Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomwenda 2017

‘Wuhande Omuthima, Wukole’

‘Wuhande Omuthima, Wukole’

“Wubye n’amaaka, wuhande omuthima, wukolebyo. Siwubahe kutse erihanga-hangya, kusangwa Omwami Mukulhu . . . ali haghuma nawu.”​—1 EMYATSI Y’EMIGULU 28:20.

ESYONYIMBO: 60, 29

1, 2. (a) Ni mubiiri wahi mukulhu kutsibu ogho Solomona ahebawa? (b) Ni kyahi ekyaleka Dawudi iniabya n’erihanga-hangya busana Solomona?

SOLOMONA mwahebwa omubiiri w’embaghane. Yehova mwamusombolha erimanira obuhimbe bw’ehekalu eye Yerusalemu. Obu bwabya buhimbe bukulhu kutsibu obuthe bwathabya! Ehekalu eyi yabya yitholere “iyakanga kutsibu,” n’eriminywa busana n’obuwane bwayu. Kandi ekikulhu kutsibu, yabya iyikendibya “nyumba y’Omwami Mukulhu.”—1 Emyatsi y’Emigulu 22:1, 5, 9-11.

2 Omwami Dawudi abya inianayikethere ndeke-ndeke ngoku Nyamuhanga akendi syawathikya Solomona. Aliwe Solomona abya “mulere” kandi isyali aminya bingyi. Angana kanganirye obuthubaha inialigha omubiiri w’erihimba ehekalu? Kutse iyo eribya isyali aminya bingyi n’eribya iniakine mulere byangana lekire iniathakolha ekyo? Solomona erithoka, abya atholere iniahanda omuthima kandi iniakolha.

3. Ni byahi ebya Solomona angabya imw’igha okwa buthubaha bwa thatha wiwe?

 3 Ebingyi ebihambire okwa buthubaha Solomona angabya iniabighira oku thatha wiwe, Dawudi. Nibya n’omughulhu Dawudi abya iniakine mulere kutsibu, iniakalhwa n’ebisoro ebyabya bikanza erirya esyombuli sya thatha wiwe. (1 Samweli 17:34, 35) Kandi mwakangania obuthubaha bunene akalhwa n’omusirikali mbangyi, oyukalire kandi oyukasaghawa, Goliata. Busana n’obuwathikya bwa Nyamuhanga, Dawudi mwakinda Goliata omw’ikolesya akabwe akakomire.—1 Samweli 17:45, 49, 50.

4. Busana naki Solomona mwayithagha erihanda omuthima?

4 Thwangana lhangira ekyaleka Dawudi iniabya iyutholere eribwira Solomona athi abye muthubaha kandi ahimbe ehekalu. (Soma 1 Emyatsi y’Emigulu 28:20.) Solomona kw’athakangania erihanda omuthima, obuba bwanga mughunzire amani, erimulemesya eritsuka omubiiri. Kandi ekyo kyangabere ky’akabi kutsibu kwilhaba erilemwa omubiiri.

Thukayithagha obuwathikya bwa Yehova erithoka eribya n’obuthubaha n’erikolha omubiiri owakathuha

5. Busana naki thukayithagha obuthubaha?

5 Nga Solomona, nethu thukayithagha obuwathikya bwa Yehova erithoka eribya n’obuthubaha n’erikolha omubiiri ow’akathuha. Hathyano thulebaye eby’erileberyako by’abandu abakanganaya obuthubaha omwa buthuku bwa kera. Neryo thukendi lebya nga thwanga kangania thuthi obuthubaha n’eriberererya omubiiri wethu.

ABAKANGANAYA OBUTHUBAHA

6. Ni kyahi ekikakutsemesaya okwa buthubaha bwa Yozefu?

6 Yozefu mwakangania obuthubaha muka Potifari akamulengako athi akesaye nayu. Yozefu angabya iniabya inianasi ngoku engebe yiwe iyikendibya omwa kabi amaghana. Omwakanya k’eriligha, Yozefu mwakangania obuthubaha n’erighana aho naho.—Enzuko 39:10, 12.

