Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwomusanju 2016

 OMWATSI W’OKWA KIDIPA | E BIBLIA—NGOKU YASABUKA

Ekyalekire e Biblia Iyasabuka

Ekyalekire e Biblia Iyasabuka

E Biblia eribya iyabirisabuka, ky’ekikaleka nawu iwabya iwangana somayo munabwire. Neryo wamabana embindulha eyuwene eye Biblia, iwukendisoma iwunayikethere ngoku ebya wukasoma byan’ebyabya omwa Masako w’erimbere. * Aliwe ni kyahi ekyalekire e Biblia iyabya iyikineho nomuhanabya ekitsibu ky’eribya iyangana lhunda, erihakanisyayo erikalire, n’eryanza erihengemya omwatsi owalimu, n’eribya iyangana sabuka omwa mibere y’embaghane yithya? Ekitabu ekyo ikyo ni kya mbaghane kithi okwa bindi?

Abanene abak’igha e Biblia babirilighirana n’ebya mukwenda Paulo abugha bino: “Amasako wosi Nyamuhanga yuwatheghekanayagho.” (2 Timoteo 3:16) Bakaligha bathi e Biblia yabirithoka erisabuka kundi iyo ni Kinywe kya Nyamuhanga kandi ngoku Nyamuhanga yuwabiritheyayo erihika namunabwire. Faizal, oyuli omwa mwatsi w’erimbere omwa myatsi eyikwamangene eno, mwathwamu eriyireberya ekyo nga nina kwenene omw’igha e Biblia. Eby’abana mubyamuswekya. Mwasanga esyongangirirya nyingyi esyoswire omwa madini mangyi isi siri omwa Biblia. Ekindi, mwatsema akaminya ekya Biblia yikabugha okwa kighendererwa ekyaleka Nyamuhanga iniahangika ekihugho.

Akabugha athi, “Hathya nabiriligha ngoku e Biblia eya ngali nayu ni kihembo erilhua oku Nyamuhanga. Nyamuhanga amabya iniangana hangika ekihugho n’ebyosi by’omwa kyanya, inangana bugha indi syawithe obuthoki bw’erithuha ekitabu n’erikitheya okw’ihwaho? Namakibugha iningendibya isingasi Nyamuhanga kw’awithe buthoki bunene—iyo ku ni Muthoka Byosi! Kandi naghe ningye ndi erighaya obuthoki bwa Nyamuhanga?”—Isaya 40:8.

^ enu. 3 Lebaya omwatsi, “Wanga Minya Wuthi Embindulha ye Biblia Eyuwene?” owali omwa Watchtower ey’Okwakathano 1, 2008.

“Hathya nabiriligha ngoku e Biblia eya ngali nayu ni kihembo erilhua oku Nyamuhanga”