Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwerikuminibiri 2017

Ababuthi​—Muwathikaye Abaana Benyu Eribana ‘Amenge w’Eribathwalha okw’ilhamibwa’

Ababuthi​—Muwathikaye Abaana Benyu Eribana ‘Amenge w’Eribathwalha okw’ilhamibwa’

“Kandi wunasi eritsuka omwa bwana bwawu wabiriminya Amasako Abuyirire, aw’akathoka erikuha amenge w’erikuthwalha okw’ilhamibwa.”​—2 TIMOTEO 3:15.

ESYONYIMBO: 141, 134

1, 2. Busana naki abandi babuthi bangana hangya-hangya abaana babu bakayihayo oku Yehova n’eribatizibwa?

ESYONGUMI sy’abigha be Biblia banemuyihayo oku Yehova n’eribatizibwa. Abangyi b’okw’ibo ni balere abakakulira omo kwenene kandi ababirithwamu erikwamayo. (Esyonyimbo 1:1-3) Wamabya iwuli mubuthi Mukristayo, obundi wukalindirira n’omuhwa ekiro mughalha wawu kutse mwali wawu akendisya batizibwa.​—Lebaya na 3 Yoane 4.

2 Aliwe, wanganabya n’erihangya-hangya. Wanganabya iwabirilhangira abalere balebe bakabatizibwa aliwe enyuma waho ibatsuka erithika-thika nga nina kibuya ibo erighendera okwa bihano bya Nyamuhanga. Nibya n’abandi babirisighania ekwenene. Neryo iwangana tsuka erilengekania wuthi omwana wawu angana tsuka erikolera Yehova aliwe kandi olhwanzo olhw’alhue awithire ekwenene ilhwatsuka eriholhoka. Omwana wawu inianganabya ng’Abakristayo balebe  abe Efeso ab’omwa kighonye ky’erimbere. Yesu mwabakaniako athi: “Siwukinyanzire lino ng’erimbere.” (Eribisulirwa 2:4) Wanga wathikya wuthi omwana wawu eribya iniane n’olhwanzo olhughumire n’erithoka “eryusuka busana n’erilhama”? (1 Petero 2:2) Thwangan’ighira okwa ky’erileberyako kya Timoteo.

“WABIRIMINYA AMASAKO ABUYIRIRE”

3. (a) Timoteo mwabya athi Mukristayo, kandi mwakolesya athi eby’igha? (b) Ni nzira syahi isathu esy’erighiramu esya Paulo abwira Timoteo?

3 Omurundi w’erimbere omukwenda Paulo eribungira e Listra abya mwaka wa 47. Oyu angabya iw’omughulhu Timoteo, obundi oyuwabya iniakine mulere, igha okwa syongangirirya sya Yesu. Mwaghendera okwa by’igha, n’enyuma w’emyaka ibiri mwatsuka eribya akabunga na Paulo. Enyuma w’emyaka nga 16, Paulo mwahandikira Timoteo athi: “Nikwa iwe wukwamirire omo myatsi eyo wakangiriribawa, n’eyo wikirirye ndeke. Kusangwa wunasi abakangirirya bawu nga babya bahi. Kandi wunasi eritsuka omwa bwana bwawu wabiriminya Amasako Abuyirire [Amasako w’Ekihebrania], awakathoka erikuha amenge w’erikuthwalha okw’ilhamibwa busana n’erikirirya Kristo Yesu.” (2 Timoteo 3:14, 15) Hano Paulo mwabugha athi Timoteo (1) mwaminya amasako abuyirire, (2) mw’ikirirya ndeke emyatsi ey’igha, (3) amabya n’amenge w’erimuthwalha okw’ilhamibwa erilhabira omw’ikirirya Kristo Yesu.

