Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Okwomukagha 2015

Abya Anzire Abandu

Abya Anzire Abandu

‘Obutseme bwaghe bwabya haghuma n’abaghalha b’abandu.’EMI. 8:31.

1, 2. Ni kyahi ekikakanganaya ngoku Yesu anzire abandu ba kutsibu?

AMENGE manene kutsibu wa Yehova mwatsuka erilhangirika ndeke-ndeke erilhabira omu Mughalha wiwe akambere. Yesu iyuwene-wene abya ini menge, ‘omukoli mukulhu’ haghuma na Thatha wiwe. Sithwanga minya Yesu nga mwabya na butseme bungahi omughulhu Thatha wiwe ‘asingika ekyanya’ n’omughulhu ‘abumba ekihugho.’ Nomw’anatsemera ebyosi ebi, ‘obutseme bwiwe bwabya haghuma n’abaghalha b’abandu.’ (Emi. 8:22-31) Omwa kwenene, Yesu athali asa n’okwa kihugho abya atsemere abandu, kutse eribanza.

2 Enyuma waho, Yesu mwakangania ku ni muthaleghulha oku Yehova kandi kw’amwanzire, n’olhwanzo okwa ‘baghalha b’abandu’ omughulhu iyo ng’Akambere ka Nyamuhanga ‘ayithuthulha’ eribya mundu. Akolha eki nuku aheyo ‘engebe yiwe mwa bughuli busana n’abandu bangyi.’ (Fil. 2:5-8; Mt. 20:28) Yesu kwenene k’anzire abandu ba kutsibu! Iniane okwa kihugho, Nyamuhanga mwamuha obuthoki obw’erikolha ebithiko-thiko ebya kanganaya ngoku anzire abandu ba kutsibu. Omw’eki, Yesu mwakangania ebindu bibuya eby’akisiya iniakolha omwa kihugho kyosi.

3. Ni byahi ebya thukayahira kw’omuwathu?

 3 Kandi eryasa lya Yesu okwa kihugho mulyamuthokesya ‘erithulha Engulhu Yuwene y’obwami bwa Nyamuhanga.’ (Lk. 4:43) Yesu abya inianasi ngoku Obwami bwa bukendi syayira erina lya Thatha wiwe mwa libuyirire n’erighunzaho ebitsibu byosi ebya bandu. Sikiri swekaya, Yesu eribya imwakangania kw’atsomene abandu ehosi ey’aghenda akalhaba akathulira. Busana naki eki kitholere ikyathuhambako? Kundi ebya thukigha omw’eki bikendi leka ithwayikethera n’eribya n’amaha busana n’obuthuku obukasa. Thulebaye ebbini by’okwa bithiko-thiko ebya Yesu akolha.

‘ABYA N’OBUTHOKI BW’ERILHAMYA’

4. Thakania nga mubyabya bithi Yesu ak’eya omuhagha.

4 Yesu mwakolha kutsibu omubiiri w’erithulira, lero lino abya iniane muthulira e Galilaya. Eyo, Yesu mweyayo ekik’itha obulighe. (Mk. 1:39, 40) Mweya omulhume oyulhwere obulhwere obuk’itha obuba obw’ebihagha. Erikangania ngoku abya alhwere kutsibu, Luka omudokita iyo mwahandika athi abya ‘akwire ebihagha byo kutsibu.’ (Lk. 5:12) ‘Neryo abere alhangira Yesu, [omuhagha] mwamulemba-lemba athi, Mukama, wamabya, wunanzire wangathoka erinyilhamya.’ Omulhume oyu ahathe erithika-thika abya inianasi ngoku Yesu anawithe obuthoki obw’erimulhamya, aliriryo anza eriminya Yesu ng’ananzire erikolha ekyo. Ni kyahi ekya Yesu aby’akolire? Mbwino angabya imwayowa athi akalhangira omundu oyuwabya iniabiriyithwa nabi oyu? Mbwino Yesu mwanakangania omuthima owali ng’owa Abafarisaya ababya bakathwalha abahagha mwa binuwa? Kuwabya in’iwe, wangakolireki?

