Erisako lyethu ly’omwaka owa 2018: ‘Abakalindirira Yehova basyabana amaaka mahya-mahya.’​—ISAYA 40:31.

ESYONYIMBO: 3, 47

1. Ni bitsibu nga byahi ebya thukaghumira, aliwe busana naki Yehova akatsemera abaghombe biwe abathaleghulha? (Lebaya ebisasani ebiri okw’itsuka.)

ENGEBE omwa kihugho kino yikalire. Ng’eky’erileberyako, abangyi omw’inywe balikyethu munemwaghalhwa omwa malhwere awakalire. Abandi abakulire, banemutsomana abahughu babu abakekelhuhire. N’abandi banemukolha kutsibu bakasondekania ebiyithawa by’amaka wabu. Kandi thunasi ngoku abangyi omw’inywe ku sibawithe kitsibu kighuma kisa okw’ebi, aliwe ku ni bingyi, kandi okwa buthuku bughumerera. Eki kikathwalha buthuku bungyi, akaghalha, n’esyosente nyingyi. Aliwe munakakasirye ndeke ngoku Yehova akendi bawathikya. Munasi ngoku emyatsi yikendi syuwana kundi ekyo ky’abirilhagha. Erikirirya lyenyu litholere iryabya irikatsemesaya Yehova!

2. Isaya 40:29 hakathuhimba hathi, aliwe ni sobya yahi eyikalire eya thwangana kolha?

2 Aliwe mbwino hakanayira iwayowa ebitsibu byawu nga bikalire kutsibu erighumira? Wamayowa wuthya, siwe musa. N’abandi baghombe ba Nyamuhanga abathaleghulha  abakera mubanayowa bathya. (1 Abami 19:4; Yobu 7:7) Ni kyahi ekya bawathikaya erighuma? Mubayikethera amaaka wa Yehova. E Biblia yikabugha yithi Nyamuhanga “akaha amaaka oko mundu oyukalhuha.” (Isaya 40:29) Aliwe, eky’obulighe, abandi bandu ba Nyamuhanga munabwire, bakanayowa erileka erikolera Yehova habw’akathuku kake ng’enzira eyuwene ey’erighumiramu ebitsibu byabu. Bakayowa erikolera Yehova nga si mughisa aliwe nga ni muheke. Neryo bakaleka erisoma e Biblia, erighenda okwa mihindano, n’eriyathulira. Ekyo kya na Sitani akanza ibakolha.

3. (a) Thwanga kakirya thuthi Sitani nuku syathutsekaye? (b) Omo mwatsi ono thukendi kania okuki?

3 Diabolo syanzire thukaghuma. Kandi anasi ngoku thuk’ongera erighuma thwamayihwerya omwa mubiiri wa Yehova. Neryo wamayowa iwamalhuha kinyamubiri n’omw’iyowa, ambi isiwaseghera haali oku Yehova. Ongera eriyithunda hakuhi nayu. E Biblia yikabugha yithi: “Asyabaha amaaka, n’eribahangania ndeke.” (1 Petero 5:10; Yakobo 4:8) Omo mwatsi ono, thukendi kania oku Isaya 40:26-31 ahakendi thweghesya oko maaka wa Yehova aw’erithughumya. Neryo thukendi kania okwa mibere ibiri eyanga leka ithwakolha bike omwa mubiiri wa Yehova, kandi thukendi minya erikolesya emisingyi ye Biblia nga lyanga thuwathikya lithi eriyiyinia.

