly’ekwenene. Omwa myanya eyi, mwa thukathungira emihindano y’obuli yenga eya Yehova akathulisirayamu bunyakirimu. Ha thukanabanira erihumulikanibwa n’obusondoli bw’obunyakirimu erilhabira omwa kithunga kiwe. Abosi abakasa okwa mihindano, bakabya ng’abalyakokibawa na Yehova na Mughalha wiwe. Neryo thutholere ithwalhangira ini lhusunzo lhunene erikokibwa okwa ‘meza ya Yehova.’1 Kor. 10:21.

4 Erikangania ngoku Yehova akalhangira ini kikulhu kutsibu ithwe erihindana haghuma thukaramya n’erisikania emithima, mwasondolha omukwenda Paulo erithukunga athi isithwaleka erihindana lyethu haghuma. (Soma Abaebrania 10:24, 25.) Mbwino ithunemwendibya ithwamasikya Yehova thwamabulha okwa mihindano isihali nzumwa eyitholere? Erikangania ku thukatsemera ekihembo kya Yehova eky’emihindano, thutholere ithwatheghekayo n’erisangira muyo n’omuthima wosi.Esy. 22:22.

5 Omwa mibere yosi, thutholere ithwakangania ku thusikirye Ekisenge ky’Obwami n’esyondegheka sy’obunyakirimu esikakolerawamu. Mbwino si kwenene indi emibere eya thukathwalira mw’Ekisenge ky’Obwami yikakanganaya ku thusikirye erina lya Yehova erikabanika n’okwa byapa eby’Ebisenge by’Obwami?—Lebaya na 1 Bam. 8:17.

6. Abandu babiribugha bathiki okwa Bisenge byethu eby’Obwami n’okwa bakahindanirako? (Lebaya ekisasani ekiri okw’itsuka.)

6 Thukabya thwamasikya emyanya yethu ey’erihindaniramu, n’abathe Bema ba Yehova bakakilhangira. Ng’eky’erileberyako, omulhume mughuma omwa Turkey mwabugha athi: “Obuyonzo n’obuyithondeke ebya nalhangira okwa Kisenge ky’Obwami mubyanyitsemesya. Abandu ababyako babya bamebere ndeke, ibanatsemire, kandi mubanyiramukya ndeke. Eki mukyanyihambako kutsibu.” Omulhume mwatsukiraho eribya akahindana, neryo buthuku buke-buke amabatizibwa. Omwa tawuni nguma omwa Indonesia, balikyethu mubakokya abakulhu-bakulhu omwa gavumente n’abaliranwa eriasa okwa mukonga ow’erihayo Ekisenge ky’Obwami. Omuthabali mukulhu omwa tawuni eyo mwasa. Mwatsemesibwa akalhangira emihimbire y’enyumba, ngoku yikakolesibawa, n’obuthalha bwayu obuwene. Mwabugha athi, “Obuyonzo obuli hano bukakanganaya ngoku muwithe erikirirya ly’okwenene.”

Emibere yethu yangana kangania ngoku thuthasikirye Nyamuhanga (Lebaya enungu 7, 8)

7, 8. Thukasa okwa mihindano, thutholere ithwabya ithunasi byahi?

7 Obuyithondeke bwethu, emyambalire, n’emiyipambire, bitholere ibyakangania ku thusikirye Nyamuhanga oyukathukokaya okwa mihindano. Nomwakine indi obuli mundu akayithwiramu ngoku angayithwa omughulhu thuli okwa mihindano,  thutholere ithwayitheya okw’ilhabirirania, kutse eribya omwa mihindano ng’oyuthayitsomanire. Ni kwenene, Yehova anzire abaghombe biwe n’abandi abakasyahindana ibayowa buholho. Aliwe kandi, abali omwa mihindano sibatholere bakatsandya ekitsumbi ky’emihindano omw’iambalha ng’abali eka, kutse omw’ibya iwunemuthuma esyomeseji okwa simu, erikania-kania, n’eririra omwa mihindano, n’ebindi-n’ebindi. Ababuthi batholere ibakangirirya abaana babu eriminya ngoku Ekisenge ky’Obwami si mwanya w’erisathiramu n’erithibithanako.Omu. 3:1.

8 Iniabirihithana kutsibu, Yesu mwahehya abanza erihira omwa hekalu ya Nyamuhanga mw’eby’esuburu. (Yn. 2:13-17) Namunabwire, Ebisenge byethu by’Obwami ni mwanya w’eriramirayamu n’erikangiriribwa bunyakirimu. Neryo ebyosi-byosi eby’esuburu sibitholere bikakolerwako.—Lebaya na Nehemia 13:7, 8.

