Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomusanju 2017

Erisingura Ekikarwanisaya Obulengekania Bwawu

Erisingura Ekikarwanisaya Obulengekania Bwawu

HANE enzighu eyikuli olhubi! Enzighu eyo ni Sitani, kandi akakolesaya ekirwanisyo ekikalire kutsibu. Ekirwanisyo ekyo kikolirwe kwilhabirirya erilhwa n’obulengekania bwawu, butsira omubiri wawu. Wunasi nga ni kihi? Y’epokopoko nyibi!

Omukwenda Paulo abya inianasi ngoku epokopoko nyibi ya Sitani ni y’akabi kutsibu. Aliwe abandi Bakristayo mubathalhangira obutsibu obo. Ng’eky’erileberyako, abandi omwa Korinto ibakalengekanaya bathi ibo erikirirya lyabu lighumire, Sitani syanga bathebya. (1 Abanya Korinto 10:12) Ekyo ky’ekyaleka Paulo iniakunga athi: ‘Ng’ubaha nyithi ngoku Eva anathebibawa n’amenge mabi w’enzoka, kw’amalengekania wenyu asyatsandibwa athya, imwaleka erikwama Kristo.’​—2 Abanya Korinto 11:3.

Ebinywe bya Paulo bikakanganaya ngoku ni kikulhu erithendi kwama kya yowa nga siwangawa. Erithoka erisingura epokopoko nyibi ya Sitani, thutholere ithwaminya ngoku ni y’akabi neryo ithwayitheya kuyo.

EPOKOPOKO NYIBI NI Y’AKABI YITHI?

Omwa mwatsi ono, epokopoko nyibi w’omwatsi w’amabehi ow’akathulhawa omw’ikighenderera busana n’eryanza erithebya abandu kutse eryanza eribahindulha kw’amalengekania. Erikwamana n’ekitabu Propaganda and Persuasion, epokopoko nyibi ni kindu “ekithatholere, kikatsandaya, si ky’obulingirirania.” Erisoborerayo abandi bakanakolesaya ebinywa nga bino; “amabehi, eritsulika omwatsi, erithebya, n’erisathira okwa bwongo bw’abandi.”

Epokopoko nyibi ni y’akabi kundi, omwa lyolho-lyolho yangana ghenda yikathuhindulha kw’amalengekania isithwasi. Ithwangana linganisyayo ng’omuka ow’akitha aliwe isiwanga lhangiragho kutse eryowa akabeha. Vance Packard, oyusomire eby’emibere y’abandu,  mwabugha athi epokopoko nyibi yangana bindulha emibere yethu “isithwasi n’ahake.” Owundi musomi mwabugha athi epokopoko nyibi yabirileka abandu bangyi ibakolha ebindu bibi kutsibu n’eby’obukiru, abandi ibahika n’okw’ithinda n’erighunzaho ekihanda kirebe ky’abandu, esyonyuhi, ikyaletha n’eriendereribwa busana n’akasolholho omwa rangyi n’omwa dini.​—Easily Led​A History of Propaganda.

Abandu-nya-bundu bamabya ibangana thoka erithuthebya omwa pokopoko yabu nyibi, kandi ibbwa Sitani? Abiriyitheghererya emibere y’abandu eritsuka aha bakathahangikirwa. N’ekindi, hathya yuthabere “ekihugho kyosi,” neryo angana kolesya ekihugho omwa nzira yosi-yosi erilhalhania amabehi wiwe. (1 Yoane 5:19; Yoane 8:44) Sitani “abiririba ameso w’obulengekania” bw’abandu bangyi omw’ikolesya epokopoko yiwe nyibi, indi lino “yukathebaya ekihugho kyosi.” (2 Abanya Korinto 4:4; Eribisulirwa 12:9) Wangana rwanisya wuthi epokopoko yiwe nyibi?

GHUMAYA ERIKIRIRYA LYAWU

Yesu mwathukangirirya athi hane enzira nyolho ey’erirwanisiryamu epokopoko nyibi: “Mwasyaminya ekwenene, n’omwatsi w’ekwenene asyabaha obwiranda.” (Yoane 8:31, 32) Omwa lhuhe, omusirikali atholere iniabya inianasi ahakalhua omwatsi w’okwenene, kundi enzighu yiwe nayu yikendibya iyinemuthuma omwatsi w’amabehi erimuthebya. Neryo nethu, ni hayi aha thwangabana omwatsi w’okwenene? Yehova abirithuha Ekinywe kiwe e Biblia. Omo mwamuli ebyosi ebyanga kuwathikya erirwanisya epokopoko nyibi ya Sitani.​—2 Timoteo 3:16, 17.

