Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwerikuminibiri 2016

Muhire Erihangya-hangya Lyenyu Lyosi oku Yehova

Muhire Erihangya-hangya Lyenyu Lyosi oku Yehova

“Muhire erihangya-hangya lyenyu lyosi oku Nyamuhanga, kusangwa akabatheghaya.”1 PET. 5:7.

ESYONYIMBO: 60, 23

1, 2. (a) Busana naki sithutholere thukasweka thwamabana amaghaniryo? (Lebaya ekisasani ekiri okw’itsuka.) (b) Omo mwatsi ono thukendi kania okuki?

THULI omwa buthuku bw’ebitsibu binene. Sitani ahithene kutsibu kandi ‘akaghenda-ghenda ng’endale eyikaruruma n’erisosnda-sonda oyo yangalya.’ (1 Pet. 5:8; Erib. 12:17) Neryo kwesi sikiriswekaya, eribya ihakanayira nethu ng’abaghombe ba Yehova ithwabya omwa maghaniryo. Nibya n’abaghombe ba Yehova abakera, ng’Omwami Dawudi, ibakanabya omwa mibere eyikabahira omwa bulighe. (Esy. 13:2) Wibuke ngoku na Paulo anabya omw’ihangya-hangya busana n’omubiiri w’eritheya ebithunga. (2 Kor. 11:28) Aliwe thwanga kolhaki thwamayowa ithulithoherwe n’amaghaniryo mangyi?

2 Thatha wethu w’elhubulha oyuthwanzire, oyuwanawathikaya abaghombe biwe abakera, yunemwendi thuwathikya eribana erihumulikana okwa maghaniryo okwa lhulengo lhulebe. E Biblia yikathubwira yithi: “Muhire erihangya-hangya lyenyu lyosi oku Nyamuhanga, kusangwa akabatheghaya.” (1 Pet. 5:7) Aliwe ekyo wanga kikolha wuthi? Muleke thulebaye nzira ini ngoku wanga ghumira amaghaniryo—omw’ilhabira omw’isaba erikalhua okwa muthima, omw’isoma Ekinywe kya Nyamuhanga n’erikighaniryako, erisaba omulimu abuyirire  wa Yehova, n’eribwira munywani wawu oyowukayisigha okw’iyowa lyawu. Thukakania okwa syonzira ini esi, ambi iwabya iwunemulebya nga ni yahi eyikendi kuwathikya.

GHUSIRA YEHOVA Y’AMAGHANIRYO WAWU

3. Yehova wanga mughusira wuthi amalighe wawu?

3 Ekindu ky’erimbere eky’erikolha, ly’erihikira Yehova omw’isaba erikalhua okwa muthima. Omughulhu wamabana ebikalyambaya, kutse erikulethera amaghaniryo, bwira Thatha wawu w’elhubulha y’ebyosi. Omwimbi w’esyonyimbo mwasaba Yehova athi: “Iwe Nyamuhanga, wuhulikirire erisaba lyaghe.” Neryo omwa lhwimbo ilhwan’olho, mwabugha athi: “Ughusire Omwami mukulhu y’amalighe wawu.” (Esy. 55:1, 22) Wukendibya wabirikolha ekyosi-kyosi ekya wangathoka erirwanisya ekitsibu, erisaba erikalhua okwa muthima irikendi kuwathikya erihwa mw’obuba. Aliwe erisaba lyanga kuwathikya lithi omughulhu wukahandabuka n’erikwa engitsi?—Esy. 94:18, 19.

4. Omughulhu thuli omwa maghaniryo, busana naki ni kikulhu kutsibu erisaba?

4 Soma Abanya Filipi 4:6, 7. Yehova akahulikirira emisabe yethu eyikalhua okwa muthima n’erimuhathikana. Athi? Omw’ithuhererya erihumulikana omwa muthima, erikaleka ithwayowa buholho omwa malengekania. Abangyi babiriyilhangirira eki kikababyako. Omundu oyunalhue awithe ebikamulyambaya, iniali omwa maghaniryo, Nyamuhanga akamuwathikaya, iniayowa iniamathunga obuholho n’obuthekane omwa muthima, nibya ikyaswekya n’abandi. Nawu ekyo ikyangana kubyako. Neryo kwesi, “obuholho bwa Nyamuhanga” bwangana fundikirya emilyambo yosi-yosi eya wangabana. Ambi iwayikethera eriyilhagha erya Yehova akabugha omwa lhwanzo lino, athi: “Siwusamalire handi n’erisweka, kusangwa indi Nyamuhanga wawu. Ngendi kuha amaaka, kwenene ngendi kuwathikya.”—Isa. 41:10.

