Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomwenda 2017

“Ekinywe kya Nyamuhanga Wethu Kikahangana Kera na Kera”

“Ekinywe kya Nyamuhanga Wethu Kikahangana Kera na Kera”

“Ebithi bikuma, n’omusanga akasesuka, nikwa ekinywe kya Nyamuhanga wethu kikahangana kera na kera.”​—ISAYA 40:8.

ESYONYIMBO: 116, 115

1, 2. (a) Engebe yangabere yithi ku hathabya e Biblia? (b) Ni kyahi ekikathuwathikaya erighasirwa omwa Kinywe kya Nyamuhanga?

ENGEBE yawu yangabere yithi ku wuthabya ne Biblia? Siwangabwene erihabulha eryuwene erikakusondolha buli kiro. Siwanga minyire ekwenene eyihambire oku Nyamuhanga, engebe, kutse obuthuku obukasa. Kandi siwanga minyire nahake ebya Yehova akolera abandu kera.

2 Eky’obutseme, sithuli omwa mibere ey’obulighe eyi. Yehova abirithuha Ekinywe kiwe, e Biblia. Abirilhaghanisya athi omwatsi owalimu akendi syabyaho kera na kera. Omukwenda Petero mwasuba omwa binywe ebiri omu Isaya 40:8. Nomwakine indi omulhondo oyo syalikanaya kutsibu-tsibu okwa Biblia, ahambire okwa biri omwa Biblia. (Soma 1 Petero 1:24, 25.) Thwangana ghasirwa kutsibu thwamasoma e Biblia omwa mubughe wethu. Abanzire Ekinywe kya Nyamuhanga, ekyo kyababiriminya. Ahabw’ebighonye bingyi, abandu babirikolha kutsibu erisubya e Biblia y’omwa yindi mibughe n’erihikyayo okwa bandu, nomuhanabya erihakanisibwa n’emibere  eyikalire. Yehova anzire abandu abosi “balhamibawe, n’eriminya ndeke omwatsi w’ekwenene kyamathokekana.”—1 Timoteo 2:3, 4.

3. Omo mwatsi ono thukendi kania okuki? (Lebaya ekisasani ekiri okw’itsuka.)

3 Omo mwatsi ono, thukendi lebya Ekinywe kya Nyamuhanga nga kyabirihangana kithi (1) omubughe akaghenda akahinduka, (2) eby’ekipolitiki ebyaleka emibughe iyahinduka, na (3) hakabya erihakanisibwa e Biblia yikahindulhwa omwa yindi mibughe. Omwatsi ono akendi thuwathikya athi? Thukendi ongera erisima e Biblia na Mwinyeyo.—Mika 4:2; Abanya Roma 15:4.

OMUBUGHE ERIHINDUKA

4. (a) Emibughe yikaghenda yikahinduka yithi obuthuku bune mulhaba? (b) Thukaminya thuthi ngoku sihali omubughe owa Nyamuhanga akalhangira ng’alengire owundi? Ekyo kikaleka ithwayowa thuthi?

4 Obuthuku bukabya bune mulhaba, n’omubughe nagho iniabya iniane muhinduka. Ebinywe ibyangana hinduka ibyamanyisya ekindi kindu. Obundi n’omwa mubughe wawu mwanganabya imune ebinywe ebyabirihinduka. Kwabine bithya n’okwa mibughe ya kera. Ekihebrania n’Ekigiriki ekya munabwire kiri mbaghane okwa Kihebrania n’Ekigiriki eky’omwa buthuku bwe Biblia. Abandu bangyi sibali yitheghereraya e Biblia omwa mibughe eya kera eyo yahandikawamu, neryo bakayithagha erihindulirwayo. Abandi bakalengekanaya bathi bam’igha Ekihebrania n’Ekigiriki ebya kera ibakendi yitheghererya ndeke e Biblia. Aliwe ekyo sikyanga bawathikya ndeke. * (Lebaya omwatsi ahikwa.) Thutsemire kundi e Biblia eyosi kutse ebitsweka byayo yabirihindulhwa hakuhi omwa mibughe 3,000. Yehova anzire “obuli kithunga ky’abandu, n’obuli kihanda, n’obuli mubughe” ibaghasirwa omwa Kinywe kiwe. (Soma Eribisulirwa 14:6.) Omo kwenene, eki kikaleka ithwayowa ithuli hakuhi na Nyamuhanga wethu ow’olhwanzo kandi oyuthawithe kasolholho.—Emibiri 10:34.

