Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomusanju 2017

Erisondekania Obughuda Obw’Okwenene

Erisondekania Obughuda Obw’Okwenene

“Muyire abira busana nenyu omo bindu bithathunganene.”​—LUKA 16:9.

ESYONYIMBO: 32, 154

1, 2. Busana naki omughulhu owathulimu ono sihangabya hathe abanakwa?

MUNABWIRE, eby’esyosente bikalire kandi simuli bulingirirania. Ng’eky’erileberyako, hathya kikalire okwa balere bangyi eribana emibiiri. Abandi bakanatsama esyongebe syabu, ibaghenda omwa bihugho ebiwithe esyosente. Kandi nibya n’omwa bihugho ebigaga mun’oswire abanakwa kutse abera. Omwa kihugho kyosi, abagaga banemuyongera eribya bagaga n’abanakwa bakayongera eribya banakwa. Erikwamana n’embaririra nguma eya lino-lino, obuthuku bukendi hika abagaga bake buyira ibathunga esyosente singaha n’esy’abandu abosi omwa kihugho kyosi. Abandi banawithe esyosente esyobangana ghunza emyaka-n’emyaka ibanemulyako, aliwe abandi bandu bangyi ni banakwa kutsibu. Yesu abya inianasi ekyo akabugha athi: “Muli n’abera ebiro byosi.” (Mariko 14:7) Busana naki hali obuthe-bulingirirania obu?

2 Yesu abya inianasi ngoku Obwami bwa Nyamuhanga busa bw’obwanga hindulha eby’esuburu y’ekihugho kino. E Biblia yikakanganaya ngoku “abathundi,” kutse eby’ekisubure, eby’ekipolitiki n’eby’amadini, ni by’ekihugho ekithaberweko na Sitani. (Eribisulirwa 18:3) Abandu ba Nyamuhanga bakathoka eriyihighulha ndeke okwa politiki n’amadini w’amabehi. Aliwe  abaghombe ba Nyamuhanga bangyi sibanga yihighulira ighuma okwa by’esuburu y’omwa kihugho kya Sitani.

3. Ni bibulyo byahi ebya thukendi kaniako?

3 Ithwe ng’Abakristayo, thutholere ithwayilebya ndeke nga thuwithe malengekaniaki okwa by’ekisubure by’ekihugho kino. Ithwangana yibulya: ‘Nangakolesya indi ebindu byaghe by’ekinyamubiri erikangania ku ngali muthaleghulha oku Nyamuhanga? Nangayitheya indi okw’iyingirya kutsibu omwa by’ekisubure by’ekihugho kino? Ni byalholirweko byahi ebikakanganaya ngoku abandu ba Nyamuhanga bamuyikethere kutsibu?’

OMUSYO W’OMUTHEYA MUBI

4, 5. (a) Ni kyahi ekyahika okwa mutheya oyukanibweko omwa musyo wa Yesu? (b) Yesu mwabugha athi abigha biwe bakoleki?

4 Soma Luka 16:1-9. Omusyo wa Yesu ow’omutheya mubi atholere inialeka ithwath’imana hake n’erighanirya. Omutheya mwatsongerwa oko mukama wiwe ngoku akasatha omwa bindu bya mukama wiwe, neryo mwathwamu erimubinga. * (Lebaya omwatsi ahikwa.) Aliwe omutheya mwakolesya “amenge.” Abere athali alhua okwa mubiiri, mwanywana abandu abanga muwathikya omwa buthuku bw’embere. Yesu eriha omusyo oyu syamanyisaya athi anzire abigha biwe ibakolha omwa nzira eyithatholere erithoka eribyaho. Abandu b’ekihugho kino ibo ekyo kyo bakakolha. Aliwe, Yesu akolesaya omusyo oyo eryeghesya erisomo likulhu kutsibu.

5 Ngoku omutheya anayisanga iniamabiringira omwa mibere eyikalire, Yesu abya inianasi ngoku n’abangyi b’okwa bigha biwe engebe yikendi syabakalira omwa kihugho ekithe mw’obulingirirania kino. Neryo mwababwira athi: “Muyire abira busana nenyu omwa bindu bithathunganene.” Busana naki? Nuku ekiro ebindu ebyo byasyahwa, abanywani abo, ni bugha ambu Yehova na Yesu, ibabakokya “omwa manyumba w’erikotheramo.” Erihano lya Yesu eri lyanga thweghesayaki?