OBUHOLHO BW’OMUTHIMA ERILHUA OMWA KINYWE KYA NYAMUHANGA

5. Ekinywe kya Nyamuhanga kyanga thulethera kithi obuholho omwa muthima?

5 Enzira yakabiri ngoku thwanga bana obuholho omwa muthima ly’erisoma e Biblia n’erighanirya okwa kya thwamasoma. Busana naki eki ni kikulhu? Omwa Biblia mune obusondoli obwanga thuwathikya eriyihighulha okwa maghaniryo, erikehyagho kutse erighunzaghoho. Isiwabirirawa ngoku Ekinywe kya Nyamuhanga kikawathikaya n’erihumulikania kundi kiri mw’ebinywe by’amenge eby’Omuhangiki iyuwene-wene. Wukendibya wunemughanirya okwa malengekania wa Nyamuhanga—mbulha n’ithungyi kutse ni kiro—n’erilengekania nga wanga ghendera wuthi okwa busondoli bwe Biblia, wukendi bana iwabirighuma. Yehova mwalinganisya erisoma Ekinywe kiwe ng’eribya n’amaaka n’erithendi hahukya omuthima.—Yos. 1:7-9.

6. Ebinywe bya Yesu byangana kuwathikya bithi?

6 Omwa Biblia, thukabana mw’ebinywe ebikahumulikanaya ebya Yesu iyuwene-wene abugha. Ebinywe biwe n’erikangirirya liwe ibikahumulikanaya abababya bakamuhulikirira. Abangyi mubamwanza kundi iniakahumulikanaya ababya n’amalighe omwa muthima, erighumya abahwere amani, n’erihumulikania ababbunikire omuthima. (Soma Matayo 11:28-30.) Mwakangania kw’atsomene obunyakirimu bw’abandi, eriyowa lyabu, n’eribatsomana kinyamubiri. (Mk. 6:30-32) Yesu syali athaleka erithuwathikya. Angana kuwathikya ngoku anabya akawathikya abakwenda ababya haghuma nayu. Yesu erikuwathikya sikiriyithaghisaya eribya aho ali. Na lino, omwa kitsumbi kiwe ng’Omwami elhubulha, anathutsomene. Neryo kwesi, wamabana erihangya-hangya lyosi-lyosi, iniakendi kuhumulikania n’erikuwathikya okwa buthuku obutholere. Omwa kwenene, ebinywe bya Yesu byangana kuwathikya erighumira ebitsibu, ibyakuha amaha n’obuthubaha.—Heb. 2:17, 18; 4:16.

 EMIBERE EYIKALHUA OKWA MULIMU WA NYAMUHANGA

7. Wangaghasirwa wuthi Nyamuhanga amakuha omulimu abuyirire, wukamusabagho?

7 Yesu mwabugha athi Thatha wethu w’elhubulha syanga lemwa eriha omulimu abuyirire oko bakamusabagho. (Lk. 11:10-13) Eki kikathuhikaya okwa nzira eyakasathu—engulhu, eyanga thuwathikya erirwanisya amaghaniryo—nayo iy’emibere eyikalhua okwa mulimu. Emibere eyuwene eyi, eyikalhua okwa mulimu wa Nyamuhanga yikakanganaya emibere ya Nyamuhanga iyuwene-wene. (Soma Abanya Galatia 5:22, 23; Kol. 3:10) Wukendibya wunemukulha-kulhania emibere eyo, engolangana yawu n’abandi yikendyuwana. Neryo erighunzerera, ebyanga kulethere amaghaniryo busana n’abandi ibyabulha. Okwa lyawu, thalengekania hake emibere eyikalhua okwa mulimu nga yanga kughasira yithi.

