Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomwenda 2017

Ibya n’Omubere w’Eriyikakirya

Ibya n’Omubere w’Eriyikakirya

“Emikolere eyikalhua okwa mulimu y’eyi, . . . eriyitheya [“eriyikakirya,” NW].”​—ABANYA GALATIA 5:22, 23.

ESYONYIMBO: 83, 53

1, 2. (a) Ni kyahi ekyanga lhwiririra omw’ithendi yikakirya? (b) Busana naki ithwakania okwa mubere w’eriyikakirya?

ERIYIKAKIRYA ni mubere ogho Yehova angana thuwathikya eribya nagho. (Abanya Galatia 5:22, 23) Yehova iyo akathoka eriyikakirya ndeke-ndeke kundi ahikene. Aliwe kundi ithwe sithuhikene, thukana lemawa eriyikakirya. Kandi kwenene, ebingyi by’okwa bitsibu ebya bandu bawithe bikasa busana n’erithendi yikakirya. Lyanganaleka omundu iniathakolha lhuba eby’omughaso munene kutse inialemwa okwa sukuru kutse okwa mubiiri. Erithendi yikakirya lyangana lethera eribugha kithya-kithya, erithamira, amalhwa, erithwa embeta, amabanza, erilemwa eritsira omutse mubi, erihirwa omwa ngomo, ebitunturo, obulhwere obukasira omw’ikolha emyatsi y’engyingo, n’amakule awathanzibirwe.—Esyonyimbo 34:11-14.

2 Abandu abathe yikakiraya bakayilethera ebitsibu kandi ibabilethera n’abandi. Kandi kine mwongera erilhangirika ngoku abandu bakayongera erilemwa eriyikakirya. Aliwe eki isikyathuswekaya, kundi Ekinywe kya Nyamuhanga mukyabugha kithi erithendi yikakirya kikendisyabya kighuma ky’okwa bikakanganaya ngoku thuli omwa “biro by’enyuma-nyuma.”—2 Timoteo 3:1-3.

3. Busana naki thukayithagha eriyikakirya?

3 Busana naki thukayithagha eriyikakirya? Habw’esyonzumwa ibiri. Ey’erimbere, abandu abakakakiraya eriyowa lyabu, mughulhu mungyi bakabya na bitsibu bike. Kandi kikab’olhobera erikolongana ndeke n’abandi n’eriyitheya okw’ihithana, amaghaniryo, kutse erituntura. Eyakabiri, eribya ithune banywani ba Nyamuhanga, thutholere ithwarwanisya erilengwako n’eriyikakirya okwa syongumbu nyibi. Ekyo kya Adamu na Eva balemawa erikolha. (Enzuko 3:6) Ng’ibo, munabwire abandu bangyi bawithe ebitsibu binene kundi sibali yikakiraya.

4. Ni kyahi ekyanga humulikania owosi-wosi oyo kikakalira erikakirya esyongumbu siwe nyibi?

4 Yehova anakyasi ndeke ngoku sithuhikene kandi ngoku kikathukalira eriyikakirya. Aliwe anzire iniathuwathikya erighondya esyongumbu syethu nyibi. (1 Abami 8:46-50) Iyo ng’Omunywani w’olhwanzo, omwa bwolho-bwolho akawathikaya abo kikanakalira erikakirya eriyowa lyabu n’esyongumbu syabu. Omo mwatsi ono, thukend’igha okwa ky’erileberyako kya Yehova eky’eriyikakirya. Thukendi kania n’okwa by’erileberyako by’omwa Biblia ebyuwene n’ebithuwene, n’erikania okwa menge awalimu awanga thuwathikya.

YEHOVA NI KY’ERILEBERYAKO

5, 6. Ni ky’erileberyako kyahi eky’eriyikakirya ekya Yehova akathuhiriraho?

