Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo  |  Na. 1 2018

1 Obuwathikya bw’Eriyihighulha Okwa Bitsibu

1 Obuwathikya bw’Eriyihighulha Okwa Bitsibu

E Biblia yikabugha yithi erihabulha lyayu lya theghekanibawa na Nyamuhanga kandi liri “n’endundi busana n’erikangirirya, busana n’erikunga, n’erikangirirya abandu erikwama ekithunganene.” (2 Timoteo 3:16) Eki nina kwenene? Thulebaye ngoku amenge awali omwa Biblia abiriwathikya abandu eriyihighulha okwa bitsibu ebikalire omwa ngebe bithe byabalengya amani.

ERIKOLESYA OBWABU BWA NABI

Delphine, oyukanibweko omo mwatsi w’erimbere, mwayowa erihangya-hangya liwe irikaleka inianza erinywa obwabu bwa kutsibu. E Biblia siyiri ghanaya erinywa okwa lhulengo olhutholere aliwe yikabugha yithi: “Siwubye omo kathi-kathi k’abakalhumba obwabu.” (Emisyo 23:20) Erikolesya nabi obwabu kikalhwiririra mw’ebitsibu eby’amaghalha ebikalire, erithwa kutse eritsandya obunywani, n’esyomiliyoni sy’abandu eriholha obuli mwaka. Abandu bangana yihighulha okwa bingyi by’okwa bitsibu ebi bamaghendera okw’ihabulha ly’amenge lye Biblia.

Delphine mwakolha ekyo. Lino akabugha athi: “Munaminya ngoku obwabu sibuli ghunzaho erihangya-hangya lyaghe. Munaghendera okwa menge awali omu Abanya Filipi 4:6, 7, ahakabugha hathi: ‘Simuhanga-hangaye emithima yenyu, nikwa omwa buli mwatsi mubwire Nyamuhanga obwagha bwenyu.’ Omwa kiro, amalengekania n’erihangya-hangya ibikabya byamanyasamu, iningasaba Yehova. Ngamubwira eriyowa lyaghe lyosi, imwamuli ekinigha, erihithana, n’erihwa amaha, kandi ingamulemba-lemba indi anyiwathikaye ngabye n’amalengekania awuwene. Omwa ngyakya, iningalengaho eribirirwa eriyowa nabi eryo. Omubere w’erisaba mwaleka ingathoka erihwerya amalengekania okwa byanga withe butsira okwa byanga thawithe. Munathwamu erileka erithasyanywa obwabu. Kundi obuholho obo nabana bwabya bw’obughuli, nabya isinanganza eribuherya.”

 OBUTSWATSWA

Obutswatswa ni kighuma ky’okwa bitsibu ebikalhumaya kutsibu omuthima. Aliwe emisingyi ye Biblia yangana thuwathikya eriyihighulha okwa bitsibu ng’ebyo, yikakangania ekikabiletha—ng’eky’erileberyako, eriyanzirirya erithatholere n’erilebya eby’obutswatswa. Omulhume omulere iya Samuel akabugha athi: “Ikyolhobire eriyanzirirya. Ihakanayira ingabya isinganzire omundu, aliwe ingalhangira inianyanzire—neryo ekyo ikyaleka ingamusatha-sathirako.” Samuel mwayisanga iniamabiriminywa ng’oyukayanziriraya—nibya isyathakighenderera—neryo mwathwamu eribya akakikolerera. Aliwe omutse oyu mwamulyambya kutsibu. Lino akabugha athi: “Kyabya ky’akabi kundi kikaletha esyongumbu sy’eriyitsomana.”

Samuel mwasoma omwatsi okwa jw.org owatheghekirwe busana n’abalere. Kandi mwalengekania okwa Emisyo 20:11, ahakabugha hathi: “Omwana akayiminyisaya busana n’emibiiri yiwe, emibiiri yamabya ini mibuya, kutse yithunganene.” Ekyo mukyawathikya kithi? Samuel mwaminya ngoku omutse wiwe w’eriyanzirirya syaby’atholere kandi isyuwene. Lino akabugha athi: “Kandi munaminya ngoku omunyethu oyukayanziriraya akakulha-kulhanaya emibere eyikaleka iniabya mwanze mubi omwa butheke. Munatsuka erilengekania oyungendi syathahya ng’angayowa athi amanyilhangira ingasatha-sathira okwa wundi mukali. Ekyo mukyaleka ingaminya ngoku omutse oyu ni mubi. Eribya ini kyolho eriyanzirirya sibugha ambu kitholere.” Samuel mwahinduka. Eriyihighulha okw’iyanzirirya lyabirileka iniayihighulha n’okwa butswatswa.

Antonio iyo ibbwa abya omwa kitsibu ekikalire eky’obutswatswa: Inianzire kutsibu erilebya eby’obutswatswa. Nomwanabya athahirye omukali oyo abya anzire kutsibu, mirundi mingyi iniakayisanga iniabirilebya eby’obutswatswa. Akabugha athi erilengekania oku 1 Petero 5:8 mukyamuwathikya. Hakabugha hathi: “Mulebaye, muyitheghaye! Kusangwa enzighu yenyu Sitani yikaghenda-ghenda ng’endale, eyikaruruma n’erisonda-sonda oyo yangalya.” Antonio akabugha athi: “Ebisasani by’obutswatswa bithuthimbireko omwa kihugho kyosi, n’ebisasani ebyo byangana sighalha okwa bwongo. Omulhondo oyo mwanyiwathikya kutsibu erilengekania okwa nzuko y’erilengwako eri. Nabya ngatholere ing’igha omwa byalhuba ngoku ebisasani ebi bikalhua oku Sitani. Hathya ngakyasi ngoku Yehova musa yuwanga nyiwathikya ‘eriyilebya, n’eritheya’ nuku nangarwanisya ebikalhwa n’obwongo bwaghe, omuthima waghe, n’obutheke bwaghe ebyo.” Antonio mwabana obuwathikya obw’akayithagha, n’erighunzerera abirithoka erileka omutse mubi oyo. Ekyo kyabirimuwathikya eriyihighulha nibya n’okwa bitsibu ebikalire.

Omo kwenene, e Biblia yikaha erihabulha eryuwene eryanga thuwathikya eriyihighulha okwa bitsibu ebikalire. Kandi ibbwa ebitsibu ebya wuwithe ebikabya nga byabirihanda emirihi kandi ibyabya nga sibyanga thasyahwa? Thulebaye ekinywe kya Nyamuhanga nga kyanga thuwathikya kithi erighunzaho ebitsibu ng’ebi.

Obusondoli bwe Biblia bwangana thuwathikya eriyihighulha okwa bitsibu birebe