Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomunani 2017

‘Obuholho bwa Nyamuhanga Bulhabire Amenge Wosi’

‘Obuholho bwa Nyamuhanga Bulhabire Amenge Wosi’

“Obuholho bwa Nyamuhanga obulhabire amenge wosi, bwasyatheya emithima yenyu.”​—ABANYA FILIPI 4:7.

ESYONYIMBO: 76, 141

1, 2. Ni kyahi ekyabya oku Paulo na Sila e Filipi? (Lebaya ekisasani ekiri okw’itsuka.)

THATHERA akasasani. Bwabya kathi-k’ekiro. Abamisani babiri, iya Paulo na Sila, babya ibane omwa kisenge ky’engomo eky’ekabunu ekiri mw’omwirima munene omwa tawuni ye Filipi. Isibangathoka erighenda kundi ebisando byabu byabya bibohire, n’emighongo yabu iyinemulhuma busana n’erihunzwa kutsibu. (Emibiri 16:23, 24) Erithungyi ly’ekiro ekyo, abandu abahithene, babya ibabirithwalha Paulo na Sila omwa kathale eyiri abathabali. Aho n’aho, bamabatswera. Mubabasathangirya kw’esyongyimba n’eribaswirya kutsibu omwa migho. (Emibiri 16:16-22) Eki ka kyabya kindu ky’obuthe bulingirirania! Kundi Paulo abya ndulhani ye Roma, abya atholere eritswerwa omwa nzira eyitholere. *​—Lebaya omwatsi ahikwa.

2 Omwa ngomo, Paulo angabya imwalengekania okwa biryabya n’erilengekania okwa bandu b’omwa Filipi. Omwa tawuni yabu imo simwabya esyosinagogi ng’eyindi miyi eyo Paulo abya  iniabirihikamo. Neryo Abayuda ibakaramiraya eyihya sy’omuyi hakuhi n’olhusi. (Emibiri 16:13, 14) Mbwino eki kyabya kundi omwa muyi oyu simwabya abalhume Abayuda ng’ikumi, kundi w’abya mughanzo ow’abya akayithaghisibwa erilighirwa eribya n’esinagogi? Abandu ababya bikere e Filipi ibakayiheka busana n’eribya ndulhani sye Roma. (Emibiri 16:21) Obundi ky’ekyaleka ibalengekania bathi Paulo na Sila eribya ini Bayuda, sibangabya ndulhani sye Roma. Sithwanga minya, aliwe ekya thwasi, Paulo na Sila mubaghuswa omwa ngomo isibaliko lhubanza.

3. Kyangabya imukyalyambya kithi Paulo akahirwa omwa ngomo, aliwe aby’awithe malengekaniaki?

3 Obundi Paulo angabya imwalengekania n’okwa kyaleka iniayisanga e Filipi. Enyuma w’emyezi mike, Paulo mwahika e Asia Enyike, okwa wundi musirya w’engetse ye Aegean. Eyo, omulimu abuyirire mwabera erimughania erithulira omwa myanya mirebe. Omulimu abuyirire mwabya ng’aw’akamusukuma erighenda ahandi. (Emibiri 16:6, 7) Aliwe ibbwa hayi? Paulo abere iniane, e Troa, omwa nzoli mwabwirwa bino: “Wusokere e Makedonia.” Erisonda lya Yehova mulyalhangirika! Neryo aho n’aho, Paulo mwaghenda e Makedonia. (Soma Emibiri 16:8-10.) Neryo mubyabya bithi ahikayo? Abere akanahika e Makedonia, mwahirwa omwa ngomo! Busana naki Yehova mwalighira eki eribya oku Paulo? Anga ghunzire omwa ngomo mwa buthuku bungahi? Nomukyangabya indi emyatsi eyi yabya iyinemulyambya Paulo omwa malengekania, erikirirya liwe mulyabya irinaghumire kandi inianatsemire. Iyo na Sila ‘mubasaba n’eriimba esyonyimbo sy’eripipa Nyamuhanga.’ (Emibiri 16:25) Obuholho bwa Nyamuhanga mubwahumulikania emithima n’amalengekania wabu.

