Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwerikuminakughuma 2017

Ghana Amalengekania w’Ekihugho

Ghana Amalengekania w’Ekihugho

‘Mutheghaye sihabye mundu oyukabanyegha omwa menge w’abandu n’eritheba buyira erikalhua omwa kihugho.’—ABANYA KOLOSAI 2:8.

ESYONYIMBO: 38, 31

1. Ni kyahi ekya mukwenda Paulo ahandikira Abakristayo abe Kolosai? (Lebaya ekisasani ekiri okw’itsuka.)

OMWA myaka ye 60-61, omukwenda Paulo iniane omwa ngomo mwe Roma mwahandikira Abakristayo be Kolosai. Mwabasoborera ekikaleka ibayithagha eribya n’amaaka w’eriyitheghererya eby’obunyakirimu, ni bugha ambu, erithoka erilhangira emyatsi nga Yehova. (Abanya Kolosai 1:9) Paulo mwabugha athi: “Busana n’eki ngababwira sihabye mundu oyukabathebaya omwa binywe by’ekisehya. Mutheghaye sihabye mundu oyukabanyegha omwa menge w’abandu n’eritheba buyira erikalhua okwa mitse y’abandu, n’okwa myatsi y’ebirimu ebikathabalha oko bihugho, eyithalhua oku Kristo.” (Abanya Kolosai 2:4, 8) Neryo Paulo mwasoborera ekikaleka amalengekania amanene awasibwe iniabya isyahikire n’ekikaleka abandu bangyi ibanzagho. Ng’eky’erileberyako, awandi malengekania anganaleka abandu ibayowa nga bawithe amenge kutse nga balengire abandi. Neryo Paulo mwahandika ebaruha yiwe eriwathikya balikyethu eriyihighulha okwa malengekania w’ekihugho n’erighana emitse mibi.—Abanya Kolosai 2:16, 17, 23.

2. Busana naki ithwakania okwa by’erileberyako ebikakanganaya amalengekania w’ekihugho?

 2 Abawithe amalengekania w’ekihugho-hugho bakagheghena emisingyi ya Yehova, kandi thwamathendi yitheya, lyolho-lyolho ibangana tsekya eriyikethera lyethu omwa menge wa Nyamuhanga. Ithwe bosi thukabya ithunemubana amalengekania w’ekihugho okwa Tivi, okwa Intaneti, eya thukakolera, n’okwa sukuru. Thwangayitheya thuthi okwa malengekania aya? Omo mwatsi ono, thukendi kania okwa by’erileberyako bithanu ebikakanganaya amalengekania w’ekihugho kandi ngoku thwanga yihighulha kugho.

THUNATHOLERE ITHW’IKIRIRYA OMU NYAMUHANGA?

3. Ni malengekania wahi agho abandu bangyi banzire? Busana naki?

3 “Nanganabya mundu mubuya ising’ikirirye n’omu Nyamuhanga.” Munabwire amalengekania aya oswire omwa bihugho bingyi. Abakabugha ebi banganabya isibathalengekania buuli nga hane Nyamuhanga aliwe ibangana kwama kya yowa ibawithe obwiranda obw’erikolha ekya banzire. (Soma Esyonyimbo 10:4.) Abandi bakayowa bathi bakendi lhangirwa mo b’amenge bakabugha bathi, “Nanganabya n’emibere eyuwene ising’ikirirye omu Nyamuhanga.”

