“Neryo lino Nyamuhanga wethu, thukakuha ewasingya n’eripipa erina lyawu ly’olhukengerwa.”​—1 EMYATSI Y’EMIGULU 29:13.

ESYONYIMBO: 80, 50

1, 2. Yehova ni mwenge athi?

YEHOVA ni Nyamuhanga oyukahithaya. Obuli kindu ekya thuwithe kikalhua okw’iyo. Eby’obughuli ebyosi ebiri omwa kihugho ni biwe, kandi akabikolesaya omw’isighika engebe. (Esyonyimbo 104:13-15; Hagai 2:8) E Biblia yikathubwira ngoku hakanayira Yehova iniakolesya ebindu by’obughuli ebi omwa nzira y’ekithiko-thiko eriha abandu b’ebya bakayithagha.

2 Ng’eky’erileberyako, Yehova mwaha Abaisraeli b’emana n’amaghetse habw’emyaka 40 ibane omo mbwarara. (Eriluayo 16:35) Ekyalhwiririramu, mubathabulha kindu kyosi-kyosi. (Nehemia 9:20, 21) Enyuma waho, Yehova mwaha omuminyereri Elisa y’obuthoki bw’erikanyia amaghutha make w’omukwakali omuthaleghulha. Ekihembo ekyalhua oku Nyamuhanga eki mukyawathikya omukali oyu erithuha amabanza kandi hamasaka n’esyosente esyanga muwathikya iyo n’abaghalha biwe. (2 Abami 4:1-7) Kandi busana n’obuwathikya bwa  Yehova, omwa nzira y’ekithiko-thiko Yesu mwaha abandu b’ebyalya nibya n’esyosente kyamayithaghisibwa.​—Matayo 15:35-38; 17:27.

3. Omo mwatsi ono thukendi kania okuki?

3 Yehova angana thwamu erikolesya ekyosi-kyosi eriwathikya ebihangikwa biwe. Kandi, akabwira abaghombe biwe athi nabu baheyo ekya banga thoka erisighika omubiiri w’ekithunga kiwe. (Eriluayo 36:3-7; soma Emisyo 3:9.) Busana naki Yehova akanza nethu ithwakolesya ebindu byethu by’obughuli erimuha? Abaghombe ba Yehova ab’omwa buthuku bwe Biblia mubasighika bathi omubiiri wiwe? Munabwire ekithunga kikakolesaya kithi esyosente esikahebawayo? Omwatsi ono akendi subirya okwa bibulyo ebi.

BUSANA NAKI THUKAHA YEHOVA?

4. Ni kyahi ekya thukakanganaya Yehova thukasighika omubiiri wiwe?

Thukaha Yehova kundi thumwanzire

4 Thukaha Yehova kundi thumwanzire kandi busana n’erimusima. Emithima yethu yikatsema thukalengekania okwa byosi ebya Yehova abirithukolera. Omwami Dawudi mwayowa athya akasoborera ebya yithaghisibawa erihimba ehekalu. Dawudi mwabugha athi obuli kindu ekya thuwithe kikalhua oku Yehova kandi athi n’ekyosi-kyosi ekya thukaha Yehova kikalhua okwa by’abirithuha.​—Soma 1 Emyatsi y’Emigulu 29:11-14.

5. E Biblia yikathukangiriraya yithi ngoku erihayo ahathe eriyikukumirira ni kitsweka kikulhu omw’iramya ly’okwenene?

5 Kandi thuha Yehova kundi ni nzira y’erimuramiryamu. Omwa syonzoli, omukwenda Yoane mwowa abaghombe ba Yehova omwa lhubulha bakabugha bathi: “Omukama wethu na Nyamuhanga wethu iwe wutholere eribana olhukengerwa, n’erisikya n’obuthoki, kusangwa wahangika ebindu byosi, kandi busana n’erisonda lyawu mubyabyaho kandi mubyahangikwa.” (Eribisulirwa 4:11) Ahathe erithika-thika, Yehova atholere olhukengerwa lhwosi n’erisikya, neryo thwanzire ithwamuha ekya thukatsemera. Erilhabira omu Musa, Yehova mwalhaghira ekihanda kye Israeli erihindana okwa biro bikulhu bisathu omo mwaka. Ekighuma ky’okw’iramya lyabu okwa biro bikulhu ebi mwabya erihererya Yehova. Abandu mubabwirwa indi “sibasyahulhukira embere sy’Omwami Mukulhu yo byalha bisa.” (Eryibuka Ebihano 16:16) Na munabwire, ekitsweka kikulhu ky’okw’iramya lyethu ly’erihayo ahathe erikakwa. Omwa nzira eyi, thukakanganaya ku thukatsomana n’erisighika omubiiri w’ekithunga kya Yehova.