ABAKALINDIRIRA YEHOVA BASYABANA AMAAKA MAHYA-MAHYA

4. N’isomo lyahi erya thwang’igha omu Isaya 40:26?

Yehova angana kuha akaghalha aka wukayithagha erighumira ebitsibu byawu

4 Soma Isaya 40:26. Sihali oyuwabirithoka eribara esyongununu syosi esiri omwa kyanya. Abanya sayansi bikirirye ngoku omwa galakisi yethu nyisa mwanganabya esyongununu nga bbiliyoni 400. Aliwe kandi Yehova akaha obuli ngununu y’erina. Ekyo kikathweghesayaki oku Yehova? Amabya iniangana thatsomana esyongununu esithawithe ngebe, thalengekania ng’angabya iniakayowa athi busana nawu! Wukamukolera, butsira kundi wutholere iwakikolha, aliwe kundi wumwanzire. (Esyonyimbo 19:1, 3, 14) Thatha wethu w’olhwanzo anasi ebyosi ebikuhambireko. E Biblia yikabugha yithi anasi omughanzo w’esyonzwiri sy’oko mithwe yethu. (Matayo 10:30) Yehova anzire ithwaminya ngoku “anasi ebyo abathe kw’olhubanza bakalhabamu.” (Esyonyimbo 37:18, NW) Ahathe erithika-thika, Yehova akalhangira ebitsibu byosi ebya wuwithe, kandi angana kuha amaaka agho wukayithagha erighumira obuli kitsibu.

5. Thwangakakasya thuthi ngoku Yehova angana thughumya?

5 Soma Isaya 40:28. Yehova ya Nzuko y’akaghalha kosi. Ng’eky’erileberyako, thalengekania okwa kaghalha ak’akaha eryuba lyethu. Omunya sayansi iya David Bodanis mwabugha athi obuli sekendi eryuba likahulhukaya akaghalha ak’ingene n’erihuta ery’esyobbiliyoni n’esyobbiliyoni esy’esyobbomu esye atomiki. Owundi oyukasekulhaya mwabaririra athi akaghalha ako eryuba likahulhukaya omwa sekendi nguma kamakolesibwa ng’amasenyerezi ikangana kolesibwa n’abandu bosi omwa kihugho kyosi habw’emyaka 200,000! Ahathe erithika-thika, Yehova oyukaha  eryuba ly’akaghalha, angana thuha akaghalha akathukayithagha erighumira ebitsibu byethu.

6. Engomo ya Yesu ni nyibuya yithi, kandi eki kikathuhambako kithi?

6 Soma Isaya 40:29. Erikolera Yehova likathuha etseme nene. Yesu mwabwira abigha biwe athi: “Mwimaye engomo yaghe, muhekeyo.” Kandi mw’ongerako athi: “Nenyu mwasyabana erilhuhuka omwa mithima yenyu. Kusangwa engomo yaghe ni nyibuya, n’omuheke waghe anguhirire.” (Matayo 11:28-30) Eki ni kwenene! Hakanayira, ithwayowa ithulhuhire thukaghenda okwa mihindano kutse omw’ithulira. Aliwe thukayowa thuthi thukalhuayo? Thukayowa ithwabirihumulikana n’eriyitheghekera ndeke erighumira ebitsibu byethu. Omo kwenene, engomo ya Yesu ni nyibuya.

7. Iha ekyalholirweko ekikakanganaya ngoku ebiri omu Matayo 11:28-30 bihikire.

7 Thulebaye ekya mwali wethu mughuma alholhako. Akwire obulhwere bw’enduhi y’olhughumerera, erilhuha kw’obwongo, n’omuthwe ow’akalhuma kutsibu. Neryo hakanayira ikyamukalira erighenda okwa mihindano. Aliwe, kiro kighuma, abere abirihira h’akaghalha k’erighenda okwa muhindano, mwahandika athi: “Omukania abya ahambire okw’ihwa amani. Mwakana lhabibwa omwa mibere y’olhukeri n’eritsomana kyamaleka ingathoghongya n’emisonia. Mwakana ny’ibukya ngoku aha ngatholere eribya kw’okwa mihindano.” Mwatsema eribya imwahiraho akaghalha k’erihindana!

8, 9. Omukwenda Paulo amanyisayaki akahandika athi: “Omughulhu indi mwolho, indi mbangyi”?

8 Soma Isaya 40:30. Thwanganabya ithunasi mibiiri mingyi, aliwe sithwanga thoka eyosi omwa kaghalha kethu. Eki ni kindu ekya ithwe bosi thutholere ithwaminya. Omukwenda Paulo abya iniangana thoka erikolha bingyi, aliwe abya isyanga kolha obuli kindu eky’anzire erikolha. Abere abiribwira Yehova eriyowa liwe, Yehova mwamubwira athi: “Obuthoki bwaghe bukahikana omo bwolho bwawu.” Paulo mwayitheghererya ekya Yehova amubwira. Ky’ekyaleka Paulo iniabugha athi: “Omughulhu indi mwolho, indi mbangyi.” (2 Abanya Korinto 12:7-10) Amanyisayaki?