5. Ni kyahi ekya sukuma Yesu eribugha athi, ‘Nyinanzire’ akalhamya omuhagha?

5 Omuhagha oyu akabya nga mwathabirikira athi, ‘Indi Mutsandirya, Indi Mutsandirya!’ ngoku kyabya kitholere erikwamana n’Emighambo ya Musa. Aliwe ekyo Yesu mwathakitsomana. Ekyabya atsomane ly’erimuwathikya. (Law. 13:43-46) Sithwasi ebyabya omwa malengekania wa Yesu okwa ndambi eyo, aliriryo thwanganaminya ngoku abya ayowire. Erikwa obulighe mulyaleka Yesu iniakolha ekithiko-thiko. Yesu mwakakya ebyalha biwe n’erithulha okwa muhagha, kandi omwa mulenge owakakanganaya olhukeri n’obuthoki mwabugha athi: ‘Nyinanzire; Wulhamibawe.’ Neryo ‘ebihagha biwe mubyamulhuako.’ (Lk. 5:13) Kwenene Yehova mwaha Yesu y’obuthoki isi busana n’erikolha ebithiko-thiko lisa aliwe n’erimuthokesya erikangania kw’anzire abandu.Lk. 5:17.

6. Ebithiko-thiko bya Yesu byabya bya mbaghane bithi, kandi bikakanganayaki?

6 Obuthoki bwa Nyamuhanga mubwathokesya Yesu Kristo erikolha ebithiko-thiko muthina-muthina. Mwathalhamya ebihagha bisa, aliriryo mwalhamya obuli musindo w’endwalha n’obuli musindo w’obukoni. E Biblia yithi: ‘Kyaleka endeko iyasweka omughulhu balhangira esyomumu sikabugha, n’ebirema ibyabirilhama, n’abakasindoghera ibali mughenda, n’esyondimethime isirimulhangira.’ (Mt. 15:31) Ababya bawithe ebitsuku ebilhwere, Yesu eribalhamya isyaliyithagha erisondya ebitsuku ebithalhwere nuku abahire byomo. Ebitsuku ebilhwere ebyo ibyakanalhamaya! Kandi iniakalhamaya abandu aho n’aho, nibya n’abandi iniakabalhamaya iniane hali kubo. (Yn. 4:46-54) Eki kikakanganayaki? Kikakanganaya ngoku Yesu oyunemuthabalha ng’Omwami elhubulha, anzire kandi awithe obuthoki obw’erilhamya abandu kera na kera. Erigha okwa mibere eya Yesu abya akathwalira mw’abandu, kikaleka ithwayikethera ngoku obuminyereri obuli omwa Biblia buno bukendisyabererera:  ‘Akaghanyira abera n’abandu bolho-bolho.’ (Esy. 72:13) Kwenene, omw’iyisunza liwe erikalhua okwa muthima, Yesu akendi syawathikya abosi abakanuba.

‘HANGANA! HEKA ENGYINGO YAWU, WUYIGHENDERE’

7, 8. Yesu mwayisanga athi iniamabirihika okwa mulhume omulhwere okwa kitsinga kye Betesaida?

7 Muhalhaba myezi mike Yesu alilhamirye omuhagha owe Galilaya. Mwalhuayo, amaghenda e Yudea busana n’eriyathulha engulhu yuwene ey’Obwami bwa Nyamuhanga. Bangabya ibabya bandu bangyi abahambawako busana n’erithulira n’emibere mibuya ya Yesu. Ikimuli okwa muthima eribwira abera b’omwatsi mubuya, n’erithulira obwiranda oko bali omwa muliki, n’erilhunga ababbunikire omwa muthima.Isa. 61:1, 2; Lk. 4:18-21.

8 Neryo okwezi okwa Nisani kwabere kwahika, Yesu mwaya e Yerusalemu eriy’ibuka Ekiro ky’Erikyuruka erikangania kw’asikirye ekihano ekya Thatha wiwe. Etawuni yabya iyabiri huha-huna busana n’abandu abakasa okwa kiro kikulhu ekibuyirire eki. Ebwanga bw’ighulhu bw’ehekalu yabya ekitsinga kya maghetse ekikahulhawa mwa Betesaida n’eyo Yesu mweyayo omulhume oyulhwere.

9, 10. (a) Ni kyahi ekyabya kikaleka abandu ibasa okwa kitsinga ekye Betesaida? (b) Ni kyahi ekya Yesu akolha okwa kitsinga, kandi kikathweghesayaki? (Lebaya ekisasani ekiri okw’itsuka.)

9 Abandu bangyi abalhwere ibakayisorokeraya okwa kitsinga kye Betesaida. Ekyaleka ibabya bak’asaho niki? Ahabw’esyonzumwa esithasibwe, ibakalengekanaya bathi omulhwere amaghenda omwa maghetse aya omughulhu akayidunga iniakendi yisanga iniabirilhama. Hangabya ihabya h’oswire abandu bangyi, abakahanga-hangaya, n’abakayibulha-bulha, isibasi nga banemwendi lhama. Ibbwa ni kyahi ekyaleka Yesu, omundu oyuhikene oyuthawithe bulema nayu iniaghenda okwa kitsinga eki? Olhukeri lhw’olhwaleka Yesu iniahikaho okwa mulhume oyuwabya iniabirilhwalha ahabw’obuthuku obulhabire n’okwa bwa Yesu abya iniamathaghunza okwa kihugho.Soma Yoane 5:5-9.