Thutsemire kundi e Biblia eyosi kutse ebitsweka byayo yabirihindulhwa hakuhi omwa mibughe 3,000

5. Ni kyahi ekyaleka e Biblia eya King James Version iyabya y’omughaso?

5 Emibughe eribya iyikahinduka kikahamba n’okwa mbindulha sye Biblia. Embindulha eyanabya yikayitheghereribwa yikanahulhuka, endambi yikahika iyabya isiyanga thasya yitheghereribwa. Eky’erileberyako ye Biblia eya King James Version, eyatsuka erihulhukibwa omwa 1611. Muyabya nguma y’okwa syo Biblia esy’Olhusungu esikakolesibawa kutsibu. Erithwalira haghuma, abakakanaya Olhusungu nahathya bakinakolesaya ebinywe ebyakolesibawa kera omwa King James Version. Aliwe embindulha eyi, erina lya Yehova irikabanikamu mirundi mike kutsibu. Omwa Masako w’Ekihebrania, emyanya eyabya yikabanikamu erina lya Nyamuhanga, omwa Biblia eyi ihakabya “MUKAMA” omwa syonyughuta esinene-sinene. N’esindi Biblia esyakwamako,  musyakolesya ekinywe “MUKAMA” omwa syonyughuta esinene-sinene omwa milhondo mirebe ey’Amasako w’Ekigiriki. Omw’eki, e King James Version muyakangania ngoku erina lya Nyamuhanga line n’omwa yikahulhawa mwa Ndaghano Mbyaka.

6. Ni kyahi ekikaleka ithwasima e Biblia eya New World Translation?

6 E Biblia eye King James Version yabere yikanahulhuka, ebinywe by’Olhusungu ebyabyamu byabya by’okwa buthuku obo. Aliwe obuthuku bwabere bune mulhaba, ebindi binywe bya kubyo mubyahwa okwa buthuku, kandi munabwire bikalire eriyitheghererya. Eki mukyabya n’okwa syombindulha sye Biblia esye yindi mibughe esya kera. Neryo thutsemire eribya ne Biblia eya New World Translation of the Holy Scriptures, eyikakolesaya omubughe owakayitheghereribawa lino. E Biblia eyi eyosi kutse ebitsweka byayo yiri omwa mibughe eyilhabire omu 150. Eki kikamanyisaya kithi abandu bangyi omwa kihugho bangana soma e Biblia eyi omwa mubughe wabu. Ebinywe ebyolhobire ebirimu bikaleka omwatsi wa Nyamuhanga iniahika okwa muthima. (Esyonyimbo 119:97) Aliwe ekikaleka e Biblia eya New World Translation iyabya y’embaghane kutsibu kiri kithi yikahira erina lya Nyamuhanga omwa myanya eyo lyabyamu kera.

OMUBUGHE OWAKAKOLESIBAWA KUTSIBU

7, 8. (a) Busana naki Abayuda bangyi omwa kighonye kyakasathu E.K.K. babya isibanga yitheghererya Amasako w’Ekihebrania? (b) E Greek Septuagint niki?