6. Thukaminya thuthi ngoku eby’ekisubure by’ekihugho kino sibyabya omwa ndegheka ya Nyamuhanga?

6 Nomwakine indi Yesu mwathabugha ekyamaleka iniahulha ebindu by’ekinyamubiri mwa bindu “ebithathunganene,” e Biblia yikakanganaya ngoku eky’eryanza erisondekania esyosente nyingyi omwa bindu sikyabya omwa ndegheka ya Nyamuhanga. Ng’eky’erileberyako, omwa Edeni, Yehova mwaha Adamu na Eva bo bingyi kwilhaba n’ebyo bakayithagha. (Enzuko 2:15, 16) Enyuma w’aho, Nyamuhanga abere aha abahakabibwa biwe b’omulimu abuyirire, “sihali oyuwabugha athi ebindu biwe ni biwe iyuwene, nikwa mubasangira ebyosi.” (Emibiri 4:32) Omuminyereri Isaya mwabugha athi obuthuku bukendi syahika abandu abosi ibabya n’obwiranda bw’eriyitsemesya omwa kyosi-kyosi ekya kithaka kikahulhukaya. (Isaya 25:6-9; 65:21, 22) Banalindirire obuthuku obo, abigha ba Yesu bakayithagha eribya “n’amenge.” Batholere ibasondekania ebiyithawa by’engebe omw’ikolesya ebindu ebithathunganene by’ekihugho kino, kandi ibanemulengaho n’eritsemesya Nyamuhanga.

ERIKOLESYA NDEKE EBINDU EBITHATHUNGANENE

7. Ni habulha lyahi erya Yesu akaha omu Luka 16:10-13?

7 Soma Luka 16:10-13. Omutheya oyuli omwa musyo wa Yesu mwayikolera abanywani abanga muwathikya iyo ng’omundu. Aliwe,  Yesu anza abigha biwe bayire abanywani omwa lhubulha butsira busana n’eriyighasira ibobene. Anza thuminye ngoku emibere thukakoleserayamu ebindu byethu yangana kangania nga thune batheleghulha oku Yehova kutse eyihi. Ekyo thwanga kikolha thuthi?

8, 9. Thaha eby’erileberyako ngoku balikyethu banemukangania obuthaleghulha omw’ikolesya ebindu ebithathunganene.

8 Enguma y’okwa syonzira esy’erikanganiryamu obuthaleghulha bwethu ly’erihayo okwa bindu byethu by’ekinyamubiri erisighika omubiiri w’erithulha engulhu omwa kihugho kyosi ogho Yesu akanayako. (Matayo 24:14.) Omusika mulere e India mwabya akabika ebinusu omwa kasanduku. Busana n’ekyo, mwaleka n’eribya akaghulha ehidole. Akasanduku kabere k’usulha, mwahayo esyosente syosi esyabyamu erisighika omubiiri w’erithulira. Mughalha wethu e India awithe eririma ly’ebighuma by’esyokokonati. Mwahayo esyokokonati nyingyi kutsibu okwa ofisi y’abahinduli eye Malayalam. Kundi e ofisi eyi yikayithagha ebighuma ebi, mwayowa iniamakolha ekilengire, omwakanya k’erihayo esyosente. Ayo ni “menge.” Na balikyethu e Greece bakabya ibane muhererya e Beteli y’amaghutha w’emizeituni, echizi, n’ebindi byalya.

9 Owundi mughalha wethu e Sri Lanka abirihayo enyumba yiwe nene eribya mukakolerwa emihindano, emike-mike n’eminene-minene, n’abandi balikyethu abali omwa mubiiri w’omughulhu wosi ban’ikeremu. Mughalha wethu oyu mwayilhusya kw’ekindu ekyangana mw’ingirirya esyosente, aliwe kyabiriwathikya balikyethu bangyi. Omwa bihugho eyo mubiiri wethu aghanirwe, balikyethu bakahayo amanyumba wabu erikolerwa mw’emihindano. Ekyo kikaleka abatemburi n’abandi balikyethu ibabana ah’erihindanira isibathapangisya.