9 Paulo mwaminya ngoku hane eby’athe angathoka ahabw’iwe. Abya akayithagha obuwathikya erilhua okwa wundi oyumulengirye amaaka. Omulimu abuyirire wa Nyamuhanga iniakaha Paulo y’amaaka omughulhu atsekire. Kandi mwamuwathikya kwilhaba n’aho. Omulimu wa Nyamuhanga kandi mwaha Paulo y’akaghalha k’erikolha ebindu eby’athe angathoka omwa kaghalha kiwe. Nethu ku byanganabya bithya. Yehova amathuha omulimu wiwe abuyirire, ithukendi ghuma ndeke!

10. Yehova mwawathikya athi Dawudi erighumira ebitsibu biwe?

10 Omwami Dawudi mwayilhangirira ngendo nyingyi omulimu wa Nyamuhanga akamuha akaghalha. Mwabugha athi: “Busana nawu ngalhaba omo mulhondo; busana na Nyamuhanga waghe ngalenga oko lhuhimbo.” (2 Samweli 22:30) Ng’olhuhimbo lhuuli olhwa thuthe thwanga thoka erilengako, okwa bundi buthuku ebitsibu byethu bikanabya bingyi indi sithwanga thoka eribighunzaho ahabwethu. Thukayithagha obuwathikya bwa Yehova.

11. Omulimu abuyirire akathuwathikaya athi erighumira ebitsibu byethu?

11 Soma Isaya 40:31. Amasamba syangathoka eribya omwa kyanya okwa kaghalha  kawu kasa. Akaghalha akakalhua okwa muyagha kakasumbira erisamba ly’omwa kyanya. Eki kikaleka erisamba iryaghulhuka lhughendo lhuuli kandi irithakolesya kaghalha kanene. Neryo wamabya n’ekitsibu ekikalire, ambi iwalengekania okwa lisamba. Saba Yehova akwongere akaghalha erilhabira omwa “muwathikya, omulimu abuyirire.” (Yoane 14:26) Thwangana saba Yehova athuhe omulimu wiwe obuli kiro, okwa ndambi yosi-yosi. Kutsibu-tsibu thwanganayowa ithutholere erisaba Yehova y’obuwathikya omughulhu hangabya erithendi yitheghererania n’abalikyethu omwa kithunga. Aliwe erithendi yitheghererania ng’eri likasa busana naki?

12, 13. (a) Busana naki hakanabya erithendi yitheghererania omwa Bakristayo? (b) Ebya Yozefu alhabamu bikathweghesayaki oku Yehova?

12 Erithendi yitheghererania likabya kundi ithwe bosi sithuhikene. Hanganayira, ebya bandi bakabugha kutse erikolha ibyathuhithania, kutse ithwahithania abandi. Eri lyanganabya irengwako erikalire. Aliwe kikathuha akaghisa ak’eribya bathaleghulha oku Yehova. Kithi? Omw’igha erikolha haghuma n’abalikyethu omwa bughuma. Yehova abanzire nomwakine indi sibahikene, nethu thutholere ithwabanza.

Yehova mwathasighania Yozefu kandi nawu syendi kusighania (Lebaya enungu 13)

13 Yehova syalikakiraya abaghombe biwe okw’irengwako. Ekyo thukakiminya okwa byabya oku Yozefu. Yozefu iniakine mulhwana, baghalha babu mubamukwa erihali. Mubamughulya ng’omukobe, neryo mwathwalhwa e Misiri. (Enzuko 37:28) Yehova abya inianalhangire ebikabya kandi ahathe erithika-thika angabya imwayowa nabi akalhangira munywani wiwe, omughombe muthaleghulha Yozefu, akakolhwa nabi. Aliwe, Yehova mwathakikakirya. Enyuma waho, Yozefu abere akahangirirwa indi mwakanza erihamba muka Potifari n’erihirwa omwa ngomo, Yehova kandi mwathakakirya ekyo. Aliwe Nyamuhanga mwanasighania Yozefu? Eyihi. E Biblia yikabugha yithi “Omwami Mukulhu mwabya haghuma na Yozefu. Ebyosi akolha, Omwami Mukulhu mwatsumulhabyo.”​—Enzuko 39:21-23.