7 Eby’ekipolitiki erihinduka bikanaleka ihabya embinduka omwa mibughe eyikakolesibawa kutsibu okwa buthuku bulebe. Aliwe Yehova abirilhangira athi e Biblia yikabya omwa mubughe ogho abandu bakayitheghereraya. Ng’eky’erileberyako, ebitabu 39 eby’erimbere omwa Biblia byahandikawa na Bayuda, kutse Abaisraeli. B’abatsuka erihebwa “erikangirirya lya Nyamuhanga.” (Abanya Roma 3:1, 2) Mubahandika ebitabu ebyo omwa Kihebrania kutse omwa Kiaramaiki. Aliwe omwa kighonye ekyakasathu E.K.K., Abayuda bangyi babya isibakiyitheghereraya Ekihebrania. Busana naki? Alexander the Great abere athabalha okwa bihugho bingyi, Obwami bw’Abagiriki mubwakanyirira. Neryo Ekigiriki mwabya mubughe owakakolesibawa kutsibu omwa bihugho ebithaberweko n’Abagiriki, kandi abandu bangyi mubatsuka eribugha Olhugiriki omwakanya k’omubughe wabu. (Danieli 8:5-7, 20, 21) Mwabya imwamuli n’Abayuda bangyi abo kyabya kikakalira eriyitheghererya Ekihebrania. Mubawathikibwa bathi?

8 Emyaka nga 250 Yesu athali abuthwa, ebitabu bithano by’erimbere ebye Biblia mubyahindulhwa omwa Lhugiriki. Enyuma waho, n’awandi Masako w’Ekihebrania mwahindulhwa. Embindulha eyi muyahulhwa mwa Greek Septuagint. Y’embindulha ey’erimbere eyasibwe eya Masako w’Ekihebrania awosi.

9. (a) E Septuagint n’esindi mbindulha sye Biblia musyawathikya sithi abakasoma Ekinywe kya Nyamuhanga? (b) Ni kitsweka kyahi omwa Masako w’Ekihebrania ekya wanzire kutsibu?

9 E Septuagint muyaleka ikyathokekana okwa Bayuda abakabugha Olhugiriki erisoma Amasako w’Ekihebrania omwa Lhugiriki. Thalengekania nga mubatsema bungahi eribya ibanganowa n’erisoma Ekinywe kya Nyamuhanga omwa mubughe ogho basi? Endambi muyahika, ebitsweka bye Biblia byamahindulhwa omwa mibughe eyabya yikakanibwa kutsibu nga Syriac, Gothic, ne  Latin. Abandu bangyi babere babya ibangana thoka erisoma Ekinywe kya Nyamuhanga n’eriyitheghereryakyo, nabu mubakyanza. Neryo mubabanamu n’amasako agho bakatsemera kutsibu, ngoku kine namunabwire. (Soma Esyonyimbo 119:162-165.) Ahathe erithika-thika, Ekinywe kya Nyamuhanga kyabirihangana nomuhane esyombinduka omwa by’ekipolitiki n’omwa mubughe.

ERIHAKANISYA E BIBLIA YIKAHINDULHWA OMWA YINDI MIBUGHE

10. Busana naki abandu bangyi babya isibanga thoka erisoma e Biblia omwa buthuku bwa John Wycliffe?

10 Habw’emyaka mingyi, abasondoli bangyi ab’obuthoki mubalengesya erikakirya abandu erisoma e Biblia. Aliwe abalhume abakubaha Nyamuhanga mubathaleka omubiiri w’erilhangira bathi abandu bosi bakabana e Biblia. Omughuma w’okw’ibo ni John Wycliffe, oyuwabya ikere e England omwa kighonye kye 14. Abya ikirirye athi obuli mundu atholere iniabya iniangana thoka erisoma e Biblia. Omwa buthuku bwiwe, abandu bangyi omwa England babya isibali bathowa omwatsi we Biblia omwa mubughe wabu. Ebbeyi ye Biblia ini nene kutsibu, kandi obuli Biblia iyikahandikawa omo byalha. Neryo abandu bake kutsibu bababya bawitheyo. Kandi okwa buthuku obo, abandu bangyi babya isibasi erisoma. Ababya bakaya okwa kanisa banganabya ibanabya bakowa e Biblia yikasomwa omwa Lhulatini, aliwe kundi abya mubughe wa kera, abandu ba buli kiro isibanga yitheghererya. Yehova mwakolhaki erilhangira athi abandu bakathunga e Biblia omwa mibughe yabu?—Emisyo 2:1-5.

