Ghenda ahali omwatsi

Ghenda ahali ebirimo

Obutseme​—Omubere Owathukathunga Erilhua oku Nyamuhanga

Obutseme​—Omubere Owathukathunga Erilhua oku Nyamuhanga

ABANDU banzire ibatsema. Aliwe thuli omwa biro by’enyuma-nyuma, n’obuli mundu awithe ebitsibu ‘ebikalire.’ (2 Timoteo 3:1) Abandi bandu bakabulha kw’obutseme busana n’erikolhwa nabi, erilhwalha, eriherya emibiiri, kutse eriholerwa omwanze. Abandi bakahwa kw’etseme yabu kundi muhakabya ekindu ekiryabalethera eriyilhalikirira kutse obulighe. Nibya n’abaramya ba Yehova banganahwa amani neryo lyolho-lyolho obutseme bwabu ibwahwa. Eki kyamabya ikyabirikubyako, wangathasya suba-subania wuthi obutseme bwawu?

Erisubirya okwa kibulyo ekyo, thutholere ithwatsuka eriminya obutseme bw’okwenene nga bo bwahi n’abandi nga babiribya bathi ibane n’obutseme bwabu nibya n’omwa bitsibu. Neryo, thukendi lhangira ngoku thwangabya ithune n’obutseme n’eryongerabo.

OBUTSEME NIKI?

Eritsema sikirimanyisaya eritsanga-tsanga. Thalengekania oku kino: Oyuthamire angana yiseka-sekako. Aliwe bukabya bwamuhwako, syali thasyaseka-seka kandi anganaminya kw’akinawithe bitsibu bingyi. Eritsanga-tsanga liwe likabya ililhue ly’akathambi kake kandi isi butseme bw’okwenene.​—Emisyo 14:13.

Okwa lhundi lhuhandi, obutseme n’iyowa linene erikabya omwa muthima thukathunga ekindu kirebe ekyuwene kutse thukalindirirakyo. Eribya n’obutseme kikamanyisaya eribya ithunatsemire omwa mibere yosi mbulha yuwene kutse mibi. (1 Abanya Tesalonika 1:6) Ekindu kirebe kyangana thuhithania aliwe ithwabya ithune n’obutseme. Ng’eky’erileberyako, abakwenda mubaswiribwa busana n’erithulha engulhu eyihambire oku Yesu. Aliwe, “mubalhua omw’ibughiro ibanemutsema bathi Nyamuhanga akaghanzabo ng’abatholere erihemulhwa busana n’erina lya Yesu.” (Emibiri 5:41) Sibatsema busana n’eriswiribwa aliwe busana n’eribya bathaleghulha oku Nyamuhanga.

Obutseme si kindu ekya thukabuthawa nakyo kutse ekikayiretha. Busana naki? Kundi obutseme bw’okwenene ni kitsweka ky’okwa mikolere y’omulimu abuyirire wa Nyamuhanga. Omulimu wa Nyamuhanga akathuwathikaya eribya “bandu bahya-bahya,” imwamuli n’eribya n’obutseme. (Abanya Efeso 4:24; Abanya Galatia 5:22) Kandi thwamabya n’obutseme, ikikendi thwolhobera erighumira ebitsibu byethu.

EBY’ERILEBERYAKO EBYA THWANZIRE ERIGHERERERYA

Yehova aby’anzire okwa kihugho ikwakoleka ebindu bibuya, butsira ebindu bibi ebya thukalhangira munabwire. Aliwe nomwakine indi abandu bakakolha ebithuwene, Yehova syali athabulha kw’obutseme. E Biblia yithi: “Amaaka n’obutseme biri aho wiwe.” (1 Emyatsi y’Emigulu 16:27) Eryongera okw’ekyo, ebibuya ebya baghombe biwe bakakolha bikamutsemesaya.​—Emisyo 27:11.

Thukagherereraya, kutse erilengaho eribya nga Yehova omw’ithendihwa kw’obutseme emyatsi nomuyanga ghana eribya ngoku thulhue thukalengekania. Omwakanya k’erihangya-hangya, thukahira amalengekania w’okwa bindu ebyuwene ebya thuwithe lino n’eriyibombeka  thukalindirira ebyuwene kutsibu omwa buthuku obukasa. *​—Lebaya omwatsi ahikwa.