4. Ni byahi ebyo thwanga bwira oyukikiriraya athi sihali Omuhangiki?

4 Mbwino kine mw’amenge erikirirya wuthi sihali Omuhangiki? Ekibulyo ekyo kikatabura abandi bandu bakasondya eky’erisubirya omwa by’esayansi. Aliwe eky’erisubirya ni kyolho. Mbwino enyumba yangana kwama kya yibuthukira? Sikyangabya! Hakabya ihane oyuwahimbayo. Ibbwa ebindu ebikahumulha, emikwikire yabyu ka yikatha-kathenie kutsibu kwilhaba enyumba yosi-yosi. N’esyoselu, kutse ehitafali hy’omubiri, ihyohyene-hyene hikayikolha mw’ehindi ng’ihyo, ekindu ekyo enyumba yithe yanga kolha. Eki kikamanyisaya indi esyoselu sikabika emyatsi eya syangana lhabirya esindi nuku nasyo sithoke eriyithahangulha mw’esindi. Nindi yuwaha esyoselu sy’amaaka w’erikolha ebi? E Biblia yikasubiraya yithi: “Kusangwa obuli nyumba yikahimbawa n’omundu, nikwa Nyamuhanga ni muhimbi w’emyatsi yosi.”—Abaebrania 3:4.

5. Ni kyahi ekya thwanga bugha okwa malengekania aw’eribugha ambu thwangana minya ekibuya isithw’ikirirye omu Nyamuhanga?

5 Thwanga bugha thuthiki okwa malengekania aw’eribugha indi thwangana minya ekibuya isithw’ikirirye omu Nyamuhanga? Ni kwenene e Biblia yikabugha yithi n’abandu abath’ikirirye omu Nyamuhanga banganabya n’emisingyi eyuwene. (Abanya Roma 2:14, 15) Ng’eky’erileberyako, omundu anganasikya n’eryanza ababuthi bwiwe. Aliwe amabya isy’ali ghendera okwa misingyi ya Yehova, endambi yangana hika iniathwamu nabi. (Isaya 33:22) Munabwire abanya menge bangyi bakaligha ngoku thukayithagha obuwathikya bwa Nyamuhanga erirwanisya ebitsibu by’ekihugho. (Soma Yeremia 10:23.) Neryo isithwalengekanaya thuthi thwangana minya ekihikire isithw’ikirirye omu Nyamuhanga kandi isithulighendera okwa misingyi yiwe.—Esyonyimbo 146:3.

THUNAYITHAGHIRE EDINI?

6. Abandu bangyi bawithe malengekaniaki okwa dini?

6 “Wangana tsema isiwuwithe edini.” Abandu bangyi bakalengekanaya bathi eby’edini bik’itha obulhundu kandi sibiwithe mughaso. Kandi, amadini akakangiriraya okwa muliro wa kera na kera, akakaka abandu erihayo esyosente, n’erisighika eby’ekipolitiki. Sikiriswekaya eribya abandu bangyi ibakabugha  bathi bali buholho erithendibya omwa dini! Bangana bugha ebinywe nga bino, “Ngananzire Nyamuhanga, aliwe singanzire eribya omwa dini.”

7. Eriramya ly’okwenene lyanga kuwathikya lithi eribya n’etseme?

7 Mbwino kwenene thwangana tsema isithuwithe dini? Ni kwenene, omundu iniakendi tsema amabya isyali omwa dini y’amabehi. Aliwe sihali oyuwanga tsema amabya isi munywani wa Yehova, “Nyamuhanga oyutsemire.” (1 Timoteo 1:11NW) Obuli kindu ekya Yehova akakolha kikawathikaya abandi. Ithwe ng’abaghombe biwe, thutsemire kundi thukasondekanaya esyonzira sy’eriwathikiryamu abandi. (Emibiri 20:35) Ng’eky’erileberyako, thalengekania eriramya ly’okwenene nga lyanga wathikya lithi eka eribya mw’etseme. Thuk’igha erisikya n’eribya bayisiwa okwa banze bethu, erikulya abaana ab’esyongeso, n’erithungira ab’eka yethu b’olhwanzo lhw’okwenene. Eriramya ly’okwenene likawathikaya abandu ba Yehova erikolha haghuma omwa buholho n’erikangania balikyabo b’olhwanzo.—Soma Isaya 65:13, 14.