4, 5. (a) Emibere yethu yangabya yithi ng’eyo Paulo abyamu? (b) Emibere Paulo abyamo muyahinduka yithi ngoku athabya akalengekania?

4 Wune wathayowa nga Paulo? Obundi hakanayira iwasaba Nyamuhanga erikuwathikya erithwamu ndeke kandi iwayowa iwune mukwama obusondoli bw’omulimu wiwe. Aliwe, kandi enyuma waho iwabana ebitsibu kandi iwabya iwutholere erikolha esyombinduka omw’ithwamu eryo. (Omugambuli 9:11) Neryo, wukabya wukakilengekaniako, iwabulha ekiryaleka Yehova inialighira ebindu birebe eribya. Ni kyahi ekyanga kuwathikya eriyiyinia n’eryongera eriyikethera Yehova? Ithwangana kibana omwa byathasyabya oku Paulo na Sila.

5 Paulo na Sila babere banemw’imba, ebindu bingyi ebyo bathabya balengekenie mubyabya. Eky’erimbere, muhabya omusiki munene. Neryo esyonyuyi sy’engomo musyayikingulha. N’ebyabya bibohire abanya ngomo mubyayibohokalira. N’omutheya w’engomo mwanza eriyitha, Paulo amamuthanga, neryo omutheya w’engomo n’eka yiwe yosi mubabatizibwa. Engyakya, abakulhu b’omuyi mubathuma abapolisi erilhusya Paulo na Sila b’omwa ngomo n’eribabwira bathi balhue omwa muyi baghende buholho. Abakulhu aba babere baminya ngoku Paulo na Sila ni ndulhani sye Roma, mubalhangira ku babirisobya, neryo ibobene-bene mubasa n’eribugha bathi ibo bakendi bakwamanisya. Aliwe Paulo na Sila mubaghana bathi bakendi tsuka eriyalhagha Ludia, oyuwabya iniamabiribatizibwa eribya mwali wabu. Kandi mubakolesya akaghisa ako erighumya abandi balikyethu be Filipi. (Emibiri 16:26-40) Emyatsi ka muyahinduka lhuba-lhuba!

 ‘BULHABIRE AMENGE WOSI’

6. Ni byahi ebyo thukendikaniako?

6 Ebyabya ebyo bikathweghesayaki? Yehova angana thukolera ekya thuthalhue thulengekenie, neryo kwesi sithutholere thukahangya-hangya thukabana ebitsibu. Erisomo eryo lyangabya imulyahamba kutsibu oku Paulo. Thukaminya ekyo busana n’ebya ahandikira balikyethu be Filipi ebihambire okwa maghaniryo n’obuholho bwa Nyamuhanga. Omo mwatsi ono thukendi kania okwa binywe bya Paulo ebiri omu Abanya Filipi 4:6, 7. (Soma.) Thukendikania n’okwa yindi myatsi eyiri omwa Biblia eyikakanganaya ngoku Yehova akolha ekithabya kikalengekanibwa. Erighunzerera, thukendikania “obuholho bwa Nyamuhanga” nga bwanga thuwathikya buthi erighumira ebitsibu ithunayikethere ndeke Yehova.

Yehova angana thukolera ekya thuthalhue thulengekenie, neryo kwesi sithutholere thukahangya-hangya thukabana ebitsibu.