Ekyo, Sitani anakyasi. Akakolesaya ekihugho kiwe erithulengemerya n’erithulemesya erisoma n’eriyeghesya e Biblia. Isiwaligha erithebibwa “n’amenge wa Sitani”! (Abanya Efeso 6:11) Erithaminya emyatsi y’omusingyi omwa Biblia sikirighunza. Thutholere ithwayikasa erisekulya okwa myatsi y’ekwenene ey’omwakathi. (Abanya Efeso 3:18) Omuhandiki w’ebitabu, ya Noam Chomsky mwabugha athi, “Sihali oyukendihira ekwenene y’omwa bulengekania bwawu. Ni kindu ekya wutholere iwayironderya iwuwene-wene.” Neryo kwesi, ‘omw’isondya omwa Masako obuli kiro,’ yisonderaye ekwenene.​—Emibiri 17:11.

Erithoka erisingura epokopoko nyibi ya Sitani, thutholere ithwaminya ngoku ni y’akabi neryo ithwayitheya kuyo

Sitani syanzire wukakolesya amaaka wawu w’eritsuka erilengekania ndeke okwa bya wuk’owa. Wunasi ekikaleka? Kundi amathebo “ak’ingira ndeke” abandu “bamalemesibwa erilengekania ndeke oko mwatsi.” (Media and Society in the Twentieth Century) Neryo kwesi isiwakwama kyaligha ekindu isiwuthatsuka  erikirengekaniako ndeke. (Emisyo 14:15) Nyamuhanga mwakuha amaaka w’obulengekania n’eriminya, nuku wanga bikolesya erighumya erikirirya lyawu.​—Emisyo 2:10-15; Abanya Roma 12:1, 2.

SIGHALHA IWUNE BUGHUMA N’ABANDI

Abasirikali abakaligha epokopoko nyibi y’enzighu bakakwa obuba kandi ibasagha n’erilhwa. Ikyangana leka ibatsuka n’erirwanisya ab’okw’ibo kutse ibayisolholha okwa bandi. Omukulhu w’abasirikali mughuma e Germany akabugha athi epokopoko nyibi y’eyabya nguma okwa nzumwa esyaleka e Germany iyasingwa omwa Lhuhe lhw’Ekihugho Kyosi olhw’Erimbere. Mwabugha athi abandu mubahambwako kutsibu erihika okw’ibya nga sibakyasi n’ekiriho. Ekyo kya Sitani anemukolha na munabwire eritsandya obughuma bw’Abakristayo. Ng’eky’erileberyako, akalengaho eriletha erithendi yitheghererangania omwa balikyethu. Kutse akalengaho eribalhusya omwa kithunga kya Yehova omw’ibaletha mw’amalengekania indi sikiri mw’obulingirirania kutse bathi hali ekyo kyabikolha nabi.

Isiwathebibawa kisi! Iwe kwama obusondoli obuli omwa Kinywe kya Nyamuhanga n’erisighalha iwune bughuma na balikyethu. Ng’eky’erileberyako, e Biblia yikathuhira mw’omuhwa w’erighanyirana n’erighunzaho erithendi yitheghererangania omwa bya lhuba. (Abanya Kolosai 3:13, 14; Matayo 5:23, 24) Kandi yikathukunga okw’ithendi yisolholha okwa kithunga. (Emisyo 18:1) Lhangira wuthi wukarwanisaya epokopoko nyibi ya Sitani. Thayibulya, ‘Omughulhu mulikyethu anyihithanaya, munanayithwere omwa nzira eyikatsemesaya Nyamuhanga, kutse eyikatsemesaya Sitani?’​—Abanya Galatia 5:16-26; Abanya Efeso 2:2, 3.

SIWUHERAYE ERIYIKETHERA LYAWU

Omusirikali oyutheyikethera kamanda wiwe syalilhwa ndeke. Neryo esyonzighu sikalengaho erilhalhania epokopoko y’amabehi nuku abasirikali bahwe mw’eriyikethera abasondoli babu. Abasondoli abo bamakolha esobya ndebe, neryo esyonzighu sikendyanza sikolesaye ekyo n’eribugha sithi: “Simwamalebya, obo aba imwanabayikethera!” kandi sithi “Simuleke bakabaghusa omwa kabi!” Na Sitani ekyo ky’akanakolha. Akanza erithwa eriyikethera erya wuwithe omwa bandu abo Yehova akakolesaya erisondolha abandu biwe.