Omwa Biblia muli eby’erileberyako bingyi eby’abandu ababya ibane n’obutseme bwabu nomubana ebitsibu bingyi. Abrahamu mwabya iniane n’obutseme n’omughulhu engebe yiwe yabya omwa kabi kandi n’omughulhu abandi bandu bamulethera ebitsibu. (Enzuko 12:10-20; 14:8-16; 16:4, 5; 20:1-18; 21:8, 9) Eki mwakikolha athi? Omw’ilengekania okwa maha wiwe w’erisyabya omwa kihugho kihya-kihya omw’isi sy’erithabalha lya Masiya. (Enzuko 22:15-18; Abaebrania 11:10) Yesu mwabugha athi: “Thatha wenyu Abrahamu mwatsema erilholha okwa kiro kyaghe.” (Yoane 8:56) Thukagherereraya Abrahamu thukabera erilengekania okwa butseme obwa thukendi syabana omwa buthuku obukasa.​—Abanya Roma 8:21.

Paulo na Sila nabu babya bawithe erikirirya erighumire kandi mubabya ibane n’obutseme nomubanabana ebitsibu bingyi. Ng’eky’erileberyako, babere babiriswiribwa kutsibu n’erihirwa omwa ngomo, “babya bakasaba n’eriimba esyonyimbo sy’eripipa Nyamuhanga.” (Emibiri 16:23-25) Mubathoka erighuma kundi mubalholha embere erilengekania okwa milhaghe ya Nyamuhanga ey’obuthuku obukasa. Kandi eriminya ngoku eriaghalhwa lyabu lyabya busana n’erikwama Kristo mukyabalethera etseme. Thukagherereraya Paulo na Sila thuk’ibuka ebibuya ebikalhua omw’ikolera Nyamuhanga buthaleghulha.​—Abanya Filipi 1:12-14.

Namunabwire, hane eby’erileberyako bingyi eby’abalikyethu ababiribya ibane n’obutseme bwabu n’omwa bitsibu. Ng’eky’erileberyako, omwa Kwerikuminakughuma 2013, Akanyabungu ak’amani akakahulhawamu Haiyan mukatsandalikania amanyumba w’Abema ba Yehova abalhabire omu 1,000 e Philippines. George, oyuwabya awithe enyumba eyatsanda omwa tawuni ye Tacloban, akabugha athi: “Baghalha bethu banatsemire nomubanabana ebitsibu byosi ebi. Sinanga thoka erisoborera obutseme obwa thuwithe.” Thwamalengekania okwa bya Yehova abirithukolera n’erimusima, ithukendibya ithunatsemire nibya n’omughulhu thuwithe ebitsibu ebikalire. Ni bindi byahi ebya Yehova akathuha ebikaleka ithwabya n’obutseme?

EBIKALEKA ITHWATSEMA

Enzumwa ngulhu eyikaleka ithwabya n’obutseme bw’obughuma bwethu na Yehova. Thunasi Omwami w’Obuhangwa bwosi. Ni Thatha wethu, Nyamuhanga wethu, kandi Munywani wethu!​—Esyonyimbo 71:17, 18.

Kandi thukasima eribya Yehova iniabirithuha engebe n’amaaka w’eritsemerayo. (Omugambuli 3:12, 13) Kundi abirithuletha okw’iyo, thwanganaminya eby’akathusunzira kandi thunasi ngoku thwanga kolesya esyongebe syethu. (Abanya Kolosai 1:9, 10) Aliwe, abandu bangyi sibasi ekighendererwa ky’engebe. Erikangania ndeke embaghane eyi, Paulo mwahandika athi: “Emyatsi eyo ameso athe alhangira, n’amathwe athyowa, n’emyatsi eyo omuthima athe aghanirya, eyo ni myatsi eyo Nyamuhanga abirithegheka busana n’abandu abamwanzire. Nikwa Nyamuhanga abirithubisulirayo omwa mulimu wiwe.” (1 Abanya Korinto 2:9, 10) Eriyitheghererya erisonda lya Nyamuhanga n’ekighendererwa kiwe kikathuha obutseme.

Yehova abirithukolera n’ebilhabire okw’aho. Abirileka ikyathokekana ebibi byethu erighanyirwa. (1 Yoane 2:12) Akathuha amaha w’engebe omwa kihugho kihya-kihya, ekiri hakuhi. (Abanya Roma 12:12) Nibya na lino, Yehova akathuha abanywani abo thwangana ramya nabu haghuma. (Esyonyimbo 133:1) Kandi akathutheghaya oku Sitani n’esyombinga siwe. (Esyonyimbo 91:11) Thwamabera erilengekania okwa bibuya ebya Yehova abirithukolera ebi, ithukendibya n’obutseme bunene.​—Abanya Filipi 4:4.