6. Busana naki ni kibuya ithwe erihithya? (Lebaya ekisasani ekiri okw’itsuka.)

6 Ni kibuya ithwe erihithya butsira erianza erihebwa lisa. (Soma Emibiri 20:35.) Thalengekania oko mwana oyo ababuthi biwe bakabya ibane muhererya akasente neryo inimya okwa kasente ako iniaghulira ababuthi biwe b’ekihembo. Ekihembo kiwe eki kikaleka ababuthi ibayowa bathi? Kutse thalengekania okwa mutemburi oyuwikere n’ababuthi biwe neryo iniabaha akasente k’eripangisya kw’enyumba kutse ak’erighulha kw’ebyalya. Ababuthi biwe banganabya  isibalengekenie bathi angakolha ekyo, aliwe bakaligha ekihembo kiwe. Busana naki? Kundi ni nzira y’erikanganiryamu kw’akasima ebya bakamukolera. Omwa nzira iya n’eyo, Yehova anasi ngoku thutholere ithwamuha okwa bya thukalhangira mwa by’obughuli.

NGOKU ABAGHOMBE BA NYAMUHANGA BAHAYO OMWA BUTHUKU BWAKERA

7, 8. Abandu ba Nyamuhanga abakera mubahiraho bathi eky’erileberyako bakahayo (a) erisighika emibiiri mirebe? (b) erisighika omubiiri wiwe?

7 Omwa Biblia, thukigha ngoku abandu ba Yehova mubahayo erisighika omubiiri wiwe. Ihakanayira ibahayo busana n’emibiiri mirebe. Ng’eky’erileberyako, Musa mwahira omwa Baisraeli mw’omuhwa w’erihayo busana n’obuhimbe bw’ehema y’erihindanamo. Enyuma waho, Omwami Dawudi mwakolha ekiri ng’ekyo busana n’obuhimbe bw’ehekalu. (Eriluayo 35:5; 1 Emyatsi y’Emigulu 29:5-9) Omwa buthabali bw’Omwami Yoasi, abahereri mubasuba-subania e hekalu omw’ikolesya esyosente esyo bandu bahayo. (2 Abami 12:4, 5) Omwa kighonye ky’erimbere, Abakristayo mubaminya ngoku enzalha nene yabiriwa e Yudea neryo ngoku balikyethu bakayithagha obuwathikya. Neryo obuli Mukristayo mwathwamu erithumira balikyethu ekyo angathoka.​—Emibiri 11:27-30.

8 Kandi abandu ba Yehova mubahayo esyosente erisighika ababya bakasondolha omubiiri wiwe. Ng’eky’erileberyako, omwa Mighambo ya Musa, Abalawi mubathahebwa omwandu ng’ebindi bihanda. Neryo abandi Baisraeli ibakaha Abalawi b’ekighuma ky’ikumi. Eki mukyaleka Abalawi ibahwerya amalengekania wabu okwa mubiiri wabu eyiri ehema. (Emiganzo 18:21) Omwa nzira iya n’eyo, abakali abenge mubakolesya ebya bawithe erisighika Yesu n’abakwenda biwe.​—Luka 8:1-3.

Obuli mundu iniakahayo, eritsuka oko mughuda kutsibu erihika oko munakwa kutsibu

9. Kera, ebikahebawayo ibikalhua hayi?

9 Ebikahebayo ibikalhua omwa nzira muthina-muthina. Abaisraeli abahayo busana n’obuhimbe bw’ehema y’erihindanamu bangabya imubahayo okwa bindu by’obughuli ebyo balhusaya e Misiri. (Eriluayo 3:21, 22; 35:22-24) Omwa kighonye ky’erimbere, abandi Abakristayo mubaghulya okwa bindu byabu, ng’amalima kutse esyonyumba, n’erilethera abakwenda b’esyosente. Neryo abakwenda mubakolesya esyosente esyo eriwathikya balikyethu abakayithagha obuwathikya. (Emibiri 4:34, 35) Abandi Bakristayo ibakabya ibanemuhira lhuhandi esyosente esy’erisighika omubiiri. (1 Abanya Korinto 16:2) Neryo obuli mundu iniakahayo, eritsuka oko mughuda kutsibu erihika oko munakwa kutsibu.​—Luka 21:1-4.

NGOKU THUKAHAYO MUNABWIRE

10, 11. (a) Thwanga gherererya thuthi abaghombe ba Yehova abenge abakera? (b) Wukayowa wuthi okw’isighika omubiiri w’Obwami?

