Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwerikumi 2016

Kanganaya Erikirirya Lyawu Omwa Milhaghe ya Yehova

Kanganaya Erikirirya Lyawu Omwa Milhaghe ya Yehova

“Erikirirya . . . n’irigha kwenene emyatsi eyo thuthe lhangira.”EBR. 11:1.

ESYONYIMBO: 54, 125

1. Thutholere ithwalhangira thuthi erikirirya ly’Ekikrisitayo?

ERIKIRIRYA ly’Ekikrisitayo ni mubere mubuyanga. Abandu bosi sibawithegho. (2 Tes. 3:2) Aliriryo, Yehova abiriha obuli mughuma w’okwa baramya biwe “olhulengo lhw’erikirirya.” (Abar. 12:3; Gal. 5:22) Abosi abawithe omubere oyu batholere ibasimwa kutsibu.

2, 3. (a) Ni mighisa yahi eyikathokekana busana n’omundu eribya n’erikirirya? (b) Ni bibulyo byahi ebya thukendi kaniako?

2 Thatha wethu w’elhubulha akayilethako abandu erilhabira omu Mughalha Wiwe. Omundu eribya n’erikirirya omu Yesu, likaleka ikyathokekana erighanyirwa ebibi. Neryo ekyo ikyaleka iniabya n’amaha w’erisyabya omwa bughuma bwa kera na kera Nyamuhanga. (Yn. 6:44, 65; Abar. 6:23) Thune thwathakolha ekyangaleka ithwatholere omughisa mungaha n’oyu? Ithwe ng’abakolha-nabi, ekithutholere lhwa n’olhuholho. (Esy. 103:10) Aliriryo Yehova mwathulhangira mw’ebibuya. Omwa lhukogho lhwiwe, mwakyungulha emithima yethu eriowa engulhu yuwene. Neryo muthwatsuka erikangania erikirirya omu Yesu ithune n’amaha w’erisyabana engebe y’erikotha.Soma 1 Yoane 4:9, 10.

 3 Aliwe ibbwa erikirirya niki? Mbwino likasubulira okw’iminya lisa emighisa eyo Nyamuhanga athuwithire? Kandi ekikulhu, thutholere ithwakangania erikirirya lyethu omu nzira syahi?

‘IKIRIRAYA OMWA MUTHIMA WAWU’

4. Soborera ekikaleka erikirirya iryabya isikwama kyaminya buyira.

4 Erikirirya si ry’erikwama kya minya ekighendererwa kya Nyamuhanga lisa. Ni kaghalha k’amaaka manene akakasukuma omundu erikolha erikwamana n’erisonda lya Nyamuhanga. Erikirirya omwa nzira ya Nyamuhanga y’omulhamu kikaleka omw’ikirirya iniabwira abandi b’okwa ngulhu yuwene. Omukwenda Paulo mwasoborera athi: ‘Wamakangya omo buno bwawu ngoku Yesu ni Mukama, kandi wam’ikirirya omwa muthima wawu ko Nyamuhanga amulhubukaya oko baholi, iwalhamibwa. Kusangwa omundu am’ikirirya omwa muthima busana n’erithungananibwa na Nyamuhanga, kandi akathulhagho omo buno inialhamibwa.’Abar. 10:9, 10; 2 Kor. 4:13.