7. Rahabu mwakangania athi obuthubaha? (Lebaya ekisasani ekiri okw’itsuka.)

7 Owundi oyuwakanganaya obuthubaha ni Rahabu. Rahabu angana kwire obuba n’erighana eriwathikya abalingyi Abaisraeli abahika ewiwe e Yeriko. Aliwe kundi abya ayikethere Yehova, omwa buthubaha mwabisa abalhume babiri abo n’eribawathikya eritswa buholho. (Yosua 2:4, 5, 9, 12-16) Rahabu aby’ikirirye ngoku Yehova ya Nyamuhanga w’okwenene, kandi abya inianayikethere ngoku Nyamuhanga akendiha Abaisraeli b’ekihugho. Mwathalighira eryubaha abandu, nibya n’omwami we Yeriko n’abandu biwe, likamughunza amani. Aliwe, mwakangania obuthubaha amayilhamya n’ab’okw’iyo.—Yosua 6:22, 23.

8. Obuthubaha bwa Yesu mubwahamba buthi okwa bakwenda?

8 N’abakwenda ba Yesu abathaleghulha mubakangania obuthubaha bunene. Babya ibabirilhangira obuthubaha bwa Yesu, kandi ekyo mukyaleka ibamugherererya. (Matayo 8:28-32; Yoane 2:13-17; 18:3-5) Abasadukayo babere banza eribugha bathi baleke erikangirirya oku Yesu, abakwenda mubaghana ekyo.—Emibiri 5:17, 18, 27-29.

9. Erisako erya 2 Timoteo 1:7 likathuwathikaya lithi eriyitheghererya obuthubaha nga bukalhua oku ndi?

 9 Yozefu, Rahabu, Yesu, n’abakwenda babya ibabirithwamu erikolha ekihikire. Mubakangania obuthubaha, isi busana n’eriyikethera omwa maaka wabu, aliwe busana n’eriyikethera Yehova. Nethu omughulhu thukayithagha obuthubaha, thutholere ithwayikethera Yehova, butsira amaaka wethu. (Soma 2 Timoteo 1:7.) Thuthalebya nga thwanga kangania thuthi obuthubaha: omw’eka yethu n’omwa kithunga.

EMIBERE EYIKAYITHAGHA OBUTHUBAHA

10. Busana naki Abakristayo abalere bakayithagha obuthubaha?

10 Hali mibere minene eyikayithagha Abakrisitayo abalere erikangania obuthubaha bakakolera Yehova. Bangan’ighira okwa ky’erileberyako kya Solomona, oyuwakanganaya obuthubaha akathwamu erihimba ehekalu. Nomwakine indi abalere batholere erisondolhwa n’ababuthi babu, nabu banawithe erithwamu ahabwabu okwa myatsi y’omughaso. (Emisyo 27:11) Bakayithagha obuthubaha erithwamu bakasombolha abanywani, eby’eriyitsemesya, ngoku bangabya ibanahenirye omwa by’esyongeso, kandi ng’abakendi batizibwa mughulhu wahi. Bakayithagha obuthubaha kundi aho bakabya ibali okw’ighana Sitani, oyukatsuma Nyamuhanga.

11, 12. (a) Musa mwakangania athi obuthubaha? (b) Abalere banga gherererya bathi eky’erileberyako kya Musa?

11 Erithwamu likulhu eryo balere batholere ibakolha lihambire okwa bilhubirirwa byabu. Omwa bindi bihugho, abalere bakahathikanawa erisoma kali-kali n’eribana omubiiri owali kw’omusara munene. N’omwa bindi bihugho, kikalire eribana akasente, neryo abalere ibangana lengekania bathi batholere ibakolha kutsibu eriwathikya ab’eka yabu. Wamabya iwuli omwa mibere ng’eyi, Iengekanaya okwa ky’erileberyako kya Musa. Mwali wa Farao yuwamukulhaya, neryo Musa angana yihirireho ekilhubirirwa ky’eribya mugaga kutse eribya mukulhu. Thalengekania okwa kahathikano ak’angabya iniabya akabana omw’eka ey’akuliramu e Misiri, abasomesya, n’abahani biwe! Aliwe Musa mwakangania obuthubaha n’erithwamu eribya n’abandu ba Nyamuhanga. Abere abirilhua e Misiri n’erisighania obugaga bwayo, mwayikethera ndeke Yehova. (Abaebrania 11:24-26) Ekyo mukyaleka Yehova iniamutsumulha kutsibu, kandi akendi syamutsumulha kwilhaba n’aho omwa buthuku obukasa.