10 Munabwire, nethu thwangana sabwa erihayo habw’ekighendererwa kirebe. Obundi ekithunga kyenyu kine mutheghekania  erithasyuwania Ekisenge ky’Obwami kutse erihimba ekihyaka. Kutse obundi ekyaghanda ky’omuthahulha ky’ewenyu kikayithagha erithasyuwanibwa. Kandi ithwangana thoka eriwathikya okwa sente esikakolesibawa okwa lhuhindano lhwethu. Kutse obundi balikyethu omwa wundi mwanya bawire kw’ekitsinduli neryo bakayithagha obuwathikya. Kandi ebya thukahayo bikasighika abamisani, abatemburi b’embaghane, abalebererya b’omuthimbo, n’abakakolera okwa kyaghanda kikulhu n’okwa mithahulha omwa kihugho kyosi. N’ekithunga kyenyu kyanganabya ikine muthuma obuwathikya erisighika obuhimbe bw’erihimbira balikyethu b’emyanya eyikabya mw’emihindano eminene-minene n’obuhimbe bw’Ebisenge by’Obwami omwa bindi bitsweka.

11 Ithwe bosi thwangana hayo ekyosi-kyosi erisighika omubiiri owa kithunga kya Yehova kinemukolha omwa biro by’enyuma-nyuma bino. Ebingyi ebikahebawayo sibiri minyawa. Thukabya thukathogherya omwa hisanduko ehiri omwa Kisenge ky’Obwami kutse erihayo omw’ikolesya e jw.org, sithulibwira abandi nga thwahereyo singahi. Kandi ibbwa wamayowa ebya wukahayo nga ni bike kutsibu? Okwenene kuli kuthi ebingyi ebikahebawayo omwa kithunga bikalhua omwa hike-hike ehyo balikyethu bakahayo. Nibya balikyethu abanakwa bakagherereraya Abakristayo abakera abe Makedonia. Babya “bera kutsibu,” aliwe mubasaba erilighirwa erihayo kandi mubahayo ndeke.​—2 Abanya Korinto 8:1-4.

12. Ekithunga kikalengaho kithi erikolesya ndeke ebikahebawayo?

12 Akathunga Akakasondolha ni kathaleghulha kandi ni k’amenge omwa nzira eya kakakoleserayamu ebikahebawayo. (Matayo 24:45) Abali okwa kathunga ako bakasaba nuku bathwemu ndeke n’erithegheka ndeke ngoku bangakolesya esyosente. (Luka 14:28) Omwa buthuku bwe Biblia, abalhume abathaleghulha ababya bakalebererya ebikahebawayo ibakalhangira bathi bikakolesibawa omw’iramya lya Yehova lisa. Ng’eky’erileberyako, Ezera mwasuba e Yerusalemu iniane n’eby’obughuli ebyo Mwami we Persia ahayo, imwamuli ehoro, efeza, n’ebindi bindu eby’obughuli obulhabire okwa syadola miliyoni 100 (U.S.) esya munabwire. Ezera mwalhangira ebya hebawayo ebi ibikahebawa Yehova. Neryo mwaha obusondoli bw’embaghane obw’eribitheya bakalhaba omwa bihugho ebitsandire. (Ezera 8:24-34) Enyuma w’emyaka mingyi, omukwenda Paulo mwasorokya esyosente eriwathikya balikyethu be Yudea ababya omwa buyithawa. Mwalhangira athi abathwalha esyosente ‘bakakolha ekitholere, embere sy’Omukama n’akandi embere sy’abandu.’ (Soma 2 Abanya Korinto 8:18-21.) Munabwire, ekithunga kyethu kikagherereraya Ezera na Paulo omw’ikolesya ndeke ebikahebawayo.

13. Lino-lino, ni kyahi ekyabirileka ekithunga ikyakolha esyombinduka sirebe?

13 Eka yangana kolha esyombinduka omwa mikoleserye y’esyosente syabu nuku sibakolesaye sinene okwa syabakingiraya. Kutse ibasondekania emibere y’eryolhoberyamu engebe nuku bakolere Yehova ya bingyi. Kwa bine bithya n’omwa kithunga kya Yehova. Lino-lino, muhabere emibiiri mingyi eyikatsemesaya, kandi ihakanayira esyosente nyingyi isyakolesibwa kwilhaba esikahebawayo. Neryo ekithunga, ng’eka, kikasondekanaya esyonzira esy’erikeheryamu emihulhukirye n’eryolhobya emibiiri nuku kyanga kolha bingyi ebyuwene omwa byamukahayo.

 EMIGHASO Y’EBYA MUKAHAYO

Erihayo lyenyu likasighika omubiiri wethu ow’ekihugho kyosi (Lebaya enungu 14-16)

14-16. (a) Ebya mukahayo bikakolesibawa bithi? (b) Emibiiri eyi yabirikuwathikya yithi iwe ahabwawu?