8-12. Emibere eyikalhua oko mulimu yanga kuwathikya yithi erirwanisya kutse eriyihighulha okwa byanga kulethera amaghaniryo?

8 ‘Olhwanzo, obutseme, obuholho.’ Wamalengaho erikolangana n’abandi omw’isikya, iwukendi yisanga ikyabirikwolhobera erirwanisya erihangya-hangya lyawu. Ekyo kyanga thokekana kithi? Iwukendibya wunemukangania balikyethu b’olhwanzo n’eribatsomana, n’eribasikya, iwukendi yitheya okwa byanga kulethera amaghaniryo wukakolangana nabu.—Abar. 12:10.

9 ‘Eriyibombeka [erighumisirizya], obwenge [olhukeri], obubuya.’ Wukabya iwamaletha obuholho omwa ngolangana yawu n’abandi wamaghendera okw’ihabulha lino: “Mwanzane, mubye n’emithima eyihehere, mubuyirane.” (Efe. 4:32) Erikolha ekyo likaleka iwakakirya ebyanga letha amaghaniryo byamabya. Kandi iwukendi thoka erighumira ndeke ebikabya busana n’obuthahikana bw’abandi.

10 ‘Erikirirya.’ Munabwire erihangya-hangya lyethu, lihambire kutsibu okwa sente n’ebindu by’omubiri. (Emi. 18:11) Aliwe, erikirirya erighumire n’eriyikethera Yehova lyangana kuwathikya erighumira amaghaniryo ayo kutse nibya n’erighunza w’oho. Ekyo kyanga thokekana kithi? Iwangana yibalya okwa maghaniryo mangyi omw’ighendera okw’ihabulha ly’omukwenda Paulo akabugha athi “mutsemere ebyo muwithe.” Kandi mw’ongerako athi: “Kusangwa Nyamuhanga abiribugha athi: Singendi syakuleka na kera, kandi singendi syakusighania nahake. Kikaleka ithwabugha butsira eryubaha thuthi, Omwami Mukulhu ni muwathikya waghe; Singendi syubaha! Ko abandu banganyikolhaki kwehi?”—Ebr. 13:5, 6.

11 ‘Omuthima mwolho, n’eriyitheya.’ Nawu thalengekania ku kyangabya kibuya wamakangania emibere eyi. Ikikendi kuwathikya eriyihighulha okw’ikolha ebyanga kulethera amaghaniryo, kandi iwukendi ghasirwa omw’iyihighulha okwa mibere y’eriaghalirwa, olhukanda, ebitsumi n’erithuhulya.—Efe. 4:31.

12 Ni kwenene, ikikendi kuyithaghisya eribya n’omubere w’eriyikehya erithoka eriyihira omo ‘byalha bya Nyamuhanga by’obuthoki’ n’erimughusira erihangya-hangya lyawu lyosi. (1 Pet. 5:6, 7) Aliwe wukendibya wunemubya n’omubere w’eriyikehya, wukabya iwamakolha ekikendi leka Yehova iniakwanza n’erikuwathikya. (Mika 6:8) Eriminya n’eriligha ngoku amaaka wawu anawithe ahakasubulira, ikyangana leka amaghaniryo iniathakukinda, kundi wuyikethere Yehova.

“SIMUYILHUHAYE N’AMAGHANIRYO”