12 Abalere bamayihiriraho ebilhubirirwa by’erikolera Yehova n’erihira Obwami bw’embere omwa ngebe yabu, Yehova iniakendi batsumulha. Iniakendi bawathikya eribana ebiyithawa by’ab’eka yabu. Omwa kighonye ky’erimbere, omulhwana Timoteo mwahira erikolera Nyamuhanga ly’embere omwa ngebe yiwe, nawu wangana kolha ekyo. * (Lebaya omwatsi ahikwa.)—Soma Abanya Filipi 2:19-22.

Wanabirithwamu eribya muthubaha omwa ngebe yawu yosi? (Lebaya enungu 13-17)

13. Obuthubaha mubwawathikya buthi mwali wethu mulere eriberererya ebilhubirirwa biwe?

13 Mwali wethu omwa Alabama, e Amerika, mwayithagha obuthubaha erihiraho ebilhubirirwa omwa mubiiri wa Nyamuhanga. Akabugha athi: “Nakulha ingali mundu w’esisoni. Isindi kanaya n’abandu okwa Kingdom Hall, kandi ikikanyikalira erikongotha okwa syonyuyi sy’abandu abo ngathasi.” Ababuthi biwe n’abandi omwa kithunga  mubawathikya Omukrisitayo mulere oyu eriberererya ekilhubirirwa kiwe ky’eribya mutemburi. Akabugha athi: “Ekihugho kya Sitani kikanza abandu babye n’ekilhubirirwa ky’erisoma kali-kali, eribya n’ebitsumbi, esyosente, n’eribya n’ebindu binene.” Aliwe kandi mwalhangira ngoku abandu bangyi sibali hika okwa bilhubirirwa ebi kandi ngoku bikaletha amalighe n’obulhumi. Akongerako athi: “Aliwe ingye erikolera Yehova, kyabirinyilethera etseme nene n’erithekana.”

14. Ababuthi Abakrisitayo bakayithagha obuthubaha mughulhu wahi?

14 Ababuthi Abakrisitayo nabu bakayithagha obuthubaha. Ng’eky’erileberyako, oyukuhere omubiiri angana bera eribya akabugha athi wukole saha nene okwa sya wutholere erikolha kandi iby’ebiro ebyo wabirihiraho busana n’eriramya ly’eka, erithulira, n’emihindano. Wukayithagha obuthubaha erimubwira wuthi eyihi n’erihiriraho abaana bawu eky’erileberyako ekyuwene. Kutse obundi omwa kithunga ekya wulimu mwanganabya ababuthi balebe abakalighira abaana babu erikolha ebindu ebya wuthanzire abaana bawu bakakolha. Ababuthi aba bamakubulya nga ni busana naki, iwune mwendi kangania obuthubaha n’eribabwira ekikaleka iwunabasikirye?