14 Abangyi abamabirighunza omo kwenene mo myaka mingyi bakabugha bathi lino ekithunga kikabaha bingyi kwilhaba kera. Lino thuwithe e jw.org ne JW Tivi. Thuwithe e Biblia eye New World Translation of the Holy Scriptures omwa mibughe mingyi. Omwa 2014/2015, olhuhindano lhw’ekihugho kyosi olhw’ebiro bisathu olhwa “Tsuka Erisondya Obwami!” mulhwabere omwa bisathiro ebinene-binene omwa syotawuni nene 14 omwa kihugho kyosi. Obuli mundu oyuwahindana kulho mwatsema!

15 Abangyi babirikangania ku bakasima ebihembo ebi erilhua omwa kithunga kya Yehova. Ng’eky’erileberyako, omulhume na mukali wiwe abali omwa mubiiri w’omughulhu wosi e Asia mubahandika bathi: “Muthwathumwa omwa tawuni nyike. Neryo hakanayira ithwayowa nga thuli ithwibene, n’eribirirwa obunene bw’omubiiri wa Yehova. Aliwe thukabya thukalebya esyondegheka muthina-muthina esye JW tivi, thukibuka ngoku thuli b’okwa lhughanda lhw’abalikyethu olhw’ekihugho kyosi. Balikyethu bakatsema busana ne JW tivi. Thukowa ibane mubugha bathi bakabya babirilebya endegheka y’okwezi, bakayowa ibali hakuhi-kuhi n’ab’okwa Kathunga Akakasondolha. Lino batsemire kwilhaba kera busana n’eribya b’okwa kithunga kya Nyamuhanga.”

16 Omwa kihugho kyosi, Ebisenge by’Obwami nga 2,500 mubikana himbwa kutse erithasyuwanibwa. Balikyethu omwa kithunga kighuma e Honduras mubabugha bathi ibakakandira erithunga Ekisenge ky’Obwami, aliwe lino babirikibana. Mubahandika bathi: “Thukayowa ithutsemire eribya baghuma b’okw’ihiika lya Yehova n’eribya omwa lhughanda lhw’abalikyethu olhw’ekihugho kyosi.” N’abandi ku bakanayowa bathya bakathunga e Biblia n’ebindi bitabu omwa mubughe wabu, omughulhu balikyethu bakabawathikaya bakawa  kw’ekitsinduli, kutse bakalhangira ebibuya ebikalhwiririra omw’ithulira ahali abandu bangyi omwa bulhambu bwabu.

17. Munabwire thukaminya thuthi ngoku Yehova anemusighika ekithunga kiwe?

17 Abangyi abathe bema ba Yehova sibanga yitheghererya nga thukathoka thuthi ebyosi ebi omw’ihayo ahathe erikakwa. Omukulhu omwa kampuni nene mwabungira omughuma w’okwa myanya eya thukahulhukiraya mw’ebitabu. Mwasweka akalhangira ngoku omubiiri wosi akakolhawa n’abakayihayo, kandi kw’akasighikawa omw’ihayo, kandi isihali erisorokya esyosente. Mwabugha athi ebya thukakolha sibitholere bikathokekana. Ekyo ni kwenene! Thunasi ngoku kikathokekana kundi Yehova anemusighika omubiiri oyu.​—Yobu 42:2.

EMIGHISA EYIKASA BUSANA N’ERIHERERYA YEHOVA

18. (a) Ni mighisa yahi eya thukabana thukahayo erisighika Obwami? (b) Thwanga kangirirya thuthi abaana bethu n’abahyaka erikolha ekyo?

18 Yehova akathuha ekitsumbi n’akaghisa k’erisighika omubiiri munene w’Obwami. Akathukakasaya ngoku thwamakolha ekyo, iniakendi thutsumulha. (Malaki 3:10) Yehova akathulhaghanisaya athi thwamamuha ahathe eriyikukumirira, emyatsi iyikendyuwana. (Soma Emisyo 11:24, 25.) Kandi akathubwira athi ithukendi tsema thwamaha, kundi “erihithya likaletha obutseme kwilhaba erihabwa.” (Emibiri 20:35) Omwa bya thukabugha n’ebya thukakolha, thwangana kangirirya abaana bethu n’abahyaka ngoku banga sighika omubiiri oyu n’eritsemera emighisa mingyi.

19. Omwatsi ono amakuhimba athi?

19 Obuli kindu ekya thuwithe kikalhua oku Yehova. Thukabya thukamuha, thukakanganaya ku thumwanzire kandi ku thukalhangira ebyosi eby’akathukolera mwa by’omughaso. (1 Emyatsi y’Emigulu 29:17) Abaisraeli babere bakahayo erisighika obuhimbe bw’ehekalu, “mubatsema kusangwa mubahithya n’omuhwa, kusangwa mubaha n’omuthima ahikene n’omuhwa.” (1 Emyatsi y’Emigulu 29:9) Nethu ka thulhole embere eribana etseme n’erighasirwa thukaha Yehova okwa by’abirithuha.