Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomusanju 2017

Ambi Iniakuwathikya “Eriberererya Eriyisunza Lyawu Lyosi”

Ambi Iniakuwathikya “Eriberererya Eriyisunza Lyawu Lyosi”

“Wutsemere Omwami Mukulhu; nayu akendi syakuha ebyo muthima wawu anzire.”​—ESYONYIMBO 20:4.

ESYONYIMBO: 89, 140

1. Ni kyahi ekya balere batholere ibathwamu busana n’obuthuku bwabu bw’embere? Ni kyahi ekyanga bawathikya erithendyubaha? (Lebaya ekisasani ekiri okw’itsuka.)

ABALERE, munasi ndeke-ndeke ngoku wukabya wuthe watsuka olhughendo, ni ky’amenge eritsuka eriyitheghekera eya wukaya. Engebe yiri ng’olhughendo, n’obuthuku bw’eriyitheghekera olhughendo olho w’omughulhu wukine mulere. Ni kwenene kyanganabya isikyolho eriyitheghekera engebe y’embere. Omusika oyuk’ahulhawa mwa Heather mwabugha athi: “Ni kindu ekik’itha obuba. Kundi wukabya iwutholere iwathwamu nga wukendi kolha kyahi omwa ngebe yawu yosi.” Nawu wamabya ikwa wukayowa wuthya, ambi iwibuka ngoku Yehova akabugha athi: “Siwubahe, kusangwa indi Nyamuhanga wawu. Ngendi kuha amaaka, kwenene ngendi kuwathikya.”​—Isaya 41:10.

2. Ni kyahi ekikaleka iwaminya ngoku Yehova anzire iwabya n’engebe eyuwene?

2 Yehova akakuhira mw’omuhwa w’eritheghekera ndeke obuthuku bwawu bw’embere. (Omugambuli 12:1; Matayo 6:20) Anzire iwabya iwunatsemire. Eki kikalhangirika ndeke omughulhu  thukalhangira, eriowa, n’erisihirwa ebindu eby’abirihangika. Kandi Yehova akathutsomana n’omwa sindi nzira. Akathuha obusondoli obuwene kandi iniathukangirirya enzira eyuwene ey’engebe. Neryo omughulhu abandu bakaghana erihabulha liwe ly’amenge, syalitsema. Abatheghendera okwa busondoli bwiwe akababwira athya: “Mumwayisogha ebyo ndetsemera. . . . Lebaya! Abaghombe baghe basyatsema nikwa inywe mwasyahemuka. Lebaya abaghombe baghe basyutha obwogho bw’obutseme bw’omuthima.” (Isaya 65:12-14) Thukabya thwamathwamu ndeke omwa ngebe thukaha Yehova y’olhukengerwa.​—Emisyo 27:11.

ERITHEGHEKA ERIKENDI KULETHERA ETSEME

3. Yehova akakusunziraki?

3 Yehova akakusunziraki? Erithoka eribya iwunatsemire, wutholere iwaminya Yehova n’erimukolera. Yehova kw’abirithuhangika athya. (Esyonyimbo 128:1; Matayo 5:3) Ebisoro ibyo owabyo n’irya, erinywa, n’eributha. Aliwe, iwe, Yehova akanza iwatheghekera engebe yawu omwa mibere eyikendi leka iwabya iwunatsemire. Omuhangiki wawu ni “Nyamuhanga w’olhwanzo,” “Nyamuhanga oyutsemire,” oyuwahangika abandu omwa “kisosekanio kiwe.” (2 Abanya Korinto 13:11; 1 Timoteo 1:11, NW; Enzuko 1:27) Iwukendi tsema wamagherererya Nyamuhanga wethu w’olhwanzo. E Biblia yikabugha yithi: “Erihithya likaletha obutseme kwilhaba erihebwa.” (Emibiri 20:35) Mbwino siwuli wathayilhangirira eki? Ekyo ni kwenene omwa ngebe eya buli kiro. Kwesi Yehova anzire ebya wukatheghekera obuthuku bwawu bw’embere ibyabya ibiseghemere okwa lhwanzo olhwa wumuwithire n’abandi.​—Soma Matayo 22:36-39.