10 Yesu mwabulya omulhume ng’ananzire erilhama. Wangana thera akasasani omulhume akabwira Yesu lhulighe-lighe ngoku ananzire erilhama aliwe ngoku sihali oyuwanga muwathikya eriya omwa kitsinga. Neryo Yesu mwabwira omulhume oyo y’eky’eriswekya athi ahangane, aheke engyingo yiwe, ayighendere. Omulhume mwowa Yesu, am’imya engyingo yiwe n’eritsuka erighenda. Eki ka ni kindu ekikahumulikanaya ekikakanganaya ebya Yesu akendi syakolha omwa kihugho kihya-kihya! Omwa kithiko-thiko eki thukalhangira omubere wa Yesu ow’erikwira abandi b’obulighe. Iniakasondaya abali n’obwagha. Eky’erileberyako kya Yesu kitholere ikyathuhira mw’omuhwa ow’erilholha embere erisondya omwa bulhambu bwethu mw’abakanuba busana n’ebindu bibi ebikabya.

‘NINDI OYUWAMATHULHA OKO NGYIMBA SYAGHE?’

11. Mariko 5:25-34 hakakanganaya hathi ngoku Yesu akakwira abalhwere b’obulighe?

11 Soma Mariko 5:25-34. Ahabw’emyaka 12, omukali abya inianalhwere obulhwere obukahemulha. Mubwahamba okwa ngebe yiwe yosi, n’eriramya isyangayaramya. Nomwakine indi abya ‘iniabiryaghalhwa n’eribughira ebindu biwe byosi okwa bathambiri bangyi,’ obulhwere bwabya ibwabiryongera kutsibu. Aliriryo kiro kighuma, omukali mwasondya eyindi nzira ey’erilhamiramu. Mwalhangira athi akahika ahali Yesu. Mwayihathathania omwa bandu  nuku athule okwa syongyimba sya Yesu. (Law. 15:19, 25) Yesu mwayowa obuthoki ibwamamuhulhukako, neryo amabulya nga nindi oyuwamamuthulhako. Omukali, ‘inianemuthithimana n’eryubaha, mwawa embere siwe n’erimubwira ebyosi eby’ekwenene.’ Yesu eriminya ngoku Yehova abirilhamya omukali oyo, mwamubwira omwa lhukeri athi: ‘Mwali waghe, erikirirya lyawu lyamakulhamya. Wughende buholho, wulhamibawe kw’endwalha yawu.’

Ebithiko-thiko bya Yesu mubyakangania ngoku athutsomene kandi ngoku syalianza thukaghalhwa (Lebaya enungu eya 11, 12)

12. (a) Omwa bya thwamabirigha, wanga bugha wuthi Yesu ni mundu oyuli athi? (b) Yesu mwathuhirira h’eky’erileberyako kyahi?

12 Yesu k’abya w’olhukeri! Thukalhangira ngoku abya atsomene abalhwere. Sitani anzire ithwalengekania thuthi sihali oyuthwanzire kandi sithuwithe mughaso. Aliwe ebithiko-thiko bya Yesu mubyakangania ngoku athutsomene kandi ngoku syalianza thuk’aghalhwa. Oyu ka ni Mwami kandi Muhereri Mukulhu ow’olhukeri! (Ebr. 4:15) Kikalire eriyitheghererya eriyowa ly’oyulhwere obulhwere obukalire, kwilhabirirya thwamabya isithuli thwathabulhwalha. Yesu nomwanabya isyali athalhwalha, iniakayitheghereraya eriyowa ly’abalhwere. Nethu thutholere ithwagherererya Yesu ngoku thwangathoka.1 Pet. 3:8.

“YESU MWALIRA”

13. Erilhubuka lya Lazaro likathubwiraki oku Yesu?

13 Yesu iniakayowa nabi abandi bak’aghalhwa. Abere akalhangira abandu ibane omwa bulighe busana n’olhuholho lhwa munywani wiwe, Lazaro, Yesu mwakwa ‘obulighe bwa kutsibu’ kandi “mwakwa engitsi.” Mwayowa athya nomwanabya inianasi ngoku akayasubaya Lazaro. (Soma Yoane 11:33-36.) Yesu mwathayowa ng’akendi hemuka amalira. Ababyaho mubalhua ibakilhangira ngoku  Yesu abya anzire Lazaro n’ab’okw’iyo. Kwenene Yesu ka mwakangania kw’akakwa obulighe akakolesya obuthoki obwa Nyamuhanga amuha erilhubukya munywani wiwe!Yn. 11:43, 44.

