Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwokubanza 2018

Ni Lhwanzo Lhwahi Olhukaletha Obutseme bw’Okwenene?

Ni Lhwanzo Lhwahi Olhukaletha Obutseme bw’Okwenene?

‘Obutseme buli okwa kihanda ekiwithe Yehova mo Nyamuhanga wabu!’​—ESYONYIMBO 144:15.

ESYONYIMBO: 111, 109

1. Busana naki obuthuku obwa thulimu ni bwa mbaghane okwa bundi bwosi-bwosi?

THULI omwa buthuku obuli mbaghane okwa bundi bwosi-bwosi aho abandu bakathaberaho. Yehova anemuhindania endeko nene erilhua “oko buli kithunga, n’ebihanda byosi, n’abandu bosi, n’emibughe yosi,” ngoku e Biblia yalhaghulha. Ibo ni “kihanda kikalire” ekiri mw’abandu abalhabire oku miliyoni munani “abakamukolera omwa musibo n’omwa kiro.” (Eribisulirwa 7:9, 15; Isaya 60:22) Sihali hathabya bandu bangaha n’abaliho munabwire abanzire Nyamuhanga n’abalikyabo.

2. Ni lhwanzo lhwahi olhuthatholere olhwa thukalhangira omwa bathe banywani ba Nyamuhanga? (Lebaya ekisasani ekiri okw’itsuka.)

2 Aliwe, kandi e Biblia muyalhaghulha yithi omwa buthuku bwethu, abandu abathe banywani ba Nyamuhanga bangabere n’olhwanzo olhuthatholere olhw’eriyitsomana. Omukwenda Paulo mwahandika athi omwa biro by’enyuma-nyuma, abandu basyabya ‘abakayanza, erianza ebindu,’ kandi ‘abanzire eriyitsemesya isibanzire Nyamuhanga.’ (2 Timoteo 3:1-4) Olhwanzo lhw’eriyitsomana olhu lhuli mbaghane  okwa lhw’erianza Nyamuhanga. Erikwamirira ebilhubirirwa by’eriyitsomana sikyanga lethera omundu y’etseme, nomwanga lengekania athi lhukendi leka iniatsema. Aliwe lhukaletha omwa bandu mw’eriyitsomana n’erileka engebe iyakalira obuli mundu.

3. Omo mwatsi ono thukendi kania okuki? Busana naki?

3 Omukwenda Paulo abya inianasi ngoku olhwanzo lhw’eriyitsomana lhwanga kanyirire kandi ikyabya kitsibu okwa Bakristayo. Neryo mwabakunga athi ‘basaghe abandu ng’aba’ kutse eriyihighulha okwa bandu abakakanganaya olhwanzo lhw’eriyitsomana. (2 Timoteo 3:5) Aliwe sithwanga thoka eriyihighulha okwa bandu ng’aba omwa buli kindu. Neryo thwanga kolhaki eriyitheya okwa malengekania w’abandu abathuthimbireko n’eritsemesya Yehova, Nyamuhanga w’olhwanzo? Thulebaye embaghane eyiri ahakathi-kathi k’olhwanzo olhwa Nyamuhanga anzire ithwabya nalho n’olhwanzo olhukanibweko omwa 2 Timoteo 3:2-4. Neryo ithwangana yirebya n’erilhangira ngoku thwanga kangania olhwanzo olhwanga leka ithwatsema.

ERIANZA NYAMUHANGA KUTSE ERIYANZA?

4. Busana naki si kibi eriyanza?

4 Paulo mwahandika athi: ‘Abandu basyabya abakayanza.’ Mbwino eki kikamanyisaya kithi eriyanza ni kibi? Eyihi, eriyanza ni kindu kya buli kiro kandi kitholere. Yehova kwa thuhangika athya. Yesu mwabugha athi: ‘Wanze mulikyenyu ngoku wuyanzire.’ (Mariko 12:31) Omo kwenene, sithwanganza abandi thuthayanzire. Kandi e Biblia yikathubwira yithi: ‘Lithya abiba ko banze abakali babu bo bathya ngoku bakanza emibiri yabu. Oyukanza omukali wiwe akayanza. Kusangwa sihali mundu na kera oyukakwa omubiri wiwe w’obusu, nikwa akahagho akalyo n’erisughagho.’ (Abanya Efeso 5:28, 29) Neryo kilhangirikire ngoku thutholere ithwanayanza.