7. N’isomo lyahi eryo Paulo eghesaya balikyethu be Filipi omwa baruha yiwe, kandi nethu yikathweghesayaki?

7 Omughulhu baghalha bethu be Filipi basoma ebaruha eyo Paulo abahandikira, mbwino mubalengekania okuki? Abangyi bangabya imubibuka ekyabya oku Paulo na Sila n’enzira y’ekithiko-thiko eyo Yehova abawathikirayamu. N’isomo lyahi eryo Paulo anza eribeghesya omwa baruha eyi? Erisomo lyabya ilya lino; ‘Isimwahanga-hangaya. Musaba, neryo mukendibana obuholho bwa Nyamuhanga.’ Paulo mwababwira athi obuholho bwa Nyamuhanga ‘bulhabire amenge wosi.’ Ekyo kikamanyisayaki? Esindi Biblia sikanabugha sithi, “obulhabire ebilhotho byethu byosi” kutse “obulhabire emitheghekere yosi y’omundu.” Kwesi Paulo abya iniakabugha athi “obuholho bwa Nyamuhanga” buwene kutsibu kwilhaba ngoku wanga lengekania. Ithwe hakanayira ithwabya isithwasi ekyanga ghunzaho ekitsibu kyethu, aliwe Yehova iyo akabya inianasi. Kandi angana kolha ekya thuthalengekenie.​—Soma 2 Petero 2:9.

8, 9. (a) Paulo nomwanabya iniabirikolhwa nabi e Filipi, ni bibuya byahi ebyalhwiririramu? (b) Ni kyahi ekyaleka balikyethu be Filipi ibabya ibatholere eriyikethera ebinywe bya Paulo?

8 Ebaruha ya Paulo yangabya imuyaghumya balikyethu be Filipi bakaghanirya okwa bya Yehova abya iniamathabakolera emyaka ikumi enyuma. Nomwakine indi Yehova mwaligha Paulo na Sila erikolhwa nabi, ebya balhabamu ebyo mubyawathikya ‘erilhwira n’erihangania engulhu yuwene.’ (Abanya Filipi 1:7) Abakulhu b’omuyi we Filipi abo mubasagha erithasya higha-highania ekithunga kihyaka ekyo. Obundi Paulo eribugha athi ni ndulhani ye Roma, kyanganabya iky’ekya thokesaya Luka erisighalha e Filipi Paulo na Sila babirilhuayo. Kandi Luka angabya imwongera eriwathikya Abakristayo bahya-bahya abe Filipi.

9 Balikyethu be Filipi babere basoma ebaruha ya Paulo, mubaminya ngoku ebiri muyo si malengekania wiwe. Paulo abya iniabirilhaba omwa bitsibu ebikalire. Nibya  n’ebaruha eyo abahandikira, ahandikayo iniane omwa ngomo mwe Roma. Aliwe mwakangania kw’anawithe “obuholho bwa Nyamuhanga.”​—Abanya Filipi 1:12-14; 4:7, 11, 22.

“SIMUHANGA-HANGAYE”

10, 11. Ni kyahi ekya thutholere ithwakolha omughulhu thuyilhalikirire busana n’ekitsibu, kandi ambi ithwabya ithunalindirireki?

10 Ni kyahi ekyanga thuwathikya erithendi ‘hangya-hangya’ aliwe ithwabya ‘n’obuholho bwa Nyamuhanga’? Ebinywe ebyo Paulo ahandikira Abanya Filipi bikakanganaya ngoku omughulhu thukahanga-hangaya, omubatsi ly’erisaba. Neryo omughulhu thuwithe erihangya-hangya, thutholere ithwayitsingirira omw’isaba. (Soma 1 Petero 5:6, 7.) Wukasaba Yehova, ibya iwunayikethere ndeke-ndeke ngoku akutsomene. Mughulhu wosi musime busana n’emighisa ey’akakuha. Kandi isiwibirirawa ngoku Yehova awithe obuthoki “bw’erikolha ebyosi ebyo thukabulhaya kutse ebyo thukalengekanaya.”​—Abanya Efeso 3:20.

11 Nga Paulo na Sila, nethu Yehova angana thuwathikya omwa mibere thuthalhue thukalengekania. Ikyangana thendibya kithiko-thiko, aliwe ikikendibya ikyathunalhue thukayithagha. (1 Abanya Korinto 10:13) Aliwe ekyo sikirimanyisaya indi thuyitheke, thubye aho isithuwithe ekyo thukakolha, thuthi thukalinda Yehova akendi kokothya emyatsi. Thutholere ithwakolha erikwama ngoku thulyasaba. (Abanya Roma 12:11) Ebyo thwangakolha ibikendi kangania ngoku thunatsomene kandi ithwabya ithwamaha Yehova y’eky’eritsumulha. Ambi ithwabya ithun’ibukire ngoku Yehova nibya angana thukolera ebilhabire okwa bya thulyamusaba. Hakanayira Yehova iniathukolera ebyo thuthalhue thukalengekania. Muleke thulebaye eby’erileberyako ebyangaleka ithwaminya ndeke-ndeke ngoku Yehova angana thukolera ebyo thuthalhue thukalengekania.

