Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Akaleberyo—ey’Erigha  |  Okwerikuminakughuma 2016

“Musikanaye Emithima”

“Musikanaye Emithima”

“Mwamabya muwithe ekinywe ky’erihana abandu [eribahira mw’amani], mubughekyo.”—EMIBIRI 13:15.

ESYONYIMBO: 121, 45

1, 2. Soborera ekikaleka erihira omwa bandi mw’amani iryabya ly’omughaso.

OMUSIKA w’emyaka 18 oyo thukendyahulha mwa Cristina, akabugha athi: “Ababuthi baghe sibali bathanyihira mw’amani, aliwe bakabera erinyitsweba. Kandi bakambwira ebikalhumaya omuthima. Bakabugha bathi indi ng’omwana, bathi ngali kitingirya, kandi nga tintimene. Ngabera eririra neryo ngathwamu erithendi kania nabu. Ngayowa isingwithe mughaso.” Engebe ka yangakalha hamathendibya erihirwa mw’amani!

2 Aliwe erikangania ngoku erihira omwa bandi mw’amani ni kindu kibuya, Rubén akabugha athi: “Nabya inamabirighunza myaka mingyi inganemuyowa nga ngali mundu oyuthawithe mughaso. Aliwe kiro kighuma nabya ingane omw’ithulira n’omusyakulhu w’ekithunga. Mwalhangira ekiro ekyo isingali ndeke. Nabere namusoborera eriyowa lyaghe, mwahulikirira ndeke iniabirinyikwira obulighe. Neryo mwanyibukya ebibuya ebyo nabya ngakolha. Kandi mwanyibukya n’ekya Yesu abugha—athi obuli mughuma w’okw’ithwe alengire ebiswiri kutse esyondegheya nyingyi. Ngabya inganemwibuka erisako eryo, kandi nahathya likinanyihumulikanaya. Ebinywe by’omusyakulhu oyo mubyanyisubya mw’amani.”—Mt. 10:31.

3. (a) Omukwenda Paulo mwabugha athiki okw’ihira omwa bandi mw’amani? (b) Thukendi kania okuki omwa mwatsi ono?

3 Kwesi isikyaswekaya e Biblia eribya iyikahira omuwatho okw’ibya  ithune muhira omwa bandi mw’amani. Omukwenda Paulo mwahandikira Abakristayo Abaebrania athi: “Balikyethu mutheghaye, sihabya mundu omo kathi-kathi kenyu ow’omuthima mubi n’ow’erithend’ikirirya, bikaleka akalhua oku Nyamuhanga oyuliho. Nikwa musikanaye emithima, . . . hakasyabya omundu omo kathi-kathi kenyu akathebibwa n’ebibi.” (Ebr. 3:12, 13) Wukaminya ngoku ekihano ky’erisikania emithima ni ky’omughaso wam’ibuka ngoku wayowa buholho wukabwirwa ekinywe ekikahumulikanaya. Neryo mulekenu thukanaye okwa bibulyo bino: Busana naki ni kikulhu erihira omwa bandi mw’amani? Thwang’ighaki okwa mibere Yehova, Yesu, na Paulo babya bakaghumya abandi? Kandi thwanga hira thuthi omwa bandi mw’amani?

ABANDU BAKAYITHAGHA ERIHIRWA MW’AMANI

4. Ni bahi abakayithagha erihiribwa mw’amani, aliwe busana naki munabwire omubere oyu akehire?

4 Ithwe bosi thukayithagha erihiribwa mw’amani. Eki kikabya, kutsibu-tsibu omughulhu thukine baana. Omweghesya, ya Timothy Evans akabugha athi, “Abaana. . . bakayithagha erihirwa mw’amani ngoku ebirimwa bikanayithagha amaghetse. Ekyo kikaleka omwana iniayowa ini w’omughaso kandi iniayowa iniakasimawa.” Aliwe thuli omwa mighulhu eyikalire. Abandu bayitsomene, olhwanzo lhukehire, kandi ni bake abakasikaya emithima y’abandi. (2 Tim. 3:1-5) Abandi babuthi sibali singaya abaana babu kundi nabu ababuthi babu sibabya bakabahira mw’amani nahake. Abakoli b’emibiiri bangyi sibalisimawa, neryo bakayineghenaya bathi okwa mibiiri kuli ekitsibu kinene eky’erithendihira omwa bandi mw’amani.