5. Wanga soborera wuthi abandu abakayanza kutsibu?

5 Eriyanza erikanibweko omwa 2 Timoteo 3:2 siritholere kandi siryuwene. Liri mw’eriyitsomana iwuwene. Omundu amayanza kutsibu, akabya iniamayilengekaniako kutsibu kwilhaba aho atholere. (Soma Abanya Roma 12:3.) Akayitsomana kutsibu kwilhaba eritsomana owundi mundu wosi-wosi. Hamabya ekiwire, akanza iniatsweba abandi omwakanya k’iyo. Omusomi we Biblia mughuma mwasosekania omundu ng’oyo ng’akasoro akakahulhawa mwa nyamunungu akakayiringa ng’omupira, ikayowa buholho omo bweya bwako obuhehere, aliwe ikakangania ebindi by’amahwa awathwire masa. Abandu ng’aba sibatsemire na hake.

Olhwanzo olho Nyamuhanga anzire ithwabya nalho lhukalhwiririramu emibere mibuya

6. Ni bibuya byahi ebikalhwiririra omwanza Nyamuhanga?

6 Abandi abasomire ebye Biblia bikirirye bathi Paulo atsuka eryahulha olhwanzo lhw’eriyitsomana kundi lhukalhua mw’emibere mibi eyo abugha enyuma waho. Mbaghane n’ekyo, olhwanzo olho Nyamuhanga anzire ithwabya nalho lhukalhua mw’emibere mibuya. Mwamuli obutseme, obuholho, erighumisirizya, olhukeri, obubuya, erikirirya, omuthima mwolho, n’eriyikakirya. (Abanya  Galatia 5:22, 23) Omuhandiki w’esyonyimbo mwahandika athi: ‘Obutseme buli okwa kihanda ekiwithe Yehova mo Nyamuhanga wabu!’ (Esyonyimbo 144:15) Yehova ni Nyamuhanga oyutsemire n’abandu biwe batsemire. Kandi mbaghane n’abakayanza kutsibu n’erilengekania okwa bya banga thunga bisa, abaghombe ba Yehova ibo batsemire kundi bakahithaya.​—Emibiri 20:35.

Thwanga yihighulha thuthi okw’iyanza? (Lebaya enungu 7)

7. Ni bibulyo byahi ebikendi thuwathikya eriminya nga thunanzire Nyamuhanga?

7 Thwanga minya thuthi ngoku thuli okw’iyanza kwilhaba erianza Nyamuhanga? Lengekanaya okw’ihano lino: “Simukole mwatsi omo mwagha w’obuthimane, kutse busana n’eriyipipa, nikwa muyikehaye, imukaghanza obuli mundu mwa mubuya kwilhaba inywe. Mutheghaye ebindu by’abandi butsira erilhwira ebyawu bisa.” (Abanya Filipi 2:3, 4) Thwangana yibulya: ‘Ngana ligha erihabulha eri? Nganemulengaho erikolha ebya Nyamuhanga anzire ingakolha? Ngana sondekanaya esyonzira esy’eriwathikirya mw’abandi omwa kithunga n’omw’ithulira?’ Mughulhu wosi si kyolho erihayo obuthuku bwethu n’akaghalha kethu. Kyangana thuyithaghisya erikolha kutsibu n’erisighania ebindi ebya thukatsemera. Aliwe sihali ekyanga thulethera etseme ng’eriminya ku thukatsemesaya omuthabali w’obuhangwa bwosi!

