Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomwenda 2017

Gherereraya Omubere wa Yehova ow’Erikwira Abandi b’Obulighe

Gherereraya Omubere wa Yehova ow’Erikwira Abandi b’Obulighe

“Omwami Mukulhu, Omwami Mukulhu Nyamuhanga oyo woswire n’erighanyira.”​—ERILUAYO 34:6.

ESYONYIMBO: 142, 12

1. Yehova mwayibisulha athi oku Musa? Busana naki eki ni kikulhu?

KIRO kighuma, Nyamuhanga mwayibisulha oku Musa omw’imubwira erina Liwe n’emighuma y’okwa mibere yiwe. Yehova angana hirire omuwatho w’okwa kaghalha kiwe kutse amenge wiwe, aliwe omwakanya k’ekyo, mwatsuka erikania okwa bughanyiri bwiwe kutse erikwira abandi b’obulighe. (Soma Eriluayo 34:5-7.) Musa anza eriminya Yehova ng’anemwendi musighika. Neryo Yehova mwahira omuwatho w’okwa mibere eyikakanganaya kwenene kw’anzire eriwathikya abaghombe biwe. (Eriluayo 33:13) Eriminya ngoku Yehova athutsomene kutsibu likaleka iwayowa wuthi? Omwatsi ono akendi kania okwa mubere w’erikwira abandi b’obulighe, omubere owakaleka ithwanza eribawathikya.

2, 3. (a) Ni kyahi ekikakanganaya ku ni kya buhangiranwa abandu erikwira abandi b’obulighe? (b) Busana naki wutholere iwaminya ebya Biblia yikakanaya okwa mubere oyu?

2 Yehova akakwira abandi b’obulighe, kandi abandu bahangikire omwa kisosekanio kiwe. Neryo ni kya buhangiranwa, abandu, nibya eritsomana abandi. Nibya n’abathasi Yehova, bakakwira abandi b’obulighe. (Enzuko 1:27) Omwa  Biblia muli eby’erileberyako bingyi eby’abandu abakwira abandi b’obulighe. Ng’eky’erileberyako, Solomona abere akanza eriminya okwa bakali babiri mama w’omwana nga y’owahi, mwabalengesya omw’ibugha athi omwana asathibawe banga mughabana. Mama w’omwana mwakwira omwana wiwe y’obulighe, neryo amalemba-lemba omwami athi akwame kyamuha owundi mukali. (1 Abami 3:23-27) Owundi oyuwabya n’omubere oyu ni mwali wa Farao. Abere abana Musa iniane lhumekeke, mwalhangira ku ni Muebrania kandi kw’atholere erithibwa. Aliwe “mwakwiralho obulighe,” n’erithwamu erikulya Musa ng’omwana wiwe-wiwe.—Eriluayo 2:5, 6.

3 Busana naki thutholere ithw’igha buuli okwa mubere ow’erikwira abandi b’obulighe? Kundi Yehova anzire ithwamugherererya. (Abanya Efeso 5:1) Nomwakine indi omwa buhangwa bwethu thutholere ithwabya n’omubere oyu, sithuhikene kandi thukanabya nga thwamayitsomana ithwibene. Hanganayira ikyathukalira erithwamu nga thunawathikaye abandi kutse nga thuyitsomane ithwibene. Ni kyahi ekyanga thuwathikya eryongera eritsomana abandi? Thuthatsuka erilebya Yehova n’abandi nga babirikangania bathi omubere oyu. N’ekyakabiri thwanalebya nga thwanga gherererya thuthi omubere wa Nyamuhanga oyu, kandi nga kikathughasira kithi thwamakolha ekyo.

YEHOVA—NI KY’ERILEBERYAKO EKYUWENE EKY’ERIKWIRA ABANDI B’OBULIGHE

4. (a) Ni kyahi ekyaleka Yehova iniathuma abamalaika e Sodomo? (b) Ebyabya oku Loti bikathweghesayaki?