5. Erihira omwa bandi mw’omuhwa mwamuliki?

5 Erihira omwa bandi mw’amani mwamuli erisima omundu busana n’eky’akolire ndeke. Kandi ithwangana hira omwa bandi mw’amani omw’ibabwira ngoku banawithe emibere eyuwene kutse “omw’ihamirya ab’omuthima owasikerere.” (1 Tes. 5:14.) Ekinywe ky’Ekigiriki ekya bindulhawa mwa “erisikania emithima,” erithakithwalha ngoku kine, kikamanyisaya “erikokibwa eribya okwa lhuhandi lhw’omundu.” Thukabya thukakolha haghuma na baghalha bethu na bali bethu, thukabya ithuwithe akaghisa ak’erikania ekyanga hira omwa wundi mw’amani. (Soma Omugambuli 4:9, 10.) Thukanakolesaya obuthuku obutholere erikangania abandi ngoku thubanzire n’eribatsomana? Thuthe thwasubirya okwa kibulyo ekyo, thutholere ithwatsuka erilengekania okwa musyo ono: “Ekinywe omo mughulhu owene ni kibuya kingahi!”—Emi. 15:23.

6. Busana naki Sitani akanza iniathughunza amani? Iha eky’erileberyako.

6 Sitani anzire iniathughunza amani kundi anasi ngoku ekyo kyangana leka ithwatseka bunyakirimu n’omwa sindi nzira. Emisyo 24:10, NW hakabugha hathi, “Wamahwa amani omwa buthuku bw’ebitsibu, amaaka wawu iniakendi keha.” Sitani mwakolesya bitsibu bingyi murundi mughuma n’erihangirira Yobu, omulhume muthunganene nuku ahwe amani, aliwe ekithegho kiwe kibi ekyo mukyalemwa. (Yobu 2:3; 22:3; 27:5) Thwangana rwanisya emikolere ya Sitani omw’isikya emithima y’abali omw’eka yethu n’omwa kithunga. Eki ikikendi leka emiyi yethu n’ahathukahindanira iyabya myanya eya thukayowiramu ithuwithe etseme n’obutheya.

ABAHIRA OMWA BANDI MW’AMANI

7, 8. (a) Ni byahi ebikakanganaya ngoku Yehova akalhangira ini kikulhu erihira omwa bandi mw’amani? (b) Ababuthi batholere ibakolhaki omw’ikwama eky’erileberyako kya Yehova? (Lebaya ekisasani ekiri okw’itsuka.)

7 Yehova. Omuhandiki w’esyonyimbo mwabugha athi: “Omwami mukulhu ali hakuhi n’ab’emithima yibunangikire; akalhamaya abathawithe amaha.” (Esy. 34:18) Omughulhu Yeremia ubaha n’erihwa amani, Yehova mwaghumya omuminyereri muthaleghulha oyo.  (Yer. 1:6-10) Kandi thalengekania omuminyereri Danieli oyuwabya iniamabirikulha ngoku angabya imwasuba mw’amani omughulhu Nyamuhanga athuma malaika erisyamughumya. Omulaika oyo mwahulha Danieli mwa “mundu oyusimirwe kutsibu”! (Dan. 10:8, 11, 18, 19) Mbwino nawu siwanga ghumya wuthya abathuliri, abatemburi, n’abakekelhuhire abanemughenda bakahwa amani?

