Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwerikuminakughuma 2017

Simuleke Ekindu Kyosi-kyosi Kikabasaghulha Olhuhembo

Simuleke Ekindu Kyosi-kyosi Kikabasaghulha Olhuhembo

“Simuleke mundu wosi-wosi akabasaghulha olhuhembo.”—ABANYA KOLOSAI 2:18, NW.

ESYONYIMBO: 122, 139

1, 2. (a) Ni lhuhembo lhwahi olhwa baghombe ba Nyamuhanga balindirire? (b) Ni kyahi ekikathuwathikaya erihira ameso wethu w’okwa lhuhembo? (Lebaya ekisasani ekiri okw’itsuka.)

ABAKRISTAYO abahakabibwa bawithe amaha w’obughuli. Balindirire erisy’ikalha elhubulha. Omukwenda Paulo mwahulha amaha aya mwa ‘lhuhembo, lhw’eribirikirwa ly’endatha na Nyamuhanga.’ (Abanya Filipi 3:14) Omwa lhubulha, bakendisya thabalha haghuma na Yesu Kristo omwa Bwami bwiwe n’erikolha haghuma nayu eriwathikya abandu erihikana. (Eribisulirwa 20:6) Aya ka ni maha awuwene! Ab’esindi mbuli balindirire olhuhembo olhuli mbaghane okw’olhu. Bawithe amaha w’erisyabyaho kera na kera omwa Paradiso okwa kihugho, n’amaha aya akabatsemesaya kutsibu!—2 Petero 3:13.

2 Paulo mwanza eriwathikya abahakabibwa balikyabu Abakristayo erisighalha bathaleghulha bangabana olhuhembo. Mwababwira athi: “Muhire obulengekania bwenyu oko myatsi y’endatha.” (Abanya Kolosai 3:2) Babya batholere ibahwerya  amalengekania wabu okw’amaha wabu w’elhubulha aw’obughuli. (Abanya Kolosai 1:4, 5) Erilengekania okwa mighisa ya Yehova kikawathikaya abaghombe ba Nyamuhanga abosi erihira ameso wabu okwa lhuhembo. Eki ni kwenene mbulha bawithe amaha w’erisyaghenda elhubulha kutse aw’erisyabya okwa kihugho.—1 Abanya Korinto 9:24.

3. Paulo mwakunga Abakristayo okuki?

3 Kandi Paulo mwakunga Abakristayo okwa byanga balemesya eribana olhuhembo. Ng’eky’erileberyako, mwahandikira Abanya Kolosai busana n’Abakristayo b’amabehi ababya bakalengaho eritsemesya Nyamuhanga omw’ighendera okwa Mighambo ya Musa omwakanya k’erikirirya omu Kristo. (Abanya Kolosai 2:16-18) Kandi Paulo mwakania okwa biriho munabwire ebyanga thusaghulha olhuhembo. Mwasoborera ekyathwangakolha erikakirya esyongumbu sy’obutswatswa kandi n’ekya thwangakolha hamabya erithendi yitheghererangania omw’eka kutse n’abalikyethu omwa kithunga. Erikunga erya Paulo aha lyangana thuwathikya namunabwire. Neryo thulebaye erikunga ery’olhwanzo eriri omwa baruha eyo ahandikira Abanya Kolosai.

MWITHE ESYONGUMBU SY’OBUTSWATSWA

4. Busana naki esyongumbu sy’obutswatswa syangana leka ithuthabana olhuhembo?

4 Paulo abere abir’ibukya balikyabo okwa maha wabu aw’obughuli, mwahandika athi: “Mwithe esyongumbu syenyu sy’ekihugho, sy’esi: erisingira, ebithisirire, engumbu nyibi, erisonda ibi, n’obururu.” (Abanya Kolosai 3:5) Esyongumbu sy’obutswatswa syangana thunga akaghalha kanene isyaleka ithwaherya obughuma bwethu na Yehova n’amaha wethu w’obuthuku obukasa. Mughalha wethu mughuma oyuwakwama esyongumbu siwe nyibi n’enyuma waho amasuba omwa kithunga akabugha athi esyongumbu esi musyamulengya amani neryo “amabya isyanga thasyasikakirya.”