Abandu ba Nyamuhanga bakakolesya ebindu byabu eriwathikya abandi

10. Thukaghasirawa thuthi thwamabya benge?

10 Eby’erileberyako ng’ebyo bikakanganaya ngoku abandu ba Nyamuhanga ni bathaleghulha n’omo “myatsi mike-mike.” (Luka 16:10) Bakakolesaya ebindu byabu omw’iwathikya abandi. Abanywani ba Yehova abo bakayowa bathi busana n’erihayo lyabu eryo? Kikabatsemesaya bakaminya ngoku erihayo lyabu eryo likaleka ibathunga eby’obughuda eby’okwenene elhubulha. (Luka 16:11) Mwali wethu mughuma oyukahayo mughulhu wosi esyosente erisighika omubiiri w’Obwami akabugha athi busana n’erikolha ekyo, hane ekikaswekaya eky’abirimubyako omwa ngebe. Akasoborera athi: “Iningabya ng’ongera erihayo eby’ekinyamubiri, ining’owa omuthima waghe iniayongera eryanza balikyethu. Hathya ngayowa ingawithe omuthima w’erighanyira, erighumisirizya abandi, n’eriligha erihabulhwa n’eribya mwolho namakolhwa nabi.” N’abandi bangyi babirilhangira ngoku bakaghasirawa busana n’eribya benge.​—Esyonyimbo 112:5; Emisyo 22:9.

11. (a) Erihithya lyethu likakanganaya lithi “amenge”? (b) Ni kyahi ekinemubya omwa bandu ba Nyamuhanga munabwire? (Lebaya ekisasani ekiri okw’itsuka.)

11 Kandi thukabya ithwamakangya “amenge”  thukakolesya ebindu byethu by’ekinyamubiri eriwathikya abandi abathukathulira. Neryo kwesi nomuthwangabya isithwanga thoka eryingira omwa mubiiri w’omughulhu wosi, kutse eriyathulira eyiri obuyithawa, ithwangana wathikya abandi. (Emisyo 19:17) Ng’eky’erileberyako, esyosente esyathukahayo sikawathikaya omw’ihikya ebitabu by’okwa bandu n’erisighika omubiiri w’erithulira omwa myanya eyiri mw’obunakwa bunene kandi iyine abandu bangyi banemwasa omwa kwenene. Omwa bihugho nge Congo, Madagascar, ne Rwanda, e Biblia yikaghulha sente nene kutsibu. E Biblia nguma iyangana ghulha singaha n’omusara w’omundu ow’okwezi kutse ow’eyenga. Habw’emyaka mingyi, balikyethu ibakanayisanga ibatholere erithwamu nga baghulire eka yabu y’ebyalya kutse nga baghule e Biblia. Neryo busana n’ebyathukahayo, hakabya “eriringirirania,” ekithunga kya Yehova ikyathoka erihindulha esyo Biblia n’erisighabira balikyethu, ab’omwa maka wabu n’abigha be Biblia okwa bbule. (Soma 2 Abanya Korinto 8:13-15.) Neryo erighunzerera, abakahayo n’abakahebawa, abosi ibabya banywani ba Yehova.

THWANGA YITHEYA THUTHI OKW’IYIHWERYA OMWA BY’ESUBURU Y’EKIHUGHO KINO?

12. Abrahamu mwakangania athi kw’ayikethere Nyamuhanga?

12 Kikakamathaya obughuma bwethu na Yehova thwamathendi yingirya kutsibu omwa by’esuburu y’ekihugho kino, n’erithwamu erisondya obughuda bw’okwenene. Ekyo kyo muthaleghulha Abrahamu akolha. Mwaghondera Yehova amaligha erisighania omuyi w’obugaga owe Uri, amay’ikalha omwa mahema kundi abya anzire eribya munywani wa Yehova. (Abaebrania 11:8-10) Omwa ngebe yiwe iniakayikethera Yehova butsira ebindu. (Enzuko 14:22, 23) Yesu iniakahira n’omwa bandi mw’omuhwa w’eribya n’erikirirya eriri ng’eryo. Mwanabwira omulhume omughuda athi: “Wamanza erihikana ndeke, wughende, wuhulhaye ebindu bawu, wuhebyo oko bera, nawu wasyabya n’ebindu elhubulha; kandi wase wunyikwame.” (Matayo 19:21) Omulhume oyo syabya n’erikirirya ng’erya Abrahamu. Aliwe habya ihane abandi bandu ababya bayikethere Nyamuhanga.

13. (a) Paulo mwahabulha Timoteo athiki? (b) Nethu munabwire thwanga kolesya thuthi erihabulha lya Paulo?