4 Omwa Biblia muli by’erileberyako bingyi ebikakanganaya omubere wa Yehova oyu. Ng’eky’erileberyako, thalengekania okwa ky’akolera Loti. Loti abya mulhume muthunganene oyuwabya “akaghalhwa” busana n’esyonye sy’Abanya Sodomo ne Gomora. Abandu abo sibabya basikirye Nyamuhanga, neryo Yehova mwathwamu athi batholere ibakwa. (2 Petero 2:7, 8) Yehova mwathuma oku Loti kw’abamalaika erisyamubwira ngoku emiyi ye Sodomo ne Gomora yikendi heribwa kandi Loti kw’atholere iniathibitha. E Biblia yikabugha yithi: “Nikwa Loti mwayithimbya-thimbya, neryo abamalaika mubahamba ebyalha biwe n’ebyalha bya mukali wiwe, n’ebya bali biwe babiri, Omwami Mukulhu iniakamughanyira. Neryo mubamuhulhukirya eyihya, mubamuhira eyihya w’omuyi.” (Enzuko 19:16) Thwangana yikethera ngoku Yehova akayitheghereraya emibere yosi-yosi eyikalire eya thwangabyamu, ngoku anayitheghereraya eya Loti.—Isaya 63:7-9; Yakobo 5:11; 2 Petero 2:9.

Yehova akayitheghereraya ndeke emibere yosi-yosi eya thwangabyamu

5. Ekinywe kya Nyamuhanga kikathuwathikaya erilhangira ngoku thwanga kwira abandi b’obulighe?

5 Yehova abirikangirirya n’abandu biwe erikwira abandu b’obulighe. Thalengekania okwa kighuma ky’okwa bilhaghiro ebyo aha Abaisraeli. Omundu iniakabya amabya mw’edeni y’owundi, oyukamubanza inianganathwalha olhukimba lhwiwe ng’omutsimbo ow’erisyathuha eribanza eryo. (Soma Eriluayo 22:26, 27.) Aliwe omubweki iniatholere iniasubulya olhukimba eryuba likalenga nuku mwinyelho ayiswikelho omwa kiro.  Oyuthekwa obulighe iniangana ghana erilhusubulya, aliwe Yehova mwakangirirya abandu biwe erikwira abandi b’obulighe. Omusingyi owali omwa kihano eki akathweghesayaki? Isiwagheghena ebiyithawa bya mulikyenyu. Thwamabya ithwangana thoka eriwathikya mulikyethu oyuli omwa kitsibu, thutholere ithwawathikya.—Abanya Kolosai 3:12; Yakobo 2:15, 16; soma 1 Yoane 3:17.

6. Yehova erikwira Abaisraeli ababya bakasobya b’obulighe kikathweghesayaki?

6 Yehova iniakakwira Abaisraeli b’obulighe nibya ibabirinamusoberya. E Biblia yithi: “Omwami Mukulhu Nyamuhanga w’abathatha-kulhu wabu, mwathumirabo abakwenda biwe, engendo n’engendo, kusangwa aghanyira abandu biwe, n’ah’erikalha liwe.” (2 Emyatsi y’Emigulu 36:15) Kuthya nethu, thutholere ithwakwira abathe baminya Yehova b’obulighe aliwe abangana yisubamu n’eribya banywani biwe. Yehova syanzire mundu na mughuma akaheribwa okwa kiro ky’eritswera ekikasa. (2 Petero 3:9) Neryo omughulhu hakine obuthuku, thwanzire erisangira omwa mubiiri w’erighusa okwa buli mundu kw’akasali n’eriwathikya abandu bangyi ngoku thwanga thoka erighasirwa omwa mubere wa Nyamuhanga oyu.

7, 8. Ni kyahi ekyaleka eka nguma iyakakasya ngoku Yehova mwabakwira obulighe?