8. Matayo 5:3 hanga thuwathikya hathi eriminya kwenene ekyanga lethera abandu b’etseme?

8 Neryo nina kwenene indi omundu angana tsema isyali kolera Nyamuhanga? Ni byahi ebikaleka abandu ibatsema? Abandi bakatsemera emibiiri yabu, eby’amasatha, kutse ebyo banzire. Abandi bakayowa ndeke bakatsomana amaka wabu n’abanywani babu. Nomwakine indi ebindu ebyo bikatsemesaya, hane ebilhabire okw’aho omwa ngebe. Thuli ba mbaghane okwa bisoro, neryo ithwe thwangana minya Omuhangiki wethu n’erimuramya. Mwathuhangika omwa mibere eyikaleka ithwatsema thwamakolha ekyo. (Soma Matayo 5:3.) Ng’eky’erileberyako, thukatsema n’erihimbwa thukahindana n’abalikyethu thukaramya Yehova. (Esyonyimbo 133:1) Kandi thukatsema eribya baghuma b’okwa lhughanda lhw’abalikyethu lhw’ekihugho kyosi, eribya omwa ngebe eyihenirye, n’eribya n’amaha awuwene busana n’obuthuku obukasa.

THUNAYITHAGHIRE EBIHANO OKWA BY’ESYONGESO?

9. (a) Abandu bangyi bawithe malengekaniaki okwa myatsi y’engyingo? (b) Busana naki Ekinywe kya Nyamuhanga kikaghanaya erikolha emyatsi y’engyingo n’oyowuthe nayu omwa butheke?

9 “Hali kibiki erikolha emyatsi y’engyingo n’oyowuthe nayo omwa butheke?” Abandu bangana bulya bathi: “Busana naki iwayikakirya kutsibu? Tsemera engebe.” Aliwe Ekinywe kya Nyamuhanga kikaghanaya obusingiri. * (Lebaya omwatsi ahikwa.) (Soma 1 Abanya Tesalonika 4:3-8.) Yehova awithe obughabe bw’erithuhirira h’ebilhaghiro kundi yuwathuhangika. Akabugha athi omulhume n’omukali abathahenie babatholere ibakolha emyatsi y’engyingo. Yehova akathuha ebilhaghiro kundi athwanzire. Anasi ngoku esyongebe syethu isikendyuwana thwamabighenderako. Amaka aw’akakenga ebilhaghiro bya Nyamuhanga akabya mw’olhwanzo n’erisikya kandi akabya buholho. Aliwe Nyamuhanga akendi syasuyira abakakighenderera erithwa ebihano biwe.—Abaebrania 13:4.

10. Omukristayo angarwanisya athi eby’obutswatswa?

10 E Biblia yikathukangiriraya ngoku thwangayihighulha okwa busingiri. Thutholere ithwayitheya okwa bya thukasamalira. Yesu mwabugha athi: “Obuli mundu oyukasamalira  omukali n’engumbu nyibi iniamabirimusingira omwa muthima wiwe. N’eriso lyawu ly’amali lyamaleka iwakolha ebibi, wukuleryo, wughuseryo.” (Matayo 5:28, 29) Kwesi thutholere ithwayihighulha okw’isamalira eby’obutswatswa n’erihulikirira emiziki eyiri mw’eby’obutswatswa. Paulo mwahandika athi: “Mwithe esyongumbu syenyu sy’ekihugho . . . erisingira.” (Abanya Kolosai 3:5) Kandi thutholere ithwayitheya okwa bya thukalengekanaya n’ebya thukakanayako.—Abanya Efeso 5:3-5.

THUNAHWERAYE AMALENGEKANIA W’OKW’ITHUNGA EMIBIIRI OMWA KIHUGHO?

11. Ni kyahi ekyanga leka ithwanza eribya n’emibiiri eyuwene?

11 “Omubiiri owuwene akendi leka iwabana etseme.” Abandu bangana thubwira bathi thuhweraye obuthuku n’akaghalha kethu okwa mubiiri w’ekihugho, kutsibu-tsibu owangana leka ithwaminywa, ithwabya n’obuthoki, kutse ithwabya bagaga. Kundi abangyi bakalengekanaya bathi omubiiri owuwene w’angaletha etseme, nethu ithwangan’asamu amalengekania ng’ayo.