5 Eriyikakirya lya Yehova lihikene kundi athunganene omwa buli mwatsi. (Eryibuka Ebihano 32:4) Aliwe ithwe sithuhikene. Nomwabine, thutholere ithwalebya ndeke eky’erileberyako kiwe eky’eriyikakirya nuku thwanga thoka erimugherererya ndeke. Eki kikendi thuwathikya erikolha ekihikire hamabya ebyanga thuhithania. Ni byahi ebikakanganaya eriyikakirya lya Yehova?

Eriyikakirya lya Yehova lihikene kundi ahikene omwa buli mwatsi

6 Thalengekania okwa kya Yehova athwamu erikolha Sitani akayisamambulha omwa Edeni. Ahathe erithika-thika, ebya Sitani abugha byangabya imubyaleka abaghombe ba Nyamuhanga abatheleghulha abali omwa lhubulha ibakukubalha, ibahithana, n’eriyiponera. Obundi nawu wukanayowa wuthya wukalengekania okw’ighalhwa erya Sitani abirilethaho. Aliwe Yehova mwathatsuruma. Mwasubirya omwa nzira eyitholere. Yehova abiriyikakirya okw’ihithana kandi abirikangania obulingirirania oko mwatsi owahambire okw’iyisamambulha lya Sitani. (Erilhuayo 34:6; Yobu 2:2-6) Busana naki? Yehova abirileka halhabe obuthuku kundi syanzire omundu wosi-wosi akahera aliwe “anzire abandu bosi ibabindulha emithima yabu n’erileka ebibi.”—2 Petero 3:9.

7. Eky’erileberyako kya Yehova kikathweghesayaki?

7 Eky’erileberyako kya Yehova kikathweghesaya ngoku thutholere ithwatsuka erilengekania thuthe thwabugha kandi isithwasubiraya lhuba-lhuba. Neryo hamabya erithwamu oko mwatsi mukulhu, ambi iwatsuka erilengekania ndeke oko mwatsi oyo. Saba Yehova y’amenge aw’eribugha kutse erikolha ekihikire. (Esyonyimbo 141:3) Kyolhobire eritsuruma thwamabya ithwabirihithana. Kandi kyabirileka abandu ibayikubyabwomo busana n’eribugha kutse erikolha ekindu buthalengekania!—Emisyo 14:29; 15:28; 19:2.

EBY’ERILEBERYAKO EBYUWENE N’EBITHUWENE EBY’ABAGHOMBE BA NYAMUHANGA

8. (a) Ni hayi ahathwangabana eby’erileberyako ebyuwene eby’eriyikakirya? (b) Ni kyahi ekya wathikaya Yozefu erisingura erilengwako mukali wa Potifari akamulombota? (Lebaya ekisasani ekiri okw’itsuka.)

8 Ni by’erileberyako byahi ebiri omwa Biblia ebikakanganaya omughaso w’eriyikakirya? Oyo wanga lengekaniako ni mughalha wa Yakobo iya Yozefu. Mwarwanisya erilengwako omughulhu abya akakolera omwa nyumba ya Potifari, omukulhu w’abatheya ba Farao. Mukali wa Potifari mwasima Yozefu kundi Yozefu “abya mubuya n’ow’obusu buthendere,” kandi mwalengesya erimuthetha ngendo nyingyi. Ni kyahi ekya wathikaya Yozefu erisingura erilengwako eryo? Angabya imwasangwa alengekania kutsibu okwa kyanga lhwiririra omw’iligha akahathikano k’omukali oyu. Neryo omukali abere akanza erimuhamba, Yozefu mwathibitha. Yozefu mwabugha athi: “Nanga kolha erilholho lingaha eri lyo nyithi n’erihalya oku Nyamuhanga kwehi?”—Enzuko 39:6, 9; soma Emisyo 1:10.