5. Thwanga yitheya thuthi thwamabya omwa mibere eyikalire?

5 Thutholere ithwayitheya kutsibu-tsibu thwamabya ithuli omwa mibere eyanga leka ithwathwa ebihano bya Yehova ebihambire okwa by’esyongeso. Ng’eky’erileberyako, ni ky’amenge okw’inatsuka abali omwa buthethane eriyihiriraho olhubibi okwa bindu nga erihamba-hambana, erilyatsirirana, n’eribya ibobene. (Emisyo 22:3) Eyindi mibere eyikalire yikanabya omughulhu thuli omwa lhughendo lhw’esuburo kutse omughulhu thukakolha n’abathe b’olhubutho ng’olhwethu. (Emisyo 2:10-12, 16) Wanga kolhaki eriyitheya? Yiminyikalhaye ku wuli Mwema wa Yehova. Ibya n’esyongeso mbuya, kandi isiw’ibirirawa ngoku eriyanzirirya lyangana letha ekitsibu ekikalire. Kandi thutholere ithwayitheya omughulhu thuli omwa bulighe kutse omwa mbwera. Ithwangana yithagha omundu oyukendi leka ithwayowa nga thwanzibirwe. Thwangana yowa ithuli omwa mibere eyikalire ikyaleka ithwaligha eritsomana ly’omundu wosi-wosi. Eki ni ky’akabi. Wamayisanga omwa mibere ng’eyi, isiwalighira kindu kyosi-kyosi kikakusaghulha olhuhembo. Saba Yehova n’abalikyethu b’obuwathikya.—Soma Esyonyimbo 34:18; Emisyo 13:20.

6. Ni kyahi ekyathutholere ithwabya ithun’ibukire thukasombolha eby’eriyitsemesya?

6 Eritha esyongumbu sy’obutswatswa, thutholere ithwayihighulha okw’eby’eriyitsemesya ebiri mw’eby’obutswatswa. Munabwire,  eby’eriyitsemesya bingyi bikathw’ibukaya emibere eyabya e Sodomo ne Gomora. (Yuda 7) Abakahulhukaya eby’eriyitsemesyamu bakaleka eby’obusingiri ibyabya nga ni bya buli kiro kandi nga sibiwithe kabi. Neryo thutholere ithwabya ithunayitheghirye. Sithwanga kwama kyaligha eriyitsemesya lyosi-lyosi erya ekihugho kikahulhukaya. Aliwe thutholere ithwasombolha eby’eriyitsemesya ebithe byanga thulemesya eribana olhuhembo lhw’engebe.—Emisyo 4:23.

“MUYIRE OMUTHIMA” W’OLHWANZO N’OLHUKERI

7. Ni bitsibu byahi ebyanga banika omwa kithunga ky’Ekikristayo?

7 Thutsemire eribya omwa kithunga ky’Ekikristayo. Okwa mihindano thukigha Ekinywe kya Nyamuhanga, kandi ithwasighikana omwa lhwanzo. Eki kikathuwathikaya erihira ameso wethu okwa lhuhembo. Aliwe hakanayira ihabya erithendi yitheghererangania eryangana letha ebitsibu omwa balikyethu. Thwamathendi ghunzaho ebitsibu ebi, kyangana letha erihithana.— Soma 1 Petero 3:8, 9.

8, 9. (a) Ni mibere yahi eyikendi thuwathikya eribana olhuhembo? (b) Ni kyahi ekyanga thuwathikya eribya buholho mulikyethu amathuhithania?

8 Sithwanga lighira erihithana likathulemesya eribana olhuhembo. Paulo mwasoborera ekya Abakristayo batholere ibakolha, athi: “Muli bandu ba Nyamuhanga. Abiribanza, abiriyisogha inywe. Busana n’ekyo muyire emithima y’erighanyira, omuthima w’obubuya, ow’eriyikehya, ow’obwolho, ow’eriyibombeka. Neryo mughanyirane, mubuyirane omughulhu omundu awithe omwatsi oko wundi. Ngoku Omukama ababuyira, nenyu ko mwangabuyira abandi bo muthya. Kandi kwilhaba ebyosi, muyire omuthima w’olhwanzo olhukahikanaya ebyosi haghuma omo bughuma.”—Abanya Kolosai 3:12-14.

9 Olhwanzo n’olhukeri byangana thuwathikya erighanyira abandi. Thwamayowa nabi busana n’eby’omundu alya bugha kutse erikolha, ambi ithwalengekania okwa buthuku ithwe thwabwira kutse erikolera abandi b’ekithuwene aliwe bamathughanyira. Muthwasima bakathukangania olhwanzo n’olhukeri! (Soma Omugambuli 7:21, 22.) Thukasima kutsibu kundi Kristo akahindanaya abaramya b’okwenene bahaghuma omwa lhukeri. (Abanya Kolosai 3:15) Ithwe bosi thwanzire Nyamuhanga mughuma, thukathulha omwatsi mughuma, kandi n’ebitsibu byethu ebingyi bisosene. Thwamabya n’olhukeri n’olhwanzo n’erighanyirana, ekithunga ikikendibya omwa bughuma kandi ithwabya ithunahirire ameso w’okwa lhuhembo.