7 Munabwire, Abaghombe ba Yehova abangyi babiriyilhangirira omubere wiwe ow’erikwira abandi b’obulighe. Ng’eky’erileberyako, omo myaka ya 1990, omwa Bosnia mwabya amalhwa w’ebihanda n’erithangana. Yabya eka nguma imune omulhwana w’emyaka 12 oyothukendyahulha mwa Milan. Kiro kighuma Milan, mughalha wabu, ababuthi biwe, n’abandi Bema ba Yehova babya ibane omwa bbasi bakaghenda okwa lhuhindano e Serbia. Ababuthi ba Milan babya ibakayabatizibirawa okwa lhuhindano olho. Babere bahika okwa muthano, abasirikali mubalhangira eka yabu Milan ini b’ekindi kihanda neryo mubabakimya omwa bbasi. Neryo abasirikali mubabugha bathi balikyethu balhole embere n’olhughendo lhwabu. Muhalhaba ebiro bibiri abasirikali ibane nabu. Erighunzerera, omusirikali mwabirikira omukulhu n’eribulya ng’akole athi eka eyi. Aho babya bimene, mubowa omukulhu akabugha athi, “Bathwale eyihya wangabalhasa!”

8 Abasirikali babere banemukania, abandu babiri mubatsubukira okw’eka eyo. Ab’eka eyo babya isibabasi. Mubababwira omwa bihwe-hwe bathi nabu ni Bema ba Yehova kandi bathi baghalha bethu ababya omwa bbasi mubababwire ebyabere. Balikyethu babiri abo mubabwira Milan na mughalha wabu bathi bingire omwa matoka yabu banasoka omuthanu kundi abasirikali sibabya bakalebya ebipapura by’abaana. Neryo baghalha bethu abo mubabwira ababuthi bathi bathimbe bakendi sanga-ngana okwa wundi musirya. Milan mwakwa engitsi amabulha ngalire kutse ngaseke. Ababuthi biwe mubabulya, “Mukalengekanaya abasirikali banemwendi thuleka bakalhangira thukaghenda?” Aliwe babere bakaghenda, abasirikali mubabya nibya nga sibabalhangire. Milan na mughalha wabu mubasangangana n’ababuthi babu okwa wundi musirya w’omuthanu, neryo bamaghenda okwa lhuhindano. Mubaligha ndeke-ndeke ngoku Yehova mwakasubiraya emisabe yabu! Thunakyasi erilhua omwa Biblia ngoku Yehova syali bera eritheya abaghombe biwe omw’ikolesya enzira ng’eyi. (Emibiri 7:58-60) Aliwe okwa kyabya eki, Milan mwabugha athi: “Okw’ingye kikalhangirika abamalaika nga mubalibania  ameso w’abasirikali neryo Yehova amathulhamya.”—Esyonyimbo 97:10.

Nga Yesu, wunanzire kutsibu eriwathikya abandu n’eryanza eribakangirirya oku Yehova?

9. Yesu mwalhangira athi abandu ababya bakamukwama? (Lebaya ekisasani ekiri okw’itsuka.)

9 Yesu nayu ni ky’erileberyako kibuya eky’erikangania omubere oyu. Mwakwira abandu b’obulighe kundi “mubaghalhwa n’erilhuha ng’esyombuli esithawithe mulisya.” Mwakolhaki? “Neryo mwatsuka erikangiriryabo emyatsi mingyi.” (Matayo 9:36; soma Mariko 6:34.) Aliwe Abafarisayo babya mbaghane, isibalikwa bulighe kandi isibalyanza eriwathikya abandu. (Matayo 12:9-14; 23:4; Yoane 7:49) Nga Yesu, wukan’anza kutsibu eriwathikya abandu n’eryanza eribakangirirya oku Yehova?

10, 11. Mbwino kinatholere erikangania omubere w’erikwira abandi b’obulighe mughulhu wosi? Soborera.