Nibya n’abaana balere kutsibu bangan’igha okwa bandu n’emyatsi y’omwa Biblia

4. Ni byahi ebya wabirikolesya erikangirirya abaana bawu? (Lebaya ekisasani ekiri okw’itsuka.)

4 Iwe ng’omubuthi Omukristayo, wanzire omwana wawu iniaminya Amasako abuyirire, ni bugha ambu Amasako w’Ekihebrania n’awe Kigiriki. Nibya n’abaana balere kutsibu bangan’igha okwa bandu n’emyatsi y’omwa Biblia. Ekithunga kya Yehova kyabirihulhukya ebitabu bingyi, esyobrokyuwa, n’esyovidiyo ebyo ababuthi bangakolesya eriwathikya abaana babu. Ni byahi okw’ebi ebiri omwa mubughe wawu? Omwana wawu atholere iniaminya ebiri omwa Biblia erithoka erighumya obughuma bwiwe na Yehova.

‘WIKIRIRAYE NDEKE’

5. (a) Kikamanyisayaki ‘erikirirya ndeke’? (b) Thukaminya thuthi ngoku Timoteo mwikirirya ndeke engulhu yuwene eyihambire oku Yesu?

5 Sikirighunza erikangirirya abaana bawu okwa bandu n’emyatsi eyiri omwa Biblia. Wibuke ngoku Timoteo abya atholere ‘in’ikirirya ndeke’ eby’ak’igha. Ekinywe ky’Ekigiriki ekya Paulo akolesaya hano kikamanyisaya “erikakasya” kutse “eriyikethera n’eriligha ndeke-ndeke ngoku omwatsi mulebe ahikire.” Timoteo mwaminya Amasako w’Ekihebrania “eritsuka omo bwana.” Enyuma waho, mwaligha ngoku Yesu ya Masiya. Erikirirya lya Timoteo lyabya lighumire kyamaleka iniabatizibwa n’erikolha haghuma na Paulo ng’omumisani.

6. Wanga wathikya wuthi abaana bawu erihimba erikirirya omwa Kinywe kya Nyamuhanga?

6 Wanga wathikya wuthi abaana bawu eribya n’erikirirya erighumire nga Timoteo,  nabu bang’ikirirya ndeke? Eky’erimbere, ghumisirizaya. Kikathwalha buthuku eribya n’erikirirya erighumire. Kandi iwe eribya iw’ikirirye omwa kindu kirebe sikirimanyisaya kithi n’abaana bawu ku banemwend’ithwamu bathya. Obuli mwana atholere in’igha erighabulha “ekibuya n’ekibi,” erithoka eribya n’erikirirya. (Soma Abaebrania 5:14.) Iwe ng’omubuthi, ni bingyi ebya wangakolha eriwathikya abaana bawu erighumya erikirirya lyabu, kutsibu-tsibu bakabulya ebibulyo. Thulebaye nga thwang’ighaki okwa ky’erileberyako kya thatha mughuma.

7, 8. (a) Thatha mughuma akakanganaya erighumisirizya ly’athi akakangirirya mwali wiwe? (b) Wune wathabana ekiyithawa ky’erighumisirizya omwana wawu?

7 Thomas, akabugha athi mwali wiwe ow’emyaka 11 akanamubulhaya ebibulyo nga bino: “Mbwino Yehova syangabya imwakolesya enzira y’ebindu eriyibuthukira omw’ihangika?” kutse “Busana naki ithuthasangira n’abandi omwa myatsi, ng’erikoma, eryanza eryuwania emyatsi?” Thatha oyu akayitheghaya okw’ikwama kyabwira mwali athi ikiriraye buyira. Thomas anasi ngoku omundu eriligha ekwenene siry’eriminya enzumwa y’amani, aliwe hikabya hindu hike-hike.