15. Esyonyimbo 37:25 na Abaebrania 13:5 hanga wathikya hathi ababuthi?

15 Kikayithagha obuthubaha eriwathikya abaana bethu eribya n’ebilhubirirwa omwa mubiiri wa Nyamuhanga n’eriberereryabyo. Ng’eky’erileberyako, abandi babuthi bangana sagha erihira omwa baana babu mw’omuhwa w’erikolha obutemburi engebe yabu yosi, eriwathikya eyiri obuyithawa, erikolera okwa Beteli, kutse eriwathikya omwa buhimbe  bw’Ebisenge by’Obwami n’eby’Emihindano eminene-minene. Obundi ibangana lengekania bathi abaana babu sibendi syathoka eribalembera babirikulha. Aliwe ababuthi b’amenge bakakanganaya obuthubaha n’erikirirya ngoku Yehova akendi syaberererya emilhaghe yiwe. (Soma Esyonyimbo 37:25; Abaebrania 13:5.) Ababuthi abakakanganaya obuthubaha ng’obu n’eriyikethera Yehova bakaleka abaana babu ibabagherererya.—1 Samweli 1:27, 28; 2 Timoteo 3:14, 15.

16. Abandi babuthi babiriwathikya bathi abaana babu eribya n’ebilhubirirwa omwa mubiiri wa Nyamuhanga, kandi eki kyabirighasira kithi abaana babu?

16 Omulhume na mukali wiwe e Amerika mubawathikya abaana babu erihira omubiiri wa Yehova w’embere. Omulhume akabugha athi: “Abaana bethu babere bathe batsuka eribbasulha n’eribugha, ithukabya ithune mubabwira okwa butseme bw’erikolha obutemburi n’eriwathikya omwa ekithunga. Kandi babirikolha ekyo.” Akabugha athi abaana babu erihiraho ebilhubirirwa n’eribiberererya, kyabiribawathikya erirwanisya erilengwako eriri omwa kihugho kya Sitani n’erihira omuwatho okw’ikolera Yehova. Mughalha wethu oyuwithe abaana babiri mwahandika bino: “Ababuthi banene bakahiraho akaghalha kanene n’erikolha kutsibu eriwathikya abaana babu eriberererya ebilhubirirwa omwa by’amasatha, eriyitsemesya, n’eby’esukuru. Aliwe ekilengire eki ly’erikolesya akaghalha n’ebyathuwitheko eriwathikya abaana bethu eriberererya ebilhubirirwa ebikendi bawathikya eribya n’emimanire mibuya embere sya Yehova. Kyabirithutsemesya kutsibu erilhangira abaana bethu bakahika okwa bilhubirirwa byabu n’eribya haghuma nabu omwa lhughendo olhu.” Wangana kikakasya ngoku ababuthi abakawathikaya abaana babu eribya n’ebilhubirirwa omwa mubiiri wa Nyamuhanga n’eriberereryabyo, Yehova akabasima.

ERIKANGANIA OBUTHUBAHA OMWA KITHUNGA

17. Iha eby’erileberyako ebikakanganaya obuthubaha omwa kithunga.

17 N’omwa kithunga, thukayithagha erikangania obuthubaha. Ng’eky’erileberyako, abasyakulhu bakayithagha obuthubaha bakakania n’oyuwabiriwa omwa kibi ekikalire kutse bakaha obuwathikya okwa balhwere obulhwere obukalire. Abandi basyakulhu bakabungira esyongomo eriy’igha n’abanzisibirwe kutse eriyasondolha emihindano. Kandi ibbwa bali bethu abahuru? Bawithe nzira nyingyi esy’erikanganiryamu obuthubaha n’erikolera Yehova. Bangana kolha obutemburi, ibaghenda eyiri obuwathikya, ibasangira omwa by’obuhimbe, n’erisaba erighenda okwa Sukuru ey’Abathuliri b’Obwami. Abandi nibya bakanabirikirawa okwa Sukuru ye Gileadi.

18. Bali bethu abakulire banga kangania bathi obuthubaha?

18 Thwanzire bali bethu abakulire, kandi thutsemire eribya nabu omwa kithunga! Nomwakine indi abandi sibanga thasyathoka erikolha bingyi omwa mubiiri wa Nyamuhanga ngoku babya bakakolha erimbere, bangana kangania obuthubaha kandi ibakolha mubiiri. (Soma Tito 2:3-5.) Ng’eky’erileberyako, bali bethu abakulire batholere ibakangania obuthubaha abasyakulhu bamabasaba eriwathikya mwali wethu omulere okwa myambalire eyitholere. Mwali wethu isyendi tsumanga mwali wethu omulere busana n’emyambalire yiwe, aliwe omwa bwolho-bwolho iniakendi muwathikya erilhangira ngoku emyambalire yiwe yangana hamba okwa bandi. (1 Timoteo 2:9, 10) Bali bethu abakulire bamakangania  olhwanzo omwa mibere ng’eyi, ibangana leka ekithunga ikyaghuma.