14. Thukaghasirawa thuthi thwamathendi bika ekinigha?

14 Ekindi ky’erileberyako ky’ekya Dawudi. Abangyi sibalibathakolhwa nabi nga  Dawudi. Nomwabine, munywani wa Nyamuhanga oyo mwathaligha eryusulha mw’ekinigha. Mwahandika athi: ‘Wuleke erihithana wuleke eriaghalirwa! Siwuhaghukaye omuthima, likaletha erikolha ebibi lisa.’ (Esyonyimbo 37:8) Enzumwa ngulhu y’erileka erihithana, kutse erithendikwa ekinigha, ly’eryanza erigherererya Yehova. “Syali thuliha ngoku ebibi byethu n’amalholho wethu bitholere” aliwe akathughanyira. (Esyonyimbo 103:10) Hane eyindi mighaso eyiri omw’ileka erihithana. Ng’eky’erileberyako, erihithana lyangana leka omundu iniakwa epuresya, iniathunga n’ebitsibu omwa mihumulire. Lyangana tsandya obukindi n’enuni, n’ebyalya erithendi yiswa ndeke omwanda. Kandi erihithana likaleka ithuthalengekania ndeke. Thwangana bugha kutse erikolha ebikahithanaya abandi, kandi eki ikyangana leka ithwalhuha kw’obwongo habw’obuthuku buuli. Kyuwene kutsibu eribya iwunathekene. E Biblia yikabugha yithi: “Omuthima owakayibombeka ni ngebe y’omubiri.” (Emisyo 14:30) Neryo, thwanga kolhaki abandi bamathuhithania, kandi thwanga hiraho thuthi obuholho na mulikyethu? Ithwangana kolesya erihabulha lye Biblia.

BALIKYETHU BAMATHUGHUNZA AMANI

15, 16. Thwanga kolhaki omundu amathuhithania?

15 Soma Abanya Efeso 4:26. Sikiri thuswekaya abandu abathekolera Yehova bamathukolha nabi. Aliwe mulikyethu Omukristayo kutse omuhughu wethu amabugha kutse erikolha ekyanga thuhithania, ikyangana thughunza amani. Kandi ibbwa thwamayowa nga sithwang’ibirirwa ekiryabya? Thunemwendibika ekinigha, obundi nibya habw’emyaka mingyi? Kutse ithunemwendi ghendera okw’ihabulha lye Biblia ery’erihira h’obuholho omwa byalhuba? Thwamalindirirya erikania n’oyulyathuhithanaya, ikikendi ongera erikalha erihiraho obuholho.

16 Kandi ibbwa mughalha wethu amakuhithania kandi iwabya isiwang’ibirirwa? Wangakolhaki erihira h’obuholho? Eky’erimbere, wangana saba Yehova. Mulembe-lembe akuwathikaye wuthoke erikanirania na mulikyenyu. W’ibuke ngoku mughalha wenyu nayu ni munywani wa Yehova. (Esyonyimbo 25:14) Nyamuhanga amwanzire. Yehova akatsomana banywani biwe omwa lhukeri kandi anzire nethu ekyo ikyathwanakolha. (Emisyo 15:23; Matayo 7:12; Abanya Kolosai 4:6) Ekyakabiri, lengekanaya ndeke okwa bya wukayabwira mulikyenyu. Isiwalengekanaya wuthi alyakighenderera. Obundi alyabulikira iniamabirisobya kutse imuwuthe muyitheghererya. Ibya iwangana ligha ngoku nawu wanganabya imuwukana leka ikyabya. Wukakania nayu iwangana tsuka na bino, “Obundi ningye nakithwere nabi, aliwe muligholho wabere wukakania naghe, munganayowa . . .” Erikanirania lyenyu lyamathendihiraho obuholho, isiwabikyako. Hira mulikyenyu y’omwa misabe. Saba Yehova amutsumule n’erikuwathikya erihwerya amalengekania wawu w’okwa mibere yiwe mibuya. Wangana kakasya ngoku Yehova akendi tsemera akaghalha akawukahiraho erisondekania obuholho na mulikyenyu, nayu omunywani wa Nyamuhanga.