10, 11. (a) Busana naki obuha ni bw’akabi? (b) Thwanga kolhaki erilhangira thuthi obuha sibuli thulemesaya eribana olhuhembo?

10 Obuha bwangana thulemesya eribana olhuhembo. Eby’erileberyako omwa Biblia bikakanganaya ngoku obuha ni bw’akabi. Ng’eky’erileberyako, Kaina mwakwa mughalha wabu iya Abeli y’erihali neryo amamw’itha. Kora, Datani, na Abiramu mubakwa Musa y’erihali neryo bamamuyisamambulhako. Omwami Saulo mwakwa Dawudi y’erihali amanza n’erimw’itha. Ekya Kinywe kya Nyamuhanga kikabugha kihikire kithi: “Kusangwa ahali eritsura n’eriyanza nabi, aho hali erineghena n’erikolha ebithisirire byosi.”—Yakobo 3:16.

11 Thwamalengaho kutsibu eribya n’olhwanzo n’olhukeri, isithwangakwa erihali lya lhuba-lhuba. Ekinywe kya Nyamuhanga  kikabugha kithi: “Olhwanzo lhukayibombeka, kandi lhuli n’obwenge. Olhwanzo silhulibya n’obuha.” (1 Abanya Korinto 13:4) Ekyanga thuthokesya erithendibya n’obuha kutse erihali omwa mibere yethu ly’erilhangira emyatsi nga Yehova. Thutholere ithwalhangira balikyethu ng’ebitsuko by’omubiri mughuma, nagho iky’ekithunga. E Biblia yikabugha yithi: “Ekitsuko kighuma kyamasikibwa, ebitsuko byosi bikatsema haghuma nakyo.” (1 Abanya Korinto 12:16-18, 26) Mulikyethu amabana ekindu kibuya, ithukendi tsema nayu, butsira erimukwa erihali. Thalengekania okwa ky’erileberyako ekyuwene ekya mughalha w’Omwami Saulo iya Yonatana. Yonatana mwathakwa Dawudi y’erihali akasombolhwa ng’omwami omwakanya k’iyo. Nibya mwahimba n’erisighika Dawudi. (1 Samweli 23:16-18) Mbwino nethu thwangana kangania olhukeri n’olhwanzo nga Yonatana?

MUBANE OLHUHEMBO NG’EKA

12. Ni habulha lyahi omwa Biblia eryanga wathikya eka yethu eribana olhuhembo?

12 Obuli mundu omw’eka amaghendera okwa misingyi ye Biblia, amaka wethu imukendibya obuholho n’etseme kandi ithwasyabana olhuhembo. Paulo mwahabulha amaka athi: “Abakali, mwowe abiba nywe, ngoku litholere imwakolha ng’Abakristo. Abiba, mwanze abakali benyu, simukale kubo. Abaana, mwowe ababuthi benyu omwa myatsi yosi, kusangwa eki kikatsemesaya Omukama. Inywe abo thatha, simuhithanaye abaana benyu, bakasyalhuha.” (Abanya Kolosai 3:18-21) Wanamalhangira ngoku erihabulha eri lyangana wathikya amaka wawu?

13. Mwali wethu Omukristayo angawathikya athi mwira wiwe oyuthe Mwema eryanza erikolera Yehova?

13 Obundi wuli mwali wethu oyuli omwa butheke n’oyuthekolera Yehova. Wanga kolhaki wamayowa wuthi syalikutsomana  ngoku kitholere? Iwangana hithana n’erineghena nayu, aliwe ekyo ikyanawathikya? Nomuwangabya in’iwe wamasinga, wune mwendi leka inianza erikolera Yehova? Eyihi na hake. Aliwe wamamusikya ng’omuthwe w’eka, iwangana leka eka yawu iyabya mw’obuholho n’eriha Yehova y’olhukengerwa. Eky’erileberyako kyawu ekyuwene kyangana leka mwira wawu inianza erikolera Yehova, neryo inywe bosi imwasyabana olhuhembo.—Soma 1 Petero 3:1, 2.