8 Nyamuhanga mwathalengekania athi kundi babirighunza emyaka-n’emyaka ibanemukolha na Mughalha wiwe Yesu, sihali ekyanga leka iniamusima n’erimughumya omughulhu abya okwa kihugho. Aliwe, mirundi ibiri Yesu mwowa Thatha wiwe akabughira elhubulha athi: “Oyu ni Mughalha waghe mwanze, namamutsemera.” (Mt. 3:17; 17:5) Omw’ekyo, Nyamuhanga mwabya iniamasima Yesu n’erimukakasya ngoku eby’akakolha bikasimawa. Eki kyangabya imukyahira omu Yesu mw’amani akowa ebinywe ebyo bya kabiri—okw’itsuka ly’omubiiri wiwe n’omwa mwaka wiwe w’erighunzerera okwa kihugho. Kandi Yehova mwathuma omulaika erisyaghumya Yesu iniane omwa bulighe bunene erigholho-gholho ly’ekiro aholha. (Lk. 22:43) Thwamabya ithuli babuthi, thugherereraye Yehova omw’ihira omwa baana bethu mw’omuhwa n’eribasima bakayira ekya bamakolha ndeke. Kandi thutholere ithwabawathikya bamabya ibanemubana ebikalenga okwa buthaleghulha bwabu okwa sukuru.

9. Thuk’ighaki okwa mibere Yesu abya akathwaliramu abakwenda biwe?

9 Yesu. Omw’igholho-gholho ly’ekiro Yesu atsukisaya omukonga w’eryibuka olhuholho lhwiwe, mwalhangira abakwenda biwe ibane mw’omubere w’emiyiheko. Omwa bwolho-bwolho, Yesu mwanabya ebisandu byabu, aliwe mubabya ibakinakuba obuhaka nga nindi oyuhebawe obukulhu omw’ibo; na Petero iniakayowa nga sihali ekyanga mulema. (Lk. 22:24, 33, 34) Nomubyanabya bithya, Yesu mwasima abigha biwe busana n’erimwamakirira omw’irengwako liwe. Mwabugha athi bakendi syakolha n’ebirengire ebiwe, kandi amabakakasya ngoku Nyamuhanga abanzire kutsibu. (Lk. 22:28; Yn. 14:12; 16:27) Ithwangana yibulya, ‘Mbwino naghe sinanga gherererya Yesu omw’ibya ingasima abaana baghe n’abandi okwa bya bakakolhako ndeke omwakanya k’erihanda omunwe okwa bya bakalemawamu?’

10, 11. Omukwenda Paulo mwalhangira athi ekiyithawa ky’erihimba abandi?

10 Omukwenda Paulo. Omwa syobaruha siwe, Paulo iniakakanaya ndeke okwa Bakristayo balikyabo. N’abandi abya iniabirikolha nabu habw’emyaka mingyi, neryo ahathe erithika-thika abya inianasi obulemwa bwabu, aliwe iniakakanaya okwa bubuya bwabu. Ng’eky’erileberyako, Paulo mwakania oku Timoteo ‘ng’omwana wiwe mwanze omw’isi w’Omukama,’ kandi athi ni mundu oyukatsomana ndeke abandi Bakristayo. (1 Kor. 4:17; Fil. 2:19, 20) Kandi mwabugha athi Tito abya mundu oyo babirilhangira ku ni w’omuhwa omo myatsi mingyi. (2 Kor. 8:22, 23) Timoteo na Tito ka bangabya imubayowa ndeke bakaminya amalengekania agho Paulo abawitheko!

11 Paulo na Barnaba mubatsama engebe bakasuba eyo bakolhawa nabi kutsibu. Ng’eky’erileberyako, nomwakine indi mubabana ery’endereribwa e Listra, mubasubayo nuku bayaghumaye erikirirya ly’abahyaka. (Emib. 14:19-22) Omwa Efeso, Paulo n’ababya nabu mubanabambirwa n’endeko y’abandu abahithene. Emibiri 20:1, 2 hathi: “Olhukanda olho lhwabere lhwabirihwa, Paulo mwabirikira abigha, neryo mwahanabo [eribahira mw’amani], abere abirilhaghabo, mwahongoka akaya e Makedonia. Neryo abere abilhaba omo bihugho ebyo, mwasikyabo emithima omo binywe bingyi, neryo mwahika omo kihugho ky’Abagiriki.” Kikalhangirika ngoku erighumya abandi kyabya okwa muthima wa Paulo.