10 Aliwe eki sikirimanyisaya kithi thutholere ithwakangania omubere oyu mughulhu wosi. Ng’eky’erileberyako, Omwami Saulo angabya imwalengekania athi ali okw’ikangania omubere w’erikwira abandi b’obulighe akaghana eritha Agagi, omwami w’Abamaleki kandi enzighu y’abandu ba Nyamuhanga. Kandi Saulo mwath’itha n’ebisoro by’Abamaleki. Aliwe Yehova abya iniabiribwira Saulo athi ithe Abamaleki abosi n’ebisoro byabu byosi. Busana n’erithendiowa, Yehova mwaghana Saulo eribya mwami. (1 Samweli 15:3, 9, 15) Yehova ya mutsweri oyuthunganene. Anganaminya ebiri omwa mithima y’abandu kandi anasi endambi eya thuthatholere erikanganiamu omubere oyu. (Ekiriro 2:17; Ezekieli 5:11) Omwa buthuku obuthe bwa haali, akendi tswera abosi abakaghana erimughondera. (2 Abanya Tesalonika 1:6-10) Obuthuku obo Yehova syendisyakwira ababi b’obulighe. Aliwe omw’ithoghothya ababi, akendi syabya iniakakanganaya abathunganene b’olhukeri kundi akendi syabalhamya.

11 Aliwe si mubiiri wethu eritswera abandu nga batholere erikwa kutse eyihi. Ithwe owethu ly’erikolha ekyosi-kyosi eriwathikya abandu lino. Thwanga kwira abandi b’obulighe omu nzira syahi? Thuthalebya esyonzira nyike.

NGOKU THWANGA KWIRA ABANDI B’OBULIGHE

12. Wanga kwira wuthi abandi b’obulighe?

12 Ibya n’omubere w’eriwathikya. Yehova akalhaghira Abakristayo athi ibakwira abaliranwa n’Abakrisitayo balikyabo b’olhukeri. (Yoane 13:34, 35; 1 Petero 3:8) Erikwira abandi b’obulighe kikanamanyisaya “eriaghalhwa haghuma.” Oyukakwira abandi b’obulighe akalengaho eriwathikya abakaghalhawa. Neryo kwesi thutholere ithwasondekania emibere ey’eriwathikiryamu abandi, obundi ng’omw’ibawathikya emibiiri y’eka kutse eribawathikya eriyabaghulira ebya bakayithagha.—Matayo 7:12.

Kwira abandi b’obulighe omw’ibawathikya (Lebaya enungu 12)

13. Abandu ba Nyamuhanga bakakolhaki hamabya ekitsinduli?

13 Sangira omwa mubiiri w’eriwathikya abakawa kw’ebitsinduli. Thukabya thukalhangira abandu bakaghalhwa busana n’ekitsinduli, kikanza ithwabakwira obulighe. Abandu ba Yehova basibwe ng’abakawathikaya omwa buthuku ng’obo. (1 Petero 2:17)  Ng’eky’erileberyako, mwali wethu Omujapani, abya ikere omo kitsweka ekya tsandibawa omwa musiki n’etsunami omo mwaka wa 2011. Mwabugha athi “mwahumulikana n’erithekana” akalhangira abakayihayo erilhua omwa bitsweka muthina-muthina bye Japani n’omwa bindi bihugho bakasya suba-subania amanyumba n’Ebisenge by’Obwami. Mwongerako athi: “Eki mukyaleka namalhangira ngoku Yehova akatsomana. N’abalikyethu batsomenengene. Baghalha bethu na bali bethu omwa kihugho kyosi bane muthuhira omwa misabe.”