Saba Yehova akuhe amenge n’omuthima w’eriyikakirya erithoka erirwanisya erilengwako

9. Wanga yitheghekera wuthi erirwanisya erilengwako?

9 Eky’erileberyako kya Yozefu kikathweghesayaki? Thwamabana akahathikano ak’erithwa ekihano kya Yehova, ambi ithwarwanisya erilengwako eryo. Abandi babere bathe babya Bema ba Yehova, babya omwa bukobe bw’omururu, ethamiro, erinywa ethaba, erikolesya ebibatsi ebikathamiraya, obusingiri, n’ebindi bitsibu. Nibya n’enyuma w’eribatizibwa, hanganayira ibalengwako omwa bindu ebi. Eki kyamakubyako, th’imana hake, wanalengekania ngoku obughuma bwawu na Yehova bwangatsanda erilengwako eryo lyamakukinda. Iwangana lengesya erilebya nga ni mibere yahi eyanga leka iwalengwako neryo iwathwamu ngoku wanga yitheya kuyo. (Esyonyimbo 26:4, 5; Emisyo 22:3) Wamabya iwukana lengawako wuthya, saba Yehova akuhe amenge n’omuthima w’eriyikakirya erithoka erirwanisya erilengwako.

10, 11. (a) Ni kyahi ekikahika okwa balere bangyi okwa sukuru? (b) Ni kyahi ekyanga wathikya Abakrisitayo abalere erirwanisya ebyangaleka ibathwa ebihano bya Nyamuhanga?

10 Ebiri ng’ebyahika oku Yozefu binemubya munabwire n’okwa Bakristayo bangyi abakine balere. Eky’erileberyako ni Kim. Abo Kim akasoma nabu ibakabya bamakolha emyatsi y’engyingo oko wikendi, ibakasa ibamuyipangirako. Kim iyo isyanga kania ebiri ng’ebi. Akabugha athi iyo eribya wa mbaghane mukyaleka iniayowa “ng’ali omwa mbwera kandi nga sihali oyumutsomene” kandi athi n’ab’akasoma nabu ibakalhangira nga ni mudoma kundi isyawithe oyukamuthetha. Aliwe Kim abya w’amenge. Abya inianasi ngoku akahathikano k’erikolha emyatsi y’engyingo kakabya kanene omwa bulere. (2 Timoteo 2:22) Abandi banya sukuru ibakabera erimubulya nga syali athabana mulhume. Ekyo ikikamuha akaghisa ak’erisoborera ekikaleka iniathakolha emyatsi y’engyingo. Thukayisyethera balikyethu abalere ababirithwamu erirwanisya akahathikano k’eby’obusingiri, kandi na Yehova nayu akabayisyethera!

11 Omwa Biblia mune n’eby’erileberyako eby’abandu abatharwanisaya akahathikano k’eby’obusingiri. Kandi yikakanganaya ebitsibu ebikalhwiririramu thwamathendi yikakirya. Wamabya iwuli omwa mibere ng’eya Kim, thalengekania okwa mulhwana omukiru oyukanibweko omwa Biblia omwa Emisyo sura 7. Kandi thalengekania n’oku Amnoni n’ebitsibu ebya lhwiririra omwa mibere yiwe mibi. (2 Samweli 13:1, 2, 10-15, 28-32) Ababuthi bangana wathikya abaana babu eribya n’omubere w’eriyikakirya n’amenge omw’ikania nabu okwa by’erileberyako ebi omw’iramya ly’eka.

12. (a) Yozefu mwakakirya athi eriyowa liwe iniane n’abaghalha babu? (b) Ni mibere yahi eyikathuyithaghisaya erikakirya eriyowa lyethu?