13 Timoteo abya mulhume w’erikirirya. Omukwenda Paulo abere abiribwira Timoteo athi ni mulhwana mubuya “omusirikali mubuya wa Kristo Yesu,” mwathasya mubwira athi: “Omusirikali oyukakolha omubiiri inianzire eritsemesya omukama wiwe, syaliyighobaya omo myatsi y’abandi bandu [eby’obusubure].” (2 Timoteo 2:3, 4) Abakwamire Yesu munabwire, imwamuli balikyethu abali omwa mubiiri w’omughulhu wosi abalhabire omu muliyoni mughuma, banemughendera okw’ihabulha lya Paulo eryo. Sibali ligha erithebibwa omwa by’erithererera ly’erighulya n’erighulha ery’ekihugho ky’omururu kino. Bakabya iban’ibukire omusingyi ono: “Omuyibweki ni mughombe w’oyukamubweka.” (Emisyo 22:7) Sitani anzire ithwakolesya obuthuku bwethu obwosi n’akaghalha kethu kosi omw’isondya esyosente  omwa kihugho kiwe. Omundu akanasaba eloni kutse eriyibweka esyosente nene kutsibu akanza erighulha ng’ekibanza, ematoka, erithuha esente sy’esukuru, kutse nibya esy’erikolha mw’obugheni. Thwama thendi yitheya, ithwangana yisanga ithune omwa mabanza habw’emyaka n’emyaka. Thutholere ithwakangania amenge omw’olhobya engebe, eriyitheya okw’ibya mw’amabanza, kandi ambi ithwakolesya sente nyike-nyike. Erikolha ekyo irikendi leka ikyathwolhobera erikolera Nyamuhanga omwakanya k’eribya bakobe b’esuburu y’ekihugho kya Sitani kino.​—1 Timoteo 6:10.

14. Thutholere ithwathwamu erikolhaki? Thaha eby’erileberyako.

14 Erithoka eryolhobya engebe, thutholere ithwahira Obwami bwa Nyamuhanga bw’embere. Mughalha wethu mughuma na mukali wiwe babya bawithe e bizinesi nene eyikaghoba kutsibu. Aliwe mubanza erisuba omwa mubiiri w’omughulhu wosi. Neryo mubathwamu erighulya ebizinesi yabu eyo, eryathu lyabu, n’ebindi bindu. Neryo mubayawathikya omwa buhimbe bw’ekyaghanda kyethu ekikulhu hathya ekiri e Warwick, omwa New York. Obo bwabya buthuku bw’embaghane okw’ibo kundi mukyaleka ibakolera okwa Beteli ikune omwana wabu na mwira wiwe, haghuma n’ababuthi ba mughalha wethu kundi nabu mubasawathikya okwa buhimbe bwe Warwick ahabw’esyoyenga ndebe. Mwali wethu, ini mutemburi e Colorado, U.S.A., iyo mwabana omubiiri w’erikolha biro birebe omwa bbanka. Mubanza emikolere yiwe mibuya, bamabugha bathi abye akakolha buli kiro n’eribugha bathi bakendyongera n’omusara wiwe kasathu. Aliwe kundi omubiiri oyo abya isyendi muthokesya erikolha ndeke omubiiri w’erithulira, mwaghanagho. Ebyo ni by’erileberyako bike buyira eby’eriyiferezya eryo balikyethu bangyi babirikolha. Thukabya thukathwamu erihira eby’Obwami by’embere, kikakanganaya ngoku ekirengire ebindu by’omubiri bw’obunywani bwethu na Nyamuhanga n’obugaga bw’obunyakirimu.

EBINDU BY’OMUBIRI BIKENDISYABYA BYAHWA

15. Ni bughuda bwahi obukaletha etseme y’okwenene?

15 Erithunga eby’obughuda sikirimanyisaya kithi buthekwa-buthekwa ni tsumulha lya ​—Yehova. Yehova akatsumulha “abatheke omo mikolere eyuwene.” (Soma 1 Timoteo 6:17-19.) Ng’eky’erileberyako, mwali wethu oyukahulhawa mwa Lucia mwaminya ngoku e Albania * yabiribya obuyithawa bw’abathuliri. (Lebaya omwatsi ahikwa.) Neryo mwalhua e Italy omwa 1993, amaghendayo. Syabya awithe mubiiri, aliwe mwayikethera ngoku Yehova akendi mutsumulha. Mwigha omubughe we Albania, kandi abiriwathikya bandu 60 eriyihayo oku Yehova. Sibugha ambu ithwe bosi ekyo ky’ekyanganabya eya thukathulira. Aliwe ekyosi-kyosi ekya thwanga kolha omw’iwathikya abandi erigha oku Yehova n’eribya banywani biwe ikikendi syabya ekithendi syalhua okwa muthima kera na kera.​—Matayo 6:20.