THWAMAYOWA NABI BUSANA N’EBYA THWAKOLHA KERA

17. Yehova akathuwathikaya athi erisuba-subania obughuma bwethu nayu thwamakolha ekibi, kandi busana naki thutholere ithwaligha obuwathikya obo?

17 Abandi bakayowa nga sibatholere erikolera Yehova kundi babirikolha ebibi ebikalire.  Eriyowa nga thuli kw’olhubanza lyangana thughunza kw’obuholho, etseme, n’akaghalha. Omwami Dawudi mwayowa omwa muthima mw’eyo iniakahandikirirawa neryo mwabugha athi: “Omughulhu ndakangaya ebibi byaghe, omubiri waghe mwahwerekerera, busana n’erisimba lyaghe omwa musibo wosi. Muwanyisuyira omwa musibo wosi n’omwa kiro kyosi.” Eky’obutseme, Dawudi mwathunga obuthubaha obw’erikolha ebya Yehova anzire abaghombe biwe ibakolha. Mwahandika athi: “Neryo munakukangya ebibi byaghe, nawu muwabuyira embugha y’ebibi byaghe.” (Esyonyimbo 32:3-5) Wamabya iwabirikolha erilholho erikalire, Yehova anayitheghekire erikughanyira. Anzire iniakuwathikya erisuba-subania obughuma bwawu nayu. Aliwe wutholere iwaligha obuwathikya obw’akakuha erilhabira omwa basyakulhu. (Emisyo 24:16; Yakobo 5:13-15) Neryo siwulindiriraye! Iwe erisyabana engebe y’erikotha kiseghemere okw’eki. Obundi wukina yowa nabi iwabirinaghanyirwa. Wangakolhaki?

18. Eky’erileberyako kya Paulo kyanga wathikya kithi abakayowa nga sibatholere erikolera Yehova?

18 Omukwenda Paulo mwanayowa nabi busana n’ebibi ebyo akolha kera. Mwabugha athi: “Ingye indi muke okwa bakwenda bosi, kandi sinyitholere eryahulhwa mwa mukwenda kusangwa mun’endererya ekanisa ya Nyamuhanga.” Nibya mw’ongerako athi: ‘Nikwa nyiri ngoku nyine busana n’olhukogho lhwa Nyamuhanga.’ (1 Abanya Korinto 15:9, 10) Yehova abya inianasi ngoku Paulo syahikene. Aliwe mwaligha Paulo omwa mibere eyo, kandi mwanza Paulo aminye ekyo. Wamabya kwenene iwukayowa nabi busana n’ebya wakolire kandi iwabiribibwira Yehova, n’abasyakulhu kyamayithaghisibwa, omo kwenene Yehova iniakendi kughanyira. Ligha ngoku Yehova abirikughanyira kandi ligha erighanyira liwe!​—Isaya 55:6, 7.

19. Erisako ly’omwaka wa 2018 ly’eryahi, kandi busana naki litholere?

19 Thukendibya thune museghera hakuhi n’enduli y’omughulhu ono, thubye ithunasi ku thukendi bana bitsibu bingyi. Aliwe thutholere ithw’ibuka ngoku Yehova, oyukaha “amaaka oko mundu oyukalhuha n’oko yuthawithe maaka,” angana thuha ekyosi-kyosi ekya thukayithagha erimukolera buthaleghulha. (Isaya 40:29; Esyonyimbo 55:22; 68:19) Omo mwaka wa 2018, thukendibya thuk’ibukibwa ekwenene y’omughaso eno obuli hindana okwa Kisenge ky’Obwami n’erilhangira ebinywe by’erisako lyethu ly’omwaka bino: ‘Abakalindirira Yehova basyabana amaaka mahya-mahya.’​Isaya 40:31.