ERISIGHIKA OBUHIMBE BW’EBISENGE BY’OBWAMI

9, 10. (a) Abema ba Yehova babirithoka bathi erihimba Ebisenge by’Obwami, kandi ni kyahi ekyabirilhwiririramu? (b) Ni mitheghekere yahi ey’olhwanzo eyabiriwathikya kutsibu ebithunga ebithe byanga thoka eriyihimbira Ebisenge by’Obwami

9 Ekithunga kya Yehova kikakolha kutsibu erihimba Ebisenge by’Obwami. Omubiiri w’obuhimbe oyu akakolhawa n’abakayihayo ahathe erithuhwa. Ni kyahi ekyabiri lhwiririramu? Erilhua Novemba 1, 1999, emyanya eyuwene y’eriramiryamu eyilhabire omu 28,000 yabirihimbirwa ebithunga erithimba omwa kihugho kyosi. Ni bugha ambu omwa myaka 15 eyihwere, hakuhi ebisenge bithanu bilhue bikabya ibyabirihimbwa obuli kiro.

10 Akaghalha kanene kanemuhirwaho erisighika obuhimbe bw’Ebisenge by’Obwami eyiri obuyithawa. Emitheghekere ey’olhwanzo eyi yiseghemere okwa musingyi owali omwa Masako owahambire okw’ihathulirana nuku hangabya ‘erilingirirania.’ (Soma 2 Abanya Korinto 8: 13-15.) Eki kyabirileka balikyethu abathe banga thokire eriyihimbira ah’erihindanira ibabana Ebisenge by’Obwami.

11. Abandi balikyethu bakabugha bathiki busana n’erihimbirwa Ebisenge by’Obwami, kandi eki kikaleka iwayowa wuthi?

11 Ekithunga omwa Costa Rica ekya ghasirawa omwa mitheghekere eyi mukyahindika bino: “Thukabya thukasamalira Ekisenge kyethu ky’Obwami, thukayowa nga thukalhotha! Thukinaswekire. Ekisenge kyethu ekyuwene kithya mukyahimbirwa omwa biro munani bisa! Eki mukyathokekana busana na Yehova, emitheghekere eya kithunga kiwe kyahiraho, n’obuwathikya bw’abalikyethu. Omwanya w’eriramiryamo oyu ni kihembo kundu ekya Yehova  abirithuhererya. Eki kyabirithutsemesya kutsibu.” Nawu sikirikutsemesaya wukowa erisima ng’eri n’ery’abandi balikyethu omwa kihugho kyosi busana n’erihimbirwa Ebisenge by’Obwami? Oyu ni mubiiri wa Yehova, kundi Ebisenge by’Obwami bikabya bikanahwa erihimbwa, mughulhu mungyi bikusulha mw’abandu b’omuthima mwolho abanzire eriminya bingyi ebihambire okwa Muhangiki wethu w’olhwanzo.Esy. 127:1.

12. Ni kyahi ekya wangakolha erisighika obuhimbe bw’Ekisenge ky’Obwami?

12 Balikyethu bangyi babiribana etseme nene busana n’erisangira omwa buhimbe bw’Ebisenge by’Obwami. Nomuwangabya isiwangathoka eriyawathikya okw’ihimba, ithwe bosi thwangana sighika omubiiri oyu omw’ihayo. Omuhwa ow’erianza eriha Yehova y’olhukengerwa mwaleka abaghombe biwe abakera ibahayo ebya bawitheko erisighika emibiiri yiwe, namunabwire kuthya.Eri. 25:2; 2 Kor. 9:7.

ERIYONZA EKISENGE KY’OBWAMI

13, 14. Ni misingyi yahi omwa Biblia eyangaleka ithwayonza n’erisugha Ekisenge ky’Obwami?

13 Ekisenge ky’Obwami kyamabirihimbwa, kitholere ikyabya ikinemuyonzwa n’erisuwa nuku kikanganaye emibere mibuya n’obuyithondeke bwa Nyamuhanga oyo thukaramaya. (Soma 1 Abanya Korinto 14:33, 40.) E Biblia yikakanganaya ngoku abandu ba Nyamuhanga batholere ibabya bayonzo bunyakirimu na kinyamubiri. (Erib. 19:8) Neryo abanzire eribya bandu ba Yehova batholere ibabya bayonzo.

14 Erikwamana n’emisingyi eyi, thutholere ithwalhangira thuthi obuyonzo bw’ahathukahindanira bukakanganaya engulhu  yuwene eyathukabwira abandu nuku thuyowe buholho thukabakokya. Ibakendi lhangira ngoku Nyamuhanga oyo thukaramya abuyirire kandi kwenene ngoku akisiya iniahindulha ekihugho mwa paradiso, omuthe oburofu.Isa. 6:1-3; Erib. 11:18.