12. Omubiiri owuwene mbwino w’anga leka iwatsema?

12 Nina kwenene indi omubiiri owakaleka iwabya n’obuthoki kandi iwaminywa akaleka iwatsema? Eyihi. Thalengekania oku kino. Sitani mwanza eribya n’obuthoki n’obuminywa. Mwabana eky’asonda. Aliwe hathya ahithene, syatsemire. (Matayo 4:8, 9; Eribisulirwa 12:12) Mbaghane n’ekyo, thalengekania okwa tseme eya thukabana thwamawathikya abandi erigha oku Nyamuhanga n’okwa bibuya ebya abirilhagha. Omwa kihugho simuli mubiiri ow’angakulethera etseme ng’eyi. Kandi mughulhu mungyi abandu eryanza eribya n’omubiiri owuwene kikaleka ibabya mw’amalingwatha, erihithana, kutse erikwa abandi b’erihali. Aliwe ebyosi ibyabya ini buyira. E Biblia yikabugha yithi ‘bakakwamirira erihunga.’—Omugambuli 4:4.

13. (a) Thutholere ithwalhangira thuthi omubiiri wethu? (b) Ni kyahi ekyalethera Paulo y’etseme?

13 Ni kwenene, thutholere ithwabya ithunawithe omubiiri, kandi sikibi erisombolha ogho thwanzire. Aliwe omubiiri wethu s’igho atholere eribya embere omwa ngebe. Yesu mwabugha athi: “Sihali mundu oyuwanga thoka erikolera abakama babiri; kusangwa asyakwa omughuma y’obusu, n’eryanza owundi. Simwanga thoka erikolera Nyamuhanga n’ebindu.” (Matayo 6:24) Erikolera Yehova n’erikangirirya abandi be Biblia kikendi thulethera etseme nene. Omukwenda Paulo mwayilhangirira eki. Iniakine mulere, mwahwerya amalengekania w’okw’ithunga omubiiri owuwene.  Enyuma waho, mwabana etseme akalhangira omwatsi wa Nyamuhanga akahindulha esyongebe sy’abandu abo athulira. (Soma 1 Abanya Tesalonika 2:13, 19, 20.) Omwa kihugho simuli omubiiri ow’angathulethera etseme ng’erikolera Yehova n’erikangirirya abandi okw’iyo!

Thukabana etseme thukawathikya abandi erigha oku Nyamuhanga (Lebaya enungu 12, 13)

THWANGANA GHUNZAHO EBITSIBU EBIRI OMWA KIHUGHO?

14. Busana naki abandu bakatsemera eky’eribugha indi omundu angana yighunzira h’ebitsibu biwe?

14 “Abandu bangana yighunzira h’ebitsibu byabu.” Abandu bangyi banzire amalengekania aya. Busana naki? Ku kyabya ini kwenene, ikikendi manyisya kithi sithuli yithagha obusondoli bwa Nyamuhanga kandi ithwangana kolha ekyosi-kyosi ekya thwanzire. Wanganabya iwabiryowa abandu bakabugha bathi ebitsibu ng’esyonyuhi, obubi, amalhwere, n’obunakwa binemukeha. Omwatsi mughuma akabugha athi: “Ekyalekire engebe y’abandu iy’ongera eryuwana ly’eribya babirithwamu eryuwania ekihugho.” Eki nina kwenene? Mbwino abandu bakayahika okwa kyangaghunza omwa kihugho mw’ebitsibu? Thulebaye okwenene.