8 Kandi Thomas akalhangira iniakayithagha erighumisirizya akakangirirya mwali wiwe. Omo kwenene, Abakristayo abosi batholere ibabya n’omubere oyu. (Abanya Kolosai 3:12) Thomas anasi ngoku kikendi thwalha buthuku n’erikanirania ngendo nyingyi eriwathikya mwali wiwe erikakasya ngoku eby’ikirirye ni kwenene. Atholere iniaghanirya nayu ndeke okwa by’ak’igha omwa Biblia. Thomas akabugha athi: “Kutsibu-tsibu ng’okwa myatsi mikulhu-mikulhu, ingye na mukali waghe thukanza ithwaminya kwenene omwana wethu ng’an’ikirirye eby’ak’igha kandi ng’akanabiyitheghereraya. Amabulya, kikabya ikyuwene. Omo kwenene, iningend’ikwa obuba amakwama kya ligha ekindu butsir’ibulya.”

Wukayithagha erighumisirizya eriwathikya omwana wawu erihimba erikirirya omwa Kinywe kya Nyamuhanga

9. Wanga wathikya wuthi abaana bawu erikirirya omwa Kinywe kya Nyamuhanga?

9 Ababuthi bamakangirirya abaana babu omw’ighumisirizya, endambi iyikendi hika abaana abo ibayitheghererya ‘obughali, obuuli, obuuli bw’endatha, n’obuuli bw’eyikwa’ bw’erikirirya. (Abanya Efeso 3:18) Thwangana bakangirirya erikwamana n’emyaka yabu n’eriyitheghererya lyabu. Erikirirya lyabu omwa bya bak’igha likendibya linemughuma, ikikendi b’olhobera erilhwira okwa bya b’ikirirye embere sy’abandi, imwamuli n’ababakasoma nabu. (1 Petero 3:15) Ng’eky’erileberyako, abaana bawu bangana kolesya e Biblia erisoborera abaholi nga bakabya omwa mibereki? Bakanalhangira erisoborera lye Biblia irihikire? * (Lebaya omwatsi ahikwa.) Wibuke ngoku wukayithagha erighumisirizya eriwathikya omwana wawu erihimba erikirirya omwa Biblia,  kandi akaghalha ako sikalikwira busa.​—Eryibuka Ebihano 6:6, 7.

Eky’erileberyako kyawu nakyo ni kikulhu wukawathikya abaana bawu eribya n’erikirirya

10. Ni kyahi ekitholere ikyabya kindu kikulhu wukakangirirya?

10 Aliwe ibbwa, eky’erileberyako kyawu nakyo ni kikulhu wukawathikya abaana bawu eribya n’erikirirya. Stephanie, oyuwithe abasika basathu, akabugha athi: “Eritsuka omughulhu abaana baghe babya ibakine balere, ngabya ikungane muyibulya, ‘Nganabwira abaana baghe ekikaleka ing’ikirirya omw’ibyaho lya Yehova, olhwanzo lhwiwe, n’esyonzira siwe eribya isihikire? Mbwino abaana baghe bakanalhangira kwenene ku nganzire Yehova?’ Sinanga lengekania indi abaana baghe bakend’ikirirya ndeke kandi ingye ising’ikirirye ndeke.”

“AMENGE W’ERIKUTHWALHA OKW’ILHAMIBWA”

11, 12. Amenge niki, kandi thukaminya thuthi ngoku amenge syaseghemere okwa myaka eyo mundu awithe?

11 Thwamabiriminya ngoku Timoteo (1) abya asi ndeke Amasako (2) n’eriligha ndeke emyatsi eyo abya ikirirye. Aliwe Paulo amanyisayaki akabugha athi amasako abuyirire akendi leka Timoteo iniabana ‘amenge w’erimuthwalha okw’ilhamibwa’?