13. Yesu amanyisayaki akabugha athi: “Simuyilhuhaye n’amaghaniryo”?

13 Omu Matayo 6:34 (soma), muli erihabulha lya Yesu eryasibwe kutsibu lino: “Simuyilhuhaye n’amaghaniryo.” Aliwe kyanganabya nga kikalire erighendera okw’ihabulha eryo. Yesu amanyisayaki akabugha athi: “Simuyilhuhaye n’amaghaniryo”? Kilhangirikire ngoku syangabya iniamanyisaya athi omughombe wa Nyamuhanga syanga  thunga amaghaniryo; ekyo thwabiri kilhangira ndeke omwa binywe bya Dawudi na Paulo. Aliwe Yesu abya akanza erikangania abigha biwe ngoku eriyilhuhya omwa maghaniryo mangyi sikiwithe ekya kikawathikaya. Obuli kiro kiwithe bitsibu byakyo, neryo Abakristayo sibatholere bakayilhuhya omwa maghaniryo w’ebyabirilhaba kutse ebyo bakalengekanaya bathi bikendisyabya eryongeragho okwa w’ekiro ekyo. Erighendera okwa busondoli bwa Yesu lyanga kuwathikya lithi erihumulikana okwa maghaniryo?

14. Wanga rwanisya wuthi amaghaniryo okwa bya wakolha kera?

14 Awandi maghaniryo akanalethawa busana n’eriyowa erya mundu awithe okwa by’asobaya kera. Iniangana yowa iniakine kw’olhubanza busana n’eby’akolha kera, nomuhangabya ihamabirilhaba myaka mingyi. Omwami Dawudi mwanayowa erihalya liwe ‘iryabirimulithohera ng’omuheke alithohire.’ Mwabugha athi: “Omuthima waghe ali n’obulighe, kandi ngasimba busana n’obulighe.” (Esy. 38:3, 4, 8, 18) Omwa mibere eyo, ni kyahi eky’amenge ekya Dawudi abya atholere iniakolha? Mwakolhaki? Mwathwamu eriyikethera ngoku Yehova akendi mughanyira. Omw’iyikethera linene mwabugha athi: “Obutseme buli n’omundu oyukabuyirawa amalholho wiwe.”—Soma Esyonyimbo 32:1-3, 5.

15. (a) Busana naki siwutholere wukayihira omwa maghaniryo w’ebya munabwire? (b) Wanga kolhaki erikehya amaghaniryo? (Lebaya akasanduko “ Ebighuma Okwa bya Wangakolha Erikehya Amaghaniryo.”)

15 N’okwa bundi buthuku, ithwanganabya omwa maghaniryo busana n’ebya munabwire. Ng’eky’erileberyako, Dawudi abere akahandika ebiri omwa Esyonyimbo 55, abya omwa buba bunene. (Esy. 55:2-5) Nomubyanabya bithya, mwathalighira amaghaniryo akamulemesya eriyikethera Yehova. Dawudi mwathwamu erisaba kutsibu busana n’ebitsibu biwe, aliwe abya inianasi omughaso owali omw’iyira ekya wukakolha erirwanisya enzuko y’amaghaniryo. (2 Sam. 15:30-34) Ambi ithw’ighira oku Dawudi. Omwakanya k’erilighira amaghaniryo erikubundamirya, iwe kolha ekya wanga thoka, neryo ebindi birekere Yehova.

16. Ekya lina lya Nyamuhanga likamanyisaya kyanga ghumya kithi erikirirya lyawu?

16 Omukristayo akanayihira omwa maghaniryo aw’atheyo nibya, omughulhu akayihira omwa buba busana n’ebitsibu eby’akalengekanaya athi bikendisyasa. Aliwe, siwutholere wukayihira omwa maghaniryo, kutse eribya mw’obuba busana n’ebya wuthasi nga binemwendisyabya nibya. Busana naki? Kusangwa buthuku bunene, ebindi bikanaghana eribya bibi kutsibu ngoku thwabya thukalengekania. Kandi ibbwa nibya, sihali ekyangalema Nyamuhanga oyukabugha athi iwamughusira amaghaniryo wawu. N’erina liwe lisa-lisa likamanyisaya “Akaleka Ikyabya.” (Eri. 3:14, NW) Ekya lina lya Nyamuhanga likamanyisaya kikaleka ithwayikethera ngoku Nyamuhanga anawithe obuthoki bwosi bw’eriberererya ebighendererwa biwe busana n’abandu biwe. Thutholere ithwayikethera ngoku Nyamuhanga angana hemba n’eriwathikya abaghombe biwe bathaleghulha erirwanisya amaghaniryo okwa byabya kera, ebya munabwire, n’eby’obuthuku bw’embere.