8. Abandi Bakristayo babirikolhaki busana n’erianza Nyamuhanga?

8 Busana n’erianza Nyamuhanga n’erianza erimukolera bingyi, abandi Bakristayo babirisighania emibiiri eyanga lekire ibabya bagaga kutsibu. Ericka, omudokita, mwathwamu erikolha obutemburi omwakanya k’erihwerya amalengekania w’okwa mubiiri wiwe. Iyo na mwira wiwe babirithoka erikolera omwa bihugho bingyi. Akabugha athi: “Ebingyi ebya thwabirilhabamu thukawathikya eyikabughawa eyindi mibughe, haghuma  n’abanywani abo thwabirithunga, byabiryuwania esyongebe syethu.” Ericka akinakolha ng’omudokita, aliwe akakolesaya obuthuku bwiwe bunene erikangirirya abandu oku Yehova n’eriwathikya balikyethu. Akabugha athi eki “kikatsemesaya omuthima wiwe n’erileka iniayowa ndeke.”

EBY’OBUGHUDA OMWA LHUBULHA KUTSE OKWA KIHUGHO?

9. Busana naki omundu oyuwanzire esyosente syanga tsema?

9 Paulo mwahandika athi abandu bangabere ‘abakanza ebindu.’ Myaka mirebe enyuma, omutemburi omwa Ireland mwakanirya omulhume oku Nyamuhanga. Omulhume mwahulhukya akakapa kiwe k’omw’isahu akakabika esyosente, am’iha mw’esyosente n’eribugha athi: “Nyamuhanga waghe y’oyu!” Nomubanga ghana erikibugha, abangyi ku bakayowa bathya. Banzire esyosente n’ebindu ebyo syanga ghulha. Aliwe e Biblia yikakunga yithi: “Oyukanza ebitsipa syendi syughuthibwa n’ebitsipa; kutse oyo wanzire bingyi syendi syughuthibwa omw’ikanya lyabyo.” (Omugambuli 5:10) Oyuwanzire esyosente syalyughuthasyo. Akabya ikwakina sondaya esindi n’erihwerya engebe yiwe omw’isondyasyo. Eki kikamulethera “malighe mangyi.”​—1 Timoteo 6:9, 10.

10. E Biblia yikabugha yithiki okwa by’obughuda n’obunakwa?

10 Ithwe bosi thukayithagha esyosente. Sikanathuha obutheya buke. (Omugambuli 7:12) Mbwino thwangana tsema thwamabya n’esyosente esyanga berererya ebiyithawa byethu sisa? Ee! (Soma Omugambuli 5:12.) Akuri mughalha wa Yake mwahandika athi: “Siwumbe obwera, kutse ebindu; wunyirisaye ebyalya ebimbikire.” Kyolhobire eriyitheghererya ekyaleka omulhume oyu iniathanza eribya munakwa kutsibu. Mwabugha athi syanzire er’iba kundi er’iba siririha Nyamuhanga y’olhukengerwa. Aliwe busana naki mwathanza eribya mughuda? Mwahandika athi: “Ngasyughutha n’erikughana n’eribugha nyithi, Omwami Mukulhu nindi kwehi?” (Emisyo 30:8, 9) Obundi wunasi abandu abakayikethera obughuda omwakanya k’eriyikethera Nyamuhanga.

11. Yesu mwabugha athiki okwa syosente?

11 Oyuwanzire esyosente syanga tsemesya Nyamuhanga. Yesu mwabugha athi: “Sihali mundu oyuwanga thoka erikolera abakama babiri; kusangwa asyakwa omughuma y’obusu, n’erianza owundi. Kutse asyabeghera oko mughuma, iniapona owundi. Simwanga thoka erikolera Nyamuhanga n’ebindu.” Kandi mwabugha athi: “Simuyibikire ebindu munakihugho, aho ehinyurughunzu n’amakenge bikaheraya, kandi aho abarahi bakathulha n’er’iba. Nikwa muyibikire ebindu elhubulha, aho ehinyurughunzu n’amakenge bithe heraya, kandi aho abarahi sibethulha n’er’iba.”​—Matayo 6:19, 20, 24.