19. (a) Baghalha bethu ababatizibirwe banga kangania bathi obuthubaha? (b) Abanya Filipi 2:13 na 4:13 hanga wathikya hathi baghalha bethu eribya n’obuthubaha?

19 Baghalha bethu ababatizibirwe nabu batholere ibakangania obuthubaha n’erikolha omubiiri. Bamabya ibanayitheghekire eribya baghombe abawathikya kutse basyakulhu, ekithunga kikaghasirawa kutsibu. (1 Timoteo 3:1) Aliwe, abandi bangana sagha erikolha ekyo. Obundi mughalha wethu mwasobya kera, neryo lino iniayowa nga syanga tholera eribya mughombe omuwathikya kutse musyakulhu. Owundi mughalha wethu anganayowa iyo nga syangathoka olhukwamirwa. Wamabya ikuwukayowa wuthya, Yehova angana kuwathikya eribya n’obuthubaha. (Soma Abanya Filipi 2:13; 4:13.) Ibuka eky’erileberyako kya Musa. Nayu mwayowa nga syanga thoka erikolha ekya Yehova amubwira athi akole. (Eriluayo 3:11) Aliwe Yehova mwamuwathikya eribya muthubaha n’erikolha ebya Yehova amulhaghira. Mughalha wethu oyubatizibirwe nayu angabana athi obuthubaha ng’obu? Anganasaba Yehova y’obuwathikya n’erisoma e Biblia buli kiro. Angana ghanirya okwa by’erileberyako by’abali omwa Biblia abakanganaya obuthubaha. Omw’iyikehya angana saba abasyakulhu bamuthendeke n’eriyihayo eriwathikya ahamabya obuyithawa omwa kithunga. Thukahira omwa baghalha bethu abosi ababatizibirwe mw’omuhwa ow’eribya n’obuthubaha n’erikolha kutsibu eriwathikya ekithunga!

‘YEHOVA ALI HAGHUMA NAWU’

20, 21. (a) Dawudi mwabwira Solomona athiki? (b) Ni yikethera lyahi erya thutholere ithwabya nalyo?

20 Omwami Dawudi mwabwira Solomona athi Yehova akendisyabya haghuma nayu erihika okw’ihwa ly’obuhimbe bw’ehekalu. (1 Emyatsi y’Emigulu 28:20) Ahathe erithika-thika, Solomona angabya imwaghanirya okwa binywe ebi, kandi mwathalighira eribya iniakine mulere n’eribya isyali aminya bingyi kikamukakirya okw’ikolha omubiiri. Aliwe, mwakangania obuthubaha, kandi omwa buwathikya bwa Yehova, omo myaka musanju n’embindi mwaghunza obuhimbe bw’ehekalu eyikangire.

21 Yehova mwawathikya Solomona, nethu angana thuwathikya eribya n’obuthubaha n’eriberererya omubiiri wethu, omw’eka n’omwa kithunga. (Isaya 41:10, 13) Thwamakangania obuthubaha thukakolera Yehova, ambi ithwaminya ndeke-ndeke ngoku akendi thutsumulha lino n’omwa buthuku obukasa. Busana n’ekyo, “wuhande omuthima, wukolebyo.”

^ enu. 12 Wukendi bana amenge awanga kuwathikya ngoku wangahiraho ebilhubirirwa omwa mubiiri wa Nyamuhanga omo mwatsi “Kolesaya Ebilhubirirwa by’Obunyakirimu Eriha Omuhangiki Wawu y’Olhukengerwa” omwa Watchtower ey’Okwomusanju 15, 2004.