5. Busana naki erikirirya ni ly’omughaso, kandi thwanga kolhaki eribya irinaghumire? Iha eky’erileberyako.

5 Omo kwenene, ithwe erisyabana engebe omwa kihugho kihya-kihya kya Nyamuhanga kiseghemere okw’ibya n’erikirirya n’erilhangira thuthi likabya irinaghumire. Ekiyithawa ky’erilhangira thuthi erikirirya lyethu likabya irine ndeke liri ng’ekirimwa ku kikanayithagha amaghetse. Erithendibya ng’ebimole by’omwa duka, ekirimwa ikyo kikayithagha amaghetse erithoka erikulha. Ekirimwa kik’uma kyamabulha amaghetse kutse ikyakulha ndeke kyamabya ikine mubana amaghetse. Ekirimwa ekinalhue kyuwene kyam’imwa amaghetse, ikikendiuma. N’erikirirya lyethu kwa line lithya. Irikendiuma lyamaghalhaghandibwa. (Lk. 22:32; Ebr. 3:12) Aliwe thwamatsomana ndeke erikirirya lyethu, irikendibya irineho n’erilholha embere ‘erikulha,’ neryo ithwabya “abakalire omw’ikirirya.”2 Tes. 1:3; Tito 2:2.

E BIBLIA NGOKU YIKASOBORERA ERIKIRIRYA

6. Ni nzira syahi ibiri esikakolesibawa omwa Abaebrania 11:1 erisoborera erikirirya?

6 Erisoborera lye Biblia okw’ikirirya likabanika omwa Abaebrania 11:1. (Soma.) Erikirirya lihambire kutsibu okwa bindu bibiri ebya thuthe lhangira: (1) “Emyatsi eya thukahira kw’amaha”—eki mwangangabya imwamuli eby’omwa buthuku bw’embere ebyabirilhaghanisibwa aliwe isibiri byabya, ng’erihwaho ly’omughulhu mubi ono n’eryasa ly’ekihugho kihya-kihya. (2) “Emyatsi eyo thuthe lholhako.” Hano, ekinywe ky’Ekigiriki ekikahindulhawa mwa ‘eriligha kwenene,’ kikamanyisaya “obwema obulhangirikire” obukakanganaya ngoku ekithelhangirawa kineho kwenene, ng’eribyaho lya Yehova Nyamuhanga, Yesu Kristo, abamalaika, n’emibiiri y’Obwami bw’elhubulha. (Ebr. 11:3) Thukakanganaya thuthi ngoku erikirirya lyethu lineho kandi ngoku thwikirirye omo myatsi eyithelholhawako kutse eyithelhangirawa eyikanibweko omwa Kinywe kya Nyamuhanga? Omwa binywe n’omwa mikolere yethu—thuthe thakolha ekyo erikirirya lyethu irikendibya isiri lhughirirene.

7. Eky’erileberyako kya Noa kikwathuwathikaya kithi eriyitheghererya nga kikamanyisayaki eribya n’erikirirya? (Lebaya ekisasani ekiri okw’itsuka.)

7 Abaebrania 11:7 hakakanaya okw’ikirirya lya Noa oyo enyuma w’erihanwa ‘na Nyamuhanga busana n’emyatsi eyithe lholhawako, mwakenga Nyamuhanga, neryo amakokothya obwatho busana n’erilhamya ekithunga kiwe.’ Noa mwakangania erikirirya liwe omw’ihimba obwathu bunene kutsibu. Ahathe erithika-thika, abataka biwe bangabya imubamubulya ekikaleka iniahimba ekindu kingaha n’eki nga niki. Noa mwanayihunira kutse eribabwira athi ekyo sikibahambireko? Eyihi nahake! Erikirirya liwe mulyaleka iniathulira buthubaha n’eribwira abandu b’omwa buthuku bwiwe okw’itswera lya Nyamuhanga eryabya irinemwasa. Noa angabya iniabya  iniane mubwira abandu ngendo nyingyi ebinywe byenyine-nyine ebya Yehova amubwira bino: “Namayisoha eribugha abandu bosi; kusangwa ekihugho kyabiryusulha n’omwagha busana nabo . . . Ngaletha erighunga ly’amaghetse okwa kihugho, eriherya ebyosi ebikahumulha ebiri n’engebe omw’isi wabyo. Obuli kindu ekiri omwa kihugho kyasyaholha.” Kandi ahathe erithika-thika, Noa angabya imwasoborera abandu enzira nguma nyisa y’erilhamiramu, iniane musubirira omwa kihano kya Nyamuhanga kino: “Wasyingira omwa bwathu.” Neryo kwesi Noa mwakangania erikirirya, omw’ibya “muthuli w’erithunganene.”Enz. 6:13, 17, 18; 2 Pet. 2:5.