NGOKU WANG’ONGERA OBUTSEME

Omukristayo oyunatsemire angana thasyongera etseme yiwe? Yesu mwabugha athi: “Nabiribabwira emyatsi eyi, obutseme bwaghe bubye omwa mithima yenyu, kandi obutseme bwenyu buhikane.” (Yoane 15:11) Eki kikamanyisaya kithi  obutseme bwethu bwanganabya ibunemwongera. Thwangana linganisya obutseme bwethu n’omuliro. Thwamanza omuliro ake kutsibu, thutholere ithwongera mw’esyongwe. Wibuke: Omulimu abuyirire akathuwathikaya eribana obutseme. Neryo thwamanza obutseme bwongere, thutholere ithwabya thukasaba Nyamuhanga y’omulimu abuyirire. Kandi thutholere ithwabya thukaghanirya okwa biri omwa Biblia, kundi yasondolibawa n’omulimu abuyirire.​—Esyonyimbo 1:1, 2; Luka 11:13.

Ekindi kindu ekyang’ongera obutseme bwethu ly’eriyihwerya omwa bindu ebikatsemesaya Yehova. (Esyonyimbo 35:27; 112:1) Busana naki? E Biblia yikabugha yithi muthwahangikwa ‘eryubaha Nyamuhanga n’eritheya ebihano biwe, kusangwa ebi byo bitholere ndeke busana n’obuli mundu.’ (Omugambuli 12:13) Thukolirwe ithuli b’erikolha erisonda lya Nyamuhanga. Neryo kwesi thwamakolera Yehova, ithukendi tsemera ndeke engebe. *​—Lebaya omwatsi ahikwa.

EMIGHASO Y’OBUTSEME

Thukabya thukongera obutseme bwethu, thukabana mighaso mingyi. Ng’eky’erileberyako, Yehova iniakendi thutsemera thwamalholha embere erimukolera ithunatsemire nomuthwangabya omwa bitsibu. (Eryibuka Ebihano 16:15; 1 Abanya Tesalonika 5:16-18) Kandi, kundi thuwithe obutseme bw’okwenene, isithwendi lengekania thuthi eribya n’ebindu bingyi by’ekinyamubiri kya kikulhu omwa ngebe. Aliwe, ithukendi lengaho eriyihayo kutsibu busana n’Obwami bwa Nyamuhanga. (Matayo 13:44) Kandi ithukendibya thukalhangira ebibuya ebikalhua omw’ikolera Yehova ya bingyi, obutseme bwethu ibukendyongera, ithwayowa ndeke, kandi ithwaleka abandi ibongera eritsema.​—Emibiri 20:35; Abanya Filipi 1:3-5.

Kandi, eryongera eribya n’etseme, ni ongera eribya n’amaghalha awuwene. E Biblia yikabugha yithi: “Omuthima w’eritsema ni busaki buwene.” (Emisyo 17:22) Oyukasekulhaya oyuwasoma eby’amaghalha okwa Yunivasite ye Nebraska omwa Amerika mwabugha ebikalighirana ne Biblia. Akabugha athi: “Wamabya iwunatsemire n’eritsemera engebe eya wulimo lino, iwanganasyabya iwune n’amaghalha awuwene omwa buthuku bw’embere.”

Neryo nomwakine indi thuli omwa mighulhu y’emilyambo, thwanganabya n’obutseme bw’okwenene thukabana omulimu abuyirire omw’isaba, eriyeghesya, n’erighanirya okwa Kinywe kya Nyamuhanga. Kandi obutseme bwethu ibukendyongera thwamalengekania okwa bindu bingyi ebya Yehova akathuha lino, thwamagherererya erikirirya ly’abandi, n’erilengaho erikolha erisonda lya Nyamuhanga. Neryo ithwangana yilhangirira ebiri omwa Esyonyimbo 64:10, ahakabugha hathi: “Abandu bathunganene basyatsemera ebyo Mwami Mukulhu abirikolha.”

^ enu. 10 Owundi mwatsi owakakanaya okwa “mikolere eyikalhua oko omulimu” akendisyakania okwa mubere w’eriyibombeka kutse erighumisirizya.

^ enu. 20 Eriminya esindi nzira sy’eryongera obutseme, lebaya akasanduko “ Esindi Nzira sy’Eryongera Obutseme.”