YEHOVA MWABAKOLERA EBYO BATHABYA BAKALENGEKANIA

12. (a) Omwami Hezekia mwakolhaki Omwami Senakaribu akamubahisya? (b) Emibere Yehova awathikirayamo Hezekia yikathweghesayaki?

12 Omwa Biblia, mune eby’erileberyako by’abangyi ebikakanganaya ngoku Yehova akanakolha ebyo wuthalhue wukalengekania. Ng’eky’erileberyako, omughulhu Hezekia abya mwami we Yuda, Senakaribu omwami we Asuria mwathahirira emiyi yamo yosi amasigha e Yerusalemu nyisa. (2 Abami 18:1-3, 13) N’enyuma waho Senakaribu mwasubulha erisyabambira ne Yerusalemu. Omwami Hezekia mwakolhaki? Erimbere, mwasaba Yehova y’obuwathikya n’erisaba amenge okwa muminyereri Isaya. (2 Abami 19:5, 15-20) Eryongera okw’ekyo, Hezekia mwakangania obuyitheghererya amaliha engemu eya Senakaribu amusaba. (2 Abami 18:14, 15) Erighunzerera, Hezekia mwathegheka omuyi eriyitheghekera eribambirwa eryabya irikendi ghunza mughulhu muuli. (2 Emyatsi y’Emigulu 32:2-4) Neryo mubyabya bithi? Yehova mwathuma omulaika amasyahwerekererya abasirikali ba Senakaribu 185,000 omw’ithumbi lighuma. Na Hezekia iyuwene-wene syabya akalengekania athi kikendibya!​—2 Abami 19:35.

Ebyabya oku Yozefu bikathweghesayaki?​—Enzuko 41:42 (Lebaya enungu 13)

13. (a) Ekyabya oku Yozefu kikathweghesayaki? (b) Ni kyahi ekyabya oku Sara eky’athabya akalengekania?

13 Thalengekania n’okwa kyabya okwa mulhwana mulere, iya Yozefu. Iniane omwa  ngomo mwe Misiri abya isyangaminya kw’akendi syathunga ekitsumbi eky’eribya wakabiri oko mwami we Misiri kutse ngoku Yehova angamukolesirye erilhamya ab’okw’iyo okwa nzalha eyikalire. (Enzuko 40:15; 41:39-43; 50:20) Ahathe erithika-thika Yehova mwakolera Yozefu eby’athabya akalengekania. Thalengekania n’okwa mukekulhu Sara. Mbwino Sara, omwa bukekulhu bwiwe, anabya awithe amaha athi angana syabutha owiwe mwana, butsira erithunga ow’omughombe wiwe w’obukali? Kwenene eributhwa lya Isaka kyabya kindu ekya Sara athabya akalengekania.​—Enzuko 21:1-3, 6, 7.

14. Ni yikethera lyahi erya thuwithe omu Yehova?

14 Si bugha ambu Yehova akendi thughunza kw’ebitsibu byethu byosi omwa nzira y’ekithiko-thiko ekihugho kihya kithe kyahika. Kandi sithwanga bera erisaba Yehova thuthi athukolere ebithiko-thiko omwa ngebe. Aliwe ekya thwasi, Yehova mwawathikya abaghombe biwe abathaleghulha omwa buthuku bw’enyuma. Kandi syali athahinduka. (Soma Isaya 43:10-13.) Ekyo kikaleka ithwamuyikethera. Kandi thuyikethere ngoku akendi thuha akaghalha ak’erithoka erikolha erisonda liwe. (2 Abanya Korinto 4:7-9) Eky’erileberyako kya Hezekia, Yozefu  na Sara kikathweghesayaki? Kikakanganaya ngoku Yehova iniakendi thuwathikya n’omwa mughulhu thuli omwa bitsibu ebikalire thwamasighalha ithune bathaleghulha okw’iyo.

