Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwakabiri 2017

Ebibulyo Erilhua omwa Basomi

Ebibulyo Erilhua omwa Basomi

Omukwenda Paulo mwahandika athi Yehova “syendi syaligha mukalengwako kwilhaba amaaka wenyu.” (1 Abanya Korinto 10:13) Mbwino eki kikamanyisaya kithi Yehova akasangwa alhangirira haali ebya thwanga thoka eriyiyinirya neryo iniathusombolera ebitholere ibyathuhikako?

Ekyo ku kyabya ini kwenene, thalengekania ngoku kyanga hambire okwa ngebe yethu. Ng’eky’erileberyako, omwana wa mughalha wethu mughuma mwayitha. Thatha wiwe mwabya omwa bulighe bunene. Mwabulha Yehova ng’abya iniabirisangwa alhangiririra haali n’erithwamu athi iyo na mukali wiwe bangana thoka erighumira ekitsibu eki. Omwa kihugho kibi kino, abangyi omw’ithwe bakahikawako ebitsibu ebikalha-kalire. Neryo ibbwa thunatholere ithwalengekania thuthi Yehova yukasondolha obuli kindu ekikabya omwa ngebe yethu?

Thukalebya ndeke erisako erya 1 Abanya Korinto 10:13, thukendi lhangira ngoku e Biblia siyiri sighika eky’eribugha indi Yehova akasangwa aminya ebya thwanga ghumira neryo iniathwamu ebitholere erithuhikako. Busana naki ithwabugha thuthya? Thulebaye esyonzumwa ini.

Ey’erimbere, Yehova mwaha abandu b’obughabe bw’eriyithwiramu, erisombolha eky’erikolha. Akanza ithwayithwiramu ithwibene-bene. (Eryibuka Ebihano 30:19, 20; Yosua 24:15) Thwamanza erithwamu ebikatsemesaya Yehova, ithukendi musaba obusondoli. (Emisyo 16:9) Aliwe thwamathwamu nabi, sithwangabya thuthethabana ebitsibu. (Abanya Galatia 6:7) Neryo Yehova amathwamu nga ni bitsibu byahi ebya thutholere ithwalhabamu, mbwino ithwanamabya n’obughabe bw’eriyithwiramu?

Eyakabiri, Yehova syalithukakiraya okwa bikabya kitsumbukirania. (Omugambuli 9:12) Omundu anganabana e aksidenti eyikalire kundi alhue omwa mwanya owathatholere okwa ndambi eyithatholere. Yesu mwanakania okwa bandu 18 abaholha busana n’eritherera kw’enyumba. Mwakangania ndeke ngoku Nyamuhanga siyo waleka ibaholha. (Luka 13:1-5) Si kya menge erilengekania thuthi e aksidenti eyikabya, Nyamuhanga akasangwa athwamu oyukendi holha n’oyuthendi holha.

Eyakasathu, obuli mughuma w’okw’ithwe atholere inialholha embere iniane muthaleghulha oku Yehova. Sitani mwabugha athi abaghombe ba Yehova bakamukolera busana n’eby’akabakolera. Sitani mwabugha athi sithwangabya bathaleghulha oku Yehova thwamathunga ebitsibu. (Yobu 1:9-11; 2:4; Eribisulirwa 12:10) Kwenene Yehova amathutheya okwa bitsibu birebe, Sitani iniakendibya ng’ahikire.

Eyakani, sibugha ambu Yehova akathwamu eriminya obuli kindu ekikendi thubyako omwa buthuku bw’embere. Aliwe ni kwenene, Yehova angana minya ebikendi syabya embere amanza. (Isaya 46:10) Aliwe e Biblia yikakanganaya ngoku akanathwamu erithendi minya ebindi ebikendibya omwa buthuku bw’embere. (Enzuko 18:20, 21; 22:12) Yehova awithe olhwanzo kandi athunganene, neryo syalyanza eringirira obughabe bwethu bw’erithwamu okwa bya thwanzire.Eryibuka Ebihano 32:4; 2 Abanya Korinto 3:17.