Aliwe wanga yitheya wuthi? Ithwamu erisighalha omwa kithunga kya Yehova. Lholha embere omw’ighondera n’erisighika abalhume abakasondolha abandu ba Nyamuhanga,  nomwakine indi abalhume aba sibahikene. (1 Abanya Tesalonika 5:12, 13) Obundi abayisamambulha okw’ikirirya n’abandi bathebya bangana kania-kania okwa kithunga. (Tito 1:10) Nomukyangabya indi ebya bakabugha bikabya nga ni kwenene, “Simusuka-sukanibawe omo malengekania wenyu.” (2 Abanya Tesalonika 2:2) Ghendera okw’ihabulha eryo Paulo aha Timoteo, athi: “Nikwa iwe, wukwamirire omo myatsi oyo mwakangiriribawa,” kandi wibuka “abakangirirya bawu nga babya bahi.” (2 Timoteo 3:14, 15) Ghaniraya okwa bingyi ebyangaleka iwayikethera omughombe oyutheleghulha oyo Yehova amabirikolesya hakuhi habw’emyaka kikumi inianemuthukangirirya ekwenene.​—Matayo 24:45-47; Abaebrania 13:7, 17.

LEKA ERIKWA OBUBA

Sitani angana kwasira n’omwa sindi nzira esinalhangirikire. Angan’anza erikubahisya. Eryubahisya ni “kighuma ky’okwa byabiribya omwa pokopoko nyibi eritsuka kera.” (Ekitabu Easily Led​A History of Propaganda) Omuprofesa owe Britain ya Philip M. Taylor, mwahandika athi Abaasuria, ibakakolesaya epokopoko eyiri mw’eryubahisya bakanza erithabalha ndeke okwa nzighu syabu. Sitani akendi kolesya omubere oyu, ng’erileka iwubaha abandu, erisagha eriendereribwa, n’erisagha olhuholho, nuku wuleke erikolera Yehova.​—Isaya 8:12; Yeremia 42:11; Abaebrania 2:15.

Isiwalighira Sitani erikukolha kw’ekyo! Yesu mwabugha athi: “Simubahe abak’itha omubiri n’enyuma w’aho isibawithe ebyo bangaswakolha.” (Luka 12:4) Wubye iwunayikethere ngoku Yehova akendi kutsomana ngoku anabiriyilhagha, iniakuha “obuthoki bunene” obulengethukire kutsibu n’erikuwathikya erirwanisya amathebo wa Sitani.​—2 Abanya Korinto 4:7-9; 1 Petero 3:14.

Ni kwenene hanganayira iwayowa omuhwa iniabirihwa kutse erikwa obuba. Aliwe ambi iwibuka ebinywe ebikahimba ebya Yehova abwira Yosua, athi: “Wubye n’amaaka, wuyisighe ndeke. Siwubahe kutse erihahukya omuthima, kusangwa Omwami Mukulhu Nyamuhanga wawu ali haghuma nawu ahosi wukaya.” (Yosua 1:9) Wamayowa ihali ekikakulyambaya, omwa bya lhuba, bwira Yehova omwa musabe okw’iyowa lyawu. Wutholere iwayikethera ngoku “obuholho bwa Nyamuhanga obulhabire amenge wosi bwasyatheya emithima yenyu n’amaghanirya wenyu.” Neryo iwukendi bana amaaka w’erirwanisya epokopoko nyibi ya Sitani.​—Abanya Filipi 4:6, 7, 13.

Wun’ibukire ebinywe by’amathebo eby’eryubahisya abandu ba Nyamuhanga ebya bughawa n’omuthumwa erilhua e Asuria, iya Rabsake? Anza balighe bathi sihali oyuwanga balhamya oku Asuria, nomwangabya Yehova. Neryo mwabugha athi Yehova yulyathuma Abaasuria erithoghothya e Yerusalemu. Yehova mwasubirya athiki? “Siwubahe ebinywe ebyo wukabiriowa, ebyo abaghombe b’omwami we Asuria balyanyitsuma.” (2 Abami 18:22-25; 19:6) Yehova mwathuma omulaika am’itha Abaasuria 185,000 omwa kiro!​—2 Abami 19:35.

WUBYE N’AMENGE​—MUGHULHU WOSI HULIKIRIRA YEHOVA

Wune wathalebya efilimu imune omundu oyukathebawa, aliwe isyasi? Iwangana bulha nga wumubirikireko wuthi: ‘Siwulighe! Bakakutheba!’ Neryo thalengekania, abamalaika ibanemukubwira bathi: “Kisi simuthebibawe omwa mathebo wa Sitani!”

Neryo kwesi, isithwahulikirira epokopoko ya Sitani. (Emisyo 26:24, 25) hulikirira Yehova kandi wumuyikethere omwa byosi wukakolha. (Emisyo 3:5-7) Akwanzire kandi akakusaba athi: “Mughalha waghe, wubye n’amenge n’eritsemesya omuthima waghe.” (Emisyo 27:11) Wamakolha ekyo, iwukendi singura ekikarwanisaya obulengekania bwawu!