15. Busana naki ithwabugha thuthi ebitsibu by’ekihugho binemuyongera?

15 Mbwino abandu banabirighunzaho ekitsibu ky’esyonyuhi? Omwa Lhuhi lhw’Ekihugho Kyosi olhw’Erimbere n’Olhwakabiri, abandu abalhabire omwa miliyoni 60 mubaholha. Omwaka 2015 musa, abandu miliyoni 12.4 mubasighania amanyumba wabu busana  n’olhuhi kutse ery’endereribwa. Eki mukyaleka omughanzo w’abakakakawa erilhua omwa myanya yabu iniahika miliyoni 65. Kandi ibbwa obubi? Omwa yindi myanya, obubi bwabirikeha. Aliwe ebindi bindu ng’obubi okwa Intaneti, amalhwa aw’omw’eka, eby’obutsindi, n’obulibathangania binemuyongera. Ibbwa amalhwere? Ni kwenene abandu babiribana emibatsi y’amalhwere malebe. Aliwe omwa 2013, omwatsi mughuma mwabugha athi obuli mwaka abandu miliyoni mwenda abali ahisi sy’emyaka 60 bakaholha busana n’amalhwere w’omuthima, erisanyarara, ekansa, obulhwere bw’ebihaha, n’esukali. Kandi ibbwa obunakwa? Erikwamana n’eripoti eya World Bank, omughanzo w’abandu abali omwa bunakwa bunene kutsibu omwa Afirika nyisa mw’ayongera erilhua okwa bandu miliyoni 280 omwa 1990 erihika miliyoni 330 omwa 2012.

16. (a) Busana naki Obwami bwa Nyamuhanga busa bwa bukendisya ghunzaho ebitsibu by’ekihugho? (b) Isaya n’omuhandiki w’esyonyimbo mubabugha bathi Obwami bukendi syakolhaki?

16 Emyatsi eyi siyiri thuswekaya. Munabwire, ebithongole by’esyosente n’eby’ekipolitiki bikasondolhawa n’abandu abayitsomene. Abandu aba sibanga ghunzaho esyonyuhi, obubi, amalhwere, n’obunakwa. Obwami bwa Nyamuhanga busa bo bwanga kolha ekyo. Thalengekania okwa kya Yehova akendisya kolera abandu. Obwami bwiwe bukendi syaghunzaho ebyosi ebikaletha esyonyuhi, ng’eriyitsomana, obulibathangania, eryanza ekihugho kyenyu kya kutsibu, amadini w’amabehi, na Sitani. (Esyonyimbo 46:8, 9) Obwami bwa Nyamuhanga bukendi syaghunzaho obubi. Namunabwire, bunemukangirirya esyomiliyoni sy’abandu eryanza abandi n’eriyiketherana. Sihali eyindi gavumente eyanga kolha ekyo. (Isaya 11:9) Yehova akisiya iniaghunzaho amalhwere n’eriha abandu b’amaghalha awahikene. (Isaya 35:5, 6) Akendi ghunzaho obunakwa n’erileka ikyathokekana okwa bandu bosi eritsemera engebe n’eribya n’obunywani bwa hakuhi nayu. Eki ni ky’obughuli bunene kwilhaba esyosente.—Esyonyimbo 72:12, 13.

“IMWATHOKA ERISUBIRYA NDEKE”

17. Wangaghana wuthi amalengekania w’ekihugho?

17 Neryo hamabya amalengekania agho abandu bangyi banzire, aliwe iniangana lenga okw’ikirirya lyawu, sondaya ekya Biblia yikabugha kugho. Kanaya kugho na mulikyethu oyukulire bunyakirimu. Lengekanaya okwa kikaleka abandu ibanzagho, ekikaleka iniabya isyahikire, kandi ngoku wangaghanagho. Thwangana yitheya okwa malengekania w’ekihugho omw’ikolha ekya Paulo abugha kino: “Mulendere n’amenge okwa bandu abath’ikirirye . . . Imwathoka erisubirya ndeke obuli mundu.”—Abanya Kolosai 4:5, 6.

^ enu. 9 Esindi mbindulha sye Biblia siri mw’emilhondo eya Yoane 7:53–8:11 eyithabya omwa Masako w’erimbere-mbere we Biblia. Abandi babirisoma emilhondo eyi neryo ibabugha bathi omundu oyuthawithe kibi yuwanga tswera oyuwabirisingira. Aliwe emighambo eya Nyamuhanga aha Abaisraeli muyabugha yithi: “Omundu amabanika akaghotsera n’omukali oyuhikibwe, neryo ababiri bosi basyaholha.”—Eryibuka Ebihano 22:22.