Yehova iniakendi thuwathikya n’omwa mughulhu thuli omwa bitsibu ebikalire thwamamuyikethera

15. Ni kyahi ekikendi thuwathikya eribya “n’obuholho bwa Nyamuhanga” nomuthwangabya n’ebitsibu, kandi eki kithokekene kithi?

15 Thwanga thunga thuthi “obuholho bwa Nyamuhanga” kandi nibya ithunawithe ebitsibu? Eky’erikolha, ly’erilhangira thuthi obughuma bwethu na Yehova bukabya ibunaghumire. Obughuma obo buthokekene busana n’embanulhu y’ekihongwa kya Yesu Kristo. Embanulho ni kighuma ky’okwa bindu bikulhu ebya Yehova abirithukolera. Kundi erilhabira omwa mbanulho eyo, akathoka erithughanyira ebibi byethu, neryo ithwabya n’obunyamuthima-thima obuhenirye obwanga leka ithwayithunda hakuhi na Yehova.​—Yoane 14:6; Yakobo 4:8; 1 Petero 3:21.

BUKENDI THEYA EMITHIMA YETHU N’AMALENGEKANIA WETHU

16. Niki ekyangabya thwabiribana “obuholho bwa Nyamuhanga obulhabire amenge wosi”? Iha eky’erileberyako.

16 Niki ekyangabya thwabiribana “obuholho bwa Nyamuhanga obulhabire amenge wosi”? E Biblia yikabugha yithi “bwasyatheya” emithima yethu n’obulengekania bwethu. (Abanya Filipi 4:7) Ekinywe ekikahindulhawa mo “eritheya” ekya kolesibawa e Biblia yikahandikwa, kyabya kinywe ekikakolesibawa omwa mahe ekikamanyisaya abasirikali ababya bakatheya omuyi. Abandu ababya bikere omo muyi we Filipi babya bakatheghibwa n’abasirikali ng’abo. Omwa kiro, ibakakesaya isibawithe erihangya-hangya ibanasi ngoku omuyi wabu anatheghibirwe ndeke. Kuthya nethu, thwamabya ithune “n’obuholho bwa Nyamuhanga,” sithulithasya yilhalikirira kandi emithima yethu n’amalengekania wethu bikabya ibinatheke. Thukyasi ngoku Yehova akathutsomana kandi anzire ithwabya ndeke omwa ngebe. (1 Petero 5:10) Neryo ekyo kikathutheghaya okw’ithendi yowa nga thulithoherwe n’amaghaniryo kutse okw’ihwa mw’amani.

17. Ni kyahi ekikendi syathuwathikya eriyikethera Yehova omwa mughulhu w’obulighe bunene?

17 Omwa buthuku obuthe bwahali, obulighe bunene bukendi hika okwa bandu abosi. (Matayo 24:21, 22) Sithwasi nga bikendisyabya bithi okwa buli mughuma w’okw’ithwe okwa mughulhu oyo. Aliriryo, omughulhu oyo, syatholere akaleka thukahangya-hangya. Nomwakine indi sithwasi ebyosi ebya Yehova akendisyakolha, iyo thunamwasi. Thunasi ebyo abirikolera abaghombe biwe abathaleghulha omwa buthuku bw’enyuma. Thwamabirilhangira ngoku nomuhangabyaki, Yehova akalhangira athi ekighendererwa kiwe kikabererera. Kandi ekyo iniangana kikolha omwa mibere eyithalhue yikalengekanibwa! Neryo busana n’ekyo, omughulhu Yehova akathukolera ekyosi-kyosi, kikathuha akaghisa ak’eribana “obuholho bwa Nyamuhanga, obulengire amenge wosi.”

^ enu. 1 Sila akabya nayu ng’abya ndulhani ye Roma.​—Emibiri 16:37.