12. Eriolhobya engebe kyanga thuwathikya kithi erikolera Yehova? Iha eky’erileberyako.

12 Abangyi b’okwa baghombe ba Yehova bane mulengaho eriolhobya engebe. Eki kikabaha obuthuku bw’erikolera Yehova kandi ikyaleka ibatsema. Jack, oyuwikere e Amerika, mwaghulya enyumba yiwe n’ebizinesi yiwe nuku angakolha obutemburi na mukali wiwe. Akasoborera athi: “Mukyathukalira erisighania omuyi wethu n’ebindu byethu ebyuwene omwa kihugho kyethu.” Aliriryo ahabw’emyaka mingyi iniakalhua okwa mubiiri iniabiriyiponera busana n’ebitsibu by’okwa mubiiri. Akabugha athi: “Mukali waghe, omutemburi w’omughulhu wosi, iyo iniakabya inianatsemire. Iniakanabugha athi, ‘Ngawithe  bbosi oyulengire abandi abosi!’ Neryo lino kundi naghe ngali mutemburi, ithwe bosi thukakolera Bbosi mughuma, Yehova.”

‘Engebe yaghe yikanakanganaya ku ng’ikirirye ebya Biblia yikabugha oko sente?’

Thwanga yihighulha thuthi erianza esyosente? (Lebaya enungu 13)

13. Ni kyahi ekyanga thuwathikya erilebya amalengekania agho thuwithe oko sente?

13 Thukalebya amalengekania awathuwithe okwa syosente, thutholere ithwabya b’okwenene n’eriyibulya: ‘Engebe yaghe yikanakanganaya ngoku ng’ikirirye ebye Biblia yikabugha oko sente? Mbwino erisondekania esyosente kya kindu kikulhu omwa ngebe yaghe? Ngatsomene ebindu kwilhaba obughuma bwaghe na Yehova n’abandu? Ngana lighire ndeke-ndeke ngoku Yehova akendi nyiha ebyanga yithagha?’ Thwangana yikethera ngoku Yehova syendi syalhabirya abakamuyikethera b’ahisi!​—Matayo 6:33.

THWANZIRE YEHOVA KUTSE EBY’ERIYITSEMESYA?

14. Ni malengekania wahi awatholere okwa by’eriyitsemesya?

14 Kandi e Biblia muyalhaghulha yithi omwa biro by’enyuma-nyuma, abandu basyabya ‘abanzire eriyitsemesya.’ Ngoku thunasi ku si kibi eriyithunga kw’amalengekania awatholere n’erithungagho okwa syosente, ku bine bithya n’okwa by’eriyitsemesya. Abandi bandu bakabugha bathi si batholere bakayitsemesya nahake, aliwe eki si kya Yehova akathusunzira. E Biblia yikahira omwa baghombe bathaleghulha ba Nyamuhanga mw’omuhwa ono: “Wughende, wulye akalyo kawu n’obutseme, n’eripulya ebinyu byawu n’omuthima w’eritsanga.”​—Omugambuli 9:7.

15. Kikamanyisayaki “erianza eby’eriyitsemesya”?

15 Timoteo wakabiri 3:4 hakakanaya okw’abanzire eriyitsemesya neryo ibasighania Nyamuhanga omwa ngebe syabu. Wuminye ngoku omulhondo oyo syali bugha athi abandu banganzire kutsibu eriyitsemesya kwilhaba Nyamuhanga. Ekyo ikyanga kanganirye kithi bananzire Nyamuhanga kuke. Aliwe omulhondo akabugha athi “isibanzire” Nyamuhanga. Oyusomire ebye Biblia mwahandika athi omulhondo oyu “ahathe erithika-thika syali manyisaya athi bananzire Nyamuhanga. Eki kikamanyisaya kithi sibanzire Nyamuhanga nahake.” Eri n’ikunga erikalire oko bandu abanzire eriyitsemesya. E Biblia yikakanaya okwa banzire eriyitsemesya ng’abandu abakahekawa omw’itsemesya ly’engebe.​—Luka 8:14.

16, 17. Ni ky’erileberyako kyahi ekya Yesu ahiraho okwa by’eriyitsemesya?