14, 15. (a) Ni kyahi ekikakanganaya ngoku Yehova anzire erilhusya abandu b’omw’inuba? (b) Ebinywe “amasinda w’eryibukwa” bikathubisuliraki?

14 E Biblia yikakanganaya ngoku Yesu ni ‘kiminyikalho kwenene eky’eribyaho lya Nyamuhanga.’ (Ebr. 1:3) Neryo kwesi, ebithiko-thiko ebya Yesu akolha mubyakangania ngoku iyo na Thatha wiwe banzire kutsibu erighunza okw’abandu kw’amalhwere n’olhuholho. Eki kikakanganaya ngoku Yehova na Yesu bakendi syalhubukya abandu bangyi. Yesu mwabugha athi: ‘Endambi yikasa okwa mughulhu oyo abosi abali omwa masinda [amasinda w’eryibukwa, NW] basyalhuamu.’Yn. 5:28, 29.

15 Yesu ahikire akakolesya ekinywe “amasinda w’eryibukwa” kundi Nyamuhanga Yehova anab’ibukire. Nyamuhanga Omuthoki w’Ebyosi, oyuwahangika ebindu ebyosi, syang’ibirirwa n’ekighuma ekihambire okwa mikwikire ey’abandu bethu ababiriholha imwamuli n’emibere yabu. (Isa. 40:26) Eryongera okw’ibya inianganathoka eryibuka, iyo na mughalha wiwe banzire kutsibu erikikolha. Erilhubuka lya Lazaro n’ery’abandi abakakanibawako omwa Biblia likakanganaya ngoku hakendi syabya erilhubuka omwa kihugho kihya-kihya okwa lhulengo lhunene kutsibu.

EBYA WANG’IGHIRA OKWA BITHIKO-THIKO BYA YESU

16. Obuthuku obukasa, Abakristayo abathaleghulha bawithe lhusunzoki?

16 Thwamabya ithune bathaleghulha, ithwangana syalholha okwa kithiko-thiko ekikulhu okwa byosi, eky’erilhama okwa bulighe bunene. E Harmagedoni yikendi syabya yikanahwa, ni bithiko-thiko bingyi ebikendi syabya abandu bakaghenda bakabya n’amaghalha awuwene. (Isa. 33:24; 35:5, 6; Erib. 21:4) Thalengekania wukalhangira abandu bakaghusa amaggaruvente, emyutso, ebisokolho, ehiggali hy’abalema, n’ebindi n’ebindi. Yehova anawithe ekikendi syaleka iniaha abakendi syalhama okwa Harmagedoni b’amaghalha awuwene. Abawithire omubiiri munene ow’erikolha—erikolha ekihugho kyosi mwa paradiso.Esy. 115:16.

17, 18. (a) Ni kyahi ekyangabya iky’ekyaleka Yesu iniakolha ebithiko-thiko? (b) Busana naki ithwahira h’akaghalha erisy’ingira omwa kihugho kihya-kihya?

17 Yesu eribya imwanalhamya abandu kera, kikahumulikanaya ab’omwa ‘ndeko nene,’ n’erighumya amaha wabu aw’erisyalhamibwa okwa malhwere wosi. (Erib. 7:9) Ebithiko-thiko ebyo bikakanganaya olhwanzo olhwa Mughalha wa Nyamuhanga awithire abandu. (Yn. 10:11; 15:12, 13) Olhukeri lhwa Yesu lhukakanganaya olhwanzo olhwa Yehova awithire obuli mughombe wiwe.Yn. 5:19.

18 Abandu bakasimba, bakaghalhawa kutsibu, kandi ibaholha. (Abar. 8:22) Thukayithagha ekihugho kihya-kihya kya Nyamuhanga, omukendi syabya amaghalha awuwene ngoku Nyamuhanga abirilhaghanisya. Malaki 4:2 hakathuha eriyikethera ngoku abakendi syalhamibwa ‘basyayitsangura ng’ebyana by’esyonde,’ bakatsema n’erisima busana n’erilhua omwa bukobe bw’obuthahikana. Kwesi erisima n’erikirirya lyethu omwa milhaghe ya Nyamuhanga ka bithuhire mw’omuhwa ow’erikolha ekyosi-kyosi ekyathwangathoka, eritholera erisyabya omwa kihugho kihya-kihya! Ka kikahumulikanaya eriminya ngoku ebithiko-thiko ebya Yesu akolha iniane okwa kihugho byakanganaya eby’akendisya kolera abandu omwa Bwami!