Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakasathu 2016

Yehova Akasondolha Abandu Biwe Omwa Nzira ey’Engebe

Yehova Akasondolha Abandu Biwe Omwa Nzira ey’Engebe

“Enzira y’eyi, mughendere muyo.”—ISA. 30:21.

ESYONYIMBO: 65, 48

1, 2. (a) Ni binywe byahi ebyabirilhamya esyongebe sy’abandu? (Lebaya ekisasani ekiri okw’itsuka.) (b) Abandu ba Nyamuhanga bawithe busondoli bwahi obukatheghaya esyongebe syabu?

“IMANA, LEBAYA, HULIKIRIRA.” Ebinywe ebyo ngoku bine oko, byabirilhamya esyongebe sy’abandu bangyi. Kera, emyaka eyilhabire omu 100, ebinywe ebyo ibikabya okwa byapa okwa nzira y’etreyini eyabya yikalhaba omwa North America. Busana naki? Nuku esyomatoka isisyakyuruka okwa mikangathi y’etreyini okwa buthuku bwayo bw’erilhaba neryo sikatomerwa. Kwesi erighendera okwa busondoli kyabiritheya esyongebe sy’abandu.

2 Yehova iyo akakolha ekirengire erihanika ebyapa. Ali ng’oyuwimene embere sy’abandu biwe iyuwene-wene, inianemubakangirira eyiri engebe y’erikotha n’eribatheya okwa kabi. Kwilhabirirya, ali ng’omulisya oyukatheghaya esyombuli siwe omwa lhwanzo, erisighusa kw’omulenge w’erisondolha n’erihabulha, nuku sisiwe omwa kabi.—Soma Isaya 30:20, 21.

ERITSUKA KERA, YEHOVA AKASONDOLHA ABANDU BIWE

3. Abandu mub’ingira bathi omwa nzira y’olhuholho?

3 Eritsuka kera, Yehova abiribya inianemuha abandu biwe b’eby’erighenderako.  Ng’eky’erileberyako, omw’irima lye Edeni, Yehova mwaha obusondoli obulhangirikire obwanga lekire abandu ibabyaho kera na kera ibanatsemire. (Enz. 2:15-17) Adamu na Eva ku baghendera okwa busondoli obo sibangahikire okw’inuba n’eriholha isibakiwithe maha wosi-wosi. Aliwe omwakanya k’eribya mwowa, Eva mwaligha omulenge owabya ng’akalhua okwa nzoka. Adamu nayu mwahulikirira mukali wiwe, amaghendera okwa by’omundu ng’iyo. Abosi mubathaghendera okwa busondoli bwa Thatha wabu w’olhwanzo. Ekyo muky’ingirya abandu abosi omwa nzira y’olhuholho.

4. (a) Busana naki muhayithaghisya obusondoli buhya-buhya enyuma w’erighunga ly’amaghetse? (b) Emibere mihya-mihya eyabyaho muyaminyikalya yithi amalengekania wa Nyamuhanga?

4 Omwa buthuku bwa Noa, Nyamuhanga mwaha obusondoli obukakolhaya okwa mulhamu. Enyuma w’Erighunga ly’Amaghetse, Yehova mwahira h’ekihano ekikathanga omusasi. Akihirirahoki? Akihiraho busana n’emibere mihya-mihya eyabya iyamabyaho. Yehova abya iniakayalighira abandu erirya enyama. Busana n’ekyo, mubahebwa eby’erighenderako, nga kino: “Simusyerya enyama eyithalhuire mw’omusasi, kusangwa gho ngebe yayo.” (Enz. 9:1-4) Emibere mihya-mihya eyi muyaminyikalya ndeke-ndeke amalengekania agho Nyamuhanga awithe okwa ngebe, kundi ya mwinyeyo. Iyo ng’Omuhangiki kandi ng’Oyukaha engebe, awithe ehamuli y’erihira h’ebilhaghiro ebihambire okwa ngebe. Ng’eky’erileberyako, mwahira h’ekilhaghiro athi omundu isy’itha owundi. Engebe n’omusasi ni bindu ebibuyirire embere sya Nyamuhanga, neryo akendi syatswera owosi-wosi oyuwanga bikolesya nabi.—Enz. 9:5, 6.

5. Thukendikania okuki, kandi busana naki?

5 Thulebaye eby’erileberyako bike ngoku Nyamuhanga alholha embere eriha abandu b’obusondoli habw’emyaka mingyi. Eki kikendi ghumya erithwamu lyethu ery’erikwama obusondoli bwa Yehova obukendi thukolya omwa kihugho kihya-kihya.

EKIHANDA KIHYA-KIHYA, N’OBUSONDOLI BUHYA-BUHYA

6. Busana naki Abaisraeli babya batholere ibowa emighambo eyo Nyamuhanga abaha erilhabira omu Musa, kandi babya batholere ibalhangirayo bathi?