16 Yesu mwathukangania ekya kikamanyisaya eribya n’amalengekania awatholere okwa by’eriyitsemesya. Mwaghenda “okw’iherukya” amaghenda ‘n’okw’irya inene.’ (Yoane 2:1-10; Luka 5:29) Okw’iherukya, sikwabya obwabu obukaghunza, neryo Yesu mwakolha ekithiko-thiko amahindulha amaghetse mwa bwabu. Okwa bundi buthuku, abandu babere bakatsweba Yesu busana n’erirya n’erinywa, mwakikangania ndeke-ndeke ngoku abandu abo sibawithe amalengekania awatholere.​—Luka 7:33-36.

17 Aliwe, Yesu mwathakolha eby’eriyitsemesya mwa bindu bikulhu omwa ngebe yiwe. Mwahira Yehova y’embere n’erikolha ekyo angathoka eriwathikya abandi. Abya inianayitheghekire eriholha olhuholho olhubi okwa  muthi busana n’erilhamya abandu. Yesu mwabwira abanza erimukwama athi: “Obutseme buli nenyu omughulhu abandu bakabatsuma n’eribendererya, n’eribalegha omo misindo yosi y’ebibi n’amabehi busana n’omwatsi waghe. Mutseme, mutsange kutsibu, kusangwa olhuhembo lhwenyu ni lhungyi elhubulha. Ko banendereraya bathya abaminyereri ababya embere syenyu.”​—Matayo 5:11, 12.

Thwanga yihighulha thuthi eby’eriyitsemesya? (Lebaya enungu 18)

18. Ni bibulyo byahi ebyanga thuwathikya erilebya nga thwanzire bungahi eby’eriyitsemesya?

18 Ni kyahi ekyanga thuwathikya erilebya nga thwanzire bungahi eby’eriyitsemesya? Thwangana yibulya: ‘Mbwino eriyitsemesya kya kikulhu omwa ngebe yaghe kwilhaba emihindano n’omubiiri w’erithulira? Ngana yitheghekire eriyiferezya ebindu ebyo ngatsemera kundi nganzire erikolera Nyamuhanga? Ngabya ingasombolha eby’eriyitsemesya, nganalengekanaya Yehova ng’akalhangira athi ebya ngasombolha?’ Kundi thwanzire Nyamuhanga n’erianza erimutsemesya, thukayihighulha okwa bindu ebyo thunasi ngoku biwire aliwe n’okwa bya thukalengakanaya thuthi byangana muponesya.​—Soma Matayo 22:37, 38.

NGOKU THWANGA TSEMA

19. Ni bahi abathe banga bana etseme?

19 Ekihugho kya Sitani kyabirileka abandu ibaghalhwa ahabw’emyaka nga 6,000. Ebiro by’enyuma-nyuma bino, ekihugho kyoswire mw’abandu abayanzire, abanzire esyosente, n’abanzire eby’eriyitsemesya. Bakalengekanaya okwa bya banga thunga kandi bakahira esyongumbu syabu sy’embere omwa ngebe. Aliwe abandu ng’abo sibangabana etseme y’okwenene! Mbaghane n’ekyo, Ekinywe kya Nyamuhanga, e Biblia kikabugha kithi: “Obutseme buli n’omundu oyuwithe Nyamuhanga wa Yakobo erimuwathikya, oyukayikethera Omwami Mukulhu Nyamuhanga wiwe.”​—Esyonyimbo 146:5.

20. Erianza Nyamuhanga lyabirikulethera lithi etseme?

20 Abaghombe ba Yehova kwenene bamwanzire, kandi obuli mwaka n’abandi bangyi nabu bakamuminya n’erimwanza. Eki kikakanganaya ngoku Obwami bwa Nyamuhanga bune muthabalha kandi ngoku bukisiya ibwaletha emighisa mingyi! Thwamakolha ebya Yehova anzire ithwakolha, thukamutsemesaya, kandi eki kikathulethera etseme y’okwenene. Abanzire Yehova bakendi syatsema kera na kera! Omo mwatsi owakakwamako, thukendisyakania okwa mighuma y’okwa mibere mibi eyikalhua omo lhwanzo lhw’eriyitsomana. Neryo thukendisyalhangira eyi ku yihukene okwa mibere y’abaghombe ba Yehova.