 ERIHIRA OMWA BANDI MW’AMANI MUNABWIRE

12. Emihindano yethu yikawathikaya yithi omw’ireka ihabya erisikania emithima?

12 Ekighuma ky’okwa bikaleka Thatha wethu w’elhubulha iniathuhirira h’endegheka y’emihindano, ly’eribya okwa mihindano thukasikanaya emithima. (Soma Abaebrania 10:24, 25.) Ng’abigha ba Yesu ab’erimbere, nethu thukahindana haghuma erigha n’erisikibwa emithima. (1 Kor. 14:31) Cristina, oyulyakanibawako okw’itsuka ly’omwatsi ono, akabugha athi: “Ekikanyitsemesaya kutsibu okwa mihindano, lhw’olhwanzo n’erihirwa mw’amani erya ngabanayo. Hakanayira ingayowa isingawithe tseme ingahika okwa mihindano. Aliwe neryo bali bethu bakasa eya ngali, ibanyiwako, n’erimbwira bathi hathya ngalhangirika ndeke. Bakambwira bathi banyanzire kandi ngoku batsemire bakalhangira erikulha-kulhana lyaghe bunyakirimu. Ebinywe byabu bikanyihimba, neryo ingathasyayowa ndeke!” Ka kikatsemesaya ithwe bosi thukasangira “omw’isikania emithima”!—Abar. 1:11, 12.

13. Busana naki abamabirighunza mughulhu muuli omw’ikolera Yehova nabu bakayithagha erihiribwa mw’amani?

13 Nibya n’ababirikolera Nyamuhanga habw’obuthuku bunene, bakayithagha erihirwa mw’amani. Thalengekania oku Yosua. Abya iniabirikolera Nyamuhanga habw’emyaka mingyi. Aliwe, Yehova mwabwira Musa athi amusikaye omuthima, athi: “Wuhamule Yosua, usubaye omuthima wiwe; wumusikaye; kusangwa asyasoka embere sy’abandu aba, kandi asyahabo omwandu w’ekihugho ekyo wasyasamalira.” (Ebi. 3:27, 28) Yosua abya iniakayakolha omubiiri owalithohire ow’erisondolha Abaisraeli omw’ihamba Ekihugho Ekyalhaghanisibawa. Endambi yangahikire iniabana ebitsibu n’erisingwa omwa lhuhe. (Yos. 7:1-9) Kwesi kwenene Yosua aby’atholere erisikibwa omuthima n’erihirwa mw’amani! Nethu kwesi thutholere ithwaghumya abasyakulhu b’ekithunga, imwamuli n’abalebererya b’omuthimbo, abakakolha kutsibu eritheya ekihangulho kya Nyamuhanga. (Soma 1 Abanya Tesalonika 5:12, 13.) Omulebererya mughuma mwabugha athi, “Hakanayira balikyethu ibathuhandikira ehibaruha ehikakanganaya ku mubakasima olhubungo lhwethu. Ehibaruha ehi thukahibika, ithwabya thukasomahyo thukabana ekikathulhuhaya omwa muthima. Hikathuhimba kutsibu.”

Abaana bethu bakabya ndeke thwamabya thukabahira mw’amani (Lebaya enungu 14)

14. Ni kyahi ekikakanganaya ngoku erisima n’erisubya omwa bandi mw’amani bitholere thukabahabulha?

14 Abasyakulhu b’ekithunga n’ababuthi babirilhangira ngoku erisima abandi okwa bibuya ebya bakakolha n’eribahira mw’amani ku kikawathikaya omw’ireka omundu inialigha erihabulha lye Biblia. Paulo abere abirisima Abanya Korinto busana n’erighendera okw’ihabulha liwe, bangabya imubathunga omuhwa w’erikolha ekihikire. (2 Kor. 7:8-11) Andreas, oyuwithe abaana babiri akabugha athi: “Eribya iwunemuhira omwa  baana mw’amani kikaleka ibakulha bunyakirimu n’omw’iyowa. Wukathoka eribahabulha ndeke omw’ibya iwunemubahira mw’amani. Nomwakine indi abaana bethu bakabya ibanasi ekihikire, neryo erikolha ekihikire ekyo akabya mubere wabu busana n’eribera eribahira mw’amani.”