Wukendi bana etseme wamakangania olhwanzo

4, 5. Ni kyahi ekyaleka Yesu iniabya inianatsemire?

4 Abalere, Yesu Kristo mwabahiriraho eky’erileberyako ekyuwene. Omughulhu abya mulere angabya nayu imwanabya akasatha n’eritsema n’abandi. Ngoku Ekinywe kya Nyamuhanga kikanabugha, hali “omughulhu w’eriseka,” kandi “n’omughulhu w’erisatha.” (Omugambuli 3:4) Kandi Yesu mwayithunda hakuhi na Yehova omw’isoma Amasako. Iniana w’emyaka 12, abakangirirya b’omwa Hekalu mubasweka “busana n’amenge wiwe.”​—Luka 2:42, 46, 47.

5 Yesu abere abirikulha, ikikamutsemesaya erikolha ebya Nyamuhanga akamubwira athi akole. Ng’eky’erileberyako, Nyamuhanga mwanza athi “athule engulhu yuwene okwa bera” kandi “n’erithasyaha erilhangira okwa syondimethime.” (Luka 4:18) Esyonyimbo 40:8 hakakanganaya eriyowa lya Yesu, hathi: “Nyanzire erikolha erisonda lyawu, iwe Nyamuhanga waghe.” Yesu iniakatsemera erikangirirya abandu oku Thatha wiwe. (Soma Luka 10:21.) Kiro kighuma, abere abirikanirya omukali okw’iramya ly’okwenene, Yesu mwabugha n’abigha biwe athi: “Akalyo kaghe ni kolha erisonda ly’oyo wanyithuma, n’eribugha omubiiri ow’amba.” (Yoane 4:31-34) Yesu mwatsema kundi mwakangania Nyamuhanga n’abandi b’olhwanzo. Nawu wamakolha ekyo iwukendi tsema.

6. Busana naki kyuwene eribwira abandi okwa bya wukatheghekera obuthuku bw’embere?

6 Balikyethu bangyi batsuka erikolha obutemburi  ibakine balere, kandi ekyo mukyaleka ibabya ibanatsemire. Mbwino siwanga bwira abali ng’abo okwa bya wukathegheka? “Ahathe mahano, eriyisunza likakwa obulighe, nikwa omo bungyi bw’abahani, akahanganibawa.” (Emisyo 15:22) Balikyethu aba ibangana kubwira ngoku obutemburi bukakuwathikaya omwa ngebe yawu yosi. Yesu iniakine elhubulha, mwighira oku Thatha wiwe kwa bingyi. N’omughulhu abya okwa kihugho, mwalholha embere erigha bingyi. Mwabana etseme omw’ihikya engulhu yuwene y’okwa bandi, kandi amasighalha muthaleghulha akabana ebitsibu ebikalire. (Soma Isaya 50:4; Abaebrania 5:8; 12:2) Thuthalebya ekyanga leka omubiiri w’omughulhu wosi iniakuha etseme.

EKIKALEKA ERIYIRA ABIGHA INIABYA IW’OMUBIIRI OWUWENE

7. Ni kyahi ekikaleka abalere bangyi ibatsemera omubiiri w’eriyira abigha?

7 Yesu mwathubwira athi thughende ‘thuyire abigha’ n’erikangirirya abandu. (Matayo 28:19, 20) Wamabya iwunemuthegheka erikolha oyu mwa mubiiri wawu, iwukendibya iwamaya omwa ngebe eyuwene eyikaha Nyamuhanga y’olhukengerwa. Ng’owundi mubiiri wosi-wosi, wutholere iwaminya erikolhagho ndeke. Mughalha wethu oyuk’ahulhawa mwa Timothy oyuwatsuka erikolha obutemburi iniakine mulhwana mulere akabugha athi: “Ngatsemera erikolera Yehova mughulhu wosi kundi naghe ha ngakanganiraya ku nga mwanzire. Erimbere, mukyakalha eribana omwigha we Biblia, aliwe nabere nasuba omwa bundi bulhambu, omwa kwezi kughuma kusa munathunga abigha bangyi. Omughuma wa kubo mwatsuka eryasa n’okwa mihindano. Nabere nabirighunza myezi ibiri ingane okwa Sukuru y’Abaghalha Bethu Abahuru, munathumwa ahandi, n’eyo namathungayo abigha bbani. Ngatsema ingigha n’abandu n’erilhangira ngoku Omulimu Abuyirire akabahindulha.” * (Lebaya Omwatsi ahikwa.)​—1 Abanya Tesalonika 2:19.