6 Omwa biro bya Musa, muhayithagha obusondoli obuhambire okwa mibere y’esyongeso eyitholere, n’emiramirye eyitholere. Busana naki? Kandi habya ihamathasyabya emibere mihya-mihya. Ahabw’emyaka eyilhabire omu 200, Abaisraeli babya ibane e Misiri, ekihugho ekyabya mw’eriramya abaholi, erikolesya esyosanamu, n’eyindi mirwa eyithetsemesaya Nyamuhanga. Abandu ba Nyamuhanga babere balhua omwa bukobe bwe Misiri, mubabya ibatholere erihebwa obundi busondoli. Kundi hathya babya isibakiri bakobe, aliwe ini kihanda ekyabirihebwa obwiranda ekikasondolhawa n’Emighambo ya Nyamuhanga. Kikanasoborerawa indi ekinywe “omughambo” eky’Ekihebrania kinahambene n’ekindi kinywe ekyangana manyisya “erisondolha, erihabulha, kutse erikangirirya.” Emighambo ya Musa yabya ng’olhuhimbo olhukatheghaya Abaisraeli okwa mibere mibi n’okwa syongangirirya esitsandire esy’ebindi bihanda. Abaisraeli banabya bamowa Nyamuhanga, ibakathunga emighisa yiwe. Ibakabya bamaghana erimwowa, imukalhwiririra ebitsibu.—Soma Eryibuka Ebihano 28:1, 2, 15.

7. (a) Soborera eyindi nzumwa eyaleka Yehova iniaha Abaisraeli b’obusondoli. (b) Emighambo yabya yithi ng’omulemberi okwa Baisraeli?

7 Hane n’ekindi ekyaleka obusondoli ibwayithaghisibwa. Emighambo yabya yik’imanira ekindu kikulhu ekyabya ikikendi syabya omw’isonda lya Yehova. Nakyo lyabya iry’eryasa lya Masiya, Yesu Kristo. Emighambo muyaleka Abaisraeli ibaminya ndeke-ndeke ngoku sibahikene. N’ekindi muyaleka  ibaminya ngoku bakayithagha embanulho, ekihongwa ekihikene ekyanga ghunzireho ekibi. (Gal. 3:19; Ebr. 10:1-10) Kandi emighambo muyatheya olhubutho olho Masiya angasiriremu n’erileka iniaminyererwa akahika. Neryo kwesi, emighambo muyakolha “ng’omulemberi” oyukakolhaya oku Kristo.—Gal. 3:23, 24.

8. Busana naki thutholere ithwaligha erisondolhwa n’emisingyi y’Emighambo ya Musa?

8 Nethu ng’Abakristayo, thwangana ghasirwa omwa busondoli obuli omwa Mighambo eyahebawa Abaisraeli. Thuthi? Omughulhu thukasomayo, ithwangan’imana hake, ithwalengekania okwa kyaleka Omughambo oyo iniahebwa. Nomwakine indi sithuli omw’isi sy’emighambo eyo, emingyi yangana thusondolha ndeke omwa ngebe n’omw’iramya Yehova, Nyamuhanga wethu oyubuyirire. Alighira ebihano ebyo erihandikwa omwa Biblia nuku thwangabighirako, emisingyi eyirimu iyathusondolha, n’erithuwathikya eriminya ngoku ithwe ng’Abakristayo thuwithe obusondoli obulengire. Thahulikirira ekya Yesu abugha: ‘Mwabiryowa ngoku kyabughawa kithi, Susyesingira. Nikwa ingye ngababwira nyithi obuli mundu oyukasamalira omukali n’engumbu nyibi, iniamabirisingira nayu omwa muthima wiwe.’ Kwesi, eriyihighulha okwa busingiri busa sikirighunza, thutholere ithwayihighulha n’okwa lhukumbu-kumbu lhw’eby’obusingiri.—Mt. 5:27, 28.

9. Ni yindi mibere yahi eyaleka ihabya ekiyithawa ky’erithasyathunga obundi busondoli erilhua oku Nyamuhanga?

9 Eryasa lya Yesu nga Masiya mulyaleka ihathasyayithagha obundi busondoli erilhua oku Nyamuhanga n’erithasyabisulha ndeke ekighendererwa kya Yehova. Eki kyabya kithya kundi muhathasyabya eyindi mibere mihya-mihya. Omwa mwaka owa 33 E.K., Yehova mwabya isyakikolangana n’ekihanda ky’Abaisraeli, amayisogha Ekithunga ky’Ekikristayo.