8. Nibyahi ebya mukwenda Yakobo asondolhawa n’omulimu abuyirire erisoborera ebihambire okw’ikirirya ly’okwenene?

8 Ebaruha ya Yakobo yangabya iyandikawa buthuku buke omukwenda Paulo alisondwerwe n’omulimu erihandika ebikasoborera erikirirya. Nga Paulo, Yakobo mwasoborera ngoku erikirirya ly’Abakrisitayo sikwama kya ligha buyira; aliwe ngoku likalhangirika omwa mikolere. Yakobo mwahandika athya: “Wunganganaye erikirirya lyawu erithawithe mibiiri, naghe ngendi kukangya erikirirya lyaghe omwa mibiiri yaghe.” (Yak. 2:18) Yakobo akalholha embere erikangania embaghane eyilhangirikire ahakathi-kathi k’erikwama ky’ikirirya buyira n’erikangania erikirirya.  Esyombinga sin’ikirirye ngoku Nyamuhanga aneho, aliwe sisiwithe erikirirya ery’okwenene. Aliwe, busana n’obuthayira erikirirya, sikalhangira sithi sikahakanisaya eribererera ly’ebighendererwa bya Nyamuhanga. (Yak. 2:19, 20) Mbaghane n’ekyo, Yakobo akabya akakania okwa mulhume wakera, akabulhaya athi: “Omughulhu Abrahamu thatha wethu ahera mughalha wiwe Isaka okwa kiherero, mwathathungananibwa omo mibiiri yiwe kwehi? Mulebaye ngoku erikirirya molyakolha omo mibiiri yiwe, kandi erikirirya liwe molyahikana omwa mibiiri yiwe.” Neryo erikangania ngoku erikirirya likakanganibawa omwa mibiiri, Yakobo ak’ongerako athi: “Kusangwa ngoku omubiri owathemo ekirimu aholire, ko liri lithya, n’erikirirya litheko mibiiri liholire.”Yak. 2:21-23, 26.

9, 10. Omukwenda Yoane akathuwathikaya athi eriyitheghererya omughaso w’erikangania erikirirya?

9 Ihamabirilhaba emyaka eyilhabire omu 30, omukwenda Yoane mwahandika ekitabu kiwe ky’Enjiri n’esyobaruha isathu. Mwanalighirana n’ebya bandi bahandiki be Biblia babya ibarisondolhwa erihandika bakasoborera buuli erikirirya ly’okwenene? Kwilhaba abandi bahandiki bosi be Biblia, Yoane akakolesaya kutsibu ekinywe ky’Ekigiriki ekikanahindulhawa mwa “erikirirya” kutse “erikangania erikirirya.”

10 Ng’eky’erileberyako, Yoane mwasoborera athi: “Oyukikiriraya Omughalha awithe engebe y’erikotha; nikwa oyuthekenga Omughalha siendisyalholha oko ngebe, nikwa erihithana lya Nyamuhanga limwikereko kera na kera.” (Yn. 3:36) Erikirirya ly’Ekikrisitayo mwamuli erikangania erikenga ebihano bya Yesu. Ngendo nyingyi, Yoane mwasuba omwa binywe bya Yesu ebikakanganaya ngoku erikangania erikirirya si ky’erikolha kiro kighuma.Yn. 3:16; 6:29, 40; 11:25, 26; 14:1, 12.