 ERIBWIRA OWUNDI EKIKULI OMWA MUTHIMA

17, 18. Eribwira abandi b’ebiri omwa muthima lyanga kuwathikya lithi erirwanisya amaghaniryo?

17 Enzira eya kani eyanga kuwathikya erirwanisya amaghaniryo ly’erikanirya omunywani oyo wuyikethere okw’iyowa lyawu. Oyo muli nayu omwa butheke, omunywani kundu, kutse omusyakulhu w’ekithunga ibangana kuwathikya eribya n’amalengekania awuwene okwa maghaniryo wawu. “Erilithoha ly’omuthima w’omundu likamukondomaya, nikwa ekinywe kibuya kikatsemesayagho.” (Emi. 12:25) Eribwira owundi y’ebyosi ebiri omwa muthima, ikyangana wathikya omw’ighumira ebikakulyambaya. E Biblia yikathubwira yithi: “Ahathe amahano, eriyisunza likakwa obulighe; nikwa omwa bungyi bw’abahani akahanganibawa.”—Emi. 15:22.

18 Kandi Yehova akawathikaya Abakristayo erirwanisya amaghaniryo erilhabira omwa mihindano yethu y’obuli yenga. Okwa mihindano thukasangira haghuma na balikyethu abathutsomene kandi abanzire erithughumya. (Ebr. 10:24, 25) “Erisikania emithima” ng’eri irikendi kuhimba bunyakirimu neryo ikyakuwathikya erirwanisya amaghaniryo wosi-wosi.—Abar. 1:12.

OBUWATHIKYA OBULENGIRE LY’ERIBYA BUGHUMA NA NYAMUHANGA

19. Busana naki obughuma bwawu na Nyamuhanga bwangana kuha amaaka?

19 Thalengekania okwa ky’erileberyako ky’omusyakulhu w’ekithunga e Kanada oyuwaminya omughaso w’erighusira Yehova y’amaghaniryo. Awithe omubiiri ow’akamulhuhaya kutsibu omwa bwongo, ow’obuhalimu bw’esukuru, kandi inianawithe n’obulhwere bw’eribya n’amaghaniryo. Mughalha wethu oyu abirighumira eki ky’athi? Akasoborera athi, “Ekikulhu okwa byosi, ngalhangira erikolha kutsibu erighumya obughuma bwaghe na Yehova ikikamba amaaka w’erighumira amaghaniryo. Obuwathikya bw’abanywani n’abalikyethu ni bw’omughaso omwa mughulhu w’amaghaniryo. Mukali waghe sindi mubisa kindu na kighuma okw’iyowa lyaghe. Abandi basyakulhu b’ekithunga n’omulebererya w’omuthimbo mubangwathikya kutsibu eribya n’amalengekania awuwene okwa maghaniryo waghe. Munaghenda n’okwa mubatsi, namakolha n’esyombinduka omwa mibere ngakoleseraya mw’obuthuku bwaghe, n’erihira h’obuthuku bw’erilhuhuka n’erikolha ebisasaizi. Lyolho-lyolho, munatsuka eriyowa ndeke. Omughulhu hali ebya ngabya nga sinanga kakirya, ngabirekera Yehova.”

20. (a) Thwanga ghusira thuthi Nyamuhanga y’amaghaniryo wethu? (b) Thukendi syakania okuki omo mwatsi owakakwamako?

20 Omwa bikuhi, thwamabirilhangira omughaso w’erighusira Nyamuhanga y’amaghaniryo wethu omw’imusaba erilhua okwa muthima, n’erisoma Ekinywe kiwe n’erikighaniryako. Muthukalhangira n’omughaso w’eribya n’emibere eyikalhua okwa mulimu wiwe, eribwira omunywani y’eriyowa lyethu, n’erihimbwa eryathukabana omw’ibya haghuma na balikyethu. Omwatsi owakakwamako akendikania ngoku Yehova akathasya thughumaya omw’ithuha amaha w’erisyathuhemba.—Ebr. 11:6.