OBUSONDOLI OKWA KIHANDA KIHYA-KIHYA EKY’OBUNYAKIRIMU

10. Busana naki Abakristayo mubahebwa ebihano bihya-bihya, kandi ibyo byabya bithi bya mbaghane okwa by’Abaisraeli?

10 Omwa kighonye ky’erimbere, abandu ba Nyamuhanga abasa omwa Kikristayo mubahebwa obundi busondoli buhya-buhya okwa miramirye n’eby’esyongeso. Abaghombe ba Nyamuhanga aba, ibo babya ibamingira omwa ndaghane nyihya-nyihya. Emighambo ya Musa muyahebwa ekihanda kighuma kisa—eky’Abaisraeli b’omubiri. Aliwe, e Israeli ey’obunyakirimu iyo yangabere mw’abandu erilhua omwa bihanda muthina-muthina. Omwa kwenene, ‘Nyamuhanga syawithe kasolholho, nikwa omwa buli kihanda omundu oyuk’ubaha Nyamuhanga n’erikolha ebithunganene akalighawa nayu.’ (Emib. 10:34, 35) Abaisraeli b’omubiri babya bakasondolhwa n’Emighambo ya Musa eyabya yisakire oko bisayi by’amabwe. Aliwe okwa Israeli y’Obunyakirimu, “emighambo ya Kristo” kutsibu-tsibu yabya yiseghemere okwa misingyi eyisakire okwa mithima. “Emighambo ya Kristo” yabya ini y’erighenderwako n’erighasira Abakristayo abosi ahosi-hosi aha bangabya ibali.—Gal. 6:2.

11. Ni bindu bibiri byahi omwa ngebe y’Omukristayo ebikahambawako omwa “mighambo ya Kristo”?

11 E Israeli y’obunyakirimu yabya ini y’erighasirwa kutsibu omwa busondoli bwa Nyamuhanga erilhabira omu Mughalha wiwe. Yesu abere athali atsukisya endaghane nyihya-nyihya, mwahiraho ebihano bibiri ebikulhu-bikulhu. Ekighuma kyabya kihambire okwa mubiiri w’erithulira. Ekindi ikihambire okwa mibere y’abakwamire Yesu kandi ngoku bangakolongana n’abaramya balikyabu. Obusondoli obu bwahebawa Abakrisitayo abosi; neryo kwesi buhambire okwa baramya b’ekwenene abosi munabwire, mbulha bawithe maha w’elhubulha kutse aw’okwa kihugho.

12. Ni kyahi ekyabya kihyaka omwa mubiiri w’erithulira?

 12 Thalengekania okwa mubiiri w’erithulha engulhu yuwene owa Yesu aha abigha biwe. Omwa bighonye by’enyuma okw’aho, abandu b’ebindi bihanda ibak’angirirawa bakasa omwa Israeli erikolera Yehova. (1 Bam. 8:41-43) Ekyo kyabya Yesu isyali aha ekihano ekiri omu Matayo 28:19, 20. (Soma.) Yesu mwababwira athi ‘baghende’ okwa bihanda byosi. Okwa Pentekote 33 E.K., mukyatsuka erilhangirika ngoku Yehova abirihiraho endegheka nyihya-nyihya ey’erithulhughania engulhu omwa kihugho kyosi. Omulimu abuyirire mwaha abandu 120 ab’ekithunga kihya-kihya b’amaaka aw’eribugha emibughe muthina-muthina erikania n’Abayuda n’abandi ababinduka eribya Bayuda. (Emib. 2:4-11) Enyuma w’aho, mubahikya engulhu n’okwa Basamaria. Kandi, omo mwaka wa 36 E.K., engulhu muyahika n’okwa Banya Bihanda. Omubiiri w’erithulira ow’atsuka okwa mbaghara buyira y’Abayuda mwalhandaghana erihika okwa bandu bangyi kutsibu.

13, 14. (a) “Ekihano kihya-kihya” kya Yesu, mwamuliki? (b) Eky’erileberyako kya Yesu kikathweghesayaki?

13 Thuthalebyanu ngoku thwanga thwalha abaramya balikyethu. Yesu mwahiraho “ekihano kihya-kihya.” (Soma Yoane 13:34, 35.) Ekihano ekyo sikirisubulira okwa lhwanzo olhwa buli kiro, aliwe kikayithagha iwabya iwunayitheghikire n’eritsama engebe yethu busana na mulikyethu. Ekyo sikyabya omwa mighambo ya Musa.—Mt. 22:39; 1 Yn. 3:16.

14 Yesu mwahira h’eky’erileberyako ekyuwene omw’eki. Mwanza abigha biwe ahathe eriyikukumirira. Olhwanzo olho lhw’olhwanaleka Yesu iniabya inianayitheghekire eriholera abigha biwe. Kandi abya anzire abigha biwe ibabya n’omuthima ng’oyo, nethu imwathune. Busana n’eritsomana balikyethu Abakrisitayo, ithwangana ligha erikolha ekyanga thulethera n’obulhumi, kutse nibya n’eriholha.—1 Tes. 2:8.