NGOKU WANGA HIRA OMWA BANDI MW’AMANI NDEKE

15. Ni kyahi ekya thwanga kolha erihira omwa bandi mw’amani?

15 Sima akaghalha n’emibere mibuya y’abalikyenyu. (2 Emy. 16:9; Yobu 1:8) Yehova na Yesu bakasima kutsibu akaghalha akathukahiraho erisighika eby’Obwami, nomuthwanga kolha bike busana n’emibere eya thwangabya ithulimu. (Soma Luka 21:1-4; 2 Abanya Korinto 8:12.) Ng’eky’erileberyako, abakulire abali omwa kithunga bakahira h’akaghalha kanene erithoka erihika okwa mihindano n’eriya omw’ithulira. Mbwino ekyo sikyanga leka thukabasima n’eribahira mw’amani?

16. Busana naki sithutholere thukayikukumirira okw’ihira omwa bandi mw’amani?

16 Isiwalhabaya akaghisa k’erighumya abandi. Thwamalhangira ekyanga yithagha erisima omundu, busana naki ithwayihunira? Thalengekania okwa kyabya omughulhu Paulo na Barnaba, babya e Antiokia eye Pisidia. Abakulhu b’enyumba y’erihindanamo mubababwira bathi: “Balikyethu, mwamabya muwithe ekinywe ky’erihana abandu [eribahira mw’amani], mubughekyo.” Neryo Paulo mwaha omukania owuwene. (Emib. 13:13-16, 42-44) Wamabya iwunawithe eky’eribugha erihira omwa wundi mw’amani, leka erikihunira. Amabya mubere wethu erihira omwa bandi mw’amani, nabu ibakendibya bakathuhira mw’amani.—Lk. 6:38.

17. Ni kyahi ekyanga thasyuwania ebinywe byethu by’erisima?

17 Sima erilhua okwa muthima kandi bugha ekikaleka. Eribwira abandi b’ebinywe ebikaghumaya n’erisima kikawathikaya, omwatsi ogho Yesu abwira Abakristayo be Tuatera akakanganaya ngoku eribugha ekikaleka likawathikaya na kwilhaba. (Soma Eribisulirwa 2:18, 19.) Thwamabya ithuli babuthi, ithwangana bwira abaana ekya thukasima okw’ikulha-kulhana lyabu ery’obunyakirimu. Ithwangana bwira mama oyukakulhaya abaana iyuwene ekya thukasima okwa mibere akalemberera mw’abaana nomw’ane omwa mibere eyikalire. Erisima ng’eryo iryangana wathikya kutsibu!

18, 19. Thwanga himba thuthi abakayithagha erihirwa mw’amani?

18 Obundi ithwe Yehova angana thendi thubwira buno-okwa-buno athi thuhire omwa abandi mw’amani ngoku abwira Musa athi ayaghumaye Yosua. Aliwe akatsema thukabugha ebikaghumaya balikyethu n’abandi bandu. (Emi. 19:17; Ebr. 12:12) Ng’eky’erileberyako, ithwangana bwira oyulyalhabaya omukania ngoku omwa mukania wiwe muthukabana obusondoli obwa thulhue thukayithagha kutse ngoku mwakathuwathikaya eriyitheghererya erisako. Mwali wethu mughuma mwahandikira oyuwasyalhabaya omukania omwa kithunga kyabu athi, “Nomwakine indi muthwakania bike, muwalhangira erilithoherwa eriri okwa muthima waghe, wamanyihumulikania. Nganza wuminye ngoku wabere wukakania omwa lhukeri wukalhabya omukania, n’erikania naghe enyuma w’aho, munayowa ini kihembo erilhua oku Yehova.”

19 Ithukendi bana ihane nzira nyingyi esya thwangahimbira mw’abandi bunyakirimu, thwamathwamu erighendera okw’ihabulha lya Paulo lino: “Musibikanaye, n’erihimbana ngoku mukanakolha.” (1 Tes. 5:11) Ithwe bosi ithukendi tsemesya Yehova thwamabya thukahimbangana obuli kiro.