8. Abandi balere babirikolhaki nuku bathulire abandu bangyi?

8 Abalere abandi babirithwamu erigha owundi mubughe. Ng’eky’erileberyako, Jacob, owe North America, akabugha athi: “Omughulhu nabya w’emyaka musanju, abaana abanene abo nabya ingasoma nabu ini Banya Vietinamu. Inganzire inababwira oku Yehova, neryo munathwamu erigha omubughe wabu. Ebingyi ebyo n’igha, ining’imaya egazeti ye Watchtower, ey’Olhuvietinamu inganemulebya n’omwa y’Olhusungu. Munasondya n’abanywani omwa kithunga ky’Olhuvietinamu ekyabya hakuhi. Nabere nahikya myaka 18, munatsuka erikolha obutemburi. Enyuma w’aho munabirikirwa okwa Sukuru ey’Abaghalha Bethu Abahuru. Ekyo mukyangwathikya kutsibu omwa butemburi bwaghe n’omwa kithunga, kundi nabya ininangye musyakulhu w’ekithunga ingyuwene omwa gurupu y’Olhuvietnamu. Abanya Vietinamu banene bakasweka ku nabirith’igha omubughe wabu. Bakanyikokaya, kandi mughulhu mungyi bakaligha ithw’igha nabu e Biblia. Abandi babirihika n’okw’ibatizibwa.”​—Emibiri 2:7, 8.

9. Omubiiri w’eriyira abigha akathweghesayaki?

9 Omubiiri w’eriyira abigha akakukangiriraya emibere mibuya y’erikolha omubiiri, eriminya erikanirania ndeke n’abandi, kandi ngoku wangabya iwunasikire n’erikolesya amenge. (Emisyo 21:5; 2 Timoteo 2:24) Ibbwa ekikathasyaleka omubiiri oyu iniatsemesya, wuk’igha erisighika ebya wikirirye omw’ikolesya  Amasako. Kandi iwigha n’erikolha haghuma na Yehova.​—1 Abanya Korinto 3:9.

10. Ni kyahi ekyanga kuha etseme omw’ithulira nomukyangabya indi obulhambu obwa wulimu bukalire?

10 Nomukyangabya indi omwa bulhambu bwawu ni bake abakatsemera erigha e Biblia, wangana bana etseme omwa mubiiri w’erithulira. Omwa mubiiri w’eriyira abigha, ekithunga kyosi kikakolera haghuma. Mughalha wethu kutse mwali wethu mughuma nomwangabya iyuwamawathikya omundu eribya mwigha, ithwe bosi thukatsema kundi ithwe bosi muthwasangira omw’ithulira. Ng’eky’erileberyako, Brandon mwakolha obutemburi habw’emyaka mwenda omwa bulhambu eyo abandu bake bababya bakaligha erigha e Biblia. Akabugha athi: “Nganzire erithulira kundi kya Yehova akabugha athi thukole. Munatsuka erikolha obutemburi inganaghunza esukuru. Ngatsemera erihira omwa balere b’omwa kithunga kyethu mw’omuhwa, n’erilhangira bakakulha-kulhana. Nabere nabirighenda okwa Sukuru ey’Abaghalha Bethu Abahuru Eyiseghemere Okwa Biblia, munathumwa ehandi eriyakolhayo obutemburi. Ni kwenene ingye sindi nathawathikya mundu omwa mwanya oyo erihika okw’ibatizibwa, aliwe abandi babirikikolha. Aliwe kikanyitsemesaya eribya imunasangira ndeke omwa mubiiri w’eriyira abigha.”​—Omugambuli 11:6.