12 Kandi Yozefu mwahiraho ekindi ky’erileberyako ekyuwene eky’eriyikakirya. Eki kyabya omughulhu baghalha babu basa e Misiri erisyaghulha ebyalya. Erithoka eriminya ndeke amalengekania wabu, Yozefu mwathababwira ngoku ni mughalha wabu. Abere alhangira athi syanga thasyathoka erikakirya eriyowa liwe, mwasighania baghalha babu amayalira bubiso-biso. (Enzuko 43:30, 31; 45:1) Mughalha wethu kutse mwali wethu amakolha ekindu ekyamakuponesya, erigherererya eky’erileberyako kya Yozefu kyangana kuwathikya eriyihighulha okw’ibugha kutse erikolha ekindu ekyanga leka iwayikubya bwomo. (Emisyo 16:32; 17:27) Kutse obundi wuwithe abahughu ababirihighithwa omwa kithunga. Kyamabya ikwa kiri kithya, wukayithagha erikakirya eriyowa lyawu nuku wuyihighule okw’ikolongana nabu. Eki kyangana kalha. Aliwe ikikendyolhoba wam’ibuka ku wukagherereraya eky’erileberyako kya Yehova n’erikolha ekyo akabugha.

Isihabya oyukayowa athi syanga lemwa eriyikakirya, erilengekania athi syanga leghulha amalengwako

13. Thwang’ighaki oko byabya omwa ngebe y’Omwami Dawudi?

13 Kandi thwangan’ighira okwa ky’erileberyako ky’Omwami Dawudi. Omughulhu Saulo na Simei bamukolha nabi, Dawudi mwathahithana kutse eribakangania kw’awithe obuthoki. (1 Samweli 26:9-11; 2 Samweli 16:5-10) Aliwe, Dawudi mwathakangania eriyikakirya mughulhu wosi. Thukaminya eki thukasoma okw’ilholho eryo akolha na Batiseba n’eky’anza erikolha Nabali akaghana erimuwathikya. (1 Samweli 25:10-13; 2 Samweli 11:2-4) Thwangan’igha bingyi oku Dawudi. Eky’erimbere, abakasondolha abandu ba Nyamuhanga bakayithagha eriyikakirya nuku sibakolesaye nabi obuthoki bwabu. Ekyakabiri, isihabya oyukayowa athi syanga lemwa eriyikakirya, erilengekania athi syanga leghulha amalengwako.—1 Abanya Korinto 10:12.

EBYA WANGA KOLHA

14. Ni kyahi ekyabya oku mughalha wethu mughuma, kandi busana naki thutholere ithwayitheya ebiri ng’ebyo byamathubyako?

14 Wangakolhaki eryuwania omubere wawu w’eriyikakirya? Thalengekania okwa kyabya oku Luigi. Ematoka muyatomera eyiwe. Nomwakine indi oyuwatomera ematoka ya Luigi yuwabya omwa sobya, mwakaramira Luigi n’erianza erilhwa nayu. Luigi mwasaba Yehova amuwathikaye eribya inianahumulike ne, n’erilengaho erihumulikania omulhume oyulyatomera. Aliwe omulhume oyo mwathahuna. Neryo Luigi mwahandika esyonamba sy’ematoka amaghenda omulhume iniakinakarama. Enyuma w’eyenga nguma, Luigi mwakolha erisubayo okwa mukali oyuwanzisibawa n’omwatsi we Biblia. Omulhume oyuwatomera ematoka ya Luigi abya iya mwira wiwe! Omulhume mwayiswekera n’erisaba Luigi y’ekighanyiro. Mwasaba Luigi y’enamba y’ekampuni eyitholere erisubya ematoka ya Luigi nuku angakanikisya ematoka eyo omwa bya lhuba. Omulhume mwikalha amahulikirira erikanirania okwa Biblia kandi mwalitsemera. Busana n’eki, Luigi mwalhangira ku mwakolha ndeke erithekana omulhume abiritomera ematoka yiwe, n’eriminya ku kyanga lethire ebitsibu kw’atsuruma.—Soma 2 Abanya Korinto 6:3, 4.

Ekya thukakolha thwamahithanibwa kikahamba okwa mubiiri wethu w’erithulira (Lebaya enungu 14)

15, 16. Erigha e Biblia lyanga kuwathikya lithi n’eka yawu erikulha-kulhania omubere w’eriyikakirya?