14. Omulhume Omukristayo atholere iniakolhaki mukali wiwe oyuthe mwema amabya isyamusikirye?

14 Obundi wuli mughalha wethu oyuli omwa butheke n’oyuthekolera Yehova. Wanga kolhaki wamayowa nga syakusikirye? Wamanza erimukangania bbosi nga nindi omw’imutsurumira, neryo inianemwendi thasyakusikya? Eyihi na hake! Nyamuhanga anzire iwabya iba w’olhwanzo oyukagherereraya Yesu. (Abanya Efeso 5:23) Yesu, omuthwe w’ekithunga, mughulhu wosi akaghumisirizaya kandi ni w’olhwanzo. (Luka 9:46-48) Wamagherererya Yesu, endambi iyikendi syahika mukali wawu nayu inianza erikolera Yehova.

15. Omulhume Omukristayo akakanganaya athi kw’anzire mukali wiwe?

15 Yehova akahabulha abiba athi: “Abiba, mwanze abakali benyu, simukale kubo.” (Abanya Kolosai 3:19) Omulhume oyuwithe olhwanzo akasikaya mukali wiwe. Athi? Akahulikirira ebirengekanio bya mukali wiwe n’erileka alhangire ngoku eky’akabugha ni ky’omughaso. (1 Petero 3:7) Nomwakine indi mughulhu wosi omulhume syangakolha eby’omukali akabugha, erihulikirira mukali wiwe kyangana muwathikya erithwamu ndeke. (Emisyo 15:22) Omulhume oyuwithe olhwanzo syalikaka mukali wiwe athi amusikaye. Aliwe akalengaho erikolha ebyanga leka omukali wiwe iniamusikya. Omulhume  amanza mukali wiwe n’abaana biwe, ibakendi kolera Yehova ibanatsemire kandi ibasyabana olhuhembo lhw’engebe.

Thwanga kolhaki nuku ebitsibu by’amaka sibithulemesaye eribana olhuhembo? (Lebaya enungu 13-15)

EMINYETHU—SIMULEKE EKINDU KYOSI-KYOSI KIKABASAGHULHA OLHUHEMBO!

16, 17. Iwe ng’omulere, wanga yihighulha wuthi okw’ihithana kutsibu okwa babuthi bawu?

16 Obundi wuli mulere kandi wukayowa ababuthi bawu nga sibali kuyitheghereraya kutse nga bawithe othulhaghiro-lhaghiro. Eki kyangana kuponesya nibya iwabulha nga wunatholere erikolera Yehova. Aliwe wamasighania Yehova, iwukendi lhangira ngoku omwa kihugho simuli mundu oyukwanzire ng’ababuthi bawu Abakristayo n’abalikyethu omwa kithunga.

17 Thalengekania oku kino: Ababuthi bawu ku bathabya bakakuhabulha, wangaminyire wuthi kwenene ku bakutsomene? (Abaebrania 12:8) Ni kwenene, sibahikene, neryo emibere banga kuhabuliramu yangana kuhithania. Aliwe isiwatsomana ekyo. Aliriryo, lengaho eriyitheghererya ekiryaleka ibakolha n’eribugha bathya. Sika, kandi lengaho erithendi hithana. Ekinywe kya Nyamuhanga kikabugha kithi: “Oyukakakiraya ebinywe biwe awithe eriminya, n’oyuli n’ekirimu kihehere ni mundu w’amenge.” (Emisyo 17:27) Kolha mwa kilhubirirwa kyawu eribya omundu oyukulire oyukaligha erihabulhwa n’erilighirako nomulyanga hebwa omwa mibere eyiri yithi. (Emisyo 1:8) Isiw’ibirirawa ngoku eribya n’ababuthi abanzire Yehova ni kihembo ky’obughuli. Banzire erikuwathikya eribyaho kera na kera.

18. Ni kyahi ekikaleka iwathwamu erihira ameso wawu w’okwa lhuhembo?

18 Mbulha thuwithe amaha w’erisy’ikalha elhubulha kera na kera kutse omwa kihugho paradiso, obuli mughuma w’okw’ithwe angana lindirira emighisa y’obuthuku obukasa. Amaha wethu ni kwenene. Aseghemere okwa mulhaghe w’Omuhangiki w’obuhangwa bwosi, oyukabugha athi: “Kusangwa ekihugho kyasyusulha n’eriminya ly’Omwami Mukulhu.” (Isaya 11:9) Omwa buthuku obuthe bwa hali obuli mundu okwa kihugho akendi kangiriribwa na Nyamuhanga. Olhu ni lhuhembo olhwa thutholere ithwakolera. Neryo ibya iwunemw’ibuka ebya Yehova abirikulhaghanisya kandi siwuleke ekindu kyosi-kyosi kikakulemesya eribana olhuhembo!