Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomwenda 2017

“Ekinywe kya Nyamuhanga . . . Kinemukolha Omubiiri”

“Ekinywe kya Nyamuhanga . . . Kinemukolha Omubiiri”

“Ekinywe kya Nyamuhanga kiriho kandi kinemukolha omubiiri.”​—ABAEBRANIA 4:12.

ESYONYIMBO: 114, 113

1. Ni kyahi ekikaleka iwaligha ngoku Ekinywe kya Nyamuhanga kiwithe amaaka? (Lebaya ekisasani ekiri okw’itsuka.)

ABANDU ba Yehova bikirirye ndeke-ndeke ngoku ekinywe kiwe, omwatsi wiwe oko bandu, “kiriho kandi kinemukolha omubiiri.” (Abaebrania 4:12) Thwabirilhangira amaaka w’ekinywe kya Nyamuhanga akakolha omwa ngebe yethu n’omwa ngebe y’abandi. Omughulhu abandi babya bathe babya Bema ba Yehova, babya bibi, ibakakolesaya ebibatsi ebikathamiraya, n’abandi babya basingiri. Abandi babya bawithe ebitsumbi n’esyosente aliwe ibowa engebe yabu iyikinabulirweko. (Omugambuli 2:3-11) Ekikatsemesaya, abangyi abathabya bawithe amaha n’eriyowa ngabaherire, hathya bawithe amaha n’ekighendererwa omwa ngebe. Thwabiritsemera erisoma ebyalholirweko ebikabera eryasira omwa Kaleberyo omwa kitsweka “E Biblia Yikahindulha Esyongebe.” Kandi abandu nomubangabya ibabiribya Bakristayo, batholere ibalholha embere erighumya obughuma bwabu na Yehova Nyamuhanga omw’ikolesya Ekinywe kiwe e Biblia.

2. Amaaka w’Ekinywe kya Nyamuhanga mwahamba athi okwa bandu ab’omwa kighonye ky’erimbere?

 2 Abandu erikolha esyombinduka esikalha-kalire busana n’eriminya ekwenene, sikiri swekaya. Baghalha bethu na bali bethu ab’omwa kighonye ky’erimbere ababya bawithe amaha w’erighenda elhubulha nabu mubakolha esyombinduka. (Soma 1 Abanya Korinto 6:9-11.) Paulo abere akakania okwa bathendi syasangira omo Bwami bwa Nyamuhanga, mwongerako athi: ‘Abandi omwa kathi-kathi kenyu ko mwanabya muthya.’ Ekinywe kya Nyamuhanga n’omulimu wiwe abuyirire mubyawathikya abandu abo erikolha esyombinduka. Aliwe n’enyuma w’eribya Bakristayo, abandi mubakolha ebisobyo ebikalire ebyahamba okwa bughuma bwabu na Yehova. Ng’eky’erileberyako, e Biblia yikakanaya oku mughalha wethu omuhakabibwa oyuwahighithawa. Enyuma waho, mwakolha esyombinduka nuku athasyasuba omwa kithunga. (1 Abanya Korinto 5:1-5; 2 Abanya Korinto 2:5-8) Kikatsemesaya erilhangira baghalha bethu na bali bethu eribya ibabirikolha esyombinduka nyingyi busana n’amaaka w’Ekinywe kya Nyamuhanga.

3. Omo mwatsi ono thukendi kania okuki?

3 Ekinywe kya Nyamuhanga kiwithe amaaka manene. Kundi Yehova abirithuhakyo, thwanzire ithwakikolesya ndeke. (2 Timoteo 2: 15) Omo mwatsi ono thukendi kania okwa bya thwanga kolha erikolesya amaaka we Biblia (1) omwa ngebe yethu, (2) omw’ithulira, na (3) thukakangirirya omwa kithunga. Ebya thukend’igha bikendi thuwathikya erianza n’erisima Thatha wethu w’elhubulha, oyukathukangiriraya thughasirawe.—Isaya 48:17.

OMWA NGEBE YETHU

4. (a) Thutholere ithwakolhaki nuku Ekinywe kya Nyamuhanga kithuhambeko? (b) Wukakolha wuthi eribana endambi y’erisoma e Biblia?

4 Amaaka w’Ekinywe kya Nyamuhanga erithuhambako ndeke, thutholere ithwakisoma mughulhu wosi. Thutholere ithwalengaho erikisoma buli kiro. (Yosua 1:8) Abangyi omw’ithwe thuwithe emisurusutho mingyi, aliwe sithutholere thukalighira ekindu kyosi-kyosi imwamune n’esyonzunzo syethu, bikathukakirya erisoma e Biblia. (Soma Abanya Efeso 5:15, 16.) Thwangana bana endambi omwa ngyakya-ngyakya, omw’ithungyi, kutse omwa kiro. Thukalighirana n’omwimbi w’esyonyimbo oyuwahandika athi: “Nyanzire emighambo yawu! Ngaghanirayayo omo musibo wosi.”—Esyonyimbo 119:97.