15 Eriyeghesya ndeke e Biblia mughulhu wosi irikendi wathikya Omukristayo erithunga omubere w’eriyikakirya. Wibuke ekya Nyamuhanga abwira Yosua athi: “Ekitabu eki ky’emighambo sikilhue omwa buno bwawu, nikwa wasyaghaniryakyo omwa musibo n’omwa kiro, iwabana erikwamirira erikolha ebisakire mukyo; neryo wasyayira enzira yawu mo muyisa, kandi wasyathoka ndeke.” (Yosua 1:8) Aliwe eriyeghesya e Biblia lyanga kuwathikya lithi erithunga omubere w’eriyikakirya kutse erikulha-kulhaniagho?

Eriyeghesya ndeke e Biblia mughulhu wosi irikendi kuwathikya erithunga omubere w’eriyikakirya

16 Thwabirilhangira ngoku omwa Biblia muli eby’erileberyako ebikakanganaya nga thukaghasirawa thuthi thwamabya n’omubere w’eriyikakirya n’ebitsibu ebikalhwiririramu thwamathendibya nagho. Yehova abya inianawithe ekyaleka iniabugha athi eby’erileberyako ebi bihandikawe. (Abanya Roma 15:4) Ithukendibya ithwamakangania amenge thwamabisoma, erighabyo, n’eribighaniryako buuli. Lengaho eriyilebya nga bikakuhambako bithi n’eka yawu. Saba Yehova akuwathikaya erikolesya obusondoli obuli omwa Kinywe kiwe. Wamalhangira ihane aho wukalemawa eriyikakirya, ambi iwaligha. Neryo, iwakihira omwa musabe, n’erihiraho akaghalha erilhangira wuthi wukuwanaya aho wukalemererawa. (Yakobo 1:5) Sekulhaya omwa bitabu byethu nuku wangabana amenge awanga kuwathikya.

17. Ababuthi banga wathikya bathi abaana babu eribya n’omubere w’eriyikakirya?

17 Wanga wathikya wuthi abaana bawu erithunga omubere w’eriyikakirya? Ababuthi banasi ngoku abaana babu mubathabuthwa n’omubere oyu. Neryo batholere ib’eghesya abaana babu b’emibere eyuwene omw’ibahiriraho eky’erileberyako ekyuwene. (Abanya Efeso 6:4) Wamalhangira abaana bawu isibawithe omubere w’eriyikakirya, yibulhaye iwe nga wune mubahiriraho eky’erileberyako ekyuwene. Wangana hiraho eky’erileberyako ekyuwene omw’ithendibya wukabulha omw’ithulira, okwa mihindano, n’eribya n’eriramya ly’eka. Kandi isiwasagha erighania abaana bawu kyamayithaghisibwa! Yehova mwahiriraho Adamu na Eva b’olhubibi. Olhubibi olho lhwanga bawathikirye erigha erisikya ehamuli ya Yehova. Kuthya, n’omughulhu ababuthi bakakunga abaana babu n’eribahiriraho eky’erileberyako ekyuwene, ikyangana wathikya abaana abo eribya n’omubere w’eriyikakirya. Eryanza obuthoki bwa Nyamuhanga n’erisikya ebihano biwe ni bighuma by’okwa bindu by’omughaso ebya wanga wathikiryamu abaana bawu erithunga.—Soma Emisyo 1:5, 7, 8.

18. Busana naki thutholere ithwasombolha ndeke abanywani?

18 Mbulha thuli babuthi kutse eyihi, ithwe bosi thutholere ithwakolesya amenge thukasombolha abanywani. Banywani bawu bamabya ibanzire Yehova, ibakendi leka iwabya n’ebilhubirirwa ebyuwene n’eriyitheya okwa bitsibu. (Emisyo 13:20) Eky’erileberyako kyabu kibuya ikikendi leka iwagherererya omubere wabu w’eriyikakirya. Kandi ahathe erithika-thika emibere yawu mibuya nabu iyikendi bahira mw’omuhwa. Eriyikakirya eryo thwanga thunga likendi leka Nyamuhanga iniathusima, ithwatsemera engebe, n’erihimba abo thwanzire.