EBYA WUKATHEGHEKA AHA BYANGA KULHOLYA

11. Ni yindi mibiiri yahi eyo abalere bangyi banemusangiramu erikolera Yehova?

11 Hane nzira nyingyi esy’erikolera Yehova. Ng’eky’erileberyako, abalere bangyi bakawathikaya omwa mubiiri w’obuhimbe, kundi hali obuyithawa bw’Ebisenge by’Obwami. Kikakulethera etseme erisangira omwa mubiiri oyu kundi amanyumba ayo akaha olhukengerwa oku Yehova. Kandi wanganabana n’obutseme bw’erikolha na balikyenyu. N’ekindi, iwangan’igha bingyi, ng’erikolha ndeke omubiiri omwa mibere y’eriyitheya n’eriminya erikolongana ndeke n’abalebererya bawu.

Abak’ingira omwa mubiiri w’omughulhu wosi bakabana mighisa mingyi (Lebaya enungu 11-13)

12. Erikolha obutemburi lyangana kukyungulira yindi mighisa yahi?

12 Mughalha wethu Kevin akabugha athi: “Eritsuka omwa bulere bwaghe, iningabugha indi kiro kighuma ngendi syakolera Yehova omwa mubiiri w’omughulhu wosi. Endambi muyahika namatsuka obutemburi ingahikya myaka 19. Eribana eky’erirya, ingakolha na mughalha wethu omwa kithunga oyuwabya omwa by’obuhimbe. Mun’igha erihanika enyumba, erihira mw’amadirisa, n’esyonyuyi. Enyuma w’aho munabana olhusunzo lhw’erikolha myaka ibiri haghuma na balikyethu abakasubaya Ebisenge by’Obwami n’amanyumba wa balikyethu ebikatsanda busana n’ebitsinduli. Nabere n’owa okwa kiyithawa ky’obuhimbe ekyabya e South Africa, munasaba eriyawathikya, neryo bamanyilighira. Omwa Afirika mwahano, enyuma w’amayenga malebe ngabya inamabirisuba omwa wundi mwanya eriyahimba okwa kindi Kisenge ky’Obwami. Abo ngakolha nabu thwabiribya ng’eka nguma. Thwikere haghuma, thuk’igha haghuma e Biblia, kandi ithwakolha haghuma. Ngatsemera n’erighenda omw’ithulira haghuma n’ekithunga obuli yenga. Ebya nathegheka  ingakine mwana byabirinyirethera etseme eyo ndabya ngasi.”

“Ebya nathegheka ingakine mwana byabirinyirethera etseme eyo ndabya ngasi”

13. Busana naki abalere banene batsemire erikolera Yehova okwa Beteli?

13 Abandi ababya batemburi hathya banemukolera okwa Beteli. Erikolera okwa Beteli ni ngebe eyikatsemesaya kundi obuli ekya wukakolha okwa Beteli, wukakikolera Yehova. Abanya Beteli bakawathikya omw’ireka esyo Biblia n’ebindi bitabu ibyahika okwa bandu nuku bang’igha ekwenene. Omunya Beteli mughuma oyuk’ahulhawa mwa Dustin akabugha athi: “Ingakine w’emyaka mwenda, munathunga ekilhubirirwa ky’erisyingira omwa mubiiri w’omughulhu wosi, neryo nabere naghunza esukuru, munatsuka erikolha obutemburi. Enyuma w’omwaka mughuma n’embindi, munabirikirwa okwa Beteli, nam’igha erikolesya ebyuma ebikahulhukaya ebitabu haghuma n’erikolha okwa by’esyokombyuta. Okwa Beteli, ngatsema ing’owa okwa ngulha-kulhana esinemubya omwa mubiiri w’eriyira abigha. Ngatsemire erikolera okwa Beteli kundi obuli kindu ekya thukakolha kikawathikaya abandi eriyithunda hakuhi na Yehova.”

NI BYAHI EBYA WUKENDI THEGHEKA BUSANA N’OBUTHUKU BWAWU BW’EMBERE?