John Wycliffe n’abandi mubanza obuli mundu abane Ekinywe kya Nyamuhanga. Nawu wunanzire ekyo? (Lebaya enungu 11)

11. Embindulha ye Biblia eya Wycliffe muyahamba yithi okwa bandu?

11 Omo mwaka wa 1382, John Wycliffe n’abandi mubahindulha e Biblia omwa Lhusungu. E Biblia ya Wycliffe muyakolesibwa kutsibu n’egurupu eyabya yasibwe nga Lollards. Abandu abo ibanzire e Biblia. Ibakalyatha kyalu okwa kyalu omwa England eyosi. Abandu aba ibakasomera abandu be Biblia n’eribaha esyokopi sy’ebitsweka bye Biblia esihandikire omo byalha. Omubiiri wabu oyu mwaleka e Biblia iyathasyakanyirira kutsibu omwa bandu.

12. Abakulhu b’amadini mubabya n’amalengekaniaki oku Wycliffe n’omubiiri wiwe?

 12 Abakulhu b’amadini mubapona Wycliffe, embindulha yiwe ye Biblia, n’abandu biwe. Mubendererya aba Lollards n’erithoghothya esyo Biblia sya Wycliffe esyosi esya babana. Nomwakine indi Wycliffe abya iniabiriholha, abakulhu b’amadini abo mubabugha bathi ni nzighu y’Ekelezia. Mubathakulha amakuha wiwe, bamahisyagho, n’erighusa eribu ly’omwa lhusi Swift. Aliwe abandu bangyi babya banzire erisoma n’eriyitheghererya e Biblia, kandi abakulhu b’edini isibanga thoka eribakakirya. Emyaka mingyi eyakwamako, abandu b’omwa Yuropu n’omwa bindi bitsweka mubatsuka erihindulha n’erihulhukya e Biblia omwa mibughe eyo bandu banene bakayitheghereraya.

“OYUKAKUKANGIRIRAYA WUBANE ENDUNDI”

13. N’ikakasya lyahi erya thuwithe? Eki kikaghumaya kithi erikirirya lyethu?

13 Omulimu wa Nyamuhanga w’ahandikisaya e Biblia. Aliwe eki sikirimanyisaya kithi ku kyanabya kithya n’okwa mubiiri w’erihindulha e Biblia nge Septuagint, embindulha ya Wycliffe, e King James Version, kutse eyindi yosi-yosi. Aliwe, thukabya thukalhangira emibere syahulhukiramu, kikalhangirika ndeke-ndeke ngoku Ekinywe kya Yehova kyabirihangana ngoku analhagha. Eki kikaghumaya erikirirya lyethu ngoku ebindi ebyosi ebya Yehova abirilhagha bikendi syabererera.—Yosua 23:14.

14. Ebya thukigha omwa Biblia bikaleka bithi ithwongera erianza Nyamuhanga?

14 Thukabya thukaminya emibere eya Yehova athegherayamu Ekinywe kiwe, erikirirya lyethu likaghuma kandi ithwongera erimwanza. * (Lebaya omwatsi ahikwa.) Ni kyahi ekyaleka Yehova iniathuha e Biblia n’enyuma waho iniayilhagha eritheyayo? Kundi athwanzire kandi anzire erithukangirirya thughasirawe. (Soma Isaya 48:17, 18.) Eki kikaleka ithwamwanza n’erimwowa.—1 Yoane 4:19; 5:3.

15. Thukendi syakania okuki omo mwatsi owakakwamako?

15 Thwanzire kutsibu Ekinywe kya Nyamuhanga, neryo ibbwa thwanga kolhaki erithoka erighasirwa omw’iyeghesya e Biblia? Abathukabana omw’ithulira, thwanga bawathikya thuthi erianza e Biblia? Abakakangiriraya omwa kithunga banga kolhaki erilhangira bathi erikangirirya lyabu likaseghemera okwa Kinywe kya Nyamuhanga? Omo mwatsi owakakwamako thukendi syakania okwa bibulyo ebi.

^ enu. 4 Lebaya omwatsi “Mbwino Wutholere Iwigha Ekihebrania n’Ekigiriki?” omwa Watchtower eya Okwerikuminakughuma 1, 2009.

^ enu. 14 Lebaya akasanduko “ Yilhangirire!