Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomwenda 2016

 OMWATSI W’OKWA KIDIPA | ERIHUMULIKANIBWA WANGALIBANA HAYI?

Ithwe Bosi Thukayithagha Erihumulikanibwa

Ithwe Bosi Thukayithagha Erihumulikanibwa

Wangan’ibuka wukayithinira iwukine mwana? Obundi muwahuthalha okwa byalha kutse okwa lirwe. Wangan’ibuka mama wawu nga mwakuhumulikania athi? Obundi mwoya ekironda ekyo neryo amakiboha. Muwalira, aliwe ebinywe biwe ebikahumulikanaya n’erikukungutsirirya, mubyaleka iwayowa ndeke. Okwa buthuku obo, ow’erikuhumulikania iniakalhua iniabanika.

Aliwe thukabya thune mukulha, engebe yikongera erikalha. Ebitsibu bikongera, ikyakalha n’eribana erihumulikanibwa. Kandi ibbwa eky’obulighe ebitsibu by’abandu bakulhu, sibirihwa omw’ithakukungutsirirya. Thalengekania okwa by’erileberyako bike bino.

  • Wune wathabana ekitsibu ky’eribingwa okwa mubiiri? Julian akabugha athi omughulhu abingawa okwa mubiiri, mukyamusisirya amayibulha-bulha kutsibu. Mwayibulya bino, ‘Ngendi wathikya indi ab’eka yaghe?’ ‘Enyuma w’erikolha kutsibu habw’emyaka mingyi, busana naki abangakolera ibayowa nga singwithe mughaso?’

  • Obundi wabiribbunika omuthima busana n’obutheke bwawu erisambukalha. Raquel akabugha athi: “Emyezi 18 eyihwere, mwira waghe abere anyisighania kitsumbukirania, munabya omwa bulighe. Omuthima waghe mwabya ng’abirisathika kabiri. Obulhumi bwabya omwa mubiri n’omwa muthima. Mukyanyitha obuba.”

  • Obundi wulhwere obulhwere obukalire, obukabya nga sibwanga lhama. Obundi endambi yikanahika iwayowa nga Yobu oyuwayiririrako athi: “Omuthima waghe akayisogha erinighwa, n’eriyisogha olhuholho.” (Yobu 7:15) Obundi nawu wukayowa nga Luis, omulhume oyuli omo myaka ye 80 oyuwabugha athi, “Hakanayira ingayowa iningaya holha.”

  • Kutse obundi wukayithagha erihumulikanibwa kundi waholerwe ow’okwiwe. Robert akabugha athi: “Omughulhu mughalha waghe akwira omwa aksidenti ye ndege, erimbere munathaligha indi abirikwa. Enyuma waho munabana obulhumi obuli ng’obwa Biblia yikalinganisaya ng’omuyali owakatsimitha omuthima.”—Luka 2:35.

Robert, Luis, Raquel, na Julian mubabana erihumulikanibwa n’omwa mibere y’obulighe eyo. Mubabana Oyukabahumulikanaya oyulengire—nayu isi wundi, ini Nyamuhanga Omuthoki w’Ebyosi. Akahumulikanaya athi? Mbwino nawu anemwendi kuha erihumulikania erya wukayithagha?