14. Wanga wathikya wuthi abalhwere n’abakekelhuhire?

14 Wathikaya abalhwere n’abakekelhuhire. Thukakwira abandu b’obulighe thukalhangira bakaghalhwa busana n’obulhwere kutse busana n’erikulha omo myaka. Thukendi syabulikira ebitsibu ebi bikahwaho, neryo ky’ekikaleka ithwasaba thuthi Obwami bwa Nyamuhanga bwase. Thunemulinda ebyo, thukakolha ekyosi-kyosi eriwathikya abalhwere n’abawithe ebitsibu by’erikulha omo myaka. Omuhandiki mughuma mwahandika athi kiro kighuma mama wiwe oyuwabya mukekulhu kandi inialhwere obulhwere bw’eryibirirwa, mwakinia esyongyimba siwe. Abere anemwoya esyongyimba esyo, mwowa omundu akawatha akada k’okwa lhukyo. Babya ib’Abema ba Yehova babiri ababya bakamubungira. Bali bethu abo mubamubulya nga banamuwathikaye. Omukali oyo mwabugha athi: “Ka kikahemulha bathami, kale ibbwanu.” Bali bethu mubamuwathikya. Enyuma w’aho mubahuka ekyayi  kandi bamabya ibane aho ibane mukania nayu. Mughalha wiwe mwasima kutsibu kandi mwabugha athi Abema ba Yehova “bakaghendera okwa bya bakakangiriraya.” Iwe erikwira abalhwere n’abakekelhuhire b’obulighe kikanakusukuma erikolha ekyosi-kyosi ekya wanga thoka eribawathikya?—Abanya Filipi 2:3, 4.

15. Erithulira lyethu likawathikaya lithi abandi?

15 Wathikaya abandu eriminya Yehova. Enzira ngulhu eya thwanga wathikirya mw’abandu ly’eribakangirirya oku Nyamuhanga n’Obwami bwiwe. Eyindi nzira ly’eribawathikya erilhangira omughaso owali omw’ighendera okwa bihano bya Yehova. (Isaya 48:17, 18) Omubiiri w’erithulira ni nzira mbuya ey’eriheramu Yehova olhukengerwa n’erikwira abandi b’obulighe. Mbwino si wangakolha bingyi omw’ithulira?—1 Timoteo 2:3, 4.

NAWU KIKAKUGHASIRA ERIKWIRA ABANDI B’OBULIGHE!

16. Thukaghasirawa thuthi thwamakwira abandi b’obulighe?

16 Abasomire eby’obwongo bakabugha bathi erikwira abandi b’obulighe kyangana leka iwabya n’amaghalha awuwene n’engolongana eyuwene n’abandi. Wamawathikya abakaghalhawa, etseme yawu iyikendi yongera, iwabya n’amaha, ikyakehya embwera, n’erikehya erilyambibwa. Erikwira abandi b’obulighe kikakughasira. (Abanya Efeso 4:31, 32) Thwamawathikya abandi busana n’olhwanzo, kikaleka ithwabya n’obunyamuthima-thima obuwene kundi thukaminya ku thwamakolha ekya Yehova anzire ithwakolha. Eribya n’omubere w’erikwira abandi b’obulighe likendi thuwathikya eribya babuthi babuya, abanze babuya omwa butheke, kandi banywani abuwene. N’ekindi, abakakwira abandi b’obulighe nabo bakawathikibawa bakayithagha obuwathikya.—Soma Matayo 5:7; Luka 6:38.

17. Busana naki iwanza erikwira abandi b’obulighe?

17 N’omwakine indi thukaghasirawa thwamakwira abandi b’obulighe, enzumwa ngulhu ey’eribya n’omubere oyu ly’eryanza erigherererya Yehova n’erimuha olhukengerwa. Iyo ya Nzuko y’olhwanzo n’omubere oyu. (Emisyo 14:31) Akathuhiriraho eky’erileberyako ekyuwene. Neryo kwesi thukole ekyosi-kyosi ekya thwanga thoka erigherererya Nyamuhanga omw’ikwira abandi b’obulighe. Eki kikendi leka ithwabya bughuma n’abalikyethu kandi ithwabya n’engolongana eyuwene n’abandi bandu.—Abanya Galatia 6:10; 1 Yoane 4:16.