Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomwenda 2016

 OMWATSI W’OKWA KIDIPA | ERIHUMULIKANIBWA WANGALIBANA HAYI?

Erihumulikanibwa Omwa Buthuku bw’Ebitsibu

Erihumulikanibwa Omwa Buthuku bw’Ebitsibu

Ebitsibu bikasa omwa nzira nyingyi. Sithwanga thoka erikania okwa buli mulingo w’ekitsibu omo mwatsi ono, aliwe thuthalebya ndeke eby’erileberyako bbini ebiri omwa mwatsi owali okw’itsuka. Thalhangira ngoku abawithe ebitsibu ebithe by’omuthina mughuma babiribana erihumulikanibwa ly’okwenene erilhua oku Nyamuhanga.

ERIBYA BUTSIRA MUBIIRI

“Mun’igha eriligha omubiiri wosi-wosi, thwamaleka n’eribya thukaghulha ebithe yithaghisibawa kutsibu.”—Jonathan

Seth * ak’ibuka bino: “Ingye na mukali waghe muthwaherya emibiiri yethu omwa buthuku bughumerera. Habw’emyaka ibiri, abahughu bethu ibabakaleka ithwabya ithuneho omw’ithuha obuwathikya buke-buke haghuma n’ehibiiri ehya thwabya thukabana. Busana n’ekyo, mukali waghe, Priscilla, mwaya omwa bitunturo, naghe munayowa muwabbule.

“Muthwaghuma thuthi? Priscilla iniakabera eriyibukya ebinywe bya Yesu ebiri omu Matayo 6:34. Yesu mwabugha athi isithwayihira omwa maghaniryo w’eby’omungya, kundi obuli kiro kiwithe amaghaniryo wakyo. Kandi n’emisabe yiwe eyikalhua okwa muthima muyamuhererya akaghalha k’erithendi lhuhirira. Naghe, Esyonyimbo 55:22 ihakanyihumulikanaya. Ng’omuhandiki w’esyonyimbo, munaghusira Yehova y’amalighe waghe, kandi munalhangira ngoku mwanyiwathikya. Nomwakine indi hathya nabiribana omubiiri, thukalhangira thuthi thukabya omwa ngebe nyolho omw’ighendera okw’ihano lya Yesu eriri omu Matayo 6:20-22. Kandi ekikulhu, thwabiriyithunda hakuhi na Nyamuhanga kandi nethu thwabiribya bughuma.”

Jonathan akabugha athi, “Munabulha nga thukendibya thuthi omwa buthuku obukasa omughulhu ebbizinesi yethu yawa. Busana n’ekikagho ekyabyaho, ebya thwabya ithwabirikolha ahabw’emyaka 20 mubyabya ini buyira. Ingye na mukali waghe muthwatsuka eribya thukatokera esyosente. Isithwanga thasyakolesya n’ekadi yethu erighulha ekindu, ithukasagha thuthi ekithongole ekikabweka kyangana ghanayo.

“Aliriryo Ekinywe kya Nyamuhanga n’omulimu wiwe mubya thuwathikya erithwamu ndeke. Mun’igha eriligha omubiiri wosi-wosi, thwamaleka n’eribya thukaghulha ebithe yithaghisibawa kutsibu. Kandi ithwe ng’Abema ba Yehova, obundi buwathikya mubwalhua omwa balikyethu. Mubaleka ithutha yilhangira mw’ababbule n’erithuwathikya omughulhu emibere yabya yikaghana.”

OBUTHEKE BWAMASAMBUKALHA

Raquel ak’ibuka bino, “Omughulhu mwira waghe anyisighanaya kitsumbukirania, munahithana n’eriyowa nabi. Kandi munabya omwa bulighe bunene kutsibu. Aliwe munayithunda hakuhi na Nyamuhanga, nayu mwanyihumulikania. Obuholho bwa Nyamuhanga mubwatheya omuthima waghe ingakania nayu buli kiro omwa misabe. Mwabya ng’oyukalhunga omuthima waghe owasathikire.

“Kandi hakiri bathami busana n’Ekinywe kiwe, e Biblia, kundi mukyanyiwathikya erisingura erihithana erya nabyamu. Munaghanirya kutsibu okwa binywe by’omukwenda Paulo bino: ‘Siwuleke ekibi kikakukinda, nikwa wukinde ekibi omwa kibuya.’”—Abanya Roma 12:21.

“Hane obuthuku bw’erikwama kyalhangira ekindu ‘ng’ekithere.’ . . . Hathya ngakolha ebindu ebikanyirethera etseme.”—Raquel

“Omunywani waghe mwanyiwathikya erilhangira ngoku nanga lholha embere. Mwanyikangania Omugambuli 3:6 n’erinyibwira omwa bwolho-bwolho athi hane obuthuku bw’erikwama kyalhangira ekindu ‘ng’ekithere.’ Erihabulha eryo lyabya likalire, aliwe ekyo kyanabya ingayithagha. Hathya ngakolha ebindu ebikanyirethera etseme.”

Elizabeth akabugha athi, “Wukayithagha obuwathikya bunene obutheke bwawu bwamasambukalha. Ingawithe omunywani oyuwanyiha obuwathikya ng’obo obuli kiro. Mwalira naghe, amanyihumulikania, kandi mwaleka ingayowa inganzirwe omwakanya k’eriyowa ng’ekinuwa. Ngaligha ndeke-ndeke ngoku Yehova mwamukolesya erilhamya ebironda by’omuthima waghe.”