14. Wanga kolhaki lino eriyitheghekera omubiiri w’erithulira ow’omughulhu wosi?

14 Wanga yitheghekera wuthi omubiiri w’erithulira ow’omughulhu wosi? Erithoka  erikolera Yehova n’akaghalha kawu kosi, wutholere iwatsuka erithunga emibere y’Ekikristayo. Soma Ekinywe kya Nyamuhanga obuli kiro, ghaniraya buuli kukyo, kandi lengaho erisubirya omughulhu thuli okwa mihindano. Emyaka eya wanga ghunza omwa sukuru, iyangana kuwathikya eryuwania emibere y’erikanirania n’abandu okwa ngulhu yuwene. Igha erikangania ku wunatsomene abandi omw’ibabulya omwa menge, nabu nga bawithe malengekaniaki oko mwatsi mulebe. N’ekindi, iwangana wathikya okwa mibiiri y’ekithunga, ng’erikolha obuyonzo n’erisugha Ekisenge ky’Obwami. Yehova akatsema akakolesya abandu abakayikehaya kandi abananzire erikolha. (Soma Esyonyimbo 110:3; Emibiri 6:1-3) Omukwenda Paulo mwaha Timoteo y’olhusunzo lhw’eribya mumisani kundi iniakakanibawako ndeke n’abandi balikyethu.​—Emibiri 16:1-5.

Emyaka eya wanga ghunza omwa sukuru, iyangana kuwathikya eryuwania emibere y’erikanirania n’abandu okwa ngulhu yuwene

15. Ni kyahi ekya wangakolha eribana akabiiri akanga kuwathikya erikolha obutemburi?

15 Balikyethu bangyi abali omwa mubiiri w’erithulira ow’omughulhu wosi bakana sondaya akabiiri akanga bawathikya. (Emibiri 18:2, 3) Obundi iwangana somerera akabiiri kalebe akangana leka iwabana eky’erikolha. Kanaya n’omulebererya w’omuthimbo n’abandi batemburi okwa bya wutheghekire, n’eribasaba okwa menge. N’enyuma w’aho ibbwa, ngoku e Biblia yikanabugha, ‘iwahira emibiiri yawu oku Mwami Mukulhu, neryo eriyisunza lyawu lyasyahangana.’​—Emisyo 16:3; 20:18.

16. Eringira omwa mubiiri w’omughulhu wosi lyanga kughasira lithi omwa bindi ebya wanga syakolha embere?

16 Wutholere iwayikethera ngoku Yehova anzire iwasyabana etseme omwa buthuku bw’embere. (Soma 1 Timoteo 6:18, 19.) Wukabya wunemukolha n’abandi omwa mubiiri w’omughulhu wosi, kikakuwathikaya eribya Mukristayo oyukulire bunyakirimu. Hane n’abandi abakabugha bathi eryingira omwa mubiiri w’omughulhu wosi ibakine balere mulyabawathikya omwa butheke bwabu. Mughulhu mungyi, abanabya batemburi bathe b’ingira omwa butheke, bo bakana thoka erikolha haghuma obutemburi babirithahania.​—Abanya Roma 16:3, 4.

17, 18. Erithegheka eby’embere likahamba lithi n’okwa bya muthima wawu anzire?

17 Esyonyimbo 20:4 hakabugha oku Yehova hathi: “Akuhe erisonda ly’omuthima wawu n’eriberererya eriyisunza lyawu lyosi.” Omughulhu wukatheghekera obuthuku bwawu bw’embere, ambi iwalengekania kwenene nga wanzire iwakolesya wuthi engebe yawu. Lengekanaya okwa bya Yehova anemukolha omwa buthuku bwethu buno, kandi nawu nga wanga kolha kyahi omwa mubiiri wiwe. Neryo thegheka erikolha ebikamutsemesaya.

18 Wukendibya wukakolesya engebe yawu omw’ikolera Yehova omwa buswire n’erimuha olhukengerwa, iwukendi tsema kutsibu. Iwukendi ‘tsemera Omwami Mukulhu, nayu iniasyakuha eby’omuthima wawu anzire.’​— Esyonyimbo 37:4.

^ enu. 7 Esukuru eyi siyikiriho, hathya y’Esukuru y’Abathuliri b’Obwami.