12 Ekitabu Insight on the Scriptures, Volume 2, kikasoborera kithi omwa Biblia, amenge mwamuli “amaaka w’erikolesya ebya wasi n’eriyitheghererya ndeke ngoku wanga rwanisya ebitsibu, eriyihighulha kutse erighunza h’ebitsibu, eriberererya ebilhubirirwa, kutse erihabulha abandi. Oyuthawithe menge akabya ini mukiru.” E Biblia yikabugha yithi “obukiru bubohere omwa muthima w’omwana.” (Emisyo 22:15) Kundi oyuthawithe menge akabya ini mukiru, amenge ni kiminyikalho ky’erikangania erikulha. Omundu akakulha bunyakirimu kundi akubaha Yehova n’erimwowa, butsira busana n’erikulha omo myaka.​—Soma Esyonyimbo 111:10.

13. Abalere banga kangania bathi ku bawithe amenge awakabathwalha okw’ilhamibwa?

13 Abalere abanakulire bunyakirimu sibali “ghusawa eyi n’eyi omwa bisunda by’engetse n’erihekwa ehandi n’ehandi” omwa syongumbu syabu kutse akahathikano k’abandi balere ng’ibo. (Abanya Efeso 4:14) Aliwe, amaaka wabu w’obulengekania abiryeghesibwa “erithoka erisombolha ekibuya n’ekibi.” (Abaebrania 5:14) Neryo bakathwamu ndeke, ababuthi babu kutse abandi bandu bakulhu nomubangabya isibabalhangire. (Abanya Filipi 2:12) Amenge ng’ayo akayithaghisibawa erithoka erilhamibwa. (Soma Emisyo 24:14.) Wanga wathikya wuthi abaana bawu eribya n’amenge ng’ayo? Wutholere iwalhangira wuthi bakaminya ebya wimanireko. Omwa bya wukakolha n’eribugha, batholere ibalhangira ku wunemulengaho erighendera okwa misingyi ye Biblia.​—Abanya Roma 2:21-23.

Busana naki ni ky’omughaso omubuthi erilholha embere erihiraho akaghalha? (Lebaya enungu 14-18)

14, 15. (a) Omulere oyukanza eribatizibwa atholere iniaghanirya okuki? (b) Wanga wathikya wuthi abaana bawu erighanirya okwa mighisa eyikalhua omwowa ebihano bya Nyamuhanga?

14 Aliwe, eriwathikya abaana bawu erihimba  erikirirya, sikwama kya babwira ekihikire n’ekithahikire. Wutholere kandi iwabawathikya erilengekania okwa bibulyo nga bino: ‘Ni kyahi ekikaleka e Biblia iyathanga ebindu ebikabya nibya nga byanga tsemesya? Nangaminya indi ndeke-ndeke ngoku emisingyi ye Biblia yiriho busana n’erinyighasira?’​—Isaya 48:17, 18.

15 Omwana wawu amabya iniakanza eribatizibwa, muwathikaye erilengekania ndeke okwa lhukwamirwa olhukasa busana n’eribatizibwa. Akayowa athi okwa lhukwamirwa olho? Muli mighaso yahi? Ebitsibu by’ebyahi? Busana naki emighaso yilengire ebitsibu? (Mariko 10:29, 30) Ni kikulhu erighanirya ndeke okwa myatsi eyi athe abatizibwa. Wathikaya omwana wawu erighanirya okwa mighisa y’eribya mwowa n’ebitsibu ebikalhua omw’ithendibya mwowa. Neryo aho iniangan’ikirirya ngoku erighendera okwa misingyi ye Biblia likendi mughasira mughulhu wosi.​—Eryibuka Ebihano 30:19, 20.