Neryo ibbwa kwesi Paulo amanyisayaki akabugha athi, Yehova “syendi syaligha mukalengwako kwilhaba amaaka wenyu”? Omwa bya Paulo abugha, iyo abya iniakakanaya okwa kya Yehova anga kolha ithune omwa bitsibu, butsira bithe byasa. * (Lebaya omwatsi ahikwa.) Thwamabya ithunayikethere Yehova, akendi thuwathikya omwa bitsibu byosi-byosi ebya thukabana. (Esyonyimbo 55:22) Neryo ibbwanu, thulebaye nzumwa ibiri esyaleka Paulo iniakibugha.

Enzumwa y’erimbere yiri indi ebitsibu ebikathuhikako byan’ebikahika okwa bandi. Obuthabali bwa Sitani buno bwamabya ibwathunemo, ebitsibu isithubibalire, nibya n’ebikalire kutsibu. Aliwe thwamayikethera Yehova, ithwangana ghumira  ebitsibu ebyo, ithwasighalha ithune bathaleghulha. (1 Petero 5:8, 9) Omwa 1 Abanya Korinto sura 10, Paulo abya iniabiritsuka erikania okwa bitsibu ebyo Baisraeli balhabamu omwa mbwarara. (1 Abanya Korinto 10:6-11) Abanga yikethere Yehova ba banga bighumire. Aliwe abandi Baisraeli mubathwa emighambo ya Nyamuhanga. Mubalemwa erisighalha ibane bathaleghulha oku Yehova kundi mubathamuyikethera.

Enzumwa eyakabiri yiri yithi “Nyamuhanga syalireghulha.” Ekyo kikamanyisayaki? Thukabya thukalhangira eritsuka kera ngoku Yehova abiriwathikya buthaleghulha abaghombe biwe, thukalhangira Yehova iniakakanganaya ndeke eritsomana liwe “oko bamwanzire n’abakabika ebihano biwe.” (Eryibuka Ebihano 7:9) Thukalhangira ndeke-ndeke ngoku Yehova akaberereraya eriyilhagha liwe mughulhu wosi. (Yosua 23:14) Ekya thwasi ndeke-ndeke, (1) Yehova syanga ligha thukahika kw’ebitsibu ebya thuthe thwanga thoka erighumira, kandi (2) akathuhiriraho “enzira y’eribalha.”

Yehova “akathukiranaya omo malighe wethu wosi”

Abakayikethera Yehova akabahiriraho athi “enzira y’eribalha”? Ni kwenene angananza inialhusyaho ekitsibu. Aliwe wibuke ngoku Paulo mwabugha athi Yehova “omw’irengwako eryo, asyabaha amaaka w’eriyiyinia.” Neryo enzira y’eribalha eya Yehova anga thuha iyanganabya iry’erithuha amaaka w’erighuma nuku thusighale ithune bathaleghulha. Thuthalebya eki ng’akakikolha athi.

  • Yehova “akathukiranaya omo malighe wethu wosi.” (2 Abanya Korinto 1:3, 4) Angana thuha erithekana omwa malengekania n’omwa muthima erilhabira omwa Biblia, omulimu wiwe abuyirire, n’erilhabira omwa mughombe oyuthaleghulha.Matayo 24:45; Yoane 14:16, Abanya Roma 15:4.

  • Yehova angana kolesya omulimu wiwe erithusondolha. (Yoane 14:26) Omulimu abuyirire angana thwibukya ebya thukasoma omwa Biblia nuku thwanga kolha erithwamu eritholere.

  • Yehova angana kolesya abamalaika biwe erithuwathikya.Abaebrania 1:14.

  • Angana thuwathikya erilhabira omwa balikyethu omwa kithunga. Ibangana thughumya omwa bya bakabugha n’erithukolera.Abanya Kolosai 4:11.

Erighunzerera, ni byahi ebya thwam’igha omwa bya Paulo abugha omwa 1 Abanya Korinto 10:13? Yehova siyukathwamu nga ni bitsibu byahi ebitholere ibyathuhikako. Aliwe thunasi ngoku thwamamuyikethera, ithukendi ghumira ekitsibu kyosi-kyosi. Thunasi ndeke-ndeke ngoku Yehova akendibya inianemuthuhiriraho enzira y’eribaliramu nuku thubye ithune bathaleghulha okw’iyo.

^ enu. 9 Ekinywe ky’Ekigiriki ekyahindulhawa mwa “mukalengwako” kikanathasyamanyisaya “mukabana ebitsibu.”