15, 16. (a) Ni kyahi ekyangalemesya obuyonzo bw’Ekisenge ky’Obwami, aliriryo busana naki butholere? (b) Ni mitheghekere yahi ey’eriyonza ekisenge kyenyu eyiriho, kandi obuli mughuma okw’ithwe awithe lhusunzoki?

15 Obuli bandu bawithe ngoku bakathwalha obuyonzo. Eki kikasighikira okwa mibere ey’ewabu, ng’eribya eyiri ebyondo, engungu, emibere y’esyonzira, amaghetse n’eby’erikolesya okwa buyonzo. Mbulha thuli omwa mibere eyisosire yithi, Ekisenge kyethu ky’Obwami kitholere ikyalhangirika ndeke, kundi kik’imanira erina lya Yehova kandi ni mwanya owakakolerawa mw’eriramya erihenirye.Ebi. 23:14.

16 Obuyonzo obw’Ekisenge ky’Obwami si bw’erihumira-buhumire. Abasyakulhu b’ekithunga batholere ibalhangira bathi hakabya ihane endegheka ey’obuyonzo n’ebyanga kolesibwa omw’ikolha obuyonzo okwa lhulengo olhutholere. Kundi hane obuyonzo obukakolhawa okwa buli ihindana n’obukakolhawa ihamabirilhaba buthuku, hatholere ihabya erilebererya ndeke ebikayithagha erisuwa nuku sihabye ekikasighalha. Abosi omwa kithunga bawithe olhusunzo olhw’erighenda-ghendania n’emitheghekere eyi.

ERISUGHA AHATHUKARAMIRAYA

17, 18. (a) Ni kyahi ekya thwang’ighira okwa baghombe ba Yehova abakera omw’isugha ah’eriramirya? (b) Busana naki Ebisenge by’Obwami bitholere ibyabya ibine omwa mibere eyuwene?

17 N’ekindi, abaghombe ba Yehova bakalhangira bathi bakabya ibanemusuba-subania ahakatsanda okwa Kisenge ky’Obwami. Omwami Yoasi owe Yuda mwalhaghira abahereri athi bakolesaye esyosente esyabya isyabirihebwayo omwa nyumba ya Yehova ‘erisubya ahasambukere ah’enyumba, ahakabanika ihasambukere.’ (2 Bam. 12:4, 5) Emyaka 200 enyuma waho, Omwami Yosia nayu mwakolesya esyosente esyahebawayo erisuba-subania ebyabiritsanda.Soma 2 Emyatsi y’Emigulu 34:9-11.

18 Ebyaghanda by’omuthahulha omwa bindi bihugho bikathulhagho bithi ebindi bithunga sibiritsomana kutsibu erisugha Ebisenge by’Obwami n’ebindi ebirimo. Obundi abandi omwa bitsweka ng’ebi bakabya isibasi eky’erikolha kutse isibawithe sente esy’erikolesya. Aliriryo omo kwenene, thwamathendi tsomana ebisenge ebi ibikendi kulha lhuba neryo ikithaha obwema ndeke omwa bulhambu. Okwa lhundi lhuhandi, abali omwa kithunga bamakolha ngoku bangathoka erisugha Ekisenge ky’Obwami, ikikendi leka Yehova iniapipwa kandi ikyaleka esyosente esya balikyethu bakahayo isyakolesibwa ndeke.

Isithwalekeranaya eriyonza n’erisugha Ebisenge by’Obwami (Lebaya enungu 16, 18)

19. Erithwamu lyawu ni ryahi erikwamana n’ahathukaramiraya?

19 Ekisenge ky’Obwami ni nyumba eyihebirweyo oku Yehova. Busana n’ekyo, si ya mundu kutse ekithunga. Busana n’emisingyi ye Biblia eyiri omo mwatsi ono, thutholere ithwakolangana erilhangira thuthi esyonyumba esi sikaberereraya ndeke ekighendererwa ekyaleka isyahimbwa. Ithwe bosi omwa kithunga thutholere ithwanza erihayo esyosente esyanga wathikya erihimba ebindi bisenge ebikayithaghisibawa, n’erilengaho kutsibu eribisugha. Thwamakolha ekyo, ithukendibya ithwamakangania omuhwa busana n’omwanya ow’eriramiryamu Yehova nga Yesu kw’akolha.Yn. 2:17.

^ olhup. 2 Nomwakine indi ebikakanibawako bihambire kutsibu okwa Bisenge by’Obwami, bikahamba n’okwa myanya y’emihindano eminene-minene n’eyindi eyikakolesibawa omw’isighika eriramya ly’ekwenene.