OMWA BUTHUKU BW’OBULHWERE KUTSE OBW’ERIKEKELHUHA

“Ngabya nabirisaba Nyamuhanga, ngayowa omulimu wiwe iniamanyiha akaghalha.”—Luis

Luis, omughuma w’okwa babugha ebiri okw’itsuka ly’emyatsi eno, alhwalire okwa muthima, kandi mirundi ibiri iniane musindi holha. Hathya obuli kiro ngaghunza esyosaha 16 ingane kw’ejeneretha. Akabugha athi, “Ngabya ikungane musaba Yehova. Kandi ngabya nabirisaba  Nyamuhanga, ngayowa omulimu wiwe iniamanyiha akaghalha. Erisaba likaleka ingaghuma kundi ngamuyikethere kandi nganasi ngoku anyitsomene.”

Petra oyuli omwa myaka eya 80 akabugha athi: “Ni bindu bingyi ebya nganzire erikolha, aliwe sinangathoka. Ngayowa nabi ingalhangira ku ngane muhwa akaghalha. Ngayowa ingalhuhire kandi emibatsi ya yindekireho. Nganabera erilengekania okwa mibere Yesu asabiramu Thatha wiwe athi kyamathokekana amulhusaye kw’ekitsibu kirebe.” Aliwe Yehova mwaghumya Yesu, naghe akanyighumaya. Erisaba ni bubalya bwaghe obwa buli kiro. Ngabya nabirikania na Nyamuhanga, ingayowa ndeke.”—Matayo 26:39.

Julian, oyuwabirilyambibwa n’obulhwere obw’erimutsingamya ahabw’emyaka nga 30, nayu kw’akanayowa athya. Akabugha athi, “Ingye mundu nabya ingikalha omwa kithumbi ky’ekitsumbi, hathya indi okwa kaggali k’abalema. Aliwe engebe yaghe ni y’omughaso kundi ng’akolesayayo erikolera abandi. Erihithya lyangana kehya okwa bulhumi, kandi Yehova akaberereraya omulhaghe wiwe w’erithughumya omwa buthuku bw’ebitsibu. Ng’omukwenda Paulo, naghe ahathe erithika-thika nangana bugha indi: ‘Omwa byosi ngwithe amaaka busana n’oyukamba amaaka.’”—Abanya Filipi 4:13.

OMWA BUTHUKU BW’ERIHOLERWA

Antonio ak’ibuka, “Omughulhu thatha aholha busana n’eritomerwa omwa matoka, erimbere mundakirigha. Munabulha ng’amathakwiraki, omundu oyuwabya okwa musike w’enguda. Aliwe habya isihali ekya nangakolha. Muhalhaba biro bithano iniane omwa tsuli-tsuli, neryo amaholha. Ininga yikakiraya okw’irira namabya ahali mama, aliwe iningahutana n’ekiriro omughulhu indi ingyuwene. Iningabera eriyibulya indi ‘Busana naki? Busana naki?’

“Omwa biro by’obulighe obukalire ebyo, iningabera erisaba Yehova indi anyiwathikaye ng’athoke erikakirya eriyowa lyaghe n’erimusaba obuholho. Neryo munaghenda ingathekana. Mun’ibuka ngoku e Biblia yikasoborera yithi ‘ebindu ebikawa kitsumbukirania’ byanganabya okwa wosi-wosi. Kundi Nyamuhanga syangabiha, nabiriligha ngoku ngendi syalholha oku thatha waghe akalhubuka.”—Omugambuli 9:11; Yoane 11:25; Tito 1:2.

“Nomwakine indi omwana wethu mwakwira omwa ndege, thukinibukire itseme thwabyamu ithukine nayu.”—Robert

Robert, oyulyakanibawako enyuma, nayu ayo wanamalengekania awithe. Akabugha athi: “Erilhabira omw’isaba Yehova, ingye na mukali waghe, Maribel, muthwathekana omwa birengekanio ngoku kikanibweko omwa Abanya Filipi 4:6, 7. Obuholho bw’omwa muthima obu mubwaleka ithwathoka erikania n’ab’amakuru okwa maha wethu w’erilhubuka. Nomwakine indi omwana wethu mwakwira omwa ndege yikawa, ni bingyi ebyuwene ebya thukabya ithune mw’imubukako ebya thwabya thukakolha nayu. Thukalengaho eribya ithune mubirengekaniako.

“Abalikyethu Abema ba Yehova babere bathubwira bathi mubathulhangira okwa tivi ithune mukania okw’ikirirya lyethu, muthwababwira thuthi ahathe erithika-thika ekya wathikaya y’emisabe yabu mingyi busana nethu. Omo kwenene ngikirirye indi abya iyukathusighika erilhabira omwa myatsi mingyi eyikahumulikanaya eya babya bakathuthumira.”

Ngoku thwamabirilhangira omwa by’erileberyako ebi, Nyamuhanga angana humulikania abandu abakabana ebitsibu muthina-muthina omwa ngebe. Kandi ibbwa iwe? Nomuwangabana ebitsibu ebisosire bithi omwa ngebe, hane erihumulikania eryanga kuwathikya omughulhu wuli omwa bitsibu ebikalire. * Neryo busana naki iwuthayikethera Yehova erikuwathikya? Iyo ni “Nyamuhanga w’erikirania lyosi.”—2 Abanya Korinto 1:3.

^ enu. 5 Awandi mena omwa mwatsi ono abirihindulhwa.

^ enu. 23 Wamabya iwunanzire eribana obuwathikya bw’eriyithunda hakuhi na Nyamuhanga nuku akuhumulikanaye, kisi hika okwa Bema ba Yehova abali omwa kitsweka ky’ewenyu, kutse handikira ekyaghanda ky’omuthahulha ekiri hakuhi nenyu.