Sithutholere thukalighira ekindu kyosi-kyosi imwamune n’esyonzunzo syethu, bikathukakirya erisoma e Biblia

5, 6. (a) Busana naki thutholere ithwaghanirya? (b) Thwanga ghanirya thuthi ndeke? (c) Erisoma n’erighanirya okwa Biblia kyabirikuwathikya kithi?

5 Aliwe, erikwama kya soma e Biblia lisa sikirighunza. Thutholere ithwaghanirya, kutse erilengekania kutsibu okwa bya thwabirisoma. (Esyonyimbo 1:1-3) Neryo ithukendi thoka erighendera okwa menge we Biblia omwa ngebe yethu. Mbulha thukasoma e Biblia eyiri okwa mbapura kutse okwa tabbuleti, thwanzire erilighira Ekinywe kya Nyamuhanga erithuhindulha n’erithuhira mw’omuhwa.

6 Thwanga ghanirya thuthi ndeke? Thukasoma  e Biblia, thutholere ithwahuna hake n’eriyibulya: ‘Omwatsi oyu akanyeghesayaki oku Yehova? Omwatsi oyu ngane mukolesyagho indi omwa ngebe yaghe? Ni mbinduka syahi esyo ngakinayithagha erikolha?’ Thukabya thukaghanirya okwa Kinywe kya Nyamuhanga n’erisaba busana n’ebya thwabirisoma, ithukendianza erikighenderako. Neryo ithwangana yilhangirira amaaka we Biblia omwa ngebe syethu.—2 Abanya Korinto 10:4, 5.

OMW’ITHULIRA

7. Thwanga kolesya thuthi ndeke Ekinywe kya Nyamuhanga omw’ithulira?

7 Ni kikulhu ithwe erikolesya Ekinywe kya Nyamuhanga mughulhu wosi thukathulira n’erikangirirya. Mughalha wethu mwabugha athi, “Wulyathulira na Yehova nyumba okwa nyumba, iwune mwendi yighangira omukania kutse iwukendi bugha wuthi nayu akanaye?” Thukabya thukasomera omundu ye Biblia, thukabya ithukalighira Yehova erikania nayu. Erisako eritholere liwithe amaaka kwilhaba ekyosi-kyosi ekya wangabugha. (1 Abanya Tesalonika 2:13) Wukabya wukathulira, wukana lengaho erisomera abandu be Biblia?

Thukabya thukasomera omundu ye Biblia, thukabya ithukalighira Yehova erikania nayu

8. Busana naki sikirighunza erikwama kya somera omundu y’erisako lisa omw’ithulira?

8 Aliriryo, sikirighunza erikwama kya somera omundu ye Biblia. Abandu bangyi sibali yitheghereraya ndeke ebiri omwa Biblia. N’omwa kighonye ky’erimbere kubyanabya bithya ngoku bine na munabwire. (Abanya Roma 10:2) Isithwalengekanaya thuthi omwinye nyumba akend’ilhua iniayitheghererya erisako. Thwangana muwathikya omw’isubirira omwa binywe ebikihayo enzumwa ngulhu eyiri omw’isako n’erimusoborera nga bikamanyisayaki. Omwa nzira eyi, Ekinywe kya Nyamuhanga ikyangana hika okwa malengekania n’omuthima w’abandu.—Soma Luka 24:32.

9. Thwanga wathikya thuthi abandu erisikya e Biblia omwa bya thukabugha thuthe thwasoma erisako? Iha eky’erileberyako.

9 Ebya thukatsuka eribugha thuthe thwasoma erisako byangana wathikya omwinye nyumba erisikya e Biblia. Ng’eky’erileberyako, ithwangana bugha thuthi, “Thuthalebya ekya Muhangiki wethu akabugha oko mwatsi oyu.” Kutse thwamabya ithukakanaya n’oyuthe Mukristayo, ithwangana bugha thuthi, “Thulebaye ekya Masako Abuyirire akabugha.” Thwamabana omundu oyuthatsomene eby’edini, ithwangana bugha thuthi, “Wune wathowa ekya bughawa kera kino?” Thwamabya ithun’ibukire ngoku obuli mundu awithe eby’ikirirye, ithukendi kolha ekyosi-kyosi erilhangira thuthi ebya thukatsuka nabyo bikatsemesaya.—1 Abanya Korinto 9:22, 23.

10. (a) Ni kyahi ekya mughalha wethu alholhako? (b) Wabirilhangira wuthi amaaka w’Ekinywe kya Nyamuhanga omw’ithulira?