Ebya thukakolera Yehova n’Obwami bwiwe byo bikendi syathuha etseme y’okwenene

16. (a) Eby’esyosente eby’ekihugho kino bikendibya bithi? (b) Ekyo kitholere ikyaleka ithwabya na malengekaniaki okwa bindu by’ekihugho?

16 Yesu mwakangania ndeke-ndeke ngoku eby’emyatsi y’esyosente eby’ekihugho kino bikendi syahwa. Yesu mwabugha athi omughulhu ebindu by’obughuda byasyahwa, butsira ng’oyukathika-thika athi byamasyahwa. (Luka 16:9) Ng’omwa biro by’enyuma-nyuma  bino, hane esyobbanka esyabirikinga, n’ebindi bihugho byabiribana ebitsibu omwa by’esyosente. Kandi ibbwa aha mbere aha, bikayatsandira ighuma. Eby’ekipolitiki, amadini, n’eby’ekisubure, ebyosi ebyo, omwa kihugho kya Sitani kino bikayahwa. Abaminyereri Ezekieli na Zefania mubalhaghulha bathi ehoro n’efeza, ebindu ebikakolesibawa kutsibu munabwire omwa myatsi y’esyosente nene-nene, bikendi syabya bindu buyira. (Ezekieli 7:19; Zefania 1:18) Wangayowa wuthi iwuli okw’ighunzerera ly’engebe yawu okwa kihugho, aliwe erikebera enyuma iwalhangira imuwakwamirira obughuda bw’ekihugho wamagheghena obughuda bw’obunyakirimu? Ithwangana yowa ng’omundu oyuwabirikolha esyosente nyingyi omwa ngebe yiwe yosi, aliwe akayalebya ah’akasibika kwesi esyosi ini bikwangara. (Emisyo 18:11) Ebindu by’ekihugho kino bikendihwa. Neryo kwesi isiwaheraya akaghisa ak’erikolesya ebindu byawu eriyira abanywani elhubulha. Ebya thukakolera Yehova n’Obwami bwiwe by’ebyanga leka ithwabya n’etseme y’okwenene.

17, 18. Abanywani ba Nyamuhanga balindirireki?

17 Obwami bwa Nyamuhanga bukendi syabya bwabiryasa, sihendi syabya eripangisya manyumba kutse erisaba eloni kutse eriyibweka. Ebyalya bikendi syabya bya busa kandi bingyi, kandi sihendi syabya kiyithawa ky’erithuha abadokita kutse erighulha emibatsi. Banywani ba Yehova bakendi syabana ebibuya ebya kithaka kikahulhukaya. Ehoro, efeza, n’awandi mabwe w’obughuli akendi syakolesibwa busana n’obubuya bwaghu butsira erikolha abandi mo baghuda oko bandi. Emithi eyuwene kutsibu, amabwe n’ebyuma bikendi syakolesibwa erihimba amanyumba awuwene. Banywani bethu bakendi syathuwathikya kundi ku banzire, butsira indi kundi thukendi bathuha. Omwa bulingirirania, ithwe bosi thukendi syaghasirwa omwa ebya kithaka kikahulhukaya.

18 Aka ni katahu buyira k’okwa lhuhembo lhw’obughuli olhukendi syahebwa abakayikolera obunywani elhubulha. Abaramya ba Yehova okwa kihugho bakendisya yisyandira n’obutseme bak’owa Yesu akabugha athi: “Mwase, inywe Thatha waghe abiritsumulha, mwimaye Obwami obwa kokothibawa busana nenyu okw’ihangika ly’ekihugho.”​—Matayo 25:34.

^ enu. 4 Yesu mwathakangania omutheya oyu ng’ahangirirawa kutse eyihi. Omo kwenene ekinywe “mubamubwira” ekiri omwa Luka 16:1 kyangana manyisya kithi omundu mulebe mwabugha amabehi okwa mutheya ambu akatsandaya ebindu bya mukama wiwe. Aliwe Yesu iyo, akahira omuwatho w’okwa ky’omutheya oyu athwamu erikolha, butsira okwa ekyaleka inialhusibwa kw’omubiiri.

^ enu. 15 Omwatsi wa Lucia Moussanett mwasira omwa Awake! ey’Okwomukagha 22, 2003, olhupapura 18-22.