OBUSONDOLI OMWA OBUTHUKU BUNO N’OBUKASA

15, 16. Thuli omwa mibereki mihya-mihya, kandi Nyamuhanga akathusondolha athi?

15 Kwilhabirirya eritsuka aho “omughombe oyutheleghulha n’ow’amenge” akathahirirwaho, Yesu abiribya inianemuha abandu biwe b’akalyo k’obunyakirimu okwa ndambi eyitholere. (Mt. 24:45-47) Ebyalya ebi mwamuli n’obusondoli obukahebawa busana n’esyombinduka esikabyaho.

16 Thuli omwa biro ebya Biblia yikahulha mwa “biro by’enyuma-nyuma,” kandi n’ahambere aha, thunalindirire obulighe bunene obuthe bwathabya na kera. (2 Tim. 3:1; Mk. 13:19) Kandi n’ekindi, Sitani n’esyombinga siwe babirighuswa okwa kihugho ko hano, ekindu ekyabirileka okwa kihugho ikwabya malighe mangyi. (Erib. 12:9, 12) Kandi thwabirihebwa olhumimbi lhw’erithulhughania engulhu okwa lhulengo olhuthe lhwathabya, erihika okwa bihanda byosi!

17, 18. Thutholere ithwalhangira thuthi obusondoli obwa thukahebawa?

17 Thutholere ithwakolesya ndeke eby’erikolesya omw’ithulira ebya thukathunga omwa kithunga kya Yehova. Wunanzire erikolha ekyo? Wukanabya iwunayitheghekire erighendera okwa busondoli obwa thukathunga okwa mihindano obukakanganaya ngoku thwanga bikolesya ndeke? Wukanalhangira obo ini busondoli obukalhua oku Nyamuhanga?

18 Kwenene, thwamabya b’eribana emighisa ya Nyamuhanga, thutholere ithwakwama-kwamania ndeke obusondoli obwosi obwa thukahebawa omwa kithunga. Eribya bowa munabwire kikendi syathuwathikya erighendera okwa busondoli omwa mughulhu “w’obulighe bunene,” obukendi syaghunzaho omulembe mubi wa Sitani ono. (Mt. 24:21) Enyuma w’aho, thukendi syayithagha obusondoli buhya-buhya omwa kihugho kihya-kihya ekithemu obuthebya bwa Sitani.

Omwa kihugho Paradiso, ebitabu bikendi syasanzulhwa erithuha obusondoli obw’erighenderako (Lebaya enungu 19, 20)

19, 20. Ni bitabu byahi ebikendi syasanzulhwa, kandi bikendi syawathikya bithi?

 19 Ekihanda kye Israeli mukyahebwa obusondoli buhya-buhya erilhabira omu Musa, n’enyuma w’aho, ekithunga ky’Ekikristayo nakyo kyamahebwa “emighambo ya Kristo.” Kuthya nethu, e Biblia yikabugha yithi ebitabu bikendi syasanzulhwa, erithuha obusondoli bw’erighenderako omwa kihugho kihya-kihya. (Soma Eribisulirwa 20:12.) Ebitabu ebi obundi bikendi syabyamu ebya Yehova akanza abandu bakole okwa buthuku obo. Abandu abosi, imune n’abakendi syalhubuka, ibakendi syaminya erisonda lya Nyamuhanga bamabisoma n’erib’igha. Ebitabu ebyo bikendi syathuwathikya eryongera eriminya amalengekania wa Yehova. Kundi abakendi syabya omwa Paradiso bakendi syongera eriyitheghererya Ekinywe kya Nyamuhanga n’obusondoli obukendi syabya omwa bitabu bihya-bihya, bakendi syakolangana n’abandi omo lhwanzo, n’omw’isikya. (Isa. 26:9) Thalengekania okwa ndegheka y’erikangirirya eyikendisyabya omwisi sy’obusondoli bw’Omwami Yesu Kristo!

20 Engebe y’erikotha niy’abakaghendera okwa “bisakire omwa bitabu.” Abakendi syakangania obuthaleghulha okw’irengesibwa ly’erighunzerera, Yehova akendi syahandika amena wabu omwa “kitabu ky’engebe,” isyanga simurwa. Omughisa oyo angana syabya wethu! Neryo THWAM’IMANA hake omughulhu thukasoma Ekinywa kya Nyamuhanga, THUKALEBYA ndeke nuku thuyitheghereraye nga kikathuhambako kithi, N’ERIHULIKIRIRA obusondoli bwa Nyamuhanga munabwire, ithukendi lindirira erisyasabuka obulighe bunene, n’eritsemera erisyabyaho kera na kera ithunemwigha oku Nyamuhanga wethu ow’amenge wosi, Yehova.—Omu. 3:11; Abar. 11:33.