10 Abangyi babirikilhangira ngoku erikolesya Ekinywe kya Nyamuhanga kyangana thunga amaaka okwa bandu abo bakathulira. Ng’eky’erileberyako, mughalha wethu mwabungira omusyakulhu oyuwabya  iniabirisoma esyogazeti syethu habw’emyaka mingyi. Kiro kighuma, omwakanya ka mughalha wethu erimuha Akaleberyo akahyaka, mughalha wethu mwathwamu erimusomera erisako. Mwasoma 2 Abanya Korinto 1:3, 4, ahakabugha hathi: “Thatha w’erighanyira na Nyamuhanga w’erikirania lyosi . . . yukathukiranaya omwa malighe wethu wosi.” Ebinywe ebi mubyahamba kutsibu oko musyakulhu neryo mwabugha athi mughalha wethu athasyabisubamu. Neryo omusyakulhu mwabugha athi iyo na mukali wiwe bakayithagha erihumulikanibwa. Busana n’erisako eri, omusyakulhu mwanza eriminya bingyi ebihambire okwa Biblia. Ni kikulhu erikolesya Ekinywe kya Nyamuhanga omw’ithulira!—Emibiri 19:20.  

WUKAKANGIRIRYA OMWA KITHUNGA

11. Baghalha bethu abakakangiriraya omwa kithunga bawithe lhukwamirwaki?

11 Thukatsema erihindana okwa mihindano yethu emike-mike n’eminene-minene. Enzumwa ngulhu eyikaleka ithwahindana ly’eriramya Nyamuhanga wethu Yehova. Kandi thukaghasirawa omwa bya thukigha. Busana n’ekyo, baghalha bethu abakakangiriraya omwa kithunga bawithe olhusunzo lhunene n’olhukwamirwa olhulithohire. (Yakobo 3:1) Batholere ibalhangira bathi erikangirirya lyabu litholere likaseghemera okwa Kinywe kya Nyamuhanga. Wamabya iwunawithe olhusunzo olhu, wanga kolesya wuthi amaaka we Biblia erihika okwa mithima y’abahulikiriri bawu?

12. Embuyi yanga kolhaki erilhangira yithi omukania akaseghemera okwa Masako?

 12 Amasako w’atholere iniabya musingyi mukulhu omwa mukania wosi-wosi. (Yoane 7:16) Neryo kwesi, wutholere iwalhangira wuthi emibere wukalhabiraya mw’omukania n’ebyalholirweko kutse eby’erilhangirirako si byo bandu bakahweraya kw’amalengekania kwilhaba e Biblia. Kandi ambi iwibuka ngoku erisomera abandu b’erisako omwa Biblia sikyingene n’eribakangirirya ebiri omwa Biblia. Erithwalira haghuma, wamasoma amasako manene, abangyi sibang’ibukagho. Busana n’ekyo wutholere iwasombolha ndeke amasako agho wukendi kolesya. Lhangira wuthi wukasoma erisako, wukalisoborera, wukahiraho eky’erilhangirirako, n’erikangania ngoku lyanga ghenderwako. (Nehemia 8:8) Omukania wawu amabya iniali okwa lhupapura, lhangira wuthi wukighagho ndeke n’amasako awalimu. Lebaya amasako n’omukania nga bihambangene bithi. Neryo kolesaya amasako ayo er’ihayo esyonzumwa esiri omwa mukania. (Wangana bana amenge omw’isomo lya 21 erihika 23 omwa kitabu Benefit From Theocratic Ministry School Education.) Ekikulhu kutsibu, saba Yehova akuwathikaye eribana amenge wiwe aw’obughuli omwa Biblia.—Soma Ezera 7:10; Emisyo 3:13, 14.

13. (a) Erisako erya mwali wethu owa okwa muhindano mulyamuhambako lithi? (b) Ngoku e Biblia yikakolesibawa okwa mihindano kyabirikuhambako kithi?

13 Mwali wethu mughuma e Australia  mwabana bitsibu bingyi omwa bulere bwiwe. Nomwakine indi enyuma waho mwaminya Yehova, abya iniakinathika-thika Yehova ng’anamwanzire. Okwa mihindano, mwali wethu oyu mwowa erisako erya muhambako kutsibu. Mwalighaniryako n’erisekulya, ekyo mukyaleka iniasoma awandi masako omwa Biblia. Mwaligha ngoku Yehova amwanzire. * (Lebaya omwatsi ahikwa.) Wune wathowa erisako okwa mihindano, emike-mike n’eminene-minene erya kuhambako kutsibu?—Nehemia 8:12.

14. Thwanga kangania thuthi ku thukasima n’erianza Ekinywe kya Yehova?

14 Mbwino sithuli sima Yehova busana n’Ekinywe kiwe e Biblia? Mwayilhagha athi kikendi syabyaho kera na kera kandi abiriberererya eriyilhagha liwe. (1 Petero 1:24, 25) Neryo thukendi lhangira thuthi thukasoma e Biblia mughulhu wosi, erikolesyayo omwa ngebe yethu, n’erikolesyayo eriwathikya abandi. Thukabya thukakolha eki, thukakanganaya ku thwanzire ekindu ky’omughaso munene eki, na kwilhabirirya Yehova Nyamuhanga, Omwinyekyo.

^ enu. 13 Lebaya akasanduko “ Ekyahindulha Amalengekania.”