ERIKIRIRYA LY’OMWANA OYUBATIZIBIRWE LYAMALENGWAKO

16. Ababuthi batholere ibakolhaki erikirirya ly’omwana wabu oyubatizibirwe lyamatsuka eritseka?

16 Wanga kolhaki omwana wawu amatsuka erithika-thikira ekwenene abiribatizibwa? Ng’eky’erileberyako, mughalha wawu kutse mwali wawu angana tsuka eryanza ebindu by’ekihugho. Kutse omwana wawu iniangana tsuka erithika-thikira erighendera  okwa misingyi ye Biblia kwenene nga y’engebe yuwene. (Esyonyimbo 73:1-3, 12, 13) Emibere wukamusubirayamu yangana muhambako ng’alhole embere erikolera Yehova. Lengaho erithend’ilhwa n’omwana wawu okw’eki, nomwangabya ini mulere kutse mulengwa. Aliwe, leka aminye ku wumwanzire kandi ku wanzire erimuwathikya.

17, 18. Omulere amabya mw’erithika-thika, ababuthi biwe banga muwathikya bathi?

17 Omulere oyubatizibirwe akabya iniabiriyihayo oku Yehova. Eri ni yilhagha ngoku erimwanza n’erimukolera bya bikendibya embere okwa kindu kyosi-kyosi. (Soma Mariko 12:30.) Yehova akalhangira eriyilhagha mwa kindu kikulhu, nethu kwa thutholere ithwalilhangira thuthya. (Omugambuli 5:4, 5) Ekyo ambi iwak’ibukya omwana wawu. Aliwe eky’erimbere, soma n’erigha emyatsi eyo ekithunga kya Yehova kyabirihulhukya busana n’ababuthi. Neryo, omwa bwolho-bwolho kandi okwa buthuku obutholere, kanganaya omwana wawu ngoku iyo erithwamu eriyihayo oku Yehova n’eribatizibwa lyabya ithwamu erilithohire aliwe ngoku likendimulethera emighisa mingyi.

18 Ng’eky’erileberyako, wangana bana erihabulha eryuwene omwa ndomeko “Ebibulyo Ebya Babuthi Bakabulhaya,” eyiri enyuma omwa kitabu Questions Young People Ask​Answers That Work, Volume 1. Hakahabulha ababuthi hathi sibatholere bakakwama kyalengekania lhuba-lhuba bathi omulengwa wabu abirighana ekwenene, aliwe batholere ibalebya ndeke ekitsibu nga niki. Kyanganabya ini kahathikano kutse embwera. Kutse omwana inianganabya iniakayowa abandi abalere nga bakakolera Yehova kumulenga. Endomeko yikathasya soborera ngoku ebi sibirimanyisaya indi omwana wawu abirighana ebya w’ikirirye. Mughulhu mungyi byanganabya ini busana n’ebindi bitsibu eby’anemulhabamu. Neryo endomeko yikathasyaha amenge ngoku ababuthi banga wathikya omwana wabu oyuwabiritsuka erithika-thikira ekwenene.

19. Ababuthi banga wathikya bathi abaana babu eribana amenge awanga bathwalha okw’ilhamibwa?

19 Iwe ng’omubuthi, wuwithe olhukwamirwa n’olhusunzo lhunene lhw’erikulya abaana bawu “omw’ikungabo n’erikangiriryabo omw’ikangirirya ly’omukama.” (Abanya Efeso 6:4) Ngoku thwamabirilhangira, eki kikamanyisaya kithi wutholere iwakangirirya abaana bawu ebya Biblia yikabugha n’eribawathikya eriligha ndeke ebya bak’igha. Erikirirya lyabu likendibya lyabirighuma, kikendi leka ibayihayo oku Yehova n’erimukolera n’omuhwa. Kwesi Ekinywe kya Yehova, omulimu wiwe, n’akaghalha kenyu ambi ibyawathikya abaana benyu eribana ‘amenge w’eribathwalha okw’ilhamibwa.’

^ enu. 9 Obusondoli bw’erigha ekitabu “E Biblia Kwenene Yikakangirirayaki?” bwangana wathikya ndeke abalere n’abakulhu eriyitheghererya n’erisoborera ekwenene ye Biblia. Bune okwa jw.org omwa mibughe mingyi. Lebaya omwa BIBLE TEACHINGS > BIBLE STUDY TOOLS.