11. Thwanga kangania thuthi ku thukasima eribya ithwabiriminya ekwenene?

11 Ka thutholere ithwasima Yehova eribya imwakolesya omulimu wiwe abuyirire erithubisulira ekwenene n’erithuthokesya eribya n’erikirirya omwa ngulhu yuwene! (Soma Luka 10:21.) Isithwalhuha eriha Yehova y’ewasingya busana n’erithuthunda okw’iyo erilhabira omu Mughalha wiwe, “Oyukathuletha okw’ikirirya n’Oyukabererayalyo.” (Ebr. 12:2) Erikangania ku thukasima olhukogho olho, thutholere ithwalholha embere erighumya erikirirya lyethu omw’isaba n’erigha Ekinywe kya Nyamuhanga.Efe. 6:18; 1 Pet. 2:2.

Kanganaya erikirirya lyawu omw’ithulha engulhu wukabana akaghisa kosi-kosi (Lebaya enungu 12)

12. Thutholere ithwakangania erikirirya lyethu omu nzira syahi?

12 Thutholere ithwalholha embere erikangania erikirirya omwa milhaghe ya Yehova. Thutholere ithwakolha eki omwa mibere eyilhangirikire ndeke embere sy’abandi. Ng’eky’erileberyako, thukalholha embere erithulhughania Obwami bwa Nyamuhanga n’erisangira omwa mubiiri w’eriyira abigha. Kandi thukalholha embere erikolha “ebibuya okwa bandu bosi, kandi kwilhaba aho . . . okw’abo abali omwa kithunga ky’abikirirye.” (Gal. 6:10) Kandi thukahiraho akaghalha “erighabana n’omundu wakera n’emibiiri yiwe,” ithwayitheya okwa kyosi-kyosi ekyanga tsekya obunyakirimu bwethu.Kol. 3:5, 8-10.

ERIKIRIRYA OMU NYAMUHANGA NI KIGHUMA KY’OKWA BYA THUKATSUKIRAKO

13. ‘Erikirirya omu Nyamuhanga ni rikulhu lithi, kandi busana naki?

13 E Biblia yithi: “Ahathe erikirirya omundu siangathoka eritsemesya Nyamuhanga, kusangwa litholere oyukahika oku Nyamuhanga in’ikirirya ko Nyamuhanga aneho, kandi kw’akahemba abakamusonda-sonda.” (Ebr. 11:6) Ekinywe kya Nyamuhanga kikakanganaya ngoku ‘erikirirya omu Nyamuhanga’ ni kighuma ky’okwa bya thukatsukirako ekikayithaghisibawa okwa mundu wosi-wosi eribya n’erisighalha iniane Mukrisitayo w’okwenene. (Heb. 6:1) Abakrisitayo batholere ‘ibathomeka okw’ikirirya’ lyabu kw’eyindi mibere y’omughaso nuku bangathoka ‘eriyibika  omo lhwanzo lhwa Nyamuhanga.’Soma 2 Petero 1:5-7; Yuda 20, 21.

14, 15. Busana naki ni kikulhu eribya n’olhwanzo butsira erikirirya lisa?

14 Abahandika Amasako w’Ekigiriki mubakangania ndeke omughaso w’erikirirya omw’ikania kulyo ngendo nyingyi kutsibu. Sihali owundi mubere w’Ekikrisitayo owakakanibawako kutsibu ng’oyu. Mbwino eki kikamanyisaya kithi erikirirya wa mubere mukulhu kutsibu ow’Ekikristayo?

15 Omukwenda Paulo, abere akalinganisya erikirirya n’olhwanzo, mwahandika athi: “Nomo nangabya n’erikirirya lyosi erikathoka erilhusya ebithwa, nikwa isingwithe olhwanzo, inyiri busa.” (1 Kor. 13:2) Yesu mwakangania obukulhu bw’eribya n’olhwanzo busana na Nyamuhanga, akasubirya ekibulyo kino: “Ekihano kikulhu omwa mighambo ni kyahi?” (Mt. 22:35-40) Olhwanzo lhuli mw’emibere mibuyanga mingyi y’Ekikrisitayo, imwamuli n’erikirirya. E Biblia yikabugha yithi, “Olhwanzo, . . . omo myatsi yosi lhuk’ikiriraya.” Lhuk’ikiriraya omo myatsi eyo Nyamuhanga abiribugha omwa Kinywe kiwe ky’ekwenene.1 Kor. 13:4, 7.

16, 17. Erihambangana ery’erikirirya n’olhwanzo likanakanganibawa lithi omwa Masako, aliwe ibbwa ekikulhu ky’ekyahi, kandi busana naki?

16 Busana n’omughaso w’erikirirya n’olhwanzo, abahandiki b’Amasako w’Ekigiriki ibakahandika ebinywe ebi bya haghumerere, mughulhu mungyi bikanakwamangana omwa mulhondo mughuma w’ebinywe. Paulo mwabwira balikyabo athi bambale ‘erikirirya n’olhwanzo ng’obupa bw’ekikuba.’ (1 Tes. 5:8) Petero mwahandika athi: ‘Mukanza Yesu Kristo nomo muthethamulholhako, kandi mukamwikiriraya nomo muthethamulhangira.’ (1 Pet. 1:8) Yakobo mwabwira abahakabibwa balikyabo athi: ‘Nyamuhanga mwayisogha abera b’ekihugho eribya ng’abandu b’ebindu omw’ikirirya, abasyabana Obwami obo Nyamuhanga abirilhagha oko bakamwanza.’ (Yak. 2:5) Yoane mwahandika athi: ‘Neryo ekihano kiwe [ekya Nyamuhanga] kithi thwikiriraye erina ly’Omughalha wiwe Yesu Kristo, n’erianzana, ngoku Kristo athuhana.’1 Yn. 3:23.

17 Nomwakine indi erikirirya ni rikulhu, obuthuku obukasa sithwendi syasayithagha erithunga erikirirya omwa milhaghe ya Nyamuhanga ey’ekihugho kihya-kihya kundi yikendi syabya iyabiribererera. Aliwe ekiyithawa ky’eryongera eryanza Nyamuhanga n’abaliranwa bethu sikyendi syahwa. Neryo ky’ekyaleka Paulo iniahandika athi: “Neryo lino emyatsi isathu yineho, erikirirya, amaha, n’olhwanzo; nikwa olhwanzo lhulengire eyindi myatsi eyi.”1 Kor. 13:13.

YEHOVA AKATSUMULHA ERIKIRIRYA LYETHU

18, 19. Ni kindu kyahi ky’amani ekiriho lino busana n’erikangania erikirirya, kandi nindi yukaleka eki ikya thokekana?

18 Omwa buthuku bwethu buno, Abandu ba Yehova babirilholha embere erikangania erikirirya omwa Bwami bwa Nyamuhanga obune muthabalha. Eki kyabirilhwiriramu eparadiso y’obunyakirimu eyiri omwa kihugho kyosi eyiri mw’abandu abalhabire omu miliyoni munani. Ni mwanya owoswire mw’emikolere y’omulimu wa Nyamuhanga. (Gal. 5:22, 23) Eki ka ni kindu ky’amani ekikakanganaya erikirirya n’olhwanzo lhw’okwenene lhw’Ekikrisitayo!

19 Sihali omundu okwa kihugho oyuwangakolha eki. Nyamuhanga wethu yukaleka ikyabya. Omubiiri mubuyanga oyu anemulethera Yehova y’ekitsumbi, ‘ng’ekiminyikalho kera na kera, ekithendi syalhuaho.’ (Isa. 55:13) Omo kwenene, ni “lhusunzo lhwa Nyamuhanga” erilhamibwa “omwa nzira y’erikirirya.” (Efe. 2:8) Eparadiso yethu y’obunyakirimu yikendi lholha embere eriyongera n’erikanya erihika aho ekihugho kyosi kya sy’osulha mw’abandu abahikene, abathunganene, kandi abatsemire, busana n’eripipa erina lya Yehova kera na kera. Ka thulhole embere erikangania erikirirya